ཀྲུང་གོའི་འཐུས་མིས་དབྱི་སི་རལ་གྱིས་དམག་དོན་འགུལ་སྐྱོད་མཚམས་བཞག་ནས་ཅ་ཧྲ་ས་ཁུལ་གྱི་མི་ཆོས་གནོད་འཚེ་ཇེ་ལྷོད་དུ་གཏོང་དགོས་པའི་འབོད་སྐུལ་བཏང་།

ཀྲུང་གོའི་མཉམ་འབྲེལ་རྒྱལ་ཚོགས་ཀྱི་རྒྱུན་སྡོད་འཐུས་མི་ཧྥུའུ་ཚུང་གིས་ཚེས12ཉིན། བདེ་འཇགས་ལས་འཛིན་ལྷན་ཚོགས་ཀྱི་ཅ་ཧྲའི་འབྲུ་རིགས་བདེ་འཇགས་གནད་དོན་སྐོར་གྱི་གྲོས་ཚོགས་སྟེང་བཤད་རྒྱུར། ཅ་ཧྲ་ས་ཁུལ་གྱི་མི་ཆོས་གནས་བབ་ད་བར་ཇེ་སྡུག་ཏུ་འགྲོ་བཞིན་ཡོད། ཁོས་དབྱི་སི་རལ་གྱིས་དམག་དོན་འགུལ་སྐྱོད་མཚམས་བཞག་ནས། མིའི་བཀག་རྒྱ་མེད་པར་གཏོང་བ་དང་། མཉམ་འབྲེལ་རྒྱལ་ཚོགས་སོགས་ལས་ཁུངས་དང་མཉམ་དུ་ཕྱོགས་ཡོངས་ཀྱི་མཉམ་ལས་སྤེལ་ཏེ། ས་གནས་དེའི་མི་ཆོས་གནོད་འཚེ་ཇེ་ལྷོད་དུ་གཏོང་བའི་འབོད་སྐུལ་བཏང་།

ཧྥུའུ་ཚུང་གིས་བཤད་རྒྱུར། མི་ཆོས་གནད་དོན་དེ་ཆབ་སྲིད་ཅན་དུ་འགྱུར་མི་རུང་ལ། ལྟོགས་སྐོམ་དེ་དྲག་ཆས་ཅན་དུ་སྒྱུར་མི་རུང་། དེ་ནི་རྒྱལ་སྤྱིའི་མི་ཆོས་བཅའ་ཁྲིམས་ཀྱིས་གཏན་འབེབས་བྱས་པའི་གཞི་རྩའི་ཚད་མཐའ་ཡིན། ཡིན་ཡང་ཟླ་བཅུ་གསུམ་རིང་རྒྱུན་མཐུད་པའི་འགལ་ཟླའི་ཁྲོད། མི་སེར་དཀྱུས་མའི་གཞི་རྩའི་དགོས་མཁོ་ཡང་དང་བསྐྱར་དུ་བཙན་འཕྲོག་བྱས་ཡོད་ཅིང་། འབྲུ་རིགས་དང་ཞིང་ལས་རྩ་འཛུགས་ཀྱི་སྙན་ཞུ་གསར་པས། ཅ་ཧྲ་ས་ཁུལ་དུ་མི་ཆོས་དངོས་རྫས་འདྲུད་ཚད་དེ་ལོ་རྒྱུས་ཀྱི་ཆེས་དམའ་བའི་ཆུ་ཚད་དུ་སླེབས་པ་དང་། མི་ཆོས་གནས་བབ་ཧ་ཅང་ཛ་དྲག་ཏུ་གྱུར་ཡོད་པའི་ཉེན་བརྡ་བཏང་ཡོད་ཟེར།

ཧྥུའུ་ཚུང་གིས་བཤད་རྒྱུར། འདས་པའི་ལོ་གཅིག་ནང་། དབྱི་སི་རལ་གྱིས་ཅ་ཧྲ་ས་ཁུལ་དུ་གང་འདོད་གཏོར་བཤིག་གཏོང་བ་རྒྱུན་སྲིང་བྱས་ཏེ། སྨན་ཁང་དང་། སློབ་གྲྭ། ཡུལ་གྱར་བའི་སྒར་ས་བཅས་ལ་འཇབ་རྒོལ་བྱས་ནས། ཟས་རིགས་དང་སྨན་རྫས། འབར་རྫས་སོགས་ཀྱི་མཁོ་འདོན་མཚམས་བཅད་པ་དང་། མི་སེར་གནས་སྤོར་གྱི་བཙན་ཤེད་བྱ་སྤྱོད་གཞི་རྒྱ་ཆེ་བའི་སྒོ་ནས་ཡང་དང་བསྐྱར་དུ་སྤེལ་བ་ལས། སྔར་བྱུང་མྱོང་མེད་པའི་མི་ཆོས་གནོད་འཚེ་དང་གཏོར་སྐྱོན་ཚབས་ཆེན་བཟོས་ཡོད།

ཧྥུའུ་ཚུང་གིས་བཤད་རྒྱུར། ཅ་ཧྲ་ས་ཁུལ་གྱི་མི་ཆོས་རོགས་སྐྱོབ་བྱ་བ་རྒྱ་བསྐྱེད་ན། འགྲན་སློང་ཆེན་པོ་ཞིག་ཡོད་པ་ནི་མི་ཆོས་དངོས་རྫས་མཁོ་འདོན་གྱིས་མི་འདང་བ་དེ་མིན་ལ། མི་ཆོས་རོགས་སྐྱོབ་ལ་མིས་བཀག་རྒྱ་ཐེབས་པའི་རྐྱེན་རེད། རྒྱལ་སྤྱིའི་སྤྱི་ཚོགས་ཀྱིས་ཅ་ཧྲ་ས་ཁུལ་དུ་དངོས་རྫས་འབོར་ཆེན་གྱི་རོགས་བྱས་པ་དེ། མངའ་ཁོངས་ཕྱི་རོལ་དུ་གྲལ་བསྒྲིགས་ནས་སྒུག་ཡོད་པས། ང་ཚོས་དབྱི་སི་རལ་གྱིས་མྱུར་དུ་མངའ་ཁོངས་བརྒལ་གནས་ཡོད་ཚད་སྒོ་འབྱེད་བྱེད་པར་སྐུལ་མ་བཏང་ནས། མི་ཆོས་དངོས་རྫས་ཅ་ཧྲ་ས་ཁུལ་གྱི་མངའ་ཁོངས་ཡོངས་ལ་སྐྱེལ་བའི་བཀག་རྒྱ་མེད་པར་གཏོང་དགོས་ཟེར།

ཧྥུའུ་ཚུང་གིས་ཅ་ཧྲ་ས་ཁུལ་དུས་ནམ་ཡང་མི་ཆོས་དཀའ་ཁག་ལ་འཕྲད་པ་དེ་ནི། མི་ཆོས་ལས་ཁུངས་ཀྱིས་འབད་པ་མ་བྱས་པ་མིན་ལ། མི་ཆོས་འགུལ་སྐྱོད་ལ་བཀག་རྒྱ་སྣ་ཚོགས་ཐེབས་པས་རེད། ང་ཚོས་དབྱི་སི་རལ་གྱིས་མཉམ་འབྲེལ་རྒྱལ་ཚོགས་སོགས་མི་ཆོས་ལས་ཁུངས་དང་མཉམ་དུ་ཕྱོགས་ཡོངས་ཀྱི་མཉམ་ལས་བྱས་ནས། མི་ཆོས་ལས་ཁུངས་ཀྱི་བདེ་འཇགས་ལ་འགན་སྲུང་དང་དེར་སྟབས་བདེ་བསྐྲུན་རྒྱུའི་འབོད་སྐུལ་བཏང་བ་ཡིན། དབྱི་སི་རལ་གྲོས་ཚོགས་སྟེང་ཁྲིམས་དོན་བརྒྱུད་དེ་མཉམ་འབྲེལ་རྒྱལ་ཚོགས་ཀྱི་ཕ་ལེ་སི་ཐན་ཤར་མར་ཉེ་བའི་ཡུལ་གྱུར་རོགས་སྐྱོབ་དང་བཟོ་བསྐྲུན་ཁྲུའུ་ཡི་སྒོ་རྒྱབ་པས། དེས་ཅ་ཧྲ་ས་ཁུལ་གྱི་མང་ཚོགས་ཀྱི་སྲོག་རྩ་མེད་པར་གཏོང་སྲིད། ཀྲུང་གོས་བཟོ་བསྐྲུན་ཁྲུའུ་ལ་བཀག་འགོག་དང་གཉའ་གནོན་བྱེད་པའི་བྱ་སྤྱོད་དང་བྱེད་ཐབས་གང་རུང་ལ་ཡང་བསྐྱར་རྒོལ་གཏམ་བཏང་བ་ཡིན་ལ། འབྲེལ་ཡོད་ཁྲིམས་དོན་གྲོས་གཞིས་ངེས་པར་དུ་ལག་བསྟར་བྱེད་མཚམས་འཇོག་པ་དང་། མྱུར་དུ་ཕྱིར་འཐེན་བྱེད་དགོས་ཞེས་ནན་བཤད་བྱས།

ཧྥུའུ་ཚུང་གིས་ཅ་ཧྲ་ས་ཁུལ་དུ་དམག་འཁྲུག་ཡུན་རིང་མཚམས་འཇོག་པ་མྱུར་དུ་མངོན་འགྱུར་བྱེད་པ་དང་། རྒྱལ་ཁབ་གཉིས་ཀྱི་ཇུས་གཞི་དངོས་འབེབས་བྱེད་པར་མྱུར་དུ་སྐུལ་འདེད་གཏོང་རྒྱུ་ནི། འགལ་བ་མཇུག་སྒྲིལ་བ་དང་། ཞི་བདེ་སླར་གསོ་བྱེད་པའི་གཞི་རྩའི་ཐབས་ལམ་ཡིན། ཀྲུང་གོས་དབྱི་སི་རལ་གྱིས་རྒྱལ་སྤྱིའི་སྤྱི་ཚོགས་ཀྱི་འབོད་སྐུལ་དང་ལེན་བྱས་ཏེ། ཅ་ཧྲ་ས་ཁུལ་དུ་དམག་དོན་འགུལ་སྐྱོད་སྤེལ་མཚམས་འཇོག་པ་དང་། ལེ་པ་ནོན་ཀྲིན་ཀྲུའུ་ཏང་སོགས་རྒྱལ་ཁབ་གཞན་པར་བཙན་འཛུལ་བྱེད་པ་མཚམས་འཇོག་པའི་འབོད་སྐུལ་བཏང་བ་ཡིན་ཞེས་ནན་བཤད་བྱས།