ཁོ་སི་ཐ་རི་ཁ་ཆར་ཆེན་གྱི་གནོད་འཚེ་ཐེབས་པར་བརྟེན་རྒྱལ་ཡོངས་བྲེལ་མྱུར་རྣམ་པའི་ཁྲོད་ཞུགས་ཟེར།

ཁོ་སི་ཐ་རི་ཁ་སྲིད་གཞུང་གིས་ཚེས13ཉིན་ཁྱབ་བསྒྲགས་བྱས་དོན། རྒྱལ་ཁབ་དེ་བསྟུད་མར་ཆར་ཆེན་གྱི་གནོད་འཚེ་ཐེབས་ནས་རྒྱལ་ཡོངས་བྲེལ་མྱུར་རྣམ་པའི་ཁྲོད་ཞུགས་ཡོད་ཟེར།

ཁོ་སི་ཐ་རི་ཁ་སྲིད་གཞུང་གིས་ཉིན་དེར་སྲིད་འཛིན་བཀའ་རྒྱ་བསྒྲགས་ནས་བཤད་རྒྱུར། བསྟུད་མར་དྲག་རླུང་དང་རྒྱུན་མཐུད་སྒོས་ཆར་བབས་པ་ལས། ཆུ་ལོག་དང་འདམ་རྡོའི་ཆུ་རུད། རི་ཉུལ་བ་སོགས་རང་བྱུང་གནོད་འཚེ་ཐེབས་པ་དང་། ཁོ་སི་ཐ་རི་ཁ་རྒྱལ་ཁབ་ཚེས13ཉིན་ནས་བྲེལ་མྱུར་རྣམ་པའི་ཁྲོད་ཞུགས་པ་ཡིན་ཟེར། བྲེལ་མྱུར་རྣམ་པའི་བཀའ་རྒྱ་ལག་བསྟར་བྱས་ན་རྒྱལ་ཡོངས་ཀྱི་སྟོབས་ཤུགས་གཅིག་སྡུད་ཐུབ་ཅིང་། ཆར་ཆེན་དང་ཆུ་ལོག་གི་ཤུགས་རྐྱེན་ཐེབས་ཚད་ཚབས་ཆེ་བའི་ས་ཁུལ་གྱིས་གནོད་འཚེ་ལ་ཁ་གཏད་འཇལ་བར་རོགས་བྱེད་ཐུབ་ཟེར།

ཁོ་སི་ཐ་རི་ཁ་རྒྱལ་ཁབ་བྲེལ་མྱུར་ཨུ་ཡོན་ལྷན་ཁང་གིས་ཚེས13ཉིན་བཤད་རྒྱུར། དྲག་ཆར་བསྟུད་མར་བབས་པ་ལས་རྒྱལ་ཁབ་དེར་ཆུ་ལོག་ཐེངས200ལྷག་བྱུང་བ་དང་། དེ་ལས་མི་གཉིས་རྐྱེན་ལམ་དུ་ཤོར་ཞིང་། མི་བཞི་གར་སོང་རྙེད་མེད། གཞུང་ལམ་གཙོ་ཆེ་བ་བཀག་སྡོམ་བྱས་ཤིང་། རྒྱལ་ཡོངས་ཀྱི་སློབ་གྲྭས་ཚེས11ཉིན་ནས་སློབ་ཁྲིད་བྱེད་མཚམས་བཞག་པ་རེད། གནོད་འཚེ་ཐེབས་པ་ཆེས་ཚབས་ཆེ་བའི་ཞི་བདེ་རྒྱ་མཚོའི་འགྲམ་ངོགས་ས་ཁུལ་དུ། ཁང་པ་མང་པོ་ཆུ་ལོག་གིས་ཁུར་བ་དང་། མི་ཆིག་སྟོང་བཞི་བརྒྱ་བཞི་བཅུ་ཁ་འགྲེམ་བཏང་ཡོད། ཚེས12ཉིན། ཁོ་སི་ཐ་རི་ཁ་རྒྱལ་ཁབ་བྲེལ་མྱུར་ཨུ་ཡོན་ལྷན་ཁང་གིས་དཔོན་ཕྱོགས་དྲ་རྒྱའི་སྟེང་། ཁོ་སི་ཐ་རི་ཁའི་ཞི་བདེ་རྒྱ་མཚོའི་འགྲམ་ངོགས་ཀྱི་ས་ཁུལ་ཡོངས་དང་། ཀྭ་ན་ཁ་སི་ཐི་ཞིང་ཆེན་དང་ཕིན་ཐ་ན་སི་ཞིང་ཆེན་བཅས་ཆར་ཆེན་གནོད་འཚེ་དབང་གིས་བྲེལ་མྱུར་རྣམ་པར་ཞུགས་ཡོད་ཅེས་ཁྱབ་བསྒྲགས་བྱས་པ་རེད།

ཁོ་སི་ཐ་རི་ཁ་རྒྱལ་ཁབ་གནམ་གཤིས་ཅུའུ་ཡིས་ཚེས13ཉིན་བཤད་རྒྱུར། ཅཱ་ལི་པིས་མཚོ་ཁོངས་ནས་ཚྭ་ཁུལ་དབུགས་འཁྱིལ་གསར་བ་ཞིག་གྲུབ་སྲིད་པས། མ་འོངས་པའི་ཉིན་འགའི་ནང་མུ་མཐུད་དུ་ཆར་བ་འབབ་རྒྱུ་རེད་ཅེས་བསྟན།