ཨ་རིའི་ཙུང་ཐུང་འདེམས་བསྐོ་ལས་ཐི་ལིང་ཕུའུ་ལ་རྒྱལ་ཁ་ཐོབ་ནས་སྤྱི་མཐུན་ཏང་གིས་གྲོས་ཁང་གོང་མར་ཚོད་འཛིན་བྱས།

 ཚེས6ཉིན།ཨ་རིའི་སྨྱན་བྱད་མང་པོས་ཚོད་རྩིས་དང་གནས་ཚུལ་སྤེལ་བ་ལྟར་ན།2024ལོའི་ཨ་རིའི་ཙུང་ཐུང་འདེམས་བསྐོའི་ཁྲོད་སྤྱི་མཐུན་ཏང་གི་ཙུང་ཐུང་གི་འོས་མི་ཙུང་ཐུང་ཟུར་པ་ཐི་ལིང་ཕུའུ་ལ་ཐོབ་པའི་འདེམས་ཤོག་དེ་བདམས་ཐོན་བྱུང་བར་མཁོ་བའི་འདེམས་ཤོག270ལས་བརྒལ་ཡོད། གཞན་ཡང་སྤྱི་མཐུན་ཏང་གིས་རྒྱལ་ཚོགས་ཀྱི་གྲོས་ཁང་གོང་མར་ཉུང་མཐར་ཡང་ཐེངས52ལ་ཚོད་འཛིན་བྱ་རྒྱུ་ཡིན་པ་དེའི་ཕྱེད་ཀ་ལྷག་ཙམ་ཟིན་ནས་ཚོད་འཛིན་བྱེད་པའི་དབང་ཆ་ཐོབ་པ་རེད།

ཨ་རིའི་ཤར་ཕྱོགས་ཀྱི་དུས་ཚོད་ཚེས6ཉིན་གྱི་སྔ་དྲོའི་བར་ཨ་རིའི་ཙུང་ཐུང་འདེམས་བསྐོའི་འདེམས་ཤོག་རྩིས་རྒྱག་བཞིན་ཡོད། ཨ་རིའི་མཉམ་འབྲེལ་འཕྲིན་གཏོང་ཁང་དང་ཨ་རིའི་སྐུད་ཡོད་བརྙན་འཕྲིན་གསར་འགྱུར་དྲ་བ།ཁོ་ལོམ་པི་ཡའི་རླུང་འཕྲིན་ཀུང་སི། ཧྥུའུ་ཁི་སི་གསར་འགྱུར་ལས་ཁུངས་སོགས་སྨྱན་བྱད་ཀྱིས་ཁྱབ་བསྒྲགས་བྱས་པའི་ཚོད་རྩིས་མཇུག་འབྲས་ལྟར་ན།ཐི་ལིང་ཕུའུ་ལ་ཕྱེད་ཀ་ལས་བརྒལ་བའི་འདེམས་བསྐོའི་འདེམས་ཤོག་ཐོབ་ཡོད་པ་རེད།

ཨ་རིའི་འདེམས་བསྐོའི་དབྱེ་ཞིབ་མི་སྣས་འདེམས་དམངས་ཀྱིས་དངུལ་ལོར་འགྲེམས་ཐལ་ཤོར་བ་སོགས་དཔལ་འབྱོར་གནད་དོན་ལ་སེམས་ཁྲལ་བྱེད་པ་དང་།ཁྲིམས་འགལ་གནས་སྤོས་ཡུལ་མིའི་གནད་དོན་ལ་སེམས་ཁྲལ་བྱེད་པ་ནི་ཐི་ལིང་ཕུའུ་ཡི་འདེམས་བསྐོ་ལ་རྒྱལ་ཁ་ཐོབ་པའི་རྒྱུ་རྐྱེན་གལ་ཆེན་ཞིག་ཡིན་པར་ངོས་འཛིན་བྱེད་ཀྱི་ཡོད་པ་རེད། གཞན་ཡང་གླིང་ཆེན་ཨ་ཧྥེ་རི་ཁའི་རྒྱུད་དང་ལ་ཏིང་མེ་གླིང་གི་རྒྱུད་པ་ཡིན་པའི་འདེམས་དམངས་ཁྲོད་ཐི་ལིང་ཕུའུ་ལ་རྒྱབ་སྐྱོར་བྱེད་ཚད་ཇེ་མང་དུ་སོང་པ་དེའང་ཁོའི་འདེམས་བསྐོར་རྒྱལ་ཁ་ཐོབ་པའི་རྒྱུ་རྐྱེན་གྱི་གྲས་ཤིག་ཡིན་པར་འདོད།

ཚེས6ཉིན་གྱི་ཐོ་རེངས་དུས་སུ།  ཐི་ལིང་ཕུའུ་ཡིས་ཧྥོ་ལུའོ་ལི་ཏ་མངའ་སྡེའི་ཙུང་ལན་ཐན་རྫོང་གི་ཚོགས་འགྲེམས་ལྟེ་གནས་སུ་རྒྱལ་ཁ་ཐོབ་པའི་གཏམ་བཤད་བྱས་ཤིང་། དམངས་གཙོ་ཏང་གི་ཙུང་ཐུང་གི་བདམ་བྱའི་འོས་མི།  ཨ་རིའི་ད་ལྟའི་ཙུང་ཐུང་གཞོན་པ་ཧ་ལི་སི་ཡིས་འདེམས་བསྐོའི་མཇུག་འབྲས་ལ་རྣམ་འགྱུར་ཅི་ཡང་བསྟན་མེད།

ཨ་རིའི་ཙུང་ཐུང་འདེམས་བསྐོ་བྱེད་པར་འདེམས་བསྐོ་པའི་ཚོགས་པའི་ལམ་ལུགས་ལག་བསྟར་བྱེད་པ་དང་།འདེམས་བསྐོའི་ཁྲོད་རྒྱལ་ཁ་ཐོབ་ན་ཨ་རི་ཡོངས་ཀྱི་འདེམས་བསྐོའི་འདེམས་ཤོག538ཀྱི་ཕྱེད་ཀ་ཡན་ཐོབ་དགོས་པ་སྟེ་ཉུང་མཐར་ཡང་འདེམས་ཤོག270ཐོབ་དགོས།

2024ལོའི་ཨ་རིའི་འདེམས་བསྐོ་ཆེན་མོའི་འདེམས་བསྐོའི་ཉིན་མོར་འདེམས་ཤོག་འཕེན་རྒྱུ་དེ་ས་གནས་དེའི་དུས་ཚོད་ཚེས5ཉིན་ནས་འགོ་བརྩམས་ཏེ།སྐབས་རྗེས་མའི་ཨ་རིའི་ཙུང་ཐུང་དང་རྒྱལ་ཚོགས་ཀྱི་གྲོས་མི་བརྒྱ་ཕྲག་ཁ་ཤས། དེ་མིན་མངའ་སྡེ་དང་ས་གནས་ཀྱི་དཔོན་རིགས་འབོར་ཆེན་བཅས་འདེམས་པ་རེད། ཚེས6ཉིན།ཨ་རིའི་སྨྱན་བྱད་སྡེ་ཁག་མང་པོ་ཞིག་གིས་ཚོད་རྩིས་དང་གནས་ཚུལ་སྤེལ་བ་ལྟར་ན།སྤྱི་མཐུན་ཏང་ལ་རྒྱལ་ཚོགས་ཀྱི་གྲོས་ཁང་གོང་མའི་ཚོད་འཛིན་དབང་ཆ་ཐོབ་པ་དང་གྲོས་ཁང་འོག་མའི་ཚོད་འཛིན་དབང་ཆའི་གཏོགས་ཁོངས་གསལ་བོར་བཟོས་མེད་པ་རེད།

ཐི་ལིང་ཕུའུ1892ལོར་དམངས་གཙོ་ཏང་མི་སི་ཏི་ཧྥན·ཁེ་ལི་ཧྥུའུ་ལན་རྗེས་ཀྱི་ཨ་རིའི་ལོ་རྒྱུས་སྟེང་གི་འདེམས་བསྐོའི་ནང་བསྟུད་མར་ཐེངས་གསུམ་ལ་ཞུགས་པར་མ་ཟད།　ཕམ་ཁ་བྱུང་རྗེས་སླར་ཡང་བདམས་ཐོན་བྱུང་བའི་ཙུང་ཐུང་དེ་རེད།ཐི་ལིང་ཕུའུ་ད་ལོ་ལོ78ཡིན་པ་དང་།སང་ལོའི་ཟླ་དང་པོར་འགན་བཞེས་སྐབས་ཁོ་ཨ་རིའི་ལོ་རྒྱུས་སྟེང་ལོ་ན་རྒན་ཤོས་ཀྱི་ཙུང་ཐུང་དུ་འགྱུར་རྒྱུ་རེད།

ཨ་རིའི་སྐུད་ཡོད་བརྙན་འཕྲིན་གསར་འགྱུར་དྲ་བའི་སྟེང་ཚེས5ཉིན་ཁྱབ་བསྒྲགས་བྱས་པའི་ཕྱིར་གཏོང་དམངས་འདོད་བརྟག་དཔྱད་ལས་མངོན་ལྟར་ན།ཨ་རིའི་འདེམས་དམངས་བཞི་ཆའི་གསུམ་གྱིས་ད་ལྟའི་གནས་ཚུལ་ལ་ལྟ་སྟངས་ངན་པ་འཛིན་གྱི་ཡོད། ཞིབ་ཏུ་བརྗོད་ན་བཅར་འདྲི་དང་ལེན་བྱེད་མཁན་བཅུ་ཆའི་བཞི་ཡིས་ཨ་རིའི་ད་ལྟའི་གནས་ཚུལ་ལ་མི་འདོད་པའི་རྣམ་འགྱུར་བསྟན་པ་དང་བཅུ་ཆའི་གསུམ་ཙམ་ཨ་རིའི་ད་ལྟའི་གནས་ཚུལ་ལ་ཁོང་ཁྲོ་ལངས་བཞིན་ཡོད་པ་རེད། དབྱེ་ཞིབ་མི་སྣས་ཨ་རིའི་སྤྱི་ཚོགས་ཀྱི་གནད་དོན་མང་པོའི་ཐད་སྔར་བཞིན་འགལ་བ་ཚབས་ཆེན་དང་ཁ་གཏད་དུ་ལངས་པའི་གནས་ཚུལ་ཚབས་ཆེན་ཡིན་པས་སྲིད་གཞུང་གསར་པའི་སྲིད་འཛིན་ཐད་འགྲན་སློང་དྲག་པོར་འཕྲད་ཡོད་པར་འདོད།