སྙན་ཚིག་བྱ་བྱེའུ་འདུ་བའི་ལྗོན་བཟང་།

ཡོང་ཁུངས། མཚོ་སྔོན་པོ་དྲ་བ། རྩོམ་སྒྲིག་པ། གུ་རུ་སྐྱབས། 2024-12-13 16:09:52 ཀློག་གྲངས།1333

སྙན་ཚིག་བྱ་བྱེའུ་འདུ་བའི་ལྗོན་བཟང་།

རྩོམ་པ་པོ།：ལྡོང་རོང་བསོད་ཐར།

གནས་དག་པ་རང་སྣང་དྲི་བྲལ་གྱི་མཁའ་དབྱིངས།།
སྐུ་ཉི་མ་འབུམ་གྱི་འོད་ཟེར་གྱིས་ཕྱུག་པའི།།
ཐུགས་བརྩེ་བའི་རྒྱལ་དང་རྒྱལ་སྲས་ཀྱི་ཐུ་བོ།།
དཔའ་འཇམ་དཔལ་ཡེ་ཤེས་དབྱེར་མེད་དུ་བཞུགས་རོགས།།

ཡིད་དད་པའི་ཚོགས་བརྒྱད་པདྨ་ཡི་གདན་སྟེང་།།
མགོན་ཡབ་གཅིག་གླིང་ཚང་ཆོས་རྒྱལ་གྱི་གདུང་རབས།།
ཕ་བུ་ལ་གཅེས་པའི་ཐུགས་བརྩེ་ཞིག་བཅངས་ནས།།
དུས་ད་ལྟ་ཉི་རྡུལ་འཚུབ་འཚུབ་རང་བྱོན་ཅིག །

འདང་བརྒྱབ་ན་ཕ་ཡུལ་ཕ་ཡུལ་ཞེས་གླེང་དུས།།
སྐབས་ལ་རེར་གཟུགས་ཅན་དངོས་པོ་ཞིག་ཡིན་ཡིན།།
མཚམས་ལ་རེར་གཟུགས་མེད་འདུ་ཤེས་ཤིག་ཡིན་ཡིན།།
གང་ལྟར་རུང་ཕྱི་འདང་ནང་འདང་གིས་བཅིངས་འདུག །

ལས་བག་ཆགས་དར་སྐུད་ཕྲ་མོ་ཞིག་ཡིན་ན།།
ལྷོད་མ་མྱོང་དམ་དམ་སྒྲོག་གུ་ལ་འཇུས་པའི།།
རང་གཉོམ་ལག་རྒྱས་སའི་ཕ་ཡུལ་གྱི་ཕྱི་ནང་།།
དུས་དེང་སང་དྲན་སྟངས་སུམ་མདུད་དང་བརྒྱ་མདུད།།

ཤར་གཉན་ཆེན་སྐུ་ལྷ་མདུན་སྒོ་རུ་བཞུགས་ཡོད།།
ནུབ་རྨ་རྒྱལ་རཱ་ཎས་ལྟག་སྒོ་དེ་བསྲུང་ཡོད།།
ས་སོས་ཡག་རྨ་སྟོད་སྤོམ་ར་དང་འབྲེལ་ཡོད།།
རུས་མཐོ་བ་ར་ཁྲ་རྒན་པོ་ཡི་མི་རྒྱུད།།

ས་མདོ་སྨད་སྒང་དྲུག་འབྲི་ཟླ་ཡི་ཡང་སྙིང་།།
དཀྱིལ་མ་འགྱུར་ཉག་ཕུ་ལ་དཀར་གྱི་རྩེ་མོ།།
འབྲི་ཟླ་ཆུ་གཉིས་ཀྱི་བྲང་གཞུང་གི་དམར་ཆུང་།།
འདི་ཟལ་མོ་སྒང་གི་གཏམ་རྒྱུད་ཀྱི་མགོ་ཁུངས།།

གཏམ་སྙན་མོ་ཆོས་འབྱུང་དེབ་ཐེར་དུ་བཀོད་ཡོད།།
སུས་མ་ཁོག་གནའ་གྲགས་ད་གྲགས་སུ་སོང་ན།།
ཡུལ་གླིང་ཚང་དག་པ་ལྔ་བརྒྱ་ཡི་ཞིངས་ཁམས།།
བཤད་མི་དགོས་བཤམས་པའི་ངོ་མཚར་ཞིག་རེད་ཨང་།།

སྟོད་བྲ་མ་མདུང་རྩེ་མགུལ་བ་ནས་བརྒྱན་ཏེ།།
བར་རོང་མ་འབྲོག་གི་ཚོ་ཆེན་གྱིས་བཟུང་བ།།
སྨད་ཉག་ཆུ་རིང་མོའི་དར་མདུད་ཀྱིས་དཀྲིས་པའི།།
ཡུལ་འདི་ཚོ་རྒྱ་མཚོ་མེར་མེར་བཞིན་འཁྱིལ་ཡོད།།

དགོན་ཆེན་པོ་གསུམ་འགྲིག་ནོར་བུ་ཡི་སྤུན་གསུམ།།
མགོན་དགེ་འདུན་དམར་སེར་མཚམས་སྤྲིན་གྱི་རང་མདངས།།
གླིང་འགུ་ཟི་རྫོང་མགོ་ཇ་ཆུ་ཞེས་ཐོས་ན།།
བསམ་ཤེས་ན་རིགས་གསུམ་སྤྱི་འདུས་ཀྱི་བཀོད་པ།།

ལོ་བཅུ་བཞི་ཙམ་ནས་ཕ་ཡུལ་དང་གྱེས་ཏེ།།
ཐག་རིང་ཐུང་མི་འདྲ་དགུ་བསྒྲིགས་ཤིག་བྱས་རྗེས།།
ཁྲ་གོར་གོར་འཁྱིལ་བའི་ཆུ་མིག་གི་ཀློང་ན།།
དྲན་སླ་བ་ཕ་སའི་རི་མོ་དེ་མཛེས་པ།།

ཕྱུགས་དཀར་ནག་མི་འདྲ་རི་ལུང་དུ་ཁེངས་ཤིང་།།
འབྲུ་སྣ་ལྔའི་མགོ་ལྕོག་ཞིང་ཁ་ནས་ལྡེམ་ལྡེམ།།
ནང་ཕུ་ནུ་དཔུང་གདང་རྣོ་ལྕགས་ཀྱི་སྒྲིལ་མ།།
སྡེ་མི་འདྲ་སྡེ་ཆེན་མར་ཁུ་བཞིན་འཁྱིལ་ཡོད།།

རི་མཐོ་ས་རེ་ནས་རྒྱང་ལྟ་རེ་བྱས་ན།།
སྡེ་སྟོད་སྨད་གཉིས་ཀྱི་མཐུད་མཚམས་དེ་རིང་བས།།
གྲངས་མི་ཆོད་རྒོད་པོའི་གཤོག་རྩལ་དེ་ཡོད་ན།།
བསྐོར་བསམ་པའི་བྲེལ་བ་གནའ་བྲེལ་དང་ད་བྲེལ།།

རྒྱུས་ཡོད་ན་རང་ས་རང་ཡུལ་གྱི་མལ་ས།།
རྒྱུས་མེད་ན་གླིང་དཀར་དཔའ་བོ་ཡི་ཕ་ས།
ཡ་མཚར་བའི་མཐོང་ཐོས་ནེའུ་གསེང་གི་ཀློང་ན།།
སེམས་དགའ་བའི་མགྲིན་གླུ་དིར་དིར་རང་སྙན་པ།།

ཕར་བལྟས་ན་ས་གཤིན་གསེར་མདོག་གི་ཁོལ་མ།།
གནའ་ཐོག་མའི་ལྟེ་ཁྲག་བྱུ་རུ་ཡི་ཁྲ་ཁུང་།།
ལམ་ཆེ་ཆུང་རི་ལུང་གྱ་གྱུ་ཡི་བརྐོས་རིས།།
ཆུང་བྱིས་པའི་རྐང་རྗེས་གཟི་མིག་གི་ཕྲེང་བ།།

ཤར་ཉ་འབྲང་བྲག་དཀར་གདོང་ལྔ་བཞིན་གསིག་ཅིང་།།
ལྷོ་དགེ་རྒྱས་སྨན་བཙུན་གཡུ་འབྲུག་ལྟར་འཁྱིལ་བ།།
ནུབ་གུ་ལུ་སྤུན་གསུམ་ཁྱུང་གཤོག་བཞིན་བརྒྱངས་པ།།
བྱང་སྟག་རྩེ་རྒྱ་སྟག་མཆེ་གཙིགས་བཞིན་རྣོ་བ།།

སྟེང་འཁོར་ལོ་རྩིབས་བརྒྱད་ཝེར་མ་ཡི་རྩེན་ས།།
ས་པད་མ་འདབ་བརྒྱད་རྗེ་འབངས་ཀྱི་ཕོ་བྲང་།།
མཚམས་བཀྲ་ཤིས་རྟགས་བརྒྱད་རང་བྱུང་གི་འཛུམ་རིས།།
དཔེ་དྲངས་ན་སྐབས་གསུམ་སྐྱེད་ཚལ་གྱི་དོ་ཟླ།།

ལྷ་ཚངས་པའི་བྱིན་རླབས་གང་བྱོ་ཡི་བུམ་པ།།
གཉན་གེ་མཛོའི་ནོར་མཛོད་འབེལ་གཏམས་ཀྱི་གཡང་སྒམ།།
ཀླུ་ཕ་འབུམ་བཅུ་གཉིས་མཇལ་སྐལ་གྱི་སྒོ་ཆེན།།
འདི་མ་བོས་རྟེན་འབྲེལ་རང་འགྲུབ་ཀྱི་ཕ་ས།།

སྨན་འབྲུག་མོ་མ་ཤི་གསོན་པོ་ཞིག་མེད་ཀྱང་།།
གཟུགས་མཛེས་སྡུག་མ་ཁུར་རྟེན་སྐལ་དུ་བཞག་པའི།།
གླིང་དཔའ་བོའི་མ་སྲིང་མོ་སྨན་གྱི་ལང་ཚོ།།
ཕོ་རྟ་ཐོག་ཅན་ཚོ་ས་ཐོག་ཏུ་འགྱེལ་སྐད།།

བུ་དཔའ་བ་ས་གྲགས་གནམ་གྲགས་སུ་སོང་བའི།།
ཕྱི་དགྲ་སྡེ་གཞོམ་པའི་རྩལ་དྲུག་གི་སྟག་མོ།།
ནང་རང་སྡེ་འཚོལ་བའི་མཁས་མཛངས་ཀྱི་ལུ་གུ།།
བུ་སྐྱེས་སྐྱེས་ས་གནོན་གནམ་འདེགས་ཀྱི་ཀ་བ།།

འཆད་གཞུང་བརྒྱའི་ངར་སྒྲ་གཙང་བོ་ལས་རིང་བ།།
རྩོད་འགྲན་མེད་གནམ་ལྕགས་ལྡེམ་མྱུར་གྱི་རང་གཤིས།།
རྩོམ་ཐོགས་མེད་རླུང་གཤོག་རྐྱང་ཤེས་ཀྱི་གོམ་འགྲོས།།
འདིར་དྲན་དབང་ཉི་ཟླ་གཉིས་འཛོམས་ཀྱི་གདན་ས།།

ནང་ཉམས་རྟོགས་འབར་བའི་གྲུབ་ཐོབ་ཀྱི་བཙན་ས།།
ཕྱི་གཙུག་ལག་རིག་པའི་མཁས་སྙན་གྱི་འདུ་ར།།
རྒྱུད་མན་ངག་གསེར་བྲེ་དངུལ་བྲེ་ཡི་མཛོད་ཁང་།།
ལུང་རིགས་པའི་གད་རྒྱངས་དབྱར་སྐྱེས་ཀྱི་རྔ་སྒྲ།།

ཆུང་བྱིས་དུས་ཕྱི་དྲན་འཇའ་ཚོན་ལས་བཀྲ་བ།།
གཏམ་ཁ་དཔེའི་མེ་ཏོག་སྣ་བརྒྱ་ལས་མང་བ།།
བསམ་མ་ཤེས་ཁ་ལག་ཚོད་མེད་ཀྱི་བྱ་སྤྱོད།།
ད་དྲན་ན་ངུ་དགོད་འདྲ་མ་དང་འདྲེས་མ།།

ནང་ན་ཟླའི་རྩེད་ཁང་གྱོང་རལ་གྱི་གད་ཁུད།།
ཕྱི་རྫི་རོགས་ན་ཆུང་གསང་ཚིག་གི་བྲག་ཕུག།
རླུང་ལྷགས་པས་ངོ་གདོང་གཙེས་པ་དེ་དྲན་བྱུང་།།
ཆར་ཁ་བས་གོས་མཐའ་སྦངས་པ་དེ་དྲན་བྱུང་།།

སེམས་བསམ་པ་མཐུན་ཕྱོགས་གཅིག་མཚུངས་ཀྱི་བུ་མོ།།
དགོས་མཉམ་འགྲོ་མཉམ་འདུག་གནའ་འདྲེས་ཀྱི་ཁོ་མོ།།
དུས་དེང་སང་པང་ཁུག་བུ་རྒྱུད་ཀྱིས་གང་རུང་།།
གནའ་དང་མའི་མཛེས་པ་བརྗེད་ཐབས་ཤིག་མི་འདུག །

བེའུ་རེའུ་ལུག་དེད་སའི་ཞིང་ཁ་དེ་དྲན་བྱུང་།།
ཤིང་ལྕི་བ་བཏུ་སའི་རི་སྒང་དེ་དྲན་བྱུང་།།
བྱ་བྱེའུ་དཀྲོགས་སའི་བྲག་ཐེམ་དེ་དྲན་བྱུང་།།
ཡུངས་སྲན་མ་བརྐུ་སའི་ར་བསྐོར་ཡང་དྲན་བྱུང་།།

ན་འདམ་སྦགས་ཁྲོད་ཀྱི་སྦལ་ལྕོང་ཚོ་ཤ་ཚ།།
ཆབ་གཙང་བོའི་ནང་གི་ཉ་མོ་ཚོ་སྙིང་རྗེ།།
བྱེའུ་ཨ་བྲ་བཙོན་བཙུད་བྱས་བྱས་ཀྱི་ལས་དག །
འགྱོད་ཟེར་ན་མ་ཟེར་བྱིས་དུས་ཀྱི་ཕྱི་དྲན།།

ལྕགས་ལེབ་ལེབ་རིག་ན་རལ་གྲི་ཞིག་བཟོ་ཐབས།།
ཤོག་སྐྱ་སྐྱ་རྙེད་ན་ལྷ་འབག་ཅིག་དྲ་ཐབས།།
ཆུ་ཆེ་ཆུང་འགྲམ་ནས་གཅེར་རྒྱུག་དེ་བྱས་བྱས།།
རྡོ་བརྩིགས་ནས་རྩེད་ཁང་ལས་ལས་ཀྱང་དྲན་བྱུང་།།

རྡེའུ་རྩེས་ནས་སེན་ཤ་གས་པ་དེ་དྲན་ཁུ།།
འབེན་བཙུགས་ནས་མཛུབ་མགོ་ཐེད་པ་ཡང་དྲན་ཁུ།།
ཤེད་གཡུག་ནས་སྣ་ཁྲག་བཞུར་བའང་དྲན་ཁུ།།
བ་རྟོལ་ལེ་བསམ་ནག་བྱས་བྱས་ཀྱང་དྲན་ཁུ།།

རྒན་མགོ་དཀར་ཞིག་གི་བསླབ་བྱ་ཡང་དྲན་བྱུང་།།
ད་མ་བཞུགས་གཤེགས་པའི་ཨ་མྱེ་ཡང་དྲན་བྱུང་།།
ད་མི་དྲན་མིག་ཆུ་ཐར་ཐར་དུ་འཐོར་ན།།
རྩོམ་འབྲི་སའི་ཤོག་དཀར་རལ་ན་ཡང་ཐང་གི།།

དཔྱིད་དར་ཁ་ལྷུང་དུས་སོ་ནམ་ལ་བྲེལ་བ།།
དབྱར་ད་འོང་ཟེར་དུས་རི་མགོ་རུ་ཆས་འགྲོ །
སྟོན་གསེར་མདོག་འབྲུ་རྐང་སྨིན་ལག་དེ་རྒྱས་དུས།།
དགུན་སྐྱིད་ལ་འཁོར་བའི་ཡུལ་མི་ཚོ་སྤྲོ་བ།།

ཕྱི་དུས་བཞི་མ་འདྲེས་པ་ཏྲ་ལྟར་སྒྲོས་པ།།
ནང་འབྱུང་ཁམས་མ་འཁྲུག་གསེར་ཞུན་ལྟར་སྣུམ་པ།།
ཡུལ་གླིང་ཚང་ལྷ་དང་ལྷ་མིན་གྱི་དགའ་ཚལ།།
ལས་དབུ་རྨོག་དགུང་སྔོན་སྤྲིན་དཀར་གྱིས་བཏེགས་ཡོད།།

ཕ་དམ་པ་དགྲ་ལྷ་རང་འཁོར་དུ་ཆས་དུས།།
དམག་བུ་རྟའི་དར་མཚོན་མེ་ལྕེ་བཞིན་མཆེད་དུས།།
ཕྱོགས་དགྲ་བཞི་མགོ་བོ་ཡོབ་འོག་ཏུ་མནན་དུས།།
སྟོབས་ཆེ་བ་རྫོང་ཆེན་རྫོང་ཆུང་གི་མངའ་བདག །

རྒྱུད་བཟང་བོའི་རུས་རྐང་འོ་སྤྲིས་བཞིན་ཆགས་དུས།།
གླིང་ཆེ་རྒྱུད་འབྲིང་རྒྱུད་ཆུང་རྒྱུད་ཀྱི་འཁོར་ལ།།
སྡེ་ཆེན་པོ་ཁྲི་སྐོར་བཅུ་གཉིས་ཀྱིས་བསྐོར་དུས།།
མདོ་སྟོད་སྨད་ཨ་མས་བུ་ཕྲུག་བཞིན་སྐྱོང་ཟིག །

ཆུང་རྫ་རྒྱུད་ཁྲོ་ཤུལ་བྱང་ཕྱོགས་སུ་བཞག་སྟེ།།
ཤར་ཟླ་ཐ་ཚོ་ཁ་བཅུ་གསུམ་གྱི་རི་སྡེ།།
ལྷོ་ཡིད་ལྷུང་སྡེ་མཐའ་ཚུན་ཆོད་དེ་བརྩིས་ན།།
ནུབ་འདན་ཡུལ་བར་གྱི་གླིང་ཚང་གི་རུས་ཁོངས།།

རྫ་སྟོད་སྨད་ཉག་ཕྲན་མདའ་མོ་བཞིན་དྲང་སྐད།།
བར་བྱང་པ་ཁག་གསུམ་གཞུ་མོ་ལྟར་གུག་སྐད།།
སྨད་ཉག་ཆུ་ཆུ་རྒྱུད་རལ་གྲི་བཞིན་འཕྱོར་བ།།
དཔའ་འཁོར་གསུམ་བསྐོར་བའི་དགྲ་ལྷ་ཡི་ས་དབྱིབས།།

ཆུ་རྫ་ཆབ་སིལ་མའི་ཉེ་འཁོར་དུ་ཆགས་པའི།།
གླིང་ཚབ་ཚ་དགོན་གྱི་ཉེ་ཟུར་དུ་བཞེངས་པའི།།
ས་སྐྱིད་སོས་ཡག་གི་ལྟེ་བ་རུ་འགྱིང་བའི།།
གླིང་གེ་སར་ལྷ་ཁང་རྒྱ་ཕིབས་དེ་བརྗིད་པ།།

མཁར་མི་འགྱུར་སེང་འབྲུག་སྟག་རྩེ་ཡི་གནའ་ཤུལ།།
ཤུལ་མ་ཉམས་ད་དུང་བརྩིགས་རྨང་དང་བཅས་ཏེ།།
ཡུལ་གླིང་ཚང་ཁོག་ཏུ་བྲག་བརྩིགས་བཞིན་བརྟན་པ།།
འདི་སྨུག་པོ་ལྡོང་གི་རྣམ་ཤེས་ཀྱི་གནས་མལ།།

གཉན་དམར་པོའི་ལས་ཟོག་ཆ་བདུན་གྱི་ནོར་བུ།།
མགོན་ཁྲོ་བོ་ལས་མགོན་ཡིད་བཞིན་གྱི་རྟེན་སྐུ།།
སྐུ་མི་འགྱུར་འགུ་ཟི་མགོན་ཁང་དུ་བཞུགས་ན།།
ལྷ་ཆོས་སྐྱོང་བཅོལ་ན་བཅོལ་གོ་དེ་ལོས་ཆོད།།

གནས་རྫོང་རི་རྒྱབ་ན་ཨ་ཡིག་གི་རང་བྱོན།།
གླིང་ཡབ་སྲས་དབུ་ཐོད་མ་བྲིས་ཀྱི་རང་དོད།།
འདི་རྟེན་འབྲེལ་ཡག་གི་གདུང་བཙུན་གྱི་བརྡ་ཡིག །
འདི་སྨུག་པོ་ལྡོང་གི་ཆེ་བ་དེ་མཚོན་ཡོད།།

གླིང་གེ་སར་ཟེར་བའི་གྲགས་སྙན་གྱི་དཔའ་བོ།།
བོད་མགོ་ནག་ཡོངས་ཀྱི་དགྲ་ལྷ་རུ་བཀུར་ས།།
འདི་ཡར་དེད་གླིང་རྒྱལ་ཞེ་གཉིས་ཀྱི་སྐབས་སུ།།
མ་འགོག་མོའི་སྲས་སུ་གླིང་ཚང་དུ་བལྟམས་སྐད།།

འབྲོག་སྦྲ་གུར་བྱང་ལམ་འབྲོང་ཁྱུ་བཞིན་མང་བ།།
དམའ་རོང་མོ་བང་ཁང་ཕ་བོང་བཞིན་བརླིང་བ།།
ལས་ད་བྲེལ་ཡང་བྲེལ་ཁོམ་ཁོམ་རང་མེད་པའི།།
ལས་བརྩོན་པ་ཆེ་བའི་མི་རྒྱུད་འདི་སྟོབས་པ།།

མི་གཞུང་དྲང་ཡར་གཏུགས་སྤྱི་དཔོན་གྱི་བུ་ཚ།།
རུས་བཟང་བོ་ཡར་བརྒྱུད་ལྡོང་ཚང་གི་ཁྱིམ་རྒྱུད།།
རྒྱུད་མི་འདྲ་ཆེ་རྒྱུད་གསེར་འབུམ་གྱི་ལྷ་འབངས།།
རྟ་མི་གཅིག་རྐྱང་ཤེས་རླུང་གཤོག་གི་མ་རྒྱུད།།

ཡུལ་ངེས་མེད་འགྲིམ་པའི་ལོ་ཟླ་ཞིག་བརྩིས་ན།།
ལོ་བཅུ་བཞི་ཙམ་ཞིག་མྱུར་སྟབས་ཀྱིས་སོང་བས།།
ད་ཕ་ཡུལ་ཐོན་རུང་གཞིས་སྡོད་ཀྱི་ཡུལ་མི།།
ངོ་ཐུག་རུང་ངོ་ཤེས་མིན་མིན་དུ་གྱུར་འདུག །

དེ་ལྟར་རུང་ཟོལ་མེད་བརྩེ་སེམས་ཀྱི་གཏད་ཕྱོགས།།
བྱེའུ་ཆུང་རུང་ཞེ་བློ་སྡོང་མགོ་ལ་དཔེ་བཞག །
ཡུལ་ཕུ་ནུ་ཕན་ཐོགས་ལག་ཐོགས་རེ་མེད་ཀྱང་།།
གཏམ་སྐྱིད་སྡུག་གང་ཐོས་དགའ་སྡུག་དང་སྦྲེལ་ཡོད།།

ངས་ཆུང་ནས་བལྟས་པའི་ཕ་ཡུལ་གྱི་དེ་རིང་།།
འདྲ་མི་འདྲ་འགྱུར་ལྡོག་གནམ་ས་བཞིན་འདུག་ཀྱང་།།
ཕྱི་དངོས་པོ་འགྱུར་བའི་སྣང་ཚུལ་དེ་བཞག་ནས།།
ནང་མི་འགྱུར་ཡང་ཡང་ཕ་ཡུལ་ལ་གླན་ཡོད།།

ས་ལག་མཐིལ་ཙམ་ལ་ཁ་ཕོ་ཡིས་བསྡོམས་ཡོད།།
ཆུ་ཁམ་བུ་གང་ལ་ཞེན་ཆགས་ཀྱིས་དཀྲིས་ཡོད།།
སྙིང་དམར་ཆུང་ལྡིང་འདི་ཉ་མོ་ཞིག་ཡིན་ན།།
གནས་དེ་ཉིད་མཚོ་དང་མཚེའུ་ཞིག་འདྲ་ལེ།།

སེམས་ངེས་མེད་རི་ཁའི་རི་དྭགས་བཞིན་འཁྱམ་ཡང་།།
བརྗེད་མ་མྱོང་རང་ས་རང་ཡུལ་གྱི་ངོ་གདོང་།།
ལས་ཆེ་ཆུང་རང་ནུས་རང་ཚོད་ཅིག་བསྒྲུབས་ཀྱང་།།
བོར་མ་མྱོང་ཕ་ས་གོར་གོར་དེའི་ཐ་སྙད།།

གཞོན་སོ་དཀར་འཛུམ་པའི་འོད་སྣང་གི་དུང་ཟླ།།
རྒས་སྐྲ་དཀར་དུང་གི་ཐོར་ཅོག་གི་ཆུ་འཛིན།།
ཤ་རུས་པ་བརྒྱུས་པའི་དམུ་ཐག་གི་བཙན་རྫོང་།།
ལུས་ཚོར་དྲུག་འདུ་བའི་བྱ་བྱེའུ་ཡི་ལྗོན་བཟང་།།

ལོ་ན་ཚོད་འགོག་མེད་རྒྱང་རིང་ནས་བཞུད་ཀྱང་།།
ཡིད་དགའ་བའི་བལ་དཀར་དར་འཇམ་གྱི་སྤྲིན་དཀར།།
ལམ་རྩུབ་རེག་ཚ་གྲང་འབུམ་ཁྲག་ཅིག་གཤགས་ནས།།
ཚིག་སྙན་མོའི་སྦྲང་ཆར་རང་ཡུལ་དུ་བསྩལ་ཡོད།།

ཚིག་རྒྱས་སྤྲོས་ཤོམ་ཆེན་འགྲོ་སྟངས་དེ་བསྐྱུར་ནས།།
དོན་གོ་སླའི་ནང་གཏམ་རང་སྐད་དུ་གཅལ་ནས།།
སེམས་བསམ་པའི་བརྡ་གླུ་ངག་རྟ་ལ་དྲངས་ནས།།
ཇ་འོ་མའི་ཚབ་ཏུ་རང་ཡུལ་ལ་ཕུལ་ཡོད།།

རྩོམ་གོང་མ། > གཡུ་རྣའི་སྙན་ངག་བདམས་བཀོད།
རྩོམ་གཞུག་མ། > ཡིད་གདུང་། མར་བཟའ་བློ་སྒྲོལ།

མཚོ་སྔོན་གྱི་བརྩམས་ཆོས་གཉིས་ལ་སྐབས30པའི་ཀྲུང་གོའི་དངོས་བཤུས་གློག་བརྙན་གྱི་རིག་གཞུང་དངོས་བཤུས་གློག་བརྙན་རིགས་ཀྱི་བརྩམས་ཆོས་ལེགས་ཤོས་ཀྱི་མཚན་སྙན་ཐོབ།

མཚོ་སྔོན་གྱིས་ཐོག་དང་པོར་ལུས་རྩལ་བའི་སྨན་ཡིག་འབྲི་མཁན་གྱི་དཔྱད་ཞིབ་གསོ་སྦྱོང་འཛིན་གྲྭ་དངོས་སུ་སྒྲུབ་མགོ་བརྩམས།

མཚོ་ཤར་གྲོང་ཁྱེར་གྱིས་སྐབས་བདུན་པའི་མཚོ་སྔོན་གྱི་དཔྱིད་གསར་ལས་མཚོ་ཤར་གྱི་ལེའུ་ཞེས་པའི་རིག་གནས་ཡུལ་སྐོར་གྱི་རིམ་སྤེལ་བྱེད་སྒོ་སྤེལ་རྒྱུ་རེད།

གོ་སྐབས་དམ་འཛིན་དང་དུས་བསྟུན་མདུན་སྐྱོད་དང་ཡིད་ཆེས་བརྟན་པོ་བཅས་ཀྱི་ངང་ནས་མདུན་དུ་བསྐྱོད་དགོས།　 ཁྲེན་ཀང་དང་ཞ་པིང་གིས་གཏམ་བཤད་པ་དང་། ཝུའུ་ཞའོ་ཅུན་གྱིས་མགོ་འཛིན་བྱས།