མདོ་དབུས་མཐོ་སྒང་གི་འཛམ་གླིང་རིམ་པའི་ཟངས་ཀྱི་ཐོན་ཁུངས་རྟེན་གཞི་གཏོད་རྒྱུ་རེད།

ཏུན་བྱེ་བ་རིམ་པའི་ཟངས་གཏེར་ཐོན་ཁུངས་རྟེན་གཞི་བཞི་དང་ཟངས་གཏེར་ཐོན་ཁུངས་ཀྱི་མི་མངོན་པའི་སྟོབས་ཤུགས་ཏུན་དུང་ཕྱུར་གཅིག་དང་བྱེ་བ་ལྔ་སྔོན་དཔག་ཐུབ་ནས་རང་རྒྱལ་གྱི་མདོ་དབུས་མཐོ་སྒང་གི་འཛམ་གླིང་རིམ་པའི་ཟངས་ཀྱི་ཐོན་ཁུངས་རྟེན་གཞིར་འགྱུར་རྒྱུ་རེད།

ཚེས6ཉིན།  ཀྲུང་གོ་ས་གཤིས་བརྟག་དཔྱད་ཅུའུ་ཡིས་ཁྱབ་བསྒྲགས་བྱས་པའི་གཞི་གྲངས་ལས་མངོན་པ་ལྟར་ན། རེས་སྐོར་གསར་པའི་གཏེར་འཚོལ་ཚད་བརྒལ་གྱི་འཐབ་ཇུས་བྱ་སྤྱོད་སྤེལ་བའི་ཚུན། རང་རྒྱལ་གྱིས་ཟངས་གཏེར་འཚོལ་ཤུགས་རྒྱུན་ཆད་མེད་པར་ཆེ་རུ་བཏང་ནས།  སྤྱི་ཕན་སྣེ་ཁྲིད་དང་ཚན་རྩལ་གསར་གཏོད་བྱས་པ་བརྒྱུད་ཀྲུང་དབྱང་དང་ས་གནས་ཁེ་ལས་མཉམ་ལས་ལ་སྐུལ་འདེད་བཏང་སྟེ།  མདོ་དབུས་མཐོ་སྒང་དང་ཧེ་ལུང་ཅང་སོགས་ས་ཁུལ་དུ་གཏེར་འཚོལ་གྲུབ་འབྲས་གལ་ཆེན་རབ་དང་རིམ་པ་ཐོབ་པ་དང་།  ཟངས་ཀྱི་ཐོན་ཁུངས་གསར་འཕར་བྱེད་ཚད་དེ“ལོ་ལྔའི་འཆར་འགོད་བཅུ་གསུམ་པའི”རིང་གསར་སྣོན་བྱས་པའི་ཐོན་ཁུངས་ཀྱི་ལྡབ་གཉིས་ཟིན་ཡོད་པ་རེད།

མཐོ་དབུས་མཐོ་སྒང་གི“ལོ་ལྔའི་འཆར་འགོད་བཅུ་བཞི་པའི”རིང་། རིམ་རྩིས་བྱས་ན་ཐོན་ཁུངས་ཏུན་བྱེ་བ་གཉིས་ལྷག་ཙམ་གསར་འཕར་བྱུང་བ་དང་། སྔོན་དཔག་བྱས་ན་ཐོན་ཁུངས་ཀྱི་མི་མངོན་པའི་སྟོབས་ཤུགས་ཏུན་དུང་ཕྱུར་གཅིག་དང་བྱེ་བ་ལྔ་ཟིན་ནས།  ཏུན་བྱེ་བ་གཅིག་རིམ་པའི་ཟངས་གཏེར་ཐོན་ཁུངས་རྟེན་གཞི་ཆགས་པ་དང་། མདོ་དབུས་མཐོ་སྒང་གི་འཛམ་གླིང་རིམ་པའི་ཟངས་ཀྱི་ཐོན་ཁུངས་རྟེན་གཞིར་གྱུར་ནས་རང་རྒྱལ་གྱི་ཟངས་གཏེར་རྩད་ཞིབ་གསར་སྤེལ་གྱི་རྣམ་པར་འགྱུར་ལྡོག་ནུས་ལྡན་གཏོང་རྒྱུ་རེད།

དུས་མཚུངས་སུ། ཧེ་ལུང་ཅང་གི་ཏའོ་པའོ་ཧྲན་ཟངས་གཏེར་པུའུ་ཡིས་གཏེར་ཁ་འཚོལ་ཞིབ་ལས་གྲུབ་འབྲས་ཆེན་པོ་བླངས་ཏེ། ཟངས་ཀྱི་ཐོན་ཁུངས་ཏུན་བྱེ་བ་གསུམ་དང་འབུམ་དྲུག་ཁྲི་ལྔ་འཕར་སྣོན་བྱུང་བ། ཤར་རྒྱུད་ཟངས་ཀྱི་ཐོན་ཁུངས་རྟེན་གཞིའི་རྨང་གཞི་སྲ་བརྟན་དུ་བཏང་བས། རང་རྒྱལ་གྱི་ཟངས་ཀྱི་ཐོན་ཁུངས་འགན་སྲུང་བྱེད་ནུས་མངོན་གསལ་སྒོས་ཆེ་རུ་ཕྱིན་ཡོད།

མདོ་དབུས་མཐོ་སྒང་གི་སྐྱེ་ཁམས་ཁོར་ཡུག་ཉམས་ཞན་ཡིན་པས་རང་རྒྱལ་གྱིས་ལྗང་མདོག་གཏེར་ལས་འཕེལ་རྒྱས་གཏོང་རྒྱུ་རྒྱུན་འཁྱོངས་བྱས་ཏེ་གཏེར་ལས་བྱེད་སྒོར་སྦགས་བཙོག་མི་བྱེད་པ་དང་སྐྱེ་ཁམས་ལ་བརྟེན་ནས་སྦགས་བཙོག་བཟོ་བའི་ཚད་གཞི་ཇེ་མདའ་རུ་གཏོང་རྒྱུ་མ་ཟད། གཏེར་ལས་གསར་སྤེལ་བྱས་རྗེས་ཁྲིམས་ལྟར་སླར་གསོ་བྱས་ཏེ། ཐོན་ཁུངས་བེད་སྤྱོད་དང་སྐྱེ་ཁམས་སྲུང་སྐྱོབ་མཐུན་སྦྱོར་ངང་འཕེལ་རྒྱས་ཡོང་བར་བྱེད་རྒྱུ་རེད།

ངོ་སྤྲོད་བྱས་པར་ལྟར་ན། ཀྲུང་གོ་ས་གཤིས་བརྟག་དཔྱད་ཅུའུ་ཡིས་གཏེར་རྫས་རྨང་གཞིའི་ས་གཤིས་བརྟག་དཔྱད་ལས་དོན་སྤེལ་ཤུགས་མུ་མཐུད་དུ་ཆེ་རུ་གཏོང་བ་དང་། ཚན་རྩལ་གསར་གཏོད་ཀྱི་སྣེ་ཁྲིད་ནུས་པ་ཆེ་རུ་གཏོང་བ། ཟངས་གཏེར་གྱི་ཐོན་ཁུངས་གསལ་རྟོགས་བྱེད་པ། ས་གནས་དང་ཁེ་ལས་སྤྱི་ཚོགས་བཅས་ཀྱིས་མ་རྩ་འཇོག་རྒྱུར་ཁྲིད་སྟོན་དང་སྐུལ་ཁྲིད་ཧུར་ཐག་བྱེད་པ། ལྗང་མདོག་རྩད་ཞིབ་གསར་སྤེལ་ལ་སྐུལ་འདེད་ཤུགས་ཆེན་གཏོང་བ། ཟངས་གཏེར་གྱི་ཐོན་ཁུངས་རྟེན་གཞི་ཆེ་གྲས་གསར་པ་ཁག་ཅིག་གཏོད་རྒྱུར་ཤུགས་སྣོན་རྒྱག་པ་བཅས་བྱས་ཏེ།  རྒྱལ་ཁབ་ཀྱི་ནུས་རྒྱུའི་ཐོན་ཁུངས་བདེ་འཇགས་འགན་ལེན་དང་ས་ཁོངས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་རེད།