བྲང་སྐྱིའི་གཉན་ཚད།

བྲང་སྐྱིའི་གཉན་ཚད་ནི་བྲང་ཁོག་ནང་གཉན་ཚད་རྒྱས་ཏེ་ཆུ་སེར་དང་རྣག་བསགས་པའི་ནད་ཅིག་ཡིན་ལ། ནད་རིགས་མང་པོས་བསྐྱེད་པ་ཡིན་ཏེ། སྤྱིར་བཏང་གློ་ཚད་དང་གློ་བ་ཁེགས་ཤི འབྲས་ནད། གློ་གཅོང་། རླུང་རླན་རང་བཞིན་གྱི་ཚིགས་ནད། གཤེར་རྨེན་ཚ་ནད།(胰腺炎)རྨས་སྐྱོན། (དཔེར་ན། རྩིབ་རུས་ཆག་པ)དབུགས་ལམ་དང་ཡང་ན་གནས་གཞན་ནས་བྲང་སྐྱི་ལ་སླེབས་པའི་ཕོག་ཐུག་ཅན་གྱི་དངོས་པོ། སྨན་གྱི་ཞོར་སྐྱོན། དེ་བཞིན་ཟས་སྤྱོད་མི་འཚམ་པ་དང་ལུས་ཁམས་ཀྱི་ནད་འགོག་ནུས་ཤུགས་ཇེ་ཆུང་དུ་ཕྱིན་པ་སོགས་ཀྱིས་སློང་བ་ཡིན།

ནད་རྟགས། 

ཚ་བ་ཆེན་པོ་རྒྱག་པ་དང་གློ་ལུ་བ། དབུགས་བཀག་པ། རྩིབ་བར་གཟེར་བ། དབུགས་ཁ་རྒོད་པ། མཚན་མོར་མལ་སའི་ནང་རྔུལ་ནག་བཞུར་བ། ཤ་སྐམ་པ་དང་བཞིན་མདངས་ཉམས་པ་སོགས་ཀྱི་ནད་རྟགས་ཡོད་པར་མ་ཟད། བྲང་ཁོག་ནང་ཆུ་སེར་དང་རྣག་བསགས་ཡོད་ཚེ་བོལ་ཏོལ་གྱིས་བརྟག་ན་ཅོར་སྐད་དང་འདར་སྐད་འབྱུང་བ་དང་། རྩིབ་བར་ཡངས་ལ་བརྩེ་ཞིང་སྦོས་ལ་གསོབ་པ་ཡིན།

སྔོན་འགོག

ནད་འདི་དགུན་དཔྱིད་གཉིས་ལ་འབྱུང་སླ་བས་དུས་འདི་གཉིས་ལ་ཆམ་པ་སོགས་མི་འབྱུང་བར་ཡིད་གཟབ་བྱ་དགོས་པ་དང་། གཅོང་ནད་ཅན་གྱི་ནད་པར་འབྲེལ་འདྲིས་བྱེད་པ་དང་། ཁ་ཟས་རུལ་སྐྱུར་གྱི་རིགས་བསྟེན་དྲགས་པ། ཚྭ་དང་དུ་བ་སོགས་ཚད་ལས་འདས་པ། དྲག་ཤུལ་དང་ཆམ་པ་བྱུང་བ་བཅས་མདོར་ན་ཟས་སྤྱོད་མི་འཚམ་པ་རྣམས་སྤང་དགོས།

གསོ་ཐབས། 

1 བོད་ལུགས་གསོ་རིག་ལྟར་ན། སྨན་དུ་གཙོ་བོ་ཉེར་ལྔ་དང་། གི་ཙན(གི་དགུ་པ་དང་ཙན་དན་བཅོ་བརྒྱད་བསྲེས་པ)ཅུ་གང་ཉེར་ལྔ། བསེ་རུ་ཉེར་ལྔ། ཡར་འདྲེན་བཅུ་གསུམ། ཟངས་ཐལ་ཉེར་ལྔ། སྒ་ལོ་སྨན་དམར། ཨ་གར་བཅོ་ལྔ། སྤོས་དཀར་བཅུ་པ། རྟ་ཟི་དམར་པོ། གཙོ་བོ་ཉེར་ལྔ་ཁ་ཚར་ཅན་སོགས་རྒྱུན་སྤྱོད་སྨན་སྦྱོར་རྣམས་དང་། དེ་བཞིན་ཆུ་གཤེར་དང་རྣག་མང་པོ་བསགས་ནས་སྐེམ་མ་ཐུབ་ཚེ་ཅུ་གང་ཉེར་ལྔ། བསེ་རུ་ཉེར་ལྔ། ཟངས་ཐལ་ཉེར་ལྔ་སོགས་ཤིན་ཏུ་འཕྲོད།

2 ཟས་སྤྱོད་ཀྱིས་བཅོས་པ་ལ། འོ་མ་དང་སྒོ་ང་། རླན་གནས་ཀྱི་ཤ ཤིང་ཏོག་དང་སྔོ་ཚལ་གསར་བ་སོགས་དང་། ཕག་དང་ལུག ཝ་ཡི་གློ་བ་དང་། ཁྱིམ་བྱ་དང་ངང་པའི་ཤ སྔོ་ཚལ་དང་སིལ་ཏོག་དཔེར་ན། ལྕ་ཚལ་དང་ཀྲོ་མ་ཀྲུ།(西红柿) ཤིང་ཏོག་ལུ།(梨) པད་རྩ(藕)སོགས་འཕྲོད་ལ།  ཆང་དང་དུ་བ། ཕོག་ཐུག་ཅན་གྱི་ཟས་བཙོང་དང་སྒོག་པ། སུར་པན།(椒) བཅའ་སྒ།(生姜)མཚོ་ལས་བྱུང་བའི་ཉ་སོགས་ཀྱི་ཤ་མི་འཕྲོད་པས་སྤང་དགོས། སྤྱོད་ལམ་ལ་ལུས་སེམས་ལྷོད་པའི་སྒོ་ནས་ངལ་གསོ་དགོས།