མཉམ་འབྲེལ་རྒྱལ་ཚོགས་ཀྱིས་གཏན་འགོག་འདི་མེད་པར་བཟོས།

མཉམ་འབྲེལ་རྒྱལ་ཚོགས་ཀྱིས་གཏན་འགོག་འདི་མེད་པར་བཟོས།

ཚེས30ཉིན། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་གྲོས་ཆོད་ཨང2745པར་མགྲིན་གཅིག་ཏུ་གྲོས་འཆམ་བྱུང་ནས། ཧྥེ་གླིང་དབུས་མ་སྤྱི་མཐུན་རྒྱལ་ཁབ་ཀྱི་མཚོན་ཆ་སྐྱེལ་འདྲེན་བཀག་སྡོམ་མེད་པར་བཟོ་རྒྱུའི་ཐག་བཅད་པ་རེད། 

གྲོས་ཆོད་ནང་དེ་དང་ཆབས་ཅིག་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཚང་མས2025ལོའི་ཟླ7པའི་ཚེས31ཉིན་གྱི་གོང་ལ་དགོས་ངེས་ཀྱི་བྱ་ཐབས་སྤྱད་དེ། ཧྥེ་གླིང་དབུས་མ་སྤྱི་མཐུན་རྒྱལ་ཁབ་ཀྱི་མངའ་ཁོངས་སུ་བྱེད་སྒོ་སྤེལ་མཁན་དྲག་ཆས་ཚོགས་པ་དང་འབྲེལ་ཡོད་སྒེར་པར་རིགས་སྣ་ཚོགས་ཀྱི་མཚོན་ཆ་དང་། འབྲེལ་ཡོད་དངོས་ཟོག་མཁོ་འདོན་དང་། ཕྱིར་ཚོང་ངམ་བཤུག་སྤྲོད་བཅས་བྱ་རྒྱུ་བཀག་འགོག་བྱེད་དགོས་པའི་བླང་བྱ་བཏོན་ཡོད་པ་རེད། 

གྲོས་ཆོད་ནང་ཧྥེ་གླིང་དབུས་མ་སྤྱི་མཐུན་རྒྱལ་ཁབ་ཀྱི་བཀག་སྡོམ་རིགས་གཅིག་མཁས་ཅན་ཚོ་ཆུང་གི་འགན་འཁུར་ཡུན2025ལོའི་ཟླ8པའི་ཚེས31ཉིན་བར་ཕྱིར་འགྱངས་བྱ་རྒྱུ་དང་། རིགས་གཅིག་མཁས་ཅན་ཚོ་ཆུང་གིས་ཆེས་འགོར་ན2025ལོའི་ཟླ1པོའི་ཚེས31ཉིན་གྱི་སྔོན་ལ་བདེ་འཇགས་ལས་འཛིན་ལྷན་ཚོགས་ལ་དུས་འབྲིང་གི་སྙན་ཞུ་ཞིག་དང་། འགོར་ཤོས་ལ2025ལོའི་ཟླ6པའི་ཚེས15ཉིན་གྱི་སྔོན་ལ་མཐའ་མའི་སྙན་ཞུ་ཞིག་འབུལ་དགོས་པའི་བླང་བྱ་བཏོན་པ་མ་ཟད། རིགས་གཅིག་མཁས་ཅན་ཚོ་ཆུང་ལ་རྒྱལ་ཁབ་དེའི་དྲག་ཆས་ཚོགས་པར་མུ་མཐུད་མ་དངུལ་དང་མཁོ་སྤྲོད་བྱེད་པའི་ཁྲིམས་འགལ་རྒྱལ་སྒྲོལ་འདྲེན་ཚོང་དྲ་རྒྱ་ལ་དབྱེ་ཞིབ་བྱ་རྒྱུར་དམིགས་བསལ་དོ་སྣང་དགོས་པའི་བླང་བྱ་བཏོན་པ་རེད། 

2013ལོའི་ཟླ12པར། མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་གྲོས་ཆོད་ལ་གྲོས་འཆམ་བྱུང་ནས། ཧྥེ་གླིང་དབུས་མ་སྤྱི་མཐུན་རྒྱལ་ཁབ་ཀྱི་ཞི་བདེ་དང་བརྟན་ལྷིང་ལ་གཏོར་བཤིག་གཏོང་མཁན་ལ་མཚོན་ཆ་སྐྱེལ་འདྲེན་བྱེད་རིགས་བཀག་སྡོམ་བྱ་རྒྱུའི་ཐག་བཅད་པ་རེད། 2014ལོའི་ཟླ་དང་པོར། བདེ་འཇགས་ལས་འཛིན་ལྷན་ཚོགས་ཀྱིས་ཡུལ་སྐོར་བཀག་རྒྱ་དང་རྒྱུ་ནོར་བསྡམས་བཅད་ཀྱི་བཀག་སྡོམ་བྱེད་ཐབས་སྔར་ལས་ལྷག་པར་སྤྱོད་རྒྱུའི་ཐག་བཅད་པ་རེད། བདེ་འཇགས་ལས་འཛིན་ལྷན་ཚོགས་ཀྱིས་དེའི་རྗེས་སུ་བཀག་སྡོམ་བྱེད་ཐབས་དེ་དག་ཕྱིར་འགྱངས་ཐེངས་མང་བྱས་པ་རེད།