གཞན་གྱི་བྱིས་པ་སྐྱོབ་ཆེད་རང་ཉིད་ལ་རྨས་སྐྱོན་ཐེབས་ན་གྱོང་གུད་སུས་འཁུར་དགོས།
བློ་མཐུན་རྩོམ་སྒྲིག་པ་ལགས།
ངའི་གྲོགས་པོ་བཀྲ་ཤིས་ཀྱིས་ད་ལྟ་ཟི་ལིང་གྲོང་ཁྱེར་གྱི་མྱུར་སྐྱེལ་ཀུང་སི་ཞིག་ཏུ་མྱུར་སྐྱེལ་བའི་བྱ་བ་གཉེར་བཞིན་ཡོད་ལ།ཉིན་ཞིག་ཁོ་རང་ལས་ཀ་གྲོལ་ནས་ཕྱིར་ཁྱིམ་དུ་ལོག་པའི་ལམ་བར་དུ།ལམ་འགྲམ་དུ་བཞག་ཡོད་པའི་རླངས་འཁོར་ཞིག་ལས་ལོ་བཞི་ལྔ་ཙམ་ཡིན་པའི་བྱིས་པ་ཞིག་མར་བབས་ནས་ལམ་དཀྱིལ་དུ་རྒྱུག་བཞིན་པ་མཐོང་བྱུང་།ཏག་ཏག་སྐབས་དེར་ཧ་ཅང་མགྱོགས་པའི་རླངས་འཁོར་ཆུང་ཆུང་ཞིག་བྱིས་པའི་ཕྱོགས་སུ་མཆོང་ནས་ཡོང་བཞིན་ཡོད་ཅིང་།གནས་ཚུལ་ཛ་དྲག་ཡིན་པའི་སྐབས་དེར་བཀྲ་ཤིས་ཀྱིས་རང་སྲོག་ལ་མ་འཛེམ་པར་བྱིས་པའི་ཕྱོགས་སུ་བརྒྱུགས་ཤིང་།བྱིས་པ་དེ་པང་དུ་བླངས་ནས་རྨས་སྐྱོན་ཕོག་ཏུ་མ་བཅུག ཡིན་ཡང་རླངས་འཁོར་གྱི་མྱུར་ཚད་ཤིན་ཏུ་མགྱོགས་པས་བཀྲ་ཤིས་ཀྱི་ལུས་པོར་བརྡུངས་ནས་རྨས་སྐྱོན་བཟོས་འདུག དེ་ནས་བཀྲ་ཤིས་སྨན་ཁང་དུ་སྨན་བཅོས་བྱེད་པར་བསྐྱལ་ཏེ་བརྟག་དཔྱད་བྱས་པ་ན།བཀྲ་ཤིས་ཀྱི་རྐང་པའི་རུས་པ་བཅག་འདུག་པར་གཏན་འཁེལ་བྱས་ཤིང་འཕྲལ་མར་སྨན་ཁང་དུ་བསྡད་ནས་གཤག་བཅོས་བྱ་དགོས་ཞེས་ཟེར།འདིར་ཁྱེད་བཅའ་ཁྲིམས་བློ་སྟོན་ཁང་ལ་དྲི་རྒྱུ་ཞིག་ཡོད་པ་ནི།བཀྲ་ཤིས་ཀྱིས་གཞན་གྱི་བྱིས་པ་སྐྱོབ་ཆེད་རང་ཉིད་ལ་རྨས་སྐྱོན་ཐེབས་ན་གྱོང་གུད་སུས་འཁུར་དགོས།
ཞེས་སྟོབས་ལྡན་ནས།
བློ་མཐུན་སྟོབས་ལྡན་ལགས།
གྱོད་དོན་འདི་ནི་མི་གཞན་གྱི་མི་ལུས་ཁེ་དབང་སྲུང་སྐྱོང་བྱ་ཆེད་རང་ཉིད་ལ་གནོད་འཚེ་ཕོག་པ་དང་འབྲེལ་བ་ཡོད་པས།དབང་གནོད་འགན་འཁྲི་སུས་འཁུར་དགོས་པའི་བཅའ་ཁྲིམས་ཀྱི་གནད་དོན་ཞིག་རེད།བཀྲ་ཤིས་ཀྱི་མི་ལུས་ལ་གནོད་འཚེ་ཕོག་པའི་གྱོང་གུད་དེ་བྱིས་པའི་ཁྱིམ་བདག་གིས་འཁུར་དགོས་ཏེ།རང་རྒྱལ་གྱི《དམངས་དོན་ཁྲིམས་གཞུང》གི་དོན་ཚན183པར།"མི་གཞན་གྱི་དམངས་དོན་ཁེ་དབང་སྲུང་སྐྱོང་བྱས་ཏེ་རང་ཉིད་ལ་གནོད་འཚེ་ཕོག་པ་ཡིན་ན།དབང་གནོད་མཁན་གྱིས་དམངས་དོན་འགན་འཁྲི་འཁུར་དགོས་པ་དང་།ཁེ་ཕན་ཐོབ་མཁན་གྱིས་འོས་འཚམ་གྱི་སྐྱིན་ཚབ་སྤྲད་ཆོག དབང་གནོད་མཁན་མེད་པའམ་དབང་གནོད་མཁན་བྲོས་བྱོལ་དུ་སོང་བ།ཡང་ན་དམངས་དོན་འགན་འཁྲི་འཁུར་ནུས་མེད་པ།གནོད་འཚེ་ཕོག་མཁན་གྱིས་སྐྱིན་ཚབ་སྤྲད་དགོས་པའི་རེ་བ་ཞུས་པ་ཡིན་ན།ཁེ་ཕན་ཐོབ་མཁན་གྱིས་འོམ་འཚམ་གྱི་སྐྱིན་ཚབ་སྤྲད་དགོས"ཞེས་གཏན་འབེབས་བྱས་ཡོད།གཏན་འབེབས་འདི་ལས་ཤེས་གསལ་ལྟར་ན།མི་གཞན་གྱི་མི་ལུས་དང་རྒྱུ་ནོར་གྱི་ཁེ་དབང་སྲུང་སྐྱོང་བྱ་ཆེད་རང་ཉིད་ལ་གནོད་འཚེ་ཕོག་པ་ཡིན་ན།གནོད་འཚེ་ཕོག་མཁན་གྱིས་དབང་གནོད་མཁན་ལ་དབང་གནོད་སྐྱིན་ཚབ་འགན་འཁྲི་འཁུར་དགོས་པའི་རེ་བ་གདོན་ཆོག་ལ།དབང་གནོད་མཁན་མེད་པ་དང་དབང་གནོད་མཁན་བྲོས་བྱོལ་དུ་སོང་བའམ།ཡང་ན་དམངས་དོན་འགན་འཁྲི་འཁུར་ནུས་མེད་པ་ཡིན་ན།གནོད་འཚེ་ཕོག་མཁན་གྱིས་ཀྱང་ཁེ་ཕན་ཐོབ་མཁན་ལ་འོས་འཚམ་གྱི་སྐྱིན་ཚབ་སྤྲད་དགོས་པའི་རེ་བ་གདོན་ཆོག་པ་ཤེས་ཐུབ།
གྱོད་དོན་འདིའི་ཁྲོད་དུ།བཀྲ་ཤིས་ཀྱིས་ལོ་བཞི་ལྔ་ཙམ་ཡིན་པའི་བྱིས་པ་ཞིག་རླངས་འཁོར་གྱིས་བརྡུངས་ནས་རྨས་སྐྱོན་མི་བཟོ་བའི་ཆེད་དུ།རང་ཉིད་ལ་རྨས་སྐྱོན་བཟོ་རུ་བཅུག་པ་ཡིན་ཞིང་།འདི་ནི་མི་གཞན་གྱི་དམངས་དོན་ཁེ་དབང་སྲུང་སྐྱོང་བྱས་ཏེ་རང་ཉིད་ལ་གནོད་འཚེ་ཕོག་པ་ཡིན་ལ།གྱོད་དོན་འདི་འགྲིམ་འགྲུལ་དོན་རྐྱེན་གྱི་གོ་རིམ་ལྟར་སྐྱིན་ཚབ་སྤྲད་ཆོག བཀྲ་ཤིས་ཀྱིས་དོན་རྐྱེན་བཟོ་མཁན་གྱི་ཁ་ལོ་བར་སྐྱིན་ཚབ་སྤྲད་དགོས་པའི་རེ་བ་གདོན་ཆོག གལ་ཏེ་དོན་རྐྱེན་བཟོ་མཁན་གྱི་ཁ་ལོ་བ་བྲོས་བྱོལ་དུ་སོང་བའམ།ཡང་ན་འགན་འཁྲི་འཁུར་ནུས་མེད་ཚེ་བྱིས་པའི་ཁྱིམ་བདག་ཁེ་ཕན་ཐོབ་མཁན་ཡིན་པའི་ཆ་ནས་འོས་འཚམ་གྱི་སྐྱིན་ཚབ་སྤྲད་དགོས།
ཞེས་འདི་གའི་བཅའ་ཁྲིམས་བློ་སྟོན་ཁང་ནས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注