འཇར་མན་གྱི་ཙུང་ཐུང་གིས་རང་དབང་དམངས་གཙོ་ཏང་ཁོངས་ཀྱི་པུའུ་ཀྲང་གསུམ་གྱི་ལས་འགན་མེད་པར་བཏང་།

འཇར་མན་གྱི་ཙུང་ལི་ཧྲོ་ཨར་ཚི་ཡི་རེ་བ་ལྟར། འཇར་མན་རྒྱལ་ཕྲན་མཉམ་འབྲེལ་གྱི་ཙུང་ཐུང་ཧྲི་ཐེ་དབྱིན་མཱེ་ཨར་གྱིས་ཚེས་བདུན་ཉིན། འཇར་མན་རང་དབང་དམངས་གཙོ་ཏང་གི་ཀྲུའུ་ཞི། ནོར་སྲིད་པུའུ་ཀྲང་ལིན་ཏི་ན་སོགས་རང་དབང་དམངས་གཙོ་ཏང་གི་པུའུ་ཀྲང་གསུམ་གྱི་ལས་འགན་མེད་པར་བཏང་།

ཉིན་དེར་ཁྲིམས་འཛིན་པུའུ་ཀྲང་པུའུ་ཧྲིན་མན་དང་། སློབ་གསོ་དང་ཞིབ་འཇུག་པུའུ་ཀྲང་ཧྲི་ཐ་ཁི་ཝ་ཆིན་ཀི་གཉིས་ཀྱི་ལས་འགན་ཀྱང་མེད་པར་བཏང་། ཉིན་དེའི་སྔ་ཤས་སུ། གཞི་གྲངས་ཅན་དང་འགྲིམ་འགྲུལ་པུའུ་ཀྲང་ཝེ་ཞིན་གྱིས་གསར་འགྱུར་སྒྲོག་སྤེལ་ཚོགས་འདུའི་སྟེང་། ཁོས་མུ་མཐུད་ལས་འགན་ཁུར་རྒྱུ་མ་ཟད་རང་དབང་དམངས་གཙོ་ཏང་ནས་ཕྱིར་འབུད་རྒྱུ་ཡིན་ཞེས་བཤད།

ཧྲི་ཐེ་དབྱིན་མཱེ་ཨར་གྱིས་པུའུ་ཀྲང་གསར་པའི་འགན་ཁུར་པ་དང་། ཝེ་ཞིན་གྱིས་མུ་མཐུད་དུ་གཞི་གྲངས་ཅན་དང་འགྲིམ་འགྲུལ་པུའུ་ཀྲང་གི་འགན་ཁུར་རྒྱུ་མ་ཟད་ཁྲིམས་འཛིན་པུའུ་ཀྲང་གི་འགན་གཅིག་ལྕོགས་བྱས་ཤིང་། འཇར་མན་ཙུང་ལི་བཞུགས་ཤག་གི་རྒྱལ་སྲིད་དྲུང་ཡིག་ཕུའེ་ཨར་ཀི·ཁུའུ་ཅི་སི་ནོར་སྲིད་པུའུ་ཀྲང་ལ་བསྐོ་འཇོག་བྱས་པ་དང་། ཟས་རིགས་དང་ཞིས་ལས་པུའུ་ཀྲང་ཅེ་མུའུ·ཨི་ཚི་ཏའེ་མིས་ཨར་གྱིས་སློབ་གསོ་དང་ཞིབ་འཇུག་པུའུ་ཀྲང་གི་འགན་ཁུར།

འཇར་མན་སྲིད་འཛིན་མཉམ་འབྲེལ་བཙུགས་པའི་ཚུན་དུ། འཇར་མན་གྱི་སྤྱི་ཚོགས་དམངས་གཙོ་ཏང་དང་། ལྗང་མདོག་ཏང་། རང་དབང་དམངས་གཙོ་ཏང་བཅས་ལ་ནོར་སྲིད་སྲིད་ཇུས་དང་ཝུའུ་ཁི་ལན་ལ་རོགས་བྱེད་པའི་ལངས་ཕྱོགས་སོགས་གྲོས་གཞི་མང་པོའི་སྟེང་བསམ་ཚུལ་མི་འདྲ་བ་བྱུང་ཡོད། གཟའ་འཁོར་སྔོན་མ་མཇུག་བསྡུས་པ་ནས་བཟུང་། ཏང་གསུམ་གྱིས་བསྟུད་མར་གྲོས་ཚོགས་བསྡུས་ཏེ་གྲོས་མོལ་གཅིག་མཐུན་བྱུང་བར་འདོད་ཀྱང་། མཐའ་མཇུག་ཐུན་མོང་གི་ཐག་གཅོད་ཇུས་གཞི་ཞིག་རྙེད་མ་ཐུབ་པས། ཏང་གསུམ་གྱི་འབྲེལ་བ་ཇེ་སྡུག་ཏུ་གྱུར་བ་རེད། ཧྲོ་ཨར་ཚི་ཡིས་ཚེས་དྲུག་ཉིན་བཤད་རྒྱུར། མཉམ་ལས་ཀྱི་ཡིད་རྟོན་རྨང་གཞི་མེད་པའི་རྐྱེན་གྱིས། ཁོས་ནོར་སྲིད་པུའུ་ཀྲང་ལིན་ཏི་ན་ཡི་ལས་འགན་ལེན་རྒྱུ་ཐག་བཅད་པ་ཡིན་ཟེར། རང་དབང་དམངས་གཙོ་ཏང་གྲོས་ཁང་གི་འགོ་ཁྲིད་པ་ཏིས་ཨར་གྱིས་ཚེས་དྲུག་ཉིན་གྱི་དགོང་མོར་ཁྱབ་བསྒྲགས་བྱས་དོན། རང་དབང་དམངས་གཙོ་ཏང་གི་པུའུ་ཀྲང་ཚང་མ་མཉམ་འབྲེལ་སྲིད་གཞུང་ནས་ཕྱིར་འབུད་རྒྱུ་ཡིན་ཟེར། རང་དབང་དམངས་གཙོ་ཏང་ལ་འཇར་མན་སྲིད་འཛིན་མཉམ་འབྲེལ་ཁྲོད་དུ་པུའུ་ཀྲང་བཞི་ཡོད།

ཧྲོ་ཨར་ཚི་ཡིས་ཚེས་དྲུག་ཉིན་གྱི་དགོང་མོར་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། ཁོས་རྒྱལ་ཕྲན་མཉམ་འབྲེལ་གྲོས་ཁང་འོག་མས་སང་ལོའི་ཟླ1ཚེས25ཉིན་སྲིད་གཞུང་གི་ཡིད་རྟོན་འདེམ་ཤོག་འཕེན་རྒྱུའི་གྲོས་གཞི་བཏོན་ཡོད་ཟེར། འཇར་མན་གྱི་སྨྱན་བྱད་ཀྱིས་བལྟས་ན། ཧྲོ་ཨར་ཚི་ཡིས་ཡིད་རྟོན་འདེམ་ཤོག་འཕེན་རག་བར་དུ་སྲིད་གཞུང་གི་ཁོངས་གཏོགས་ཉུང་ཤས་མུ་མཐུད་སྲུང་འཛིན་བྱ་རྒྱུའི་རེ་བ་བཅངས་ཡོད་པར་འདོད།

འཇར་མན་གྱི་གཞི་རྩའི་བཅའ་ཁྲིམས་ལྟར་ན། གལ་ཏེ་ཧྲོ་ཨར་ཚི་སྲིད་གཞུང་གིས་ཡིད་རྟོན་འདེམ་ཤོག་ཁྲོད་རྒྱལ་ཁ་ལེན་མ་ཐུབ་ན། ཙུང་ཐུང་གིས་ཙུང་ལི་ཡིས་གྲོས་གཞི་བཏོན་པ་ལྟར་རྒྱལ་ཕྲན་མཉམ་འབྲེལ་གྱི་གྲོས་ཁང་མེད་པར་བཏང་ནས། ཉིན་དྲུག་ཅུའི་ནང་འདེམ་བསྐོ་གསར་པ་བྱེད་དགོས།