ཉིན་ཤས་གོང་།  ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་མི་སྒེར་368ལ་༼རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མི་སྒེར་༽གྱི་མཚན་སྙན་བསྩལ་གནང་བ་དང་།  ཅི་ལིན་ཞིང་ཆེན་ཁྲང་ཁྲུན་གྲོང་ཁྱེར་གྲོང་འཛུགས་ལས་གྲྭ་སློབ་གྲྭའི་བོད་ལྗོངས་པུའི་ཀྲུའུ་རེན་དང་འཛིན་བདག་གཅིག་ལྕོགས་ཀྲུའུ་ཧྲུའུ་ཧྥང་གཟི་བརྗིད་ལྡན་པའི་ངང་བདམས་ཐོན་བྱུང་ཡོད། 

ཨ་མ་ཀྲུའུ་ལགས་དང་སློབ་མ་ཚོས་ལོ་གསར་དགའ་གཏོང་བྱེད་བཞིན་པ།

ཀྲུའུ་ཧྲུའུ་ཧྥང་གིས་སློབ་གསོའི་ཕྱག་ལས་གནང་བའི་ལོ་ངོ་25ཡི་རིང་། སློབ་མ་རྣམས་ཉེ་རིང་དབྱེར་མེད་སྒོ་ནས་སྐྱོང་བ་དེ་གོམས་གཤིས་ཤིག་ཏུ་གྱུར་ཡོད། སྤྱི་ལོ་2018ལོར་བོད་ལྗོངས་འཛིན་གྲྭའི་འཛིན་བདག་གི་འགན་བཞེས་འགོ་ཚུགས་ཚུན། ཁོང་གིས་བོད་ལྗོངས་མི་རིགས་ཁག་གི་སློབ་མ་རྣམས་བྱམས་དང་བརྩེ་བས་སྐྱོང་བཞིན་ཡོད། ལོ་དྲུག་གི་རིང་། ཁོང་གིས་སློབ་མ་རྣམས་ལ་རྩལ་ནུས་སྦྱོང་བའི་སློབ་ཚན་གསར་པ་མང་དག་ཅིག་འཁྲིད་གནང་ཡོད་ལ། ད་དུང་ལག་ལེན་དངོས་ཀྱི་བྱེད་སྒོ་བརྒྱུད་ཕྲུ་གུ་ཚོའི་ཕུགས་བསམ་དད་སེམས་བརྟན་དུ་འགྲོ་རྒྱུར་མཛུབ་ཁྲིད་གནང་ཁར། ཁོང་གིས་ཆེད་མངགས་བོད་ལྗོངས་སུ་སློབ་མའི་ཁྱིམ་ཚང་དུ་འཚམས་འདྲི་གནང་བར་ཕེབས་མྱོང་ཡོད། ཁོང་གི་མཐོ་དྲག་དོན་དུ་མི་གཉེར་ཞིང་སློབ་མའི་བྱ་བ་ཐུགས་སུ་འཛིན་པའི་མཛད་པ་དེར་ཁྱིམ་བདག་དུ་མའི་ཡིད་ཆེས་དང་རྒྱབ་སྐྱོར་ཐོབ་པ་དང་། བོད་ལྗོངས་མི་རིགས་ཁག་གི་སློབ་མ་ཚོས་བརྩེ་བ་ཟབ་མོས་ཨ་མ་ཀྲུའུ་ལགས་ཞེས་འབོད་ཀྱི་ཡོད། འཆད་སྟེགས་མདུན་གྱི་རྒན་ཀྲུའུ་ལགས་དང་འཚོ་བའི་ཁྲོད་ཀྱི་ཨ་མ་ཀྲུའུ་ལགས་ཀྱིས་ཐོག་མའི་བསམ་འདུན་དང་འགན་འཁྲི་ཐུགས་སུ་འཛིན་ཞིང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་རྒྱུ་གཞི་རྐང་དུ་བྱས་ཏེ། སློབ་གསོའི་གསར་སྐྲུན་གོང་འཕེལ་དང་མི་རིགས་མཐུན་སྒྲིལ་ཡར་ཐོན་ཡོང་བར་སྐུལ་འདེད་ཟམ་མི་ཆད་པར་གཏོང་བཞིན་ཡོད།  སེའུ་འབྲུ་དམར་པོའི་ཨ་མ་ཚོགས་པའི་འགོ་འཛིན་གྱི་འགན་བཞེས་བཞིན་པའི་རྒན་ཀྲུའུ་ལགས་ལ་ཅི་ལིན་གྱི་མི་བཟང་པོ་དང་དགེ་རྒན་བཟང་པོའི་བྱ་དགའ་དང་དེ་བཞིན་རྒྱལ་ཡོངས་ཀྱི་རྒྱ་ཡིག་དགེ་རྒན་བཟང་པོའི་གཟི་བརྗིད་མཚན་སྙན་ཡང་ཐོབ་མྱོང་ཡོད།  

དགེ་སློབ་ཚོས་ལྷན་དུ་གླིང་ཁ་གཏོང་བཞིན་པ།

སྤྱི་ལོ2018ལོའི་ཟླ9པའི་ནང་།  ཁྲང་ཁྲུན་གྲོང་ཁྱེར་གྲོང་འཛུགས་ལས་གྲྭ་སློབ་གྲྭས་བོད་ལྗོངས་འབྲིང་རིམ་ཆེད་ལས་འཛིན་གྲྭའི་སྒྲུབ་འགན་འཁུར་རྗེས།   ཀྲུའུ་ཧྲུའུ་ཧྥང་གིས་བོད་ལྗོངས་འཛིན་གྲྭའི་ཕྱག་ལས་གནང་འགོ་ཚུགས་པ་དང་། སློབ་གྲྭ་དེའི་བོད་ལྗོངས་འཛིན་གྲྭའི་འཛིན་བདག་ཐོག་མ་དེར་གྱུར་བ་མ་ཟད་བོད་ལྗོངས་མི་རིགས་ཁག་གི་སློབ་མ་ཚོ་ཁྲང་ཁྲུན་དུ་སྡོད་རིང་གི་ཟས་སྤྱོད་སྡོད་གསུམ་གྱི་འགན་བླངས་ཡོད། སློབ་མ་ཚོའི་ཁྲོད་ཀྱི་ལོ་ཆེ་ཤོས་རང་ལོ22དང་ཆུང་ཤོས་རང་ལོ14ཡིན།   གནམ་གཤིས་ཀྱི་ཚ་གྲང་དང་སྐད་བརྡ་མ་འཕྲོད་པ་སོགས་ཀྱི་རྐྱེན་པས་སློབ་མ་ཚོ་ཁྲང་ཁྲུན་དུ་གོམས་ཁག་པོར་གྱུར་ཡོད་ཅིང་།  སློབ་མ་ལ་ལས་རྡོག་ཆས་བརྒྱབ་ནས་ཕ་ཡུལ་དུ་ལོག་འདོད་བྱེད་ཀྱི་ཡོད།  སྐབས་དེར་རྒན་ཀྲུའུ་ལགས་ཀྱིས་ཕྲུ་གུ་ཚོར་སེམས་གསོ་བཏང་གནང་བ་མ་ཟད་བོད་ལྗོངས་ཀྱི་ཡུལ་གོམས་གཤིས་ལུགས་དང་ཕྲུ་གུ་ཚོའི་འཚོ་བའི་གོམས་གཤིས་སོགས་ལ་མཁྱེན་རྟོགས་གནང་ཡོད།  དེ་ནས་གཟའ་མཇུག་ལ་སླེབས་རིམ་བཞིན་རེས་བསྐོར་གྱིས་ཕྲུ་གུ་གཉིས་ནང་ལ་འཁྲིད་དེ་ཁོང་ཚོར་ཁྱིམ་ཚང་གི་དྲོ་སྐྱིད་ཚོར་ཐུབ་པར་གནང་བ་མ་ཟད།  ད་དུང་ཁོང་ཚོར་ཁྱིམ་ཆས་བེད་སྤྱོད་གཏོང་སྟངས་སློབ་གནང་བ་དང་།  ཁོང་ཚོའི་སྐྲ་བཞར་གནང་གི་ཡོད།  རྒན་ཀྲུའུ་ལགས་ཀྱི་བྱམས་བརྩེའི་ཐུགས་ཁུར་འོག་ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ་བའི་བསམ་པའི་ས་བོན་དེ་ཡང་སློབ་མ་ཚོའི་སེམས་དབུས་སུ་བཏབ་ཡོད། 

རྒན་ཀྲུའུ་ལགས་ཀྱི་སྐོར་གླེང་སྐབས།  སློབ་མ་ཚོས༼ཨ་མ་ལགས་ཀྱི་ཐབ་ཚང་༽ཐེངས་མང་གླེང་གིན་ཡོད།  སློབ་མ་ཚོར་ཁྱིམ་ཚང་གི་དྲོ་སྐྱིད་ཐོབ་ཆེད།  རྒན་ཀྲུའུ་ལགས་དང་སློབ་མ་ཚོས་སློབ་གྲྭའི་ནང་བ་ཐུག་དང་འོ་ཇ་བསྐོལ་གྱི་ཡོད།    དེ་ནས་༼ཨ་མ་ལགས་ཀྱི་ཐབ་ཚང་༽དེ་རིམ་བཞིན་སློབ་གྲྭའི་ནང་དུ་སྐད་གྲགས་ཆོད་ནས་རྒྱ་རིགས་དང་། བོད་རིགས། མན་ཇུ་རིགས། སོག་རིགས། ཧུའེ་རིགས་སོགས་མི་རིགས་ཁག་གི་དགེ་སློབ་ཚོའི་འགྲོ་འོང་དང་སྤེལ་རེས་མཉམ་འདྲེས་བྱེད་པའི་སྟེགས་བུ་ཞིག་ཏུ་གྱུར་བ་དང་།  ཐབ་ཚང་ཆུང་ངུ་དེས་ཕྲུ་གུ་ཚོའི་ཕོ་བ་དྲོ་སོབ་སོབ་བཟོས་ཡོད་ལ།  ཁྱིམ་བདག་ཚོའི་སེམས་པ་ཡང་དྲོ་སོབ་སོབ་བཟོས་ཡོད།   

ནམ་རྒྱུན་རྒན་ལགས་ཀྱིས་རྩལ་ནུས་སློབ་ཁྲིད་གནང་བ་མ་ཟད།  ད་དུང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་བའི་སློབ་གསོར་ཡང་མཐོང་ཧ་ཅང་ཆེན་པོ་གནང་བཞིན་པ་དང་།  ཀྲུང་ཧྭ་ཡི་ཕུལ་བྱུང་སྲོལ་རྒྱུན་རིག་གནས་དང་ཟུང་འབྲེལ་བྱེད་པའི་སློབ་ཁྲིད་ཀྱི་ནང་དོན་འཚོལ་ཞིབ་ཧུར་ཐག་གནང་གི་ཡོད་ལ།  བསམ་བློ་ཆབ་སྲིད་ཀྱི་སློབ་གསོར་ཡང་མཐོང་ཆེན་གནང་གི་ཡོད་པས།  སློབ་མ་ཚོའི་ནང་བསམ་པའི་དབུས་སུ་སྤྱི་ཚོགས་རིང་ལུགས་ལྟེ་བའི་རིན་ཐང་ལྟ་བ་ཡང་རིམ་བཞིན་རྩ་བ་ཚུགས་ནས་ཡལ་འདབ་རྒྱས་བཞིན་མཆིས།