གཡུ་རྣའི་སྙན་ངག་བདམས་བཀོད།

མིག་ནང་གི་རི་དྭགས།

གཡུ་རྣ།

ལག་པ་རྒྱང་རིང་དུ་བསྲིངས་ནས།
དུས་ཚོད་དང་ཆུ་ཕྲན་རིང་དུ་བཞུར་རྗེས།
ང་ལ་ཐོབ་དགོས་པའི་ནོམ་པ་འགངས་ཆེན་ཞིག་ཡོད་པ་དེ་ནི།
གཙང་དཀར་གྱི་ངོ་གདོང་དང་མིག་ནང་གི་རི་དྭགས་རེད་འདུག

ངས་ནང་སེམས་ཀྱི་ཐོབ་ཤོར་རླུང་ལ་སྐྱོན་ནས།
གཡའ་དག་པའི་ནམ་མཁའ་ནང་དུ་དྲངས་རྗེས།
ས་སྲོད་ཀྱི་རྣ་བར་སྦྲན་པའི་རོལ་དབྱངས་དེ་དག
དགོད་བྲོ་བའི་ན་ཟུག་མང་པོ་ཞིག་དང་སྡེབ་ནས།
མིག་ཆུ་དང་ཆར་བ་གཅིག་ཏུ་དྲིལ།

གནམ་ངོ་འཐིབ་དྲག་པའི་དོ་ཞག
ཡིད་རྩིང་བའི་ཁ་བ་སྔར་བཞིན་བབས་ནས།
རླུང་བུ་དང་ཆུ་བོ་བྱིང་བའི་གྲམ་ངོགས་དེ་རུ།
ང་གཅིག་པུ་ཕྱིར་མིག་གི་འགག་འཕྲང་མང་པོ་བརྒལ་དགོས་བྱུང་དུས།
མིག་མདུན་གྱི་གྲི་གཟུགས་དག་ཀྱང་རིང་དུ་བཀྱེད་སོང་བའི་བཟོ་ལྟ་རིམ་གྱིས་མངོན།

ཁྱོད་ཁོ་ན།

ཁྱོད་ཁོ་ན།
རི་སུལ་གྱི་གནས་དེར་ཕྱིན།
རྟོག་སྒྲུང་རེ་ངག་ནས་སྐྱོར་ཞོར།
ཟླ་བའི་འཆར་ནུབ་ལ་ཞིབ་ཏུ་བསམ།

ཁྱོད་ཀྱིས་འཁྲུལ་སྣང་གི་གདོང་འབག་ཡོངས་སུ་བཤུས་ནས།
ཞེན་ཆགས་ཀྱི་རླིད་བུ་རྒྱང་ལ་བསྐྲད་རྗེས།
སྡོད་ཚུགས་པའི་ཁེར་རྐྱང་ཞིག་ཏུ་གྱུར་ནའང།
སྔར་བཞུད་ཀྱི་སྡུག་ཡུས་དེ་དག
འགོག་མེད་ཀྱི་རླུང་བུ་ནང་བཞིན་ངའི་རྣ་རྩ་ནས་ཡང་ཡང་ལྡང་གིན་འདུག

ཁྱོད་ཀྱིས་དཀར་ངོགས་ཀྱི་འཇིག་རྟེན་ཞིག་སྐྲུན་ནས།
རྨིག་རྗེས་དང་ལག་རྗེས་ཅི་ཡང་མེད་པར།
འཁོར་བའི་སྒོ་ཕྲན་ལས་ཡོངས་སུ་བརྒལ་ཐུབ་པ་བྱས་ནའང།
ངའི་ལོ་ཟླའི་གྲུ་ཁ་ནས་འཕུར་གྱིན་པའི་བྱེའུ་ཆུང་དེ་དག
ལན་བུའི་གསེབ་ཏུ་འཚང་ཡོང་བའི་རྡུལ་ཕྲན་རེ་རེ་ཁྱེད་རང་ཡིན་པར་ལྡོག་ཏུ་མེད།

ཁྱོད་ཀྱིས་མགོ་བོ་མཁའ་ལ་བཏེག་དང།
མཁའ་ལམ་ན་བྱ་ཁྱུ་ལྡིང་གིན་འདུག
རེ་སྨོན་གྱིས་བཞེངས་བའི་རྡོ་རིང་ཞིག་དང་མི་མཚུངས་ཨང་།
མཚམས་སྤྲིན་བཞིན་རྒྱང་ལ་ཡིབ་རྗེས།
ཐོབ་ཤོར་ལས་བརྒལ་མ་ཐུབ་པའི་ང་རང།
བྱེ་མའི་རི་ཚོགས་དང་འབྲལ་སྙིང་འདུག

ཁྱོད་རང་ཤོག་བྱ་ཞིག་ཡིན་པའི་དབང་དུ་བཏང་ན།
སྨྲེ་སྔགས་ཀྱི་རྡོག་ཁྲེས་ལྕི་མོ་ཁུར་དགོས་མི་འདུག
རླུང་བུ་མེད་པའི་ས་ཕྱོགས་སུ་འཇམ་ཅག་གེར་བབས་ན་ཆོག
སྤང་ཐང་དུ་བསྟར་བའི་མེ་ཏོག་དག་ཀྱང་ཁྱོད་དང་མཉམ་དུ་འཛུམ་པས་ཆོག

གཞས་མ་ཞིག་ལ་བཏབ་པ།

ལྗང་མདོག་གི་ལྭ་གྱོན་ནས།
དྲན་དྲག་པའི་ནམ་མཁའ་གླུ་རུ་བླངས་རྗེས།
རང་ཉིད་ཀྱི་མགུལ་དུ་འཆང་པའི།
མུ་ཏིག་གི་དོ་ཤལ་རེ་རེས་རང་ལ་དགའ་བའི་བཟོ་ལྟ་ངོམ།

ཆར་ཞོད་ཀྱིས་བརླན་པའི་སྤང་ཐང་བཞིན།
སྐད་ངག་གི་སྟངས་སྟབས་མེད་ནའང་།
སྙིང་ལ་སྡུག་པའི་གཞོན་ཚུགས་དང་།
རི་དྭགས་ཀྱི་མིག་ཟུང་གཡོས་པས།
མི་སེམས་ཀྱི་དར་སྐུད་ཕྱོགས་སུ་འཐེན།

ཉི་འོད་ཀྱི་ལོ་མ་མཁའ་ལ་འཕུར་ནས།
རྟོག་སྒྲུང་གི་རྟ་ཁྱུ་དགུང་ནས་གཤར་དུས།
སེམས་ནང་དུ་སྒྲུག་པའི་གསང་བ་དེ་དག
ཕྱི་རོལ་ནས་ཕྱི་རོལ་དུ་བཀྱེད་དགོས་པ་ཅི་ཞིག་ཡིན།

སྐབས་དེར།

སྐབས་དེར།
ངས་ཁྱོད་ལ་སྙན་ངག་དང་འབྲེལ་བ་དམ་པོ་ཡོད་པའི།
དཔེ་དེབ་ཁ་ཤས་ངོ་སྤྲོད་བྱས་ནས།
འགྲེལ་བཤད་མ་ཕོད་པའི་བརྩེ་དུང་གི་བཟི་ཁ་དེ།
ན་ཟུག་དང་མཉམ་དུ་མྱོང་དགོས་ཚུལ་བཤད་ནའང་།
ཁྱོད་ཀྱིས་བྲེལ་འཚུབ་ངང་ལས་ཚོགས་ཀྱི་བྱ་བ་ཡང་དུ་གླེང་ཞོར།
དེ་དག་རྗེས་ཕྱོགས་འུ་གཉིས་ཀྱིས་མཉམ་དུ་ལྟ་ཞེས་པ་དྲན་ནམ།