གསེར་གྱི་མེ་ཏོག་བཞད་པའི་ལྕུག་ཕྲན།

གསེར་གྱི་མེ་ཏོག་བཞད་པའི་ལྕུག་ཕྲན།

བདེ་སྐྱིད་རྫོགས་ལྡན་འབོད་པའི་གླུ་སྒྲ་དང་།　།

རྨོངས་མུན་གཉིད་ལས་སློང་བའི་ཅོང་སྒྲ་ཡིན།　།

དཔལ་ཡོན་འཕོ་འགྱུར་སྒྲོག་པའི་ཕོ་ཉ་དངོས།　།

དུས་གསར་རླབས་ལ་རྩེན་པའི་ལྕུག་ཕྲན་ཉིད།　།

གངས་རིའི་གཞོན་གསར་སྟོང་གི་རེ་བ་དང་།　།

དཔལ་ཡོན་གར་གྱིས་རྩེན་པའི་ངག་རིག་གླུ།　།

སྡེ་བཞིའི་རང་སྒྲ་དགོད་པའི་གར་དང་བཅས།　།

འཁྱུག་རྩལ་རྒྱང་ལ་ངོམ་པ་ལྕུག་ཕྲན་ཉིད།　།

ངག་རིག་རང་རྩལ་འབར་བའི་གར་སྟེགས་ཆེ།　།

རྩོམ་གསར་གསེར་གྱི་མེ་ཏོག་བཞད་པའི་ཚལ།　།

གངས་རྒྱུད་གཞོན་ནུ་འབུམ་གྱིས་རེ་བའི་ཞིང་།　།

གསེར་གྱི་མེ་ཏོག་བཞད་པའི་ལྕུག་ཕྲན་གླིང་།　།

བདེ་རྒུའི་ལེགས་ཚོགས་ཉི་ཟླའི་འོད་དུ་འབར།　།

ཞི་བདེ་དཔལ་གྱི་མཚོ་ཆེན་གཡས་སུ་འཁྱིལ།　།

གང་དག་ལེགས་པའི་དཔལ་ཡོན་བླ་ན་མཐོ།　།

ལྕུག་ཕྲན་དཔག་བསམ་ལྗོན་པ་རྒྱལ་གྱུར་ཅིག　།

མཚོ་ཆེན་ཁྲི་ཤོར་རྒྱལ་མོའི་རླབས་དཀར་བཞིན།　།

མུ་འབྲེལ་ཚར་དུ་དངར་བའི་འཛུམ་ཕྲེང་འཕྱོ།　།

སྒྱུ་རྩལ་རྩོམ་རིག་གསར་པའི་རླབས་མཚམས་ན།　།

བསུང་ཞིམ་མེ་ཏོག་བཞད་པའི་ལྕུག་ཕྲན་མཛེས།　།

སོན་བཟང་མེ་ཏོག་བཞད་པའི་དགའ་ཚལ་འདིར།　།

དོན་བཟང་གླུ་སྒྲ་སྙན་པའི་དཔྱིད་དུ་འཇེབས།　།

སྲོལ་བཟང་རིག་གཞུང་སྤེལ་བའི་སྒྱུ་འཕྲུལ་གར།　།

གང་བཟང་ལེགས་པའི་དཔལ་དུ་དར་བར་སྨོན།　།