སུའུ་ཏན་སྲིད་གཞུང་གིས་རྒྱལ་ཁབ་དེའི་མི་བྱེ་བ་གཉིས་དང་ས་ཡ་བརྒྱད་འབུམ་དགུ་ལ་མི་ཆོས་རོགས་སྐྱོབ་མཁོ་ཟེར།

ཚེས13ཉིན། སུའུ་ཏན་མི་ཆོས་རིང་ལུགས་རོགས་སྐྱོར་ཨུ་ཡོན་ལྷན་ཁང་གིས་རྒྱུན་མཐུད་ཀྱི་དྲག་ཆས་གདོང་ཐུག་གི་ཤུགས་རྐྱེན་ཐེབས་ནས། ད་ལོའི་ཟླ10པའི་བར། སུའུ་ཏན་དུ་མི་ཆོས་རིང་ལུགས་ཀྱི་རོགས་སྐྱོར་བྱེད་དགོས་པའི་མི་གྲངས་བྱེ་བ་གཉིས་དང་ས་ཡ་བརྒྱད་འབུམ་དགུའི་བར་ཇེ་མང་དུ་ཕྱིན་ཡོད་པ་དང་། དེའི་ནང་མི་བྱེ་བ་གཅིག་དང་ས་ཡ་དྲུག་འབུམ་དགུ་ལ་སྲོག་སྐྱོབ་རོགས་སྐྱོར་གྱི་དགོས་མཁོ་ཧ་ཅང་ཆེ་ཟེར།

སུའུ་ཏན་གྱི་མི་ཆོས་དང་ལེན་དང་ཛ་དྲག་གནས་ཚུལ་སྐོར་གྱི་ཚོགས་འདུ་ཉིན་དེར་རྒྱལ་ཁབ་དེའི་ཤར་རྒྱུད་གྲོང་ཁྱེར་སུའུ་ཏན་གྲུ་ཁར་བསྡུས།     སུའུ་ཏན་མི་ཆོས་རིང་ལུགས་ཀྱི་རོགས་སྐྱོར་ཆེད་གཉེར་མི་སྣ་པེ་ཉི་ཡཱ་ཡིས་ཚོགས་འདུའི་ཐོག་བཤད་རྒྱུར། སུའུ་ཏན་མི་ཆོས་རིང་ལུགས་ཀྱི་རོགས་སྐྱོར་ཨུ་ཡོན་ལྷན་ཁང་དང་དེའི་མཉམ་ལས་གྲོགས་པོས་ཁྱབ་བསྒྲགས་བྱས་པའི་སྙན་ཞུ་ལྟར་ན།    སུའུ་ཏན་གྱི་དྲག་ཆས་གདོང་ཐུག་མ་བྱུང་སྔོན། རྒྱལ་ཁབ་དེའི་མི་བྱེ་བ་གཅིག་དང་ས་ཡ་ལྔ་འབུམ་བརྒྱད་ལ་མི་ཆོས་རིང་ལུགས་ཀྱི་རོགས་སྐྱོར་དགོས་པ་དང་། དེའི་ནང་ཏཱ་ཨར་ཧྥུའུ་ཨར་ས་ཁུལ་དང་ཁི་ཨར་ཏུའོ་ཧྥན་ས་ཁུལ་གྱིས་སོ་སོར80%དང17%བཟུང་ཡོད།   པེ་ཉི་ཡཱ་ཡིས་ནན་བཤད་བྱས་དོན། མིག་སྔར་སུའུ་ཏན་ལ་མི་ཆོས་ཀྱི་རོགས་སྐྱོར་ཧ་ཅང་ཆེན་པོ་དགོས་པ་དང་། མི་བྱེ་བ་གཅིག་དང་ས་ཡ་དྲུག་འབུམ་གསུམ་ལྷག་ལ་མི་ཆོས་རིང་ལུགས་ཀྱི་རོགས་སྐྱོར་གང་ཡང་ཐོབ་མེད་ཟེར།

སུའུ་ཏན་གྱི་བདག་དབང་ཨུ་ཡོན་ལྷན་ཁང་གི་ཁོངས་མི་དབྱི་པུའུ་ལ་ཞིན·ཅཱ་པུས་ཨར་གྱིས་ཚོགས་འདུའི་སྟེང་བསྟན་དོན། སུའུ་ཏན་སྲིད་གཞུང་གིས་རྒྱལ་སྤྱིའི་མི་ཆོས་རིང་ལུགས་ཀྱི་རོགས་སྐྱོར་བྱ་བར་གཞོགས་འདེགས་བྱེད་འདོད་ཡོད།    ད་ལྟའི་བར་གནམ་གྲུ་ཐང6དང་ཨ་ཏི་ལེའི་མཐའ་མཚམས་འགག་སྒོ་དང་བཅས་པའི་སྐམ་སའི་བགྲོད་ལམ་གྱི་འགག་སྒོ7མི་ཆོས་རིང་ལུགས་ཀྱི་རོགས་སྐྱོར་སྒྲིག་གཞིའི་སྤྱོད་རྒྱུར་འདོན་སྤྲོད་བྱེད་པའི་ཆོག་མཆན་སྤྲད་ཡོད།     ཁོས་རྒྱལ་སྤྱིའི་སྤྱི་ཚོགས་ཀྱིས་ཁས་ལེན་དངོས་སྒྲུབ་བྱས་ཏེ་དགོས་མཁོ་ཡོད་པའི་སུའུ་ཏན་གྱི་མང་ཚོགས་ལ་རྒྱབ་སྐྱོར་བྱེད་དགོས་པའི་འབོད་སྐུལ་བཏང་། 

2023ལོའི་ཟླ4པའི་ཚེས15ཉིན། སུའུ་ཏན་དྲག་ཆས་དམག་དཔུང་དང་སུའུ་ཏན་མགྱོགས་མྱུར་རོགས་སྐྱོར་དམག་དཔུང་བར་རྒྱལ་ས་ཁ་ཐུའུ་མུའུ་རུ་གདོང་ཐུག་དྲག་པོ་བྱུང་ནས། དམག་འཁྲུག་གི་མེ་ལྕེ་དེ་རིམ་བཞིན་ས་ཁུལ་གཞན་དུ་མཆེད་པ་རེད། ལོ་ངོ་གཅིག་རིང་གི་དྲག་ཆས་གདོང་གཏུག་དེ་ལས་སུའུ་ཏན་གྱི་མི་ཁྲི་གཉིས་དང་སྟོང་བཞི་བརྒྱད་བརྒྱ་རྐྱེན་ལམ་དུ་ཤོར་བ་དང་། མི་བྱེ་བ་གཅིག་དང་ས་ཡ་གཅིག་འབུམ་དྲུག་ཡུལ་འཁྱམ་པར་གྱུར།  མཉམ་འབྲེལ་རྒྱལ་ཚོགས་ཀྱི་ཆེད་མཁས་པས་ད་ལོའི་ཟླ10པར་སུའུ་ཏན་གྱི་དྲག་ཆས་གདོང་ཐུག་ལས་རྒྱལ་ནང་གི་མི་གྲངས་ཀྱི97%ལ“བཀྲེས་ལྟོགས་ཀྱི་གནད་དོན་ཚབས་ཆེན”ལ་འཕྲད་ཡོད་ཅེས་ཐ་ཚིག་བསྒྲགས།