གོམ་པ་མང་ཙམ་བརྒྱབ་ན་སྐུ་གཟུཊ་ཐང་ཞིང་སྐུ་ཚེ་རིང་།

གོམ་པ་རྒྱག་པ་ནི་ཆེས་སྟབས་བདེ་དང་ཆེས་ཞི་ལྷོད་ཀྱི་ལུས་སྦྱོང་ཞིག་ཡིན། གོམ་པ་མང་ཙམ་བརྒྱབ་ན་གཟུགས་པོར་ཕན་ཐོགས་གྲངས་ལས་འདས་པ་ཡོད། ཞིབ་འཇུག་བྱས་འབྲས་གསར་ཤོས་ལས་ཤེས་རྟོགས་ཐུབ་པར། གོམ་པ་མང་ཙམ་བརྒྱབ་ན་ཕྱི་ལུས་པོར་སྦྱོང་བརྡར་ཐེབས་པ་མ་ཟད། ད་དུང་ནང་སེམས་ཁམས་གསོ་བར་ཡང་ཕན་ཐོགས་ཆེན་པོ་ཡོད།

ཉིན་ལྟར་གོམ་པ་མང་ཙམ་བརྒྱབ་ན། ཡིད་མུག་ནད་སེལ་ཐུབ།

སྤྱི་ལོ2024ལོའི་ཟླ12པའི་ཚེས16ཉིན། ཨ་རིའི་གསོ་རིག་སློབ་ཚོགས་ཀྱི་དུས་དེབ་དྲ་བའི་སྒོ་འབྱེད་ཐོག་ཞིབ་འཇུག་རྩོམ་ཡིག་ཅིག་སྤེལ་བའི་ནང་། ཞིབ་འཇུག་མི་སྣས་མི་ཆིག་འབུམ་ཙམ་ལ་དབྱེ་ཞིབ་བྱས་པ་ལྟར་ན། ཉིན་ལྟར་གོམ་པ་བརྒྱབ་པའི་གོམ་གྲངས་ག་ཚོད་ཀྱིས་མང་ན་དེ་རྩིས་ཀྱིས་ཡིད་མུག་ནད་ཕོག་པའི་ཉེན་ཁ་ཆུང་བ་ཡོད།

ཞིབ་པར་བཤད་ན། ཉིན་ལྟར་གོམ་གྲངས5000ལས་ཉུང་བ་དང་བསྡུར་ན་ཉིན་ལྟར་གོམ་གྲངས་དེ་ལས་མང་བའི་མི་ལ་ཡིད་མུག་ནད་ཕོག་ཚད་མངོན་གསལ་གྱིས་ཉུང་བ་ཡོད། ཉིན་ལྟར་གོམ་གྲངས7000ལས་ཉུང་བ་དང་བསྡུར་ན་ཉིན་ལྟར་གོམ་གྲངས་དེ་ལས་མང་བའི་མི་ལ་ཡིད་མུག་ནད་ཕོག་ཚད་ཀྱི་ཉེན་ཁ31%ཉུང་བ་ཡོད། ཉིན་ལྟར་གོམ་གྲངས1000མང་དུ་བཏང་ན་ཡིད་མུག་ནད་ཕོག་ཚད9%མངོན་གསལ་དོད་པོས་ཉུང་དུ་འགྲོ་ཐུབ།

མདོར་ན། སྐྱེས་ཕོ་མོ་རྒན་གཞོན་སུ་ཡིན་རུང་། ཉིན་ལྟར་གོམ་པ་མང་ཙམ་བརྒྱབ་ན་ཡིད་མུག་ནད་ཕོག་པའི་ཉེན་ཁ་ཆུང་དུ་འགྲོ་ཐུབ།

ཉིན་ལྟར་གོམ་པ་ཁྲི་གཅིག་བརྒྱབ་ན། ཚེ་རིང་དུ་ལོ11འགྲོ་ཐུབ།

སྤྱི་ལོ2024ལོའི་ཟླ3པར།《དབྱིན་ཇིའི་ལུས་རྩལ་གསོ་རིག་དུས་དེབ》སྟེང་བཀོད་པའི་ཞིབ་འཇུག་ཅིག་ལས་མངོན་པར། ཉིན་ལྟར་གོམ་གྲངས2200ལས་བརྒལ་ན་འཆི་བའི་ཉེན་ཁ་དང་སྙིང་གི་ཁྲག་རྩའི་ནད་གཞིའི་ཉེན་ཁ་ཆུང་དུ་འགྲོ་ཐུབ་པ་དང་། ཉིན་ལྟར་གོམ་གྲངས9000ནས10500བར་ཟིན་ན་ཚེ་རིང་དུ་འགྲོ་བར་ཕན་ཐོགས་ཡོད།

གཞན་ཡང་། སྤྱི་ལོ2024ལོའི་ཟླ11པར།《དབྱིན་ཇིའི་ལུས་རྩལ་གསོ་རིག་དུས་དེབ》ཐོག་སྤེལ་བའི་ཞིབ་འཇུག་བྱས་འབྲས་གཞན་ཞིག་ལས་མངོན་པར། ལོ40ཡི་རྗེས་སུ་འགུལ་སྐྱོད་བྱེད་ཚད་ཉུང་ཤོས་ཡིན་པའི་མིས་ཉིན་ལྟར་ཆུ་ཚོད་རེར་སྤྱི་ལེ4.8ཀྱི་མྱུར་ཚད་ཐོག་ནས་གོམ་པ་བརྒྱབ་སྟེ་སྐར་མ111（ཧ་ལམ་གོམ་གྲངས11000）འགྲོ་བའམ་ཡང་ན་དེ་དང་འགུལ་སྐྱོད་བྱེད་ཚད་གཅིག་མཚུངས་ཡིན་པའི་ལུས་སྦྱོང་གཞན་དག་བྱས་ན། ཚེ་རིང་དུ་ལོ11འགྲོ་ཐུབ།

གོང་གསལ་གྱི་ཞིབ་འཇུག་དེ་དག་ལས་ར་སྤྲོད་ཐུབ་པར། རླངས་འཁོར་སོགས་རྐང་པར་འཁོར་ལོ་ཁོ་ན་སྒྲོག་ནས་མ་འགྲོ་བར་གོམ་པ་མང་ཙམ་བརྒྱབ་ན་གཟུགས་པོའི་བདེ་ཐང་ལ་བསམ་ཚོད་ལས་འདས་པའི་ཕན་ཐོགས་ཆེན་པོ་ཡོད་པ་མ་ཟད། ད་དུང་འཇིག་རྟེན་མི་ཡུལ་ཁམས་འདིར་སྡོད་པའི་མི་ཚེ་ཐུང་ཐུང་གི་ཚེ་ཐག་ཀྱང་ཆུ་རྒྱུན་བཞིན་རིང་ནས་རིང་དུ་བསྲིང་ཐུབ།

གོམ་པ་རྒྱག་སྐབས་འགུལ་སྟངས་འདི་དག་མཉམ་སྡེབ་བྱས་ན་ཕན་འབྲས་བཟང་།

རྒྱལ་ནང་གི་འབྲེལ་ཡོད་ལུས་སྦྱོང་དང་གསོ་རིག་མཁས་དབང་ཁག་ཅིག་གིས་གོམ་པ་རྒྱག་སྐབས་གཤམ་གྱི་འགུལ་སྟངས་ཁག་བདུན་པོ་དེ་དག་མཉམ་སྡེབ་བྱས་ན་གཟུགས་གཞིའི་བདེ་ཐང་ལ་ཕན་ཐོགས་ཡོད་པ་བསྟན་འདུག་པས། འདིར་མདོར་བསྡུས་ཙམ་ངོ་སྤྲོད་བྱ།

1.རྐེད་པ་ལག་པས་རྡེག་གིན་འགྲོ་དགོས།

གོམ་པ་བརྒྱབ་ནས་འགྲོ་ཞོར་རྐེད་པའི་མཐའ་འཁོར་གྱི་རྩིབ་ལོགས་ལ་ལག་པས་རྡེག་ཙམ་རྡེག་ཙམ་བྱས་ན་རྐེད་པ་ཕྲ་རུ་འགྲོ་ཐུབ།

2.རྐང་པ་བཀུག་ནས་འགྲོ་དགོས།

གོམ་པ་རྒྱག་དུས་རྐང་པ་མང་ཙམ་བཀུག་ནས་ཕྱིན་ན་གཟུགས་པོའི་མངར་ཆ་ཉུང་དུ་གཏོང་ཐུབ་པས། གཅིན་པ་མངར་སྐྱུར་གྱི་ནད་ཕོག་པའི་ནད་པར་ཕན་ཐོགས་ཆེ།

3.ལག་པ་ཡར་བཀྱག་ནས་འགྲོ་དགོས།

གོམ་པ་བརྒྱབ་ནས་འགྲོ་དུས་དུས་ཡུན་རིང་པོར་མགོ་སྒུར་ནས་ཕྱིན་ན། ཕྲག་པ་དང་མཇིང་པའི་ཤ་གནད་ལ་ངལ་དུབ་འབྱུང་སླ། དེས་ན། གཟུགས་པོ་འདྲོང་པོར་ལག་ཟུང་མགོ་ཐོག་ཏུ་ལྷོད་པོར་བཀྱག་ནས་ཕྱིན་ན་ལུས་སེམས་གཉིས་ཀྱི་ངལ་དུབ་སེལ་ཐུབ།

4.རྒྱབ་སློག་ནས་འགྲོ་དགོས།

གོམ་པ་རྒྱག་དུས་རྒྱབ་སློག་ནས་ཕྱིན་ན། གཅོང་ནད་དྲག་ཏུ་འགྲོ་བར་ཕན་ཐོགས་ཡོད། འོན་ཀྱང་མཇིང་ཚིགས་ནད་དང་ཁྲག་ཤེད་མི་བརྟན་པ་སོགས་གཞི་ནད་ཡོད་མཁན་དང་། ལོ་ན་མཐོ་བ། རྐང་ལག་བདེ་ལྕག་མེད་པའི་རྒན་རྒོན་ལ་མི་འཚམ།

5.རྟིང་པ་བཀྱག་ནས་འགྲོ་དགོས།

ཡུན་རིང་རྟིང་པ་བཀྱག་ནས་ཕྱིན་ན་སྙིང་གི་ཐེག་ཤུགས་དང་ཕན་ནུས་མཐོར་འདེགས་ཐུབ་པ་དང་། ཁྲག་གི་འཁོར་སྐྱོད་ལེགས་སུ་འགྲོ་བ། ཁྲག་རྩ་འགག་པ་དང་རེངས་པ་སོགས་སྔོན་འགོག་བྱེད་ཐུབ་པ་མ་ཟད། ད་དུང་རྐང་པའི་ཆུ་སྐྲངས་དང་སྐྱ་རྦབ་སེལ་ཐུབ།

6.རྐེད་པ་དང་དཔྱི་ཚིགས་གཡུག་ནས་འགྲོ་དགོས།

གོམ་པ་བརྒྱབ་ནས་འགྲོ་ཞོར་རྐེད་པ་དང་དཔྱི་ཚིགས་གཡུག་གཡུག་བྱས་ན་བཤང་བ་འགག་པ་སེལ་ཐུབ།

7.རྐང་པ་མཐོ་ཙམ་བཀྱག་ནས་འགྲོ་དགོས།

     གོམ་པ་སྤོ་ཐེངས་རེར། པུས་མོ་བསྐུམ་པ་དང་རྐང་པ་མཐོ་ཙམ་བཀྱག་ནས་ཕྱིན་ན་རྐེད་པའི་ཤ་གནད་ལ་སྦྱོང་བརྡར་ཐེབས་པ་དང་སྦྲགས་གཟུགས་བྱད་ཡག་ཏུ་འགྲོ་ཐུབ།