རིག་གཞུང་ལོ་ཚོགས་གལ་ཆེན་ཞིག་ལྷ་སར་འཚོགས་འདུག

རིག་གཞུང་ལོ་ཚོགས་གལ་ཆེན་ཞིག་ལྷ་སར་འཚོགས་འདུག

སྤྱི་ཚེས26ཉིན་དུས་ཡུན་ཉིན་གཉིས་ཡིན་པའི་བོད་རང་སྐྱོང་ལྗོངས་མཚན་ཉིད་རིག་པ་དང་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱི་སྐབས་བཅུ་པའི་རིག་གཞུང་ལོ་ཚོགས་དེ་ལྷ་ས་གྲོང་ཁྱེར་དུ་བདེ་བླག་ངང་འཚོགས་པ་རེད།  

ད་ཐེངས་ཀྱི་ལོ་ཚོགས་ཐོག་མི་འབོར་དང་།    མི་སེམས།    ཤེས་ལྡན་མི་སྣ་བཅས་ཀྱི་གནད་དོན་དང་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་བོད་ལྗོངས་གསར་པ་སྒོ་ཀུན་ནས་འཛུགས་སྐྲུན་བྱེད་ཅེས་པ་བརྗོད་དོན་གཙོ་བོར་བྱས་པའི་དམིགས་ཡུལ་ནི་མཐུན་སྒྲིལ་དང་།    འབྱོར་ཕྱུག ཤེས་དཔལ།    ཞི་མཐུན།    མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱ་ཆེད་རིག་གཞུང་གི་བློ་གྲོས་དང་སྟོབས་ཤུགས་སྐྱེས་སུ་འབུལ་རྒྱུ་དེ་ཡིན་པ་རེད།  

ལོ་ཚོགས་དེ་བོད་རང་སྐྱོང་ལྗོངས་མཚན་ཉིད་རིག་པ་དང་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས་ཀྱིས་གཙོ་གཉེར་བྱས་པ་དང་།    བོད་ལྗོངས་སློབ་ཆེན་གྱིས་སྒྲུབ་འགན་འཁུར་བ་མ་ཟད།    སློབ་གསོ་པུའི2011-ཧི་མ་ལ་ཡའི་མཐའ་འཁོར་གྱི་མིའི་རིགས་ཀྱི་སྒུལ་སྐྱོད་ས་ཁོངས་འཕེལ་རྒྱས་མཐུན་སྦྱོར་གསར་གཏོད་ལྟེ་གནས་དང་། པེ་ཅིང་སློབ་ཆེན་གྱི་གྲུབ་ཆའི་དཔལ་འབྱོར་རིག་པ་ཞིབ་འཇུག་ཁང་བོད་ལྗོངས་ཡན་ལག་ཁང་གི་ཤུགས་ཆེའི་རྒྱབ་སྐྱོར་ཡང་ཐོབ་ཡོད་པ་རེད།     རྒྱལ་ཡོངས་ཀྱི་མཐོ་སློབ་ཁག་དང་།    རིམ་ཁག་ཏང་གི་སློབ་གྲྭ རིམ་ཁག་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས་བཅས་ནས་ཡོང་བའི་རིགས་གཅིག་མཁས་ཅན་དང་མཁས་དབང་། དེ་བཞིན་དགེ་སློབ200ལྷག་ཙམ་འགོ་ཚུགས་མཛད་སྒོར་ཞུགས་ཡོད་པ་རེད།   

ལོ་ཚོགས་རིང་ནན་ཅིང་སློབ་ཆེན་དང་།    ལེའོ་ཉིང་སློབ་ཆེན།    ཡུན་ནན་སློབ་ཆེན།    ལྷོ་ནུབ་མི་རིགས་སློབ་ཆེན།    པེ་ཅིང་སློབ་ཆེན་སོགས་མཐོ་སློབ་མང་པོའི་གྲགས་ཅན་དགེ་རྒན་ཆེ་མོ་བ་ཚོས་ལོ་ཚོགས་ཀྱི་བརྗོད་དོན་གཙོ་བོར་དམིགས་ནས་བཞེད་དོན་གཏམ་བཤད་གནང་བ་དང་།    གསར་གཏོད་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་སྟངས་དང་།    ཀྲུང་གོའི་རྣམ་པའི་དེང་རབས་ཅན།    བོད་ལྗོངས་ཀྱི་དཔལ་འབྱོར་དེང་རབས་ཅན་གྱི་འཕེལ་ཕྱོགས།    མི་འབོར་སྤུས་ཚད་མཐོ་བའི་ངང་འཕེལ་རྒྱས་གཏོང་རྒྱུ་སོགས་ཀྱི་གྲོས་གཞི་མང་པོར་གྲོས་བསྡུར་གཏིང་ཟབ་གནང་བ་དང་ཆབས་ཅིག་ལོ་ཚོགས་ཐོག་ད་དུང་ཡན་ལག་གླེང་སྟེགས་བཙུགས་ནས་མི་འབོར་དང་།    མི་སེམས།    ཤེས་ལྡན་མི་སྣ་བཅས་གྲོས་གཞི་གསུམ་ལ་གྲོས་བསྡུར་གཏིང་ཟབ་བྱས་པ་རེད།      

ད་ཐེངས་ཀྱི་ལོ་ཚོགས་ལ་ཁྱོན་ཚོགས་ཞུགས་རྩོམ་ཡིག་80ལྷག་ཙམ་འབྱོར་བའི་ནང་རྩོམ་ཡིག་62བདམས་ནས་བསྡུས་ཡོད་པ་དང་འབྲེལ་རིག་གཞུང་ལོ་ཚོགས་ཀྱི་དཔྱད་རྩོམ་ཕྱོགས་བསྒྲིགས་ཞེས་པའི་དེབ་ཀྱང་དཔེ་སྐྲུན་བྱ་རྒྱུ་ཡིན་པ་རེད།   ལོ་ཚོགས་གྲུབ་འབྲས་ཐོབ་པའི་ངང་འཚོགས་པ་དེས་རིགས་གཅིག་མཁས་ཅན་དང་མཁས་དབང་ལ་རིག་གཞུང་སྤེལ་རེས་ཀྱི་སྟེགས་བུ་མཁོ་འདོན་བྱས་པ་མ་ཟད།    དུས་རབས་གསར་པའི་ཏང་གི་བོད་ལྗོངས་ཀྱི་ལས་དོན་ལ་བློ་གྲོས་དང་སྟོབས་ཤུགས་ཀྱང་ལེགས་སྐྱེས་སུ་ཕུལ་ཡོད་པ་རེད།