རྨ་ལྷོའི་གཞུང་ལམ་ཤར་གཏོང་ལམ་ཐག་སྤྱི་ལེ6000བརྒལ་བ།

ཟླ1པོའི་ཚེས1ཉིན། ཁམས་ར་ལྗོངས་ཁུལ་དུ་ཡུལ་སྐོར་པ་ཤིན་ཏུ་མང་། “དེ་སྔར་ལམ་མི་བཟང་བར་བསམས་ཀྱང་བློ་ཡུལ་ལས་འདས་པ་ཞིག་ལ་ཤར་གཏོང་ཐུབ་སྟེ་ཆུ་ཚོད་གཅིག་གིས་སྔོན་ལ་ཐོན་སོང”སི་ཁྲོན་དང་ཀན་སུའུ་ཡི་ཡུལ་སྐོར་པ་སྐོར་ཞིག་རླངས་འཁོར་ལས་བབས་མ་ཐག་སྤྲོ་བའི་ངང་དེ་ལྟར་བཤད། ད་ལྟ། འདི་ལྟ་བུའི་ཕྱོགས་བཞི་མཚམས་བརྒྱད་ནས་ཡོང་བའི་སྐུ་མགྲོན་བསུ་བའི་ངང་ཚུལ་རྟག་ཏུ་མཐོང་། ད་ལྟའི་བར་དུ། ཁུལ་ཡོངས་ཀྱི་གཞུང་ལམ་ཤར་གཏོང་ལམ་ཐག་སྤྱི་ལེ6097ལ་སླེབས་པ་དང་། དེས་རྨ་ལྷོ་ཁུལ་གྱི་འགྲིམ་འགྲུལ་མཐོ་ཚད་གསར་པ་ཞིག་ཏུ་སླེབས་པ་མཚོན། 

2024ལོར། རྨ་ལྷོ་ཁུལ་གྱིས“ཕྱི་ནང་མཉམ་སྦྲེལ”གྱི་གཞུང་ལམ་རྣམ་པ་འཛུགས་སྒྲུབ་དམིགས་འབེན་དུ་བྱས་ཏེ། འགྲིམ་འགྲུལ་རྨང་གཞི་སྒྲིག་ཆས་ཐད་ཀྱི་དངུལ་གཏོང་ཤུགས་ཚད་ཆེ་རུ་བཏང་ཞིང་། ཐབས་ལམ་མང་པོའི་མ་དངུལ་བསྡུ་རུབ་བྱེད་པ་དང་། ལམ་ཐིག་གནད་ལ་ཁེལ་བའི་འཆར་འགོད་བྱས་ཏེ། གཞུང་ལམ་རྣམ་གྲངས་གཙོ་གྲས་སྐོར་ཞིག་འཛུགས་སྐྲུན་བྱས།

ད་ལྟ། རེབ་གོང་ནས་བླ་བྲང་དང་། ཞུན་ཧྭ་ནས་རེབ་གོང་བར་གྱི་གཞུང་ལམ་གྱི་དུས་རིམ་སྔོན་མའི་བྱ་བ་གོ་རིམ་ལྡན་པའི་ངང་སྤེལ་བ་དང་། ལམ་ཐིག་དང་བཟོ་སྐྲུན་ཞིབ་འཇུག་སྙན་ཞུ་སོགས་གནད་འགག་གོ་རིམ་ལེགས་འགྲུབ་བྱས་ཏེ། ལས་མགོ་རྩོམ་པར་རྨང་གཞི་བརྟན་པོ་བཏིངས་ཡོད། རླངས་འཁོར་ཤར་གཏོང་བྱུང་རྗེས་རེབ་གོང་ནས་བླ་བྲང་དང་ཞུན་ཧྭ་བར་གྱི་འགྲུལ་བཞུད་དུས་ཚོད་ཇེ་ཐུང་དང་། ས་ཁོངས་དཔལ་འབྱོར་བརྗེ་རེས་མཐུན་སྦྱོར་ལ་སྐུལ་འདེད་གཏོང་བར་ཕན།

རེབ་གོང་ནས་གསེར་ལུང་བར་གྱི་མྱུར་བགྲོད་ལམ་གཞུང་ལམ་དང་། གཅན་ཚ་ནས་ཆབ་ཆ་བར་གྱི་གཞུང་ལམ་ཚ་ཚ་འུར་འུར་ངང་འཛུགས་སྐྲུན་བྱེད་བཞིན་ཡོད་པ་དང་། ཧི་ནན་ནས་རྨ་ཆེན་བར་གྱི་མྱུར་བགྲོད་གཞུང་ལམ་ད་ལོར་ལས་མགོ་རྩོམ་རྒྱུ་རེད། འགྲིམ་འགྲུལ་རྣམ་གྲངས་སྐོར་ཞིག་འཛུགས་སྐྲུན་ལེགས་འགྲུབ་བྱུང་རྗེས་རྨ་ལྷོ་ཁུལ་གྱི་གཞུང་ལམ་དྲ་བ་འཐུས་ཚང་དུ་བཏང་ཞིང་། རྨ་ལྷོ་ཁུལ་དང་ཉེ་འཁོར་ས་ཁུལ་ཕན་ཚུན་སྦྲེལ་ཏེ། ས་གནས་ཐོན་ཁུངས་གསར་སྤེལ་དང་། ཐོན་ལས་རིམ་འཕར་ཐད་འགྲིམ་འགྲུལ་ཆ་རྐྱེན་ལེགས་པོ་བསྐྲུན། 

ཕྱོགས་བཞི་མཚམས་བརྒྱད་དུ་སྦྲེལ་བའི་གཞུང་ལམ་གྱིས་རྨ་ལྷོ་ཁུལ་གྱི་ཞིང་ཕྱུགས་ཐོན་རྫས་སྐྱེལ་འདྲེན་སྔར་ལས་སྟབས་བདེ་བཟོས་ཤིང་། དངོས་ཟོག་སྐྱེལ་འདྲེན་མ་རྩ་དམའ་རུ་བཏང་བ་དང་། ཁྱད་ལྡན་ཐོན་ལས་འཕེལ་རྒྱས་ལ་རོགས་འདེགས་བྱས། སྐུ་མགྲོན་སྔར་ལས་མང་པོ་བཀུག་པ་ཡིས་རིག་གནས་ཡུལ་སྐོར་ཐོན་ལས་ཀྱི་བཙན་ས་སྐྲུན་པར་སྐུལ་འདེད་བཏང་བ་དང་། གཞུང་ལམ་གྱི་ལམ་ཐག་རྒྱུན་བསྲིངས་པ་ཡིས་རྨ་ལྷོ་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་རྨང་གཞི་བརྟན་པོ་བཏིངས།