ཨུ་རུ་སི་དང་ཝུའུ་ཁི་ལན་ལ་སོ་སོར་གཞི་རྒྱ་ཆེ་བའི་མི་མེད་གནམ་གྲུའི་འཇབ་རྒོལ་ཐེབས།

ཝུའུ་ཁི་ལན་གྱི་མཁའ་དམག་གིས་ཚེས10ཉིན་བཤད་རྒྱུར། ཚེས9ཉིན་གྱི་དགོང་མོ་ནས་ཚེས10ཉིན་གྱི་ནམ་གུང་བར། ཨུ་རུ་སིའི་དམག་དཔུང་གིས་ཝུའུ་ཁི་ལན་གྱི་ས་ཁུལ་མང་བོར་གཞི་རྒྱ་ཆེ་བའི་མི་མེད་གནམ་གྲུས་འཇབ་རྒོལ་བྱས་ཟེར། དུས་མཉམ་དུ། ཨུ་རུ་སིའི་མཁའ་སྲུང་མ་ལག་གིས་ཚེས10ཉིན་ཝུའུ་ཁི་ལན་གྱི་མི་མེད་གནམ་གྲུ་མང་བོ་གཏོར་བཤིགས་བཏང་བ་དང་།  མོ་སི་ཁོ་རུ་ཡོད་པའི་གནམ་གྲུ་ཐང་གསུམ་གྱིས་མཁའ་འགྲུལ་དོ་དམ་ཚོད་འཛིན་ལག་བསྟར་བྱས་ཡོད་ཟེར།

ཝུའུ་ཁི་ལན་གྱི་མཁའ་དམག་གིས་ཚེས10ཉིན་སྤྱི་ཚོགས་སྨྱན་བྱད་སྟེང་བཤད་རྒྱུར། ཨུ་རུ་སིའི་དམག་དཔུང་གིས་ཁི་ལ་སི་ནོ་ཏ་ཨར་མཐའ་མཚམས་ས་ཁུལ་དང་། ཨོ་ལེའོ་ཨར་མངའ་སྡེ་སོགས་ས་ཁུལ་དུ་ཝུའུ་ཁི་ལན་གྱི་མངའ་ཁོངས་སུ་ཚུར་རྒོལ་བྱེད་ནུས་ལྡན་པའི་མི་མེད་གནམ་གྲུ་བརྒྱ་དང་ཞེ་ལྔ་བཏང་ཡོད་ཟེར། ཝུའུ་ཁི་ལན་གྱི་མཁའ་སྲུང་མེ་ཤུགས་དང་གློག་རྡུལ་དམག་འཐབ་དམག་དཔུང་གིས་ཨོ་ཏི་ས་མངའ་སྡེ་དང་། ཅི་ཧྥུའུ་མངའ་སྡེ། རི་ཐོ་མིས་ཨར་མངའ་སྡེ་སོགས་ས་ཁུལ་དུ་མཁའ་སྲུང་ལས་དོན་སྤེལ་ཟེར། ཝུའུ་ཁི་ལན་ཕྱོགས་ཀྱིས་བར་སྣང་འཇབ་རྒོལ་ལས་ཝུའུ་ཁི་ལན་གྱི་ས་ཁུལ་ཁ་ཤས་སུ་རྒྱུ་ནོར་གྱོང་གུད་ཐེབས་ཡོད་ཅེས་བཤད་ཀྱང་།  མིག་སྔར་མི་སྣར་ཤི་རྨས་ཐེབས་པའི་སྙན་ཞུ་བསྒྲགས་མེད།

ཝུའུ་ཁི་ལན་གྱི་དྲག་ཆས་དམག་དཔུང་སྤྱི་ཁྱབ་བློ་འདོན་པུའུ་ཡིས་ཚེས10ཉིན་སྤྱི་ཚོགས་སྨྱན་བྱད་སྟེང་རྩོམ་ཡིག་སྤེལ་ནས་བཤད་རྒྱུར། ཝུའུ་ཁི་ལན་གྱི་མི་མེད་གནམ་གྲུའི་དཔུང་ཁག་གིས་ཝུའུ་ཁི་ལན་རྒྱལ་སྲུང་དམག་དཔུང་གི་རོགས་འདེགས་འོག  ཨུ་རུ་སིའི་པུའུ་ལེའང་སི་ཁི་མངའ་སྡེའི་དམག་ཆས་མཛོད་ཁང་ཞིག་ལ་མི་མེད་གནམ་གྲུ་བཏང་ནས་འཇབ་རྒོལ་བྱས་ཟེར། ཝུའུ་ཁི་ལན་ཕྱོགས་ཀྱིས་བཤད་ན། ཨུ་རུ་སིའི་དམག་ཆས་མཛོད་ཁང་ནས་འགས་གཏོར་གྱི་སྒྲ་ཐེངས་བརྒྱད་ཙམ་གྲག་པ་དང་། ཚེས10ཉིན་གྱི་དུས་ཚོད་དྲུག་གི་སྟེང་། དམག་ཆས་མཛོད་ཁང་དུ་ད་དུང་མེ་དཔུང་ཕྱོགས་བཞིར་མཆེད་ཀྱིན་ཡོད་ཟེར།

ཨུ་རུ་སིའི་རྒྱལ་སྲུང་དམག་དཔུང་གིས་ཚེས10ཉིན་བཤད་རྒྱུར། ཨུ་རུ་སིའི་དམག་དཔུང་གིས་མཁའ་འགྲུལ་དམག་དཔུང་དང་། མི་མེད་གནམ་གྲུ། འཕུར་མདའ་དང་མེ་སྒྱོགས་དམག་དཔུང་རྩ་འཛུགས་བྱས་ཏེ། ཝུའུ་ཁི་ལན་གྱི་དམག་བཀོལ་གནམ་གྲུ་དང་། མི་མེད་གནམ་གྲུ་འཇོག་ས་དང་གཏོང་འཕེན་བྱེད་ས། ནུས་ཁུངས་སྒྲིག་ཆས་བཅས་ལ་འཇབ་རྒོལ་བྱས་ཟེར། ཨུ་རུ་སིའི་དམག་དཔུང་གིས་ད་དུང་མི་མེད་གནམ་གྲུ་བཀོལ་ནས་ཝུའུ་ཁི་ལན་གྱི་ཧཱ་ཨར་ཁི་ཧྥུའུ་མངའ་སྡེའི་བཀོད་འདོམས་ཁང་ཞིག་གཏོར་བཤིགས་བཏང་ཟེར།

ཨུ་རུ་སིའི་རྒྱལ་སྲུང་དམག་དཔུང་གིས་བཤད་རྒྱུར། ཨུ་རུ་སིའི་མཁའ་སྲུང་དམག་དཔུང་གིས་ཚེས10ཉིན་ཝུའུ་ཁི་ལན་གྱི་མི་མེད་གནམ་གྲུ70སར་ལྷུང་དུ་བཅུག་པ་དང་། དེའི་ཁྲོད་ཀྱི་མི་མེད་གནམ་གྲུ་སོ་བཞི་མོ་སི་ཁོ་མངའ་སྡེ་ནས་མེད་པར་བཏང་ཟེར། མོ་སི་ཁོ་མངའ་སྡེའི་འགོ་བ་ཝའོ་ལོ་པིས་ཡུའེ་ཧྥུའུ་ཡིས་བཤད་རྒྱུར། སར་ལྷུང་བའི་མི་མེད་གནམ་གྲུའི་ཆག་རོ་ཡིས་སྡོད་དམངས་ཤིག་ལ་རྨས་སྐྱོན་བཟོས་པ་དང་ཁང་པ་གཉིས་མེར་ཤོར་ཟེར།

ཨུ་རུ་སིའི་རྒྱལ་ཕྲན་མཉམ་འབྲེལ་མཁའ་འགྲུལ་སྐྱེལ་འདྲེན་ཧྲུའུ་ཡིས་ཚེས10ཉིན་བཤད་རྒྱུར། ས་གནས་དེའི་དུས་ཚོད་བརྒྱད་ཀྱི་གཡས་གཡོན་དུ། མོ་སི་ཁོའི་ཏོ་མོ་ཅེ་ཏོ་ཝའོ་གནམ་གྲུ་ཐང་དང་། རུའུ་ཁི་ཧྥུའུ་སི་ཅི་གནམ་གྲུ་ཐང་། ཞེ་ལེ་མཱེ་ཅེ་ཝའོ་གནམ་གྲུ་ཐང་བཅས་ནས་གནས་སྐབས་མཁའ་འགྲུལ་དོ་དམ་ལག་བསྟར་བྱས་ཏེ། དམངས་འགྲུལ་བདེ་འཇགས་ལ་ཁག་ཐེག་བྱས་ཟེར་ཡང་། དུས་ཚོད་གཉིས་འགོར་རྗེས། གནམ་གྲུ་ཐང་གསུམ་ནས་མཁའ་འགྲུལ་དོ་དམ་གྱི་བཀག་རྒྱ་མེད་པར་བཏང་སྟེ། མཁའ་འགྲུལ་ལས་དོན་རྒྱུན་ལྡན་དུ་གྱུར།