ངས་ཚོང་ཁང་དེར་ཚོང་རྫས་ཕྱིར་སློག་པའི་རེ་བ་གདོན་ཆོག་གམ།

ངས་ཚོང་ཁང་དེར་ཚོང་རྫས་ཕྱིར་སློག་པའི་རེ་བ་གདོན་ཆོག་གམ།

བློ་མཐུན་རྩོམ་སྒྲིག་པ་ལགས།

ངའི་བྱིས་པ་ནི་དམའ་འབྲིང་ལོ་རིམ་གསུམ་པའི་སློབ་མ་ཡིན་ལ་ད་ལོར་ལོ15ལ་སོན་ཡོད། ད་ལོའི་ཟླ6པའི་ཉིན་ཞིག་ལ་མོས་ངེད་བཟའ་ཟླ་གཉིས་མེད་པའི་གོ་སྐབས་དང་བསྟུན་ནས་ཁྱིམ་དུ་གསོག་འཇོག་བྱས་ཡོད་པའི་སྒོར3000ཡོད་པ་དེ་ཁྱེར་ནས་གསེར་གྱི་རྣ་རྒྱན་ཞིག་ཉོས། ངས་གནས་ཚུལ་དེ་ཤེས་འཕྲལ་མོ་ལ་གཤེ་གཤེ་བཏང་ནས་རྗེས་ཕྱོགས་དེ་ལྟ་བུའི་ལས་མི་བསགས་པའི་སློབ་གསོ་ལེགས་པོ་ཞིག་ཀྱང་བཏང་བ་ཡིན། མོས་ཀྱང་རང་སྐྱོན་ངོས་ལེན་བྱས་པར་མ་ཟད་གསེར་གྱི་རྣ་རྒྱན་དེ་ཚོང་ཁང་གང་དུ་ཉོས་པ་སོགས་གསལ་བོར་བཤད་ནས་ཚོང་བདག་ང་ལ་སྤྲད། འདིར་ཁྱེད་བཅའ་ཁྲིམས་བློ་སྟོན་ཁང་ལ་འདྲི་རྒྱུ་ཞིག་ཡོད་པ་ནི་གནས་ཚུལ་འདི་ལྟ་བུའི་འོག་ངས་ཚོང་ཁང་དེ་བཙལ་ནས་ཚོང་རྫས་ཕྱིར་བསློག་ཆོག་པའི་རེ་བ་གདོན་ཆོག་གམ།

ཞེས་འབྲུག་ཐར་གྱིས།

བློ་མཐུན་འབྲུག་ཐར་ལགས།

རང་རྒྱལ་གྱི《དམངས་ཁྲིམས་སྤྱི་སྲོལ》གྱི་གཏན་ཁེལ་ལྟར་ན། དམངས་དོན་བྱ་སྤྱོད་ལ་ནུས་པ་ཡོད་པའི་རྒྱུ་རྐྱེན་གཅིག་ནི་བྱ་སྤྱོད་སྤེལ་མཁན་གྱི་མི་ལ་འོས་འཚམ་གྱི་དམངས་དོན་བྱ་སྤྱོད་སྤེལ་བའི་ནུས་པ་ཡོད་དགོས། ལོ10ཡན་གྱི་ནར་མ་སོན་པའི་མིི་ནི་དམངས་དོན་བྱ་སྤྱོད་ཀྱི་ནུས་པར་ཚད་བཀག་ཡོད་པའི་མི་ཡིན་ལ། སྤྱིར་བཏང་དུ་ཁོས་རང་གི་ལོ་ཚོད་དང་ཤེས་པ་ལ་འཚམ་པའི་དམངས་དོན་བྱ་འགུལ་ལ་ཞུགས་ཆོག་ཀྱང་། གཞན་པའི་དམངས་དོན་བྱ་འགུལ་ལ་ཞུགས་པར་ཁོའི་ཁྲིམས་བཀོད་འཐུས་ཚབ་པས་འཐུས་ཚབ་བྱེད་པའམ་ཡང་ན། ཁྲིམས་བཀོད་འཐུས་ཚབ་པའི་བསམ་འཆར་བསྡུ་ལེན་བྱས་ནས་ཡིད་འཐད་བྱུང་དགོས། ལོ16ཡན་དང་ལོ18མན་གྱི་སྤྱི་དམངས་ཀྱིས་རང་གི་ངལ་རྩོལ་ལ་བརྟེན་ནས་འཚོ་བའི་ཡོང་འབབ་འཚོལ་བཞིན་ཡོད་པས་དེ་ནི་དམངས་དོན་བྱ་སྤྱོད་ཀྱི་ནུས་པ་ཡོད་པའི་མི་རུ་ངོས་འཛིན་བྱ་ཆོག རང་རྒྱལ་གྱི《གན་རྒྱའི་བཅའ་ཁྲིམས》ལས་ད་དུང་དམངས་དོན་བྱ་སྤྱོད་ཀྱི་ནུས་པར་ཚད་བཀག་ཡོད་པའི་མིས་གན་རྒྱ་འཇོག་སྐབས་ངེས་པར་ཁོའི་ཁྲིམས་བཀོད་འཐུས་ཚབ་པ་ཡིད་འཐད་བྱུང་རྗེས་ད་གཟོད་གན་རྒྱ་དེར་ནུས་པ་ཡོད་ཅེས་གཏན་ཁེལ་བྱས་ཡོད། ཁྱོད་ཀྱིས་བཏོན་པའི་འདྲི་གཞིའི་ནང་སློབ་འབྲིང་འདོན་བཞིན་པའི་ཁྱོད་ཀྱི་བྱིས་པ་ནི་དམངས་དོན་བྱ་སྤྱོད་སྤེལ་བར་ཚད་བཀག་ཡོད་པའི་མི་ཡིན་པས། མོས་སྒོར3000ཅན་གྱི་རྣ་རྒྱན་ཉོས་པའི་བྱ་སྤྱོད་ནི་མོའི་ལོ་ཚོད་དང་ཤེས་པ་ལ་མི་འཚམ། གལ་ཏེ་ཁྱོད་ཀྱིས་ཁོ་མོའི་བྱ་སྤྱོད་དེ་དང་ལེན་མི་བྱེད་ཚེ་མོས་སྤེལ་བའི་དམངས་དོན་བྱ་སྤྱོད་དེ་ནི་ནུས་མེད་ཀྱི་དམངས་དོན་བྱ་སྤྱོད་ཅིག་ཡིན་པས། ཁྱོད་ཀྱིས་ཚོང་ཁང་དེ་བཙལ་ནས་ཚོང་རྫས་ཕྱིར་བསློག་པའི་རེ་བ་གདོན་ཆོག་ལ། ཚོང་ཁང་གིས་ཀྱང་ཚོང་རྫས་ཕྱིར་བསློག་ངེས་ཡིན།

ཞེས་འདི་གའི་བཅའ་ཁྲིམས་བློ་སྟོན་ཁང་གིས།