ཆུང་གྲོགས་མ། དམར་ཁ་ཚ།

ཆུང་གྲོགས་མ།

དམར་ཁ་ཚ།

ཁྱོད་རང་མེད་པས་ནམ་མཁའི་ཉི་འོད་དེ་ཙམ་དྲོད་འཇམ་མི་ལྡན་ཏེ།།

སེམས་པའི་ཕྱི་ནང་དར་གྱིས་བཟུང་ཞིང་སྙིང་ཆུང་དམར་པོ་གྲང་འདར་རྒྱག།

ཁྱོད་དང་གྱེས་པས་ཟླ་འོད་འདིས་ཀྱང་མཛེས་སྡུག་དེ་ཙམ་མི་ངོམ་སྟེ།།

ཁེར་རྐྱང་མཚན་མོར་གཙང་ཆུའི་ངོགས་སུ་ང་ལ་ཡུན་དུ་སྐྱོ་རོགས་གནང་།།

ཁྱོད་ཉིད་དྲན་པའི་དྲན་གདུང་ཀློང་ནས་སྐྲ་ལོའི་ཉག་མ་ཇེ་དཀར་རེད།།

ཁྱོད་ལ་སྒུག་པའི་རེ་སྒུག་ཁྲོད་ནས་གདོང་གི་གཉེར་རིས་ཇེ་མང་སོང་།།

ཁྱོད་དང་གཅིག་པུར་མཐུན་ན་བསམས་ཏེ་སྐྱེས་མ་གཞན་དང་འགྲོགས་འདྲིས་སྤངས།།

ཁྱོད་རང་ཁོ་ན་དགའ་འགྲོ་སྙམ་ནས་མི་སྒྲུབ་བྱ་བ་ཅང་མ་མཆིས།།

མཛེས་ཀི་མཛེས་ཀི་ཁྱོད་རང་མཛེས་ཀི་ཆུང་འདྲིས་གྲོགས་མོ་ཁྱོད་མཛེས་ཀི།

སྐྱོ་ཀི་སྐྱོ་ཀི་ང་རང་སྐྱོ་ཀི་སྟོང་འདང་ཁྲོད་ཀྱི་ང་སྐྱོ་ཀི།

བཙོག་གི་བཙོག་གི་ལས་དབང་བཙོག་གི་འུ་གཉིས་བར་གྱི་ལས་བཙོག་གི།

སུན་གི་སུན་གི་སེམས་པ་སུན་གི་ང་ཡི་སེམས་པ་འདི་སུན་གི།

རང་སྡེ་བྱིས་པའི་རྩེད་འཇོ་མཐོང་དུས་ཆུང་དུས་གཏམ་རྒྱུད་ཡིད་ལ་འཁོར།།

ཕ་གིའི་སྤང་ལྗོངས་མིག་ལ་རིག་ན་རྫི་བོར་ཆས་པའི་རྣམ་ཐར་དྲན།།

རྨི་ལམ་ནའང་ཁྱོད་དང་འུ་གཉིས་རྩེད་རྡོ་བསྒྲིགས་པའི་སྣང་བརྙན་སོགས།།

ཆུང་ཆུང་དུས་ཀྱི་རྩེད་འཇོ་ཡོད་དགུ་ཆུ་ལ་ཟླ་གཟུགས་བཞིན་དུ་འཆར།།

ཞག་དང་ཉི་མ་ཅི་ཙམ་སོང་ཡང་ཁོ་བོ་ད་རུང་ཁྱོད་ལ་དགའ།།

བསླུ་བྲིད་མཁས་པའི་སྨན་ཤར་གཞན་པར་ཨ་ལན་ཡེ་ནས་སྟེར་གྱིན་མེད།།

ལོ་དང་ཟླ་བ་ཅི་ཙམ་དགོས་ཀྱང་ངས་ནི་ཁྱོད་ཉིད་སྒུག་ན་འདོད།།

སེམས་ཀྱི་རེ་ཐག་ཆད་ནས་མེད་ཅིང་འཚོ་བའི་བཀོད་སྒྲིག་གཞན་ཞིག་མེད།།

སྣང་བ་མཐུན་པའི་བཟའ་ཚང་མཐོང་ན་ཡིད་ཀྱི་སྨོན་པ་གྲངས་མེད་འཆོར།།

འུ་གཉིས་བར་གྱི་བརྩེ་དུང་འོ་ཆུ་དེ་དང་དེ་བཞིན་འདྲེས་ན་བསམ།།

དགའ་བདེས་ཁྱབ་པའི་གཞིས་ཁྱིམ་མཐོང་ན་གདོང་གི་མིག་ཟུང་ཅེར་དང་ལྷན།།

འུ་གཉིས་ལའང་འཚོ་བ་འཚམས་པའི་གཞིས་ཁྱིམ་ཞིག་ནི་རྟོག་བཏགས་བགྱིས།།

ཆུང་ཆུང་དུས་ཀྱི་སྣང་བ་དེ་ནི་ད་ལྟའི་ཁྱོད་ལ་མི་འདུག་ཅིང་།།

ང་ལ་བཅངས་བའི་བརྩེ་བ་དེའང་ད་ལྟ་ཁྱོད་ཀྱིས་བོར་ནས་འདུག།

ཁོ་བོས་གཏན་ནས་བརྗེད་ཐབས་བྲལ་བའི་ཆུང་ཆུང་དུས་ཀྱི་རྩེད་རོགས་མ།།

ཁྱོད་ཀྱི་སེམས་པའི་མེ་ལོང་ངོས་སུ་འུ་གཉིས་ཅི་ཞིག་ལྷག་སྲིད་དམ།།

ངག་འཇམ་ཞལ་མཛེས་ལྷ་མོ་འདྲ་བའི་ང་ཡི་ཆུང་གྲོགས་གཤིས་བཟང་མ།།

སྔོན་ཆད་ལྟ་བའི་སྨྲ་བརྗོད་མེད་པ་དེ་འདྲའི་ཞི་འཇམ་ཅི་ཞིག་རེད།།

གསར་ཕྲད་གྲོགས་པོ་ཡོད་ཚོད་མིན་པ་ཆུང་ནས་འདྲིས་པའི་ལོ་བརྒྱ་མ།།

ལང་ཚོའི་མེ་ཏོག་རྒས་སུ་མ་བཅུག་ང་ལ་གནང་དང་དགའ་ལོ་མ།།