སུའུ་ཏན་དབུས་རྒྱུད་ཀྱི་གྲོང་ཚོ་ཞིག་ལ་འཇབ་རྒོལ་ཐེབས་ནས་མི11རྐྱེན་ལམ་དུ་ཤོར།

སུའུ་ཏན་གྱི་དམངས་ཁྲོད་སྒྲིག་གཞི“སུའུ་ཏན་སྨན་པའི་དྲ་བའི”སྟེང་ཚེས10ཉིན་གསལ་བསྒྲགས་སྤེལ་ནས་བཤད་རྒྱུར། སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཉིན་དེར་རྒྱལ་ཁབ་དེའི་དབུས་རྒྱུད་ཅེ་ཅི་ལ་མངའ་སྡེའི་གྲོང་ཚོ་ཞིག་ལ་འཇབ་རྒོལ་བྱས་ནས་མི11རྐྱེན་ལམ་དུ་ཤོར་ཟེར།

གསལ་བསྒྲགས་ལས་བཤད་རྒྱུར། འཇབ་རྒོལ་ཐེབས་པའི་ཧུའུ་ཏུའུ་ཨར་གྲོང་ཚོ་དེ་ཅེ་ཅི་ལ་མངའ་སྡེ་ཡི་ཤར་རྒྱུད་དུ་ཡོད་ཅིང་།  གྲོང་ཚོ་དེའི་འཕྲོད་བསྟེན་ལྟེ་གནས་དང་མང་ཚོགས་ཀྱི་སྡོད་ཁང་མང་པོ་ཞིག་ལ་འཕྲོག་བཅོམ་དང་འཇབ་རྒོལ་ཐེབས་ནས་མི11རྐྱེན་ལམ་དུ་ཤོར་བ་དང་མི18ལ་རྨས་ཕོག   རྨས་ཕོག་པའི་ནང་བྱིས་པ་མང་པོ་ཡོད་ཟེར།   གསལ་བསྒྲགས་ལས་ད་དུང་བཤད་རྒྱུར།  མིག་སྔར་ཅེ་ཅི་ལཱ་མངའ་སྡེའི་ཤར་རྒྱུད་ཀྱི་གྲོང་ཚོ་ཁག་ཅིག་ལ་སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་སྐོར་བཅོམ་བྱེད་བཞིན་ཡོད་པ་དང་གྲོང་ཚོ་མང་ཆེ་བར་མི་བསྡད་མི་འདུག་ཟེར།

ཚེས10ཉིན།  ཅེ་ཅི་ལཱ་མངའ་སྡེ་དམངས་ཁྲོད་རྩ་འཛུགས“དབུས་རྒྱུད་ཀྱི་འབོད་སྒྲ”ཞེས་པས་སྤེལ་བའི་གསལ་བསྒྲགས་ལས། མངའ་སྡེ་དེའི་ཤར་རྒྱུད་དུ་ཡོད་པའི་ཞིས་ལཱ་ལི་ཡེ་གྲོང་ཁྱེར་ལ་སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཉིན17རིང་སྐོར་བཅོམ་བྱས་པས་རྐྱེན་ལམ་དུ་ཤོར་བའི་མི་གྲངས300ལྷག་ཙམ་བར་མང་དུ་ཕྱིན་པ་དང་དེའི་ནང་རྒན་རྒོན་དང་བྱིས་པ་ཡང་ཚུད་ཡོད་པ་དང་།  ཤི་རྐྱེན་གཙོ་བོ་ནི་མེ་མདས་བརྒྱབ་པ་དང་གཞན་ཡང་དུག་ཕོག་པའི་ནད་རྟགས་ཡོད་པ་རེད། ཚེས7ཉིན་གྱི་དགོང་མོ། སུའུ་ཏན་གྱི་ཕྱི་འབྲེལ་པུའུ་ཡིས་གསལ་བསྒྲགས་སྤེལ་ནས། སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་འདས་པའི་ཉིན་གཉིས་ཀྱི་ནང་དུ་ཞིས་ལ་ལི་ཡེ་གྲོང་ཁྱེར་དུ་མི120བསད་པར་སྐྱོན་འཛུགས་བྱས་པ་རེད།

སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་དོན་རྐྱེན་དེ་གཉིས་ལ་ལན་ཅི་ཡང་བཏབ་མེད།

ད་ལོའི་ཟླ10པའི་ཚེས20ཉིན། སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གི་དབུས་རྒྱུད་བཀོད་འདོམས་དཔོན་པོ་ཅི་ཁེར་གྱིས་མངའ་འོག་གི་དམག་དཔུང་ཁྲིད་དེ།  སུའུ་ཏན་གྱི་དྲག་ཆས་དམག་དཔུང་ལ་མགོ་བཏེགས་རྗེས་སུ། སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཅེ་ཅི་ལཱ་མངའ་སྡེའི་ཤར་རྒྱུད་ཀྱི་གྲོང་ཚོ་དང་གྲོང་རྡལ་མང་པོར་གཞི་ཁྱོན་ཆེ་བའི་སྒོ་ནས་འཇབ་རྒོལ་བྱས་པ་རེད། སུའུ་ཏན་གྱི་ཕྱི་འབྲེལ་པུའུ་དང་དེ་མིན་དམངས་ཁྲོད་ཀྱི་རྩ་འཛུགས་མང་པོས་སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་གིས་ཅེ་ཅི་ལཱ་མངའ་སྡེ་ལ“འཁོན་ལན་སློག་པར”སྐྱོན་བརྗོད་བྱས་པ་དང་།   འཇབ་རྒོལ་དེའི་དབང་གིས་མང་ཚོགས་བརྒྱ་གྲངས་ཤི་རྨས་བྱུང་ཡོད་ཟེར།

2023ལོའི་ཟླ4པའི་ཚེས15ཉིན།  སུའུ་ཏན་གྱི་དྲག་ཆས་དམག་དཔུང་དང་སུའུ་ཏན་གྱི་མགྱོགས་མྱུར་རོགས་སྐྱོར་དམག་དཔུང་བར་རྒྱལ་ས་ཁར་ཐུམ་དུ་གདོང་ཐུག་དྲག་པོ་བྱུང་རྗེས།  དམག་འཁྲུག་གི་མེ་ལྕེ་དེ་རིམ་བཞིན་ས་ཁུལ་གཞན་དུ་མཆེད་པ་རེད། ལོ་གཅིག་ལྷག་ཙམ་རྒྱུན་མཐུད་པའི་དྲག་ཆས་གདོང་ཐུག་དེ་ལས་སུའུ་ཏན་གྱི་མི་ཁྲི2ལྷག་རྐྱེན་ལམ་དུ་ཤོར་བ་དང་མི་བྱེ་བ་གཅིག་དང་འབུམ་ལྔ་ཁྲི་གསུམ་ལྷག་ཙམ་ཡུལ་འཁྱར་བྱས་ཡོད།