མཚོ་སྔོན་གྱིས་ད་ལོའི་ལོ་མཇུག་དང་སང་ལོའི་ལོ་འགོའི་གཙོ་གནད་ཁྱབ་ཁོངས་ཀྱི་བཅའ་ཁྲིམས་ཁྱབ་གདལ་དང་དྲིལ་སྒྲོག་གི་ཆེད་དོན་བྱ་འགུལ་སྤེལ་རྒྱུ་རེད།

ཟླ12པའི་ཚེས4ཉིན། ཞིང་ཆེན་ཏང་ཨུའི་ཁྲིམས་ལྟར་ཞིང་ཆེན་ཕྱོགས་ཡོངས་བཅོས་སྐྱོང་ཨུ་ཡོན་ལྷན་ཁང་བཅའ་ཁྲིམས་བརྩི་སྲུང་དང་ཁྱབ་གདལ་མཐུན་སྦྱོར་ཚན་ཆུང་དང་། ཞིང་ཆེན་ཁྲིམས་འཛིན་ཐིན་གྱིས་ད་ལོའི་ལོ་མཇུག་དང་སང་ལོའི་ལོ་འགོའི་གཙོ་གནད་ཁྱབ་ཁོངས་ཀྱི་ཆེད་དོན་བཅའ་ཁྲིམས་ཁྱབ་གདལ་དང་དྲིལ་སྒྲོག་བྱ་འགུལ་སྤེལ་བའི་བྱ་བའི་ཇུས་གཞི་གཏན་འབེབས་པར་འགྲེམས་བྱས་ཏེ། གཙོ་གནད་མི་ཚོགས་དང་གཙོ་གནད་ཁྱབ་ཁོངས། གནད་འགག་དུས་གནས་གཙིགས་སུ་བཟུང་བ་དང་། མི་དམངས་མང་ཚོགས་ཀྱི་བཅའ་ཁྲིམས་ཁྱབ་གདལ་དགོས་མཁོ་དང་ཁེ་ཕན་ཞུ་གཏུག་ཡང་དག་བཙལ་ནས། བཅའ་ཁྲིམས་ཁྱབ་གདལ་གྱི་གནད་ཕིགས་ཚད་དང་མང་ཚོགས་ཡིད་ཚིམ་ཚད་རྒྱུན་མ་ཆད་པར་ཇེ་མཐོར་གཏོང་བ་དང་། ཆེད་དོན་བཅའ་ཁྲིམས་ཁྱབ་གདལ་དང་དྲིལ་སྒྲོག་ལ་བརྟེན་ནས་ཆུ་ཚད་སྔར་ལས་མཐོ་བའི་བདེ་འཇགས་མཚོ་སྔོན་དང་ཁྲིམས་སྐྱོང་མཚོ་སྔོན་འཛུགས་སྐྲུན་བྱེད་པར་སྐུལ་འདེད་གཏོང་རྒྱུ་རེད།

ཇུས་གཞིའི་ནང་། ད་ལོའི་ལོ་མཇུག་དང་སང་ལོའི་ལོ་འགོའི་གཙོ་གནད་ཁྱབ་ཁོངས་ཀྱི་ཆེད་དོན་བཅའ་ཁྲིམས་ཁྱབ་གདལ་དང་དྲིལ་སྒྲོག་བྱ་འགུལ་སྤེལ་ན། འབུར་ཐོན་གཉིས་དང་ཆེད་དོན་བཅའ་ཁྲིམས་ཁྱབ་གདལ་བཞི་ལ་དམིགས་ནས་སྤེལ་དགོས། གཙོ་གནད་མི་ཚོགས་འབུར་དུ་ཐོན་པར་བྱེད་པ་དང་། གཙོ་གནད་ཁྱབ་ཁོངས་འབུར་དུ་ཐོན་པར་བྱེད་པ། དུས་མཚུངས་སུ་སློབ་གྲྭའི་སློབ་ར་དང་ཞིང་སྡེ་གཞིས་ཁུལ། འགྲིམ་འགྲུལ་སྐྱེལ་འདྲེན། ལས་གཞི་འཛུགས་སྐྲུན་ཡུལ་གནས། ཁེ་ལས་ཀྱི་ངལ་རྩོལ། བཅའ་ཁྲིམས་ཞུ་གཏུག་སོགས་གཙོ་གནད་ཁྱབ་ཁོངས་འབུར་དུ་ཐོན་པར་བྱས་ཏེ། རིགས་བགར་བ་དང་མི་ཚོགས་བགར་ནས་བཅའ་ཁྲིམས་ཁྱབ་གདལ་གནད་ལ་འཁེལ་བ་བྱེད་དགོས། ནར་མ་སོན་པའི་མིའི་ཁྲིམས་འགལ་ཉེས་གསོག་གི་ཆེད་དོན་བཅའ་ཁྲིམས་ཁྱབ་གདལ་སྤེལ་བ་དང་། སྤྱི་ཚོགས་བདེ་འཇགས་དང་བརྟན་འཇགས་ལ་སྲུང་སྐྱོབ་བྱེད་པའི་ཆེད་དོན་བཅའ་ཁྲིམས་ཁྱབ་གདལ་སྤེལ་བ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བའི་ཆེད་དོན་བཅའ་ཁྲིམས་ཁྱབ་གདལ་སྤེལ། རོང་འབྲོག་གཞིས་ཁུལ་གྱི་ཞབས་ཞུའི་ཆུ་ཚད་མཐོར་འདེགས་གཏོང་བའི་ཆེད་དོན་བཅའ་ཁྲིམས་ཁྱབ་གདལ་སྤེལ་བ་བཅས་ཀྱི་ཆེད་དོན་བཅའ་ཁྲིམས་ཁྱབ་གདལ་བཞི་སྤེལ་བ་བརྒྱུད་དེ། བཅའ་ཁྲིམས་ཁྱབ་གདལ་གྱི་གྲུབ་འབྲས་ཀྱིས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ཐད་ཕྱོགས་ཡོངས་ནས་ཞབས་འདེགས་ཞུ་བ་དང་སྐུལ་འདེད་གཏོང་དགོས་ཞེས་བསྟན་ཡོད།

རྒྱུས་ལོན་བྱུང་བ་ལྟར་ན། ད་ལོའི་ལོ་མཇུག་དང་སང་ལོའི་ལོ་འགོའི་གཙོ་གནད་ཁྱབ་ཁོངས་ཀྱི་ཆེད་དོན་བཅའ་ཁྲིམས་ཁྱབ་གདལ་དང་དྲིལ་སྒྲོག་བྱ་འགུལ་གྱིས་ཚོགས་སྒྲིག་རང་བཞིན་དང་སྐོར་ཞིབ་རང་བཞིན། ངོས་ཐུག་སོགས་ཀྱི་རྣམ་པ་བརྒྱུད་དེ། རིགས་མི་འདྲ་བའི་བཅའ་ཁྲིམས་ཁྱབ་གདལ་གྱི་ཐོན་ཁུངས་སྣ་ཚོགས་སྒྲིག་སྦྱོར་ནུས་ལྡན་བྱེད་པ་དང་། གཞི་རིམ་གྱི་བཅའ་ཁྲིམས་ཁྱབ་གདལ་སྟོབས་ཤུགས་ཆེར་སྐྱེད་ནས། བཅའ་ཁྲིམས་ཁྱབ་གདལ་བྱ་ཡུལ་དང་བཅའ་ཁྲིམས་ཁྱབ་གདལ་གྱི་ཁྱབ་ཁོངས། བཅའ་ཁྲིམས་ཁྱབ་གདལ་གྱི་ནང་དོན། བཅའ་ཁྲིམས་ཁྱབ་གདལ་གྱི་རྣམ་པ་གནད་ཕིགས་གནད་འཁེལ་ཡོང་བར་ཁག་ཐེག་བྱེད་རྒྱུ་རེད།

ཇུས་གཞིའི་ནང་། ས་ཁུལ་སོ་སོས་བསམ་བློ་ངོས་ཟིན་ཇེ་མཐོར་གཏོང་བ་དང་། གཙོ་གནད་ཁོང་དུ་ཆུད་པ་དང་སྤྱི་ཡོངས་ལ་ཇུས་འགོད་བྱེད་པ། ཆེད་དོན་བཅའ་ཁྲིམས་ཁྱབ་གདལ་བྱ་འགུལ་དང་ཞིང་ཆེན་ཡོངས་ཀྱི་འགལ་རྩོད་ཉེན་ཁ་ཐག་གཅོད་པ་དང་སྤྱི་ཚོགས་གཏན་འཇགས་ལ་སྲུང་སྐྱོང་བྱེད་པའི་ཆེད་དོན་བཅོས་སྐྱོང་དང་། ཞིང་ཆེན་ཡོངས་ཀྱི་དགུན་དཔྱིད་དུས་ཀྱི་གཏན་འཇགས་སྲུང་སྐྱོབ་བྱ་བ། སང་ལོའི་ལོ་འགོར་སྤེལ་རྩིས་ཡོད་པའི་ལས་བྱེད་པ་ཁྲི་ཕྲག་གཞི་རིམ་དུ་བསྐྱོད་པའི་བྱ་འགུལ་སོགས་དང་ཟུང་འབྲེལ་བྱེད་པ། ཆེད་དོན་བཅའ་ཁྲིམས་ཁྱབ་གདལ་བྱ་འགུལ་མཉམ་སྤེལ་བྱེད་པ་དང་མི་སྣར་མཉམ་དུ་གསོ་སྦྱོང་བྱེད་པ། འགལ་རྩོད་མཉམ་དུ་འདུམ་སྒྲིག་བྱེད་པ། གནད་དོན་མཉམ་བཅོས་བྱེད་པ། ཆ་འཕྲིན་མཉམ་སྤྱོད་བྱེད་པར་སྐུལ་འདེད་བཏང་སྟེ། སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་བརྗེ་རེས་བཟང་བོ་མངོན་འགྱུར་བྱེད་པ་དང་། མི་དམངས་མང་ཚོགས་ཀྱི་ཐོབ་ཚོར་དང་སྐྱིད་སྣང་། བདེ་སྣང་མཐོར་འདེགས་གཏོང་དགོས་པའི་རེ་བ་བཏོན།

རྒྱུས་ལོན་བྱུང་བ་ལྟར་ན། ཐེངས་འདིའི་ལོ་མཇུག་ལོ་འགོའི་གཙོ་གནད་ཁྱབ་ཁོངས་ཀྱི་ཆེད་དོན་བཅའ་ཁྲིམས་ཁྱབ་གདལ་བྱ་འགུལ་འཆར་འགོད་དེ2024ལོའི་ཟླ12པའི་ཟླ་དཀྱིལ་ནས་སྤེལ་འགོ་རྩོམ་རྒྱུ་ཡིན་པ་དང་། 2025ལོའི་ཟླ5པའི་ནང་མཇུག་བསྡུ་རྒྱུ་ཡིན་ལ།  དུས་མཚམས་གཉིས་དང་དུས་རིམ་གསུམ་ལ་དབྱེ་ནས་སྤེལ་རྒྱུ་རེད།