སུའུ་ཏན་གྱིས་འདར་ནད་ཀྱི་རིམས་འགོག་སྨན་ཁབ་རིམ་བཞིན་བྱིས་པའི་རྒྱུན་ལྡན་གྱི་རིམས་འགོག་སྨན་ཁབ་ཁྲོད་བཞག

ཚེས4ཉིན་ནས་བཟུང་།  འདར་ནད་ཀྱི་ཤི་ཚད་ཇེ་ཉུང་དུ་གཏོང་ཆེད། སུའུ་ཏན་འཕྲོད་བསྟེན་པུའུ་ཡིས་ཅ་ཏ་ལི་ཧྥུའུ་མངའ་སྡེ་དང་ཆིན་ཉི་ལའོ་ཧི་མངའ་སྡེ་རུ་འདར་ནད་ཀྱི་རིམས་འགོག་སྨན་ཁབ་བྱིས་པའི་རྒྱུན་ལྡན་གྱི་རིམས་འགོག་སྨན་ཁབ་ཀྱི་ཁོངས་སུ་བཞག་པར་མ་ཟད། སང་ལོ་ནས་བཟུང་རྒྱལ་ནང་གི་འདར་ནད་ཀྱི་ཉེན་ཁ་ཆེ་བའི་ས་ཁུལ་གཞན་དག་ཏུ་ཁྱབ་གདལ་དུ་གཏོང་རྒྱུ་རེད།

ཟླ11པའི་ཚེས4ཉིན།  སུའུ་ཏན་ཤར་རྒྱུད་ཀྱི་ཅ་ཏ་ལི་ཧྥུའུ་མངའ་སྡེ་ལྟེ་བའི་གྲོང་ཁྱེར་ཅ་ཏ་ལི་ཧྥུའུ་གྲོང་ཁྱེར་གྱི་རིམས་འགོག་སྨན་ཁབ་རྒྱག་སའི་ལྟེ་གནས་སུ་བུ་མོ་ཆུང་ཆུང་ཞིག་གིས་འདར་ནད་ཀྱི་རིམས་འགོག་སྨན་ཁབ་རྒྱག་པར་སྒུག་ནས་བསྡད་ཡོད་པ།

སུའུ་ཏན་གྱི་འཕྲོད་བསྟེན་པུའུ་ཡི་པུའུ་ཀྲང་དབྱི་པུའུ་ལ་ཞིན་གྱིས་ཉིན་དེར་རྒྱལ་ཁབ་དེའི་ཤར་རྒྱུད་ཀྱི་ཅ་ཏ་ལི་ཕུའུ་མངའ་སྡེ་ཡི་ལྟེ་བའི་གྲོང་ཁྱེར་ཅ་ཏ་ལི་ཕུའུ་རུ་བསྡུས་པའི་གསར་འགྱུར་ཁྱབ་བསྒྲགས་ཚོགས་འདུའི་སྟེང་བཤད་རྒྱུར། ཁྱབ་གདལ་དུ་བཏང་བའི་འདར་ནད་ཀྱི་རིམས་འགོག་སྨན་ཁབ་དེར་འཛམ་གླིང་འཕྲོད་བསྟེན་རྩ་འཛུགས་ཀྱི་ཆོག་མཆན་ཐོབ་པ་དེའི་ནང་སྨན་རྫས4ཚུད་ཡོད་ཟེར།  སུའུ་ཏན་ནི་འཛམ་གླིང་འཕྲོད་བསྟེན་རྩ་འཛུགས་ཀྱི་ས་དབུས་རྒྱ་མཚོ་ཤར་མའི་ས་ཁུལ་གྱི་འདར་ནད་ཀྱི་རིམས་འགོག་སྨན་ཁབ་བྱིས་པའི་རྒྱུན་གཏན་གྱི་རིམས་འགོག་སྨན་ཁབ་ཀྱི་ཁོངས་སུ་བཅུག་པའི་རྒྱལ་ཁབ་དང་པོ་དེ་རེད།

འཛམ་གླིང་འཕྲོད་བསྟེན་རྩ་འཛུགས་ཀྱི་གཞི་གྲངས་ལས་མངོན་པ་ལྟར་ན། འདར་ནད་ནི་ཚ་ཁུལ་དང་ཚ་ཁུལ་ཕལ་བའི་རྒྱལ་ཁབ་ཏུ་སྔར་བཞིན་མཐོང་རྒྱུ་ཡོད་པ་དང་། 2022ལོར་གོ་ལ་ཧྲིལ་པོར་མི་དུང་ཕྱུར་གཉིས་དང་བྱེ་བ་བཞི་ས་ཡ་དགུ་ ཙམ་ལ་འདར་ནད་འགོས་པའི་ཁྲོད་མི་འབུམ་དྲུག་ལྷག་རྐྱེན་ལམ་དུ་ཤོར་བ་རེད། 2023ལོར་སུའུ་ཏན་དུ་འདར་ནད་ཕོག་མཁན་ས་ཡ་གསུམ་དང་འབུམ་བཞི་ལྷག་ཙམ་ཡོད་པའི་ནང་མི7900ཙམ་རྐྱེན་ལམ་དུ་ཤོར་ཡོད་པ་རེད།