དབྱི་སི་རལ་གྱི་དམག་དཔུང་གིས་ཅཱ་ཧྲ་ས་ཁུལ་གྱི་མཉམ་འབྲེལ་རྒྱལ་ཚོགས་ཀྱི་སློབ་གྲྭ་ཞིག་ལ་བར་སྣང་འཇབ་རྒོལ་བྱས་པ་ཁས་ལེན་བྱས།

དབྱི་སི་རལ་གྱི་དམག་དཔུང་གིས་ཅཱ་ཧྲ་ས་ཁུལ་གྱི་མཉམ་འབྲེལ་རྒྱལ་ཚོགས་ཀྱི་སློབ་གྲྭ་ཞིག་ལ་བར་སྣང་འཇབ་རྒོལ་བྱས་པ་ཁས་ལེན་བྱས།

དབྱི་སི་རལ་གྱི་རྒྱལ་སྲུང་དམག་དཔུང་གིས་ཚེས6ཉིན་གསལ་སྒྲོག་སྤེལ་ཏེ། ཉིན་དེའི་སྔ་དྲོར་ཅཱ་ཧྲ་ས་ཁུལ་དུ་ཡོད་པའི་མཉམ་འབྲེལ་རྒྱལ་ཚོགས་ཀྱི་སློབ་གྲྭ་ཞིག་ལ་བར་སྣང་འཇབ་རྒོལ་བྱས་པ་ཁས་ལེན་བྱས།

གསལ་སྒྲོག་ལས་བཤད་རྒྱུར། རྒྱལ་ཁབ་བདེ་འཇགས་སྤྱི་ཁྱབ་ཅུའུ་དང་ལྷོ་ཕྱོགས་དམག་སྤྱི་ཁང་གི་གསང་འཕྲིན་ལྟར་ན། ཅཱ་ཧྲའི་དབུས་ཕྱོགས་ཀྱི་མཉམ་འབྲེལ་རྒྱལ་ཚོགས་ཀྱི་སློབ་གྲྭ་ཞིག་ཕཱ་ལེ་སི་ཐན་དབྱི་སི་ལན་འགོག་རྒོལ་རྩ་འཛུགས་ཧཱ་མཱ་སིའི་དྲག་ཆས་མི་སྣ་སྦས་སྐོང་བྱེད་ས་དང་བཀོད་འདོམ་ལྟེ་གནས་སུ་བྱས་ཡོད་པས། དབྱི་སི་རལ་གྱི་དམག་དཔུང་གིས་ཚེས6ཉིན་སློབ་གྲྭ་དེའི་ནང་གི་འཇིགས་སྐུལ་ཉེས་ཅན་ལ་བར་སྣང་འཇབ་རྒོལ་བྱས་པ་དང་། སློབ་གྲྭ་དེར་བར་སྣང་འཇབ་རྒོལ་མ་བྱས་གོང་། དབྱི་སི་རལ་གྱི་དམག་དཔུང་གིས་བྱེད་ཐབས་མང་བོ་སྤྱད་དེ་མི་སེར་དཀྱུས་མའི་གནོད་པ་ཇེ་ཆུང་དུ་བཏང་ཡོད་ཟེར།

ཧཱ་མཱ་སིའི་སྨྱན་བྱད་གཞུང་སྒྲུབ་ཁང་གིས་ཚེས6ཉིན་སྤེལ་བའི་གསལ་སྒྲོག་ལས་བཤད་རྒྱུར། དབྱི་སི་རལ་གྱི་དམག་དཔུང་གིས་ཉིན་དེའི་ཕྱི་དྲོར་དབུས་ཕྱོགས་ཀྱི་ནོའུ་སེ་ལའེ་ཐི་ཡུལ་གྱར་བའི་སྒར་སའི་སློབ་གྲྭ་ཞིག་ལ་འཇབ་རྒོལ་བྱས་ཏེ། ཉུང་མཐར་ཡང་མི16རྐྱེན་ལམ་དུ་ཤོར་བ་དང་། གཞན་ཡང་མི75ལ་རྨས་ཕོག་ཡོད་ཟེར།

གསལ་སྒྲོག་ལས་བཤད་རྒྱུར། འཇབ་རྒོལ་ཐེབས་པའི་སློབ་གྲྭ་དེའི་ནང་ཡུལ་འཁྱམས་བྱེད་པའི་མང་ཚོགས་སྟོང་བདུན་ཙམ་ཡོད་པ་དང་། ན་ནིང་གི་ཟླ་བཅུ་བར་སྐོར་ཐེངས་གསར་བའི་ཕཱ་ལེ་སི་ཐན་དང་དབྱི་སི་རལ་གྱི་འཁྲུག་རྩོད་བྱུང་བའི་ཚུན་ལ། དབྱི་སི་རལ་གྱི་དམག་དཔུང་གིས་ནོའུ་སེ་ལའེ་ཐི་ཡུལ་གྱར་བའི་སྒར་སའི་ནང་གི་སློབ་གྲྭ་བཅུ་བདུན་ལྷག་དང་ཡུལ་གྱར་བའི་ལྟེ་གནས་སོགས་ཀྱི་སྒྲིག་ཆས་ལ་འགས་གཏོར་བཏང་ཡོད་པ་རེད།