ལམ་འགྲོ་བ།（ཞར་བཀོད་གསུམ།）

ལམ་འགྲོ་བ།（ཞར་བཀོད་གསུམ།）

ཨ་ཏའི་བུ་རྒྱུད། རྨ་ལྷོ།

ལོ་དེའི་འཁོར་རྐྱེན་གྱི་རྗེས་སུ།

མཚན་ལམ་རིང་མོ་འདི།

ཧ་ལམ་གཅོད་མཚམས་བཞག

སྟོན་ཀའི་ཟླ་འོད་དང་ལམ་ཁའི་གློག་འོད།

ངའི་མཐོང་ལམ་ནས་འདྲེས་ཏེ།

སྣུམ་ལམ་ལ་བབས།

འདི་ཡང་འགྲུལ་བཞུད་ཐུང་ངུ་ཞིག་གི་སྟ་གོན་ཡིན་སོང་།

ཕྱིར་དྲན་དང་མཛའ་བརྩེ་འཁྱིལ་བའི་གྲོང་སྡེ་དང་མཁར་གྲོང་བརྒྱུད།

ཞེན་ཆགས་དང་འདྲིས་སྟོབས་ཆེ་བའི་ཁོར་ཡུག་དང་ཆང་ཁ་བརྒལ།

འདུག་འདོད་ཀྱི་ཚོར་བ་མང་ཤོས་ཕྱི་མིག་གིས་བསླངས་ཀྱང་།

ལམ་བར་ལམ་བར་ཡིན་པས།

རང་ཉིད་ལམ་འགྲོ་བ་ཞིག་ཡིན་པ་ཝ་ལེར་དྲན་བྱུང་།

ཡོད་ཚད་ལམ་བར་ནས་འགྱུར།

ཐམས་ཅད་ལམ་བར་ནས་རྒས།

ད་ནི་སྐྱ་མདའ་གཏོང་ལ་ཉེ་བའི་རེ་བའི་འོད་སྣང་ཁྲོད།

མདུན་ནས་མདུན་ལ་བསྐྱོད་ཆོག

                                    2024.10.17ཉིན།

སྨྲ་བ་འགག་པ།

གཏམ་གྱི་ཡང་སྙིང་ཟད་སྟངས་ལས།

སྐད་ཆའི་ཚེ་ཚད་རྟོགས་བྱུང་།

འགྱོད་པ་ཏོག་ཙམ་རེ་བསྐྱུར་ཞོར་གྱེས་ལུགས་འདི་ཡང་།

ཞེན་ཆགས་དང་ཕྱི་མིག་འདོར་བའི་སྦྱོང་བརྡར་ཞིག་རེད།

ད་ལྟ། 

ང་ནང་བཞིན།

ཁྱོད་དང་ཁོ་མོའི་ནང་སེམས་ཀྱང་།

ཤིན་ཏུ་ཁེར་རྐྱང་ཡིན་ངེས།

ལག་འཕྲིན་ཐང་ལ་བཞག་རྗེས།

རང་ཉིད་མཐོང་ཡོང་མོད།

མུན་ནག་དང་མལ་ཁྲིའི་བར་ནས་སླར་ཡང་འབོར་སྲིད།

ཉིན་ལ་བསྐྱེད་པའི་སྡུག་རུས་དང་།

སྲིབ་ཏུ་བཏབ་པའི་སྨོན་ལམ་སོགས།

འཇིག་རྟེན་གཞན་ཞིག་ནས་སྨིན་པ་འདྲ།

རང་གི་བྱ་བྱེད་ལ་ཁུར་སེམས་མེད་ཚེ།

དུས་སྲོལ་དང་མཐུན་པར་སྨྲ།

ག་ལེར་ལྟོས་དང་།

སྟོང་བའི་མཁའ་དབྱིངས་འདིས།

ང་ཚོ་ནམ་ཡང་ལག་སྟོང་དུ་འགྲོ་དགོས་པ་གསལ་བཤད་བྱེད་ཀྱིན་འདུག

                           2024.11.09ཉིན།

ཆང་འདྲེས་པའི་སྙན་ངག

མི་ཆེན་ཞིག་གི་ཀླད་ཁྲག་ཤོར་བ་བཞིན།

ངའི་སྙན་ངག་ཏུ་ཆང་བབས་པས།

ཚེ་སྟོད་ཀྱི་གཏམ་རྒྱུད་ཁ་ཤས་ད་དུང་བཟི་ཁྱོམ་ཁྱོམ།

ཡུལ་དུས་ཀྱི་ཡག་ཉེས་མང་དག་བརྒྱུད།

སྤྲོ་གསེང་གི་མན་ངག་མ་ལུས།

ཉམས་མྱོང་གི་ཆང་བུམ་དུ་ལྟེམས།

ཁོ་བོའི་ཆང་ཕོར་གས་ནས་བཟུང་།

འགྱོད་གདུང་གི་རི་མོ་ཇེ་གསལ་དུ་གྱུར།

གང་ལའང་བྲོ་བ་མེད་པ་འདི་ཅི་ཞིག་རེད།

ངས་ནི་སྔར་ལྟར།

སུས་ཀྱང་རྒྱུས་ལོན་མི་འདོད་པའི།

ཁེར་རྐྱང་གི་སྒྲུང་རིང་བྲིས་ཏེ་སྡེ་མཐའ་ཉུལ།

གསང་སྲུང་མེད་པར་འཚོ་དཀའ་ཡང་།

ནང་གཏམ་ལ་བདུད་རྩི་མཆོད།

མངོན་ལྐོག་མེད་པར་འགྲོ་དཀའ་མོད།

ངར་གཏམ་ལ་མཆིལ་ལུད་འཕེན།

ཉེ་ཉེའི་སྐད་ཆ་ཚིག་ཏུ་འཕོས་ཚད།

འགན་ཁུར་རྫོགས་ཐབས་ཙམ་མིན་ནོ། །

2024.10.30ཉིན།

མཚན་གཞས་འཁྱག་པོ།

འབྲེལ་ལམ་ཇེ་མང་དུ་སོང་གིན།

ཁ་བརྡ་ཚར་གྱིན་འདུག

སེམས་ཁུར་གྱི་གཏམ་རྣམས།

དུས་ཀྱི་འཁྱག་རླུང་གིས་ཁྱེར་འདྲ།

གཉིད་མི་འོང་དུས།

མུན་པའི་ཆིག་ལབ་མ་གཏོགས་ཅི་ཡང་མི་ཚོར།

ཟླ་བ་ཁེར་འགྲོ་ལྟ་བུའི་ཁྱེད།

འཚོ་བ་དང་ཚོར་བའི་བར་ནས་ག་ཚོད་ངུས་མྱོང་།

མི་ཕལ་མོ་ཆེ།

རང་བདེ་ཁོ་ནར་སྲེད།

རྒྱང་སྒྲིབ་ཕོག་སྟེ།

བློ་རྒྱ་ཇེ་ཆུང་དུ་འགྱུར་སྐད།

དངོས་ཡོད་ཀྱི་ལམ་བུ་དོག་པོ་གྲོང་ནས་གྲོང་ལ་འཐེན།

ང་ཚོ་ཕལ་བ་ཡིན་པས།

སྡུག་བསྔལ་དང་མི་རྟག་གི་རབ་ཁ་གསལ་བོར་ཤེས་དགོས་ཨང་།

མཚན་མོ་ཇི་ལྟར་འཇགས་ན་ཡང་།

སེམས་པ་དེ་ལྟར་འཁྲུགས།

                2024.10.13ཉིན།