རྫ་ཆུའི་མགོ་ཁུངས་ཏེ། རི་ཆུ་མཉམ་འདྲེས་ཀྱི་ངོ་མཚར་རི་མོ།

རྫ་ཆུ་གྲོག་རོང་བརྒྱུད་ནས་བཞུར་བཞིན་པ།

དགུན་ཁའི་བཀྲ་ཤིས་འཁྱིལ་བ་རུ། གྲང་རླུང་འུར་འུར་རྩྭ་ཐང་དང་རི་ཚོགས་བརྒྱུད་ནས་ལྡང་སྟེ། གནའ་བོའི་ངག་རྒྱུན་རྗོད་བཞིན་པ་དང་མཚུངས།

ཉེ་ལམ། གསར་འགོད་པ་ཡུས་ཧྲུའུ་བོད་རིགས་རང་སྐྱོང་ཁུལ་རྫ་སྟོད་རྫོང་སྦྲ་ཆེན་ཞང་གི་བཀྲ་ཤིས་འཁྱིལ་བ་རུ་འབྱོར་བ་དང་། གནས་འདི་ལ་རྫ་ཆུའི་རིག་གནས་ཀྱི་མགོ་ཁུངས་ཞེས་འབོད་ཅིང་། རྫ་ཆུ་འདི་ནས་འབབ་མགོ་ཚུགས་ཏེ་བོད་ལྗོངས་དང་ཡུན་ནན་ཞིང་ཆེན་གཉིས་བརྒྱུད་དེ་ཞི་ཧྲོང་པན་ན་ཏའེ་རིགས་རང་སྐྱོང་ཁུལ་ནས་རྒྱལ་ཁོངས་ཀྱི་ཕྱི་ལ་བུད་རྗེས་མིང་དུ་མེ་ཀུང་ཆུ་བོ་ཞེས་འབོད།

རྣམ་སྲས་གྲོག་རོང་གི་མཚམས་སྤྲིན་ས་དབྱིབས།

གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་རྫ་ཆུའི་མགོ་ཁུངས་གླིང་ཁུལ་ནི་རྫ་སྟོད་རྫོང་དུ་ཡོད་ལ། ཞང5དང་སྲིད་འཛིན་སྡེ་བ19རུ་ཁྱབ་ཡོད་ཅིང་། སྤྱི་གླིང་ཧྲིལ་བོའི་རྒྱ་ཁྱོན་གྱི6.3%ཟིན། གནས་འདིའི་ཁྱད་ཆོས་ནི་གཙང་བོའི་མགོ་ཁུངས་ཀྱི་གྲོག་རོང་ཡིན་པ་དང་མཐོ་གྲང་རྩི་ཤིང་སྣོལ་མར་ཁྱབ་པས་ན། རྩི་ཤིང་དང་སྲོག་ཆགས་ཀྱི་ཐོན་ཁུངས་ཧ་ཅང་ཕུན་སུམ་ཚོགས་པ་དང་། གསའ་དང་གཟིག་སོགས་ཕྱོགས་སྟོན་དངོས་རིགས་ཀྱི་འཚོ་བ་རོལ་ས་གཙོ་བོའང་ཡིན། 

ས་ཆ་འདི་རུ། མཐོ་དམའ་མི་སྙོམ་པའི་རི་རྒྱུད་མུ་འབྲེལ་དུ་ཡོད་པ་ནི་ས་ཆེན་པོའི་སྒལ་ཚིགས་དང་འདྲ། རི་ངོས་སུ་སྐྱེས་པའི་གཡུ་མདོག་གི་གསོམ་སྡོང་དང་ཤུག་པ་དག་ཉི་འོད་འོག་ཏུ་སྔོ་ཐིང་ངེར་ཡོད་ཅིང་། ཡལ་ག་བསིལ་རླུང་གིས་བསྒུལ་ཚེ་སྐྱེ་སྟོབས་རབ་ཏུ་མངོན་པར་བྱེད། རི་འདབས་སུ། རྫ་ཆུ་ལང་ལོང་འབབ་པ་དང་། ཆུ་རྒྱུན་བྲག་རྡོ་དང་བརྡབས་ཚེ་ཝུ་བ་དཀར་པོ་འཕྱོ་ཞིང་དྭངས་གསལ་གྱི་གླུ་སྒྲ་སྒྲོག 

རྣམ་སྲས་ཞང་ནས་རྒྱུ་བའི་རྫ་ཆུ།

གནས་འདིའི་རི་ཆུ་ལ་སྐྱེ་སྟོབས་ཀྱི་དཔལ་འབར་ཞིང་། རི་སྐྱེས་སྲོག་ཆགས་ཀྱིས་གནས་འདི་བདག་གིར་བཟུང་ཡོད། རྣམ་སྲས་གྲོག་རོང་དུ། གནའ་བ་གཡང་གཟར་གྱི་བྲག་ངོས་སུ་མཆོང་ལྡིང་དང་བཅས་འགོ་བཞིན་ཡོད་ལ། ཟོར་ཡང་བའི་གཟུགས་པོ་ལ་བདེ་ལྕག་རབ་ཏུ་འཁྱུག་ཅིང་། སྤུ་མདོག་བྲག་རྡོ་དང་གཞི་གཅིག་ཏུ་འདྲེས་པས། ཐབས་མཁས་ངང་སྦས་སྐུང་བྱས་ཆོག ཐག་མི་རིང་བའི་ནགས་གསེང་དུ། བྱ་ཝང་དཀར་པོ་སྐོར་ཞིག་འཇམ་ཐིང་ངེར་འགུལ་སྐྱོད་བྱེད་པ་དང་། ཕོ་བྱའི་མགོ་ཡི་སྒྲོ་སྤུ་ནག་པོ་དེ་པྲོག་ཞུ་དང་མཚུངས་ཤིང་། སྲན་མ་ནག་པོ་གཉིས་དང་འདྲ་བའི་མིག་ཟུང་གིས་དོགས་ཟོན་དང་བཅས་ཞིབ་ལྟ་བྱེད། མཐོ་ཞིང་བརྗིད་པའི་སྤྲིན་གསོམ་གྱིས་ཁོ་ཚོར་གྲང་རླུང་འགོག་ཅིང་། ས་ངོས་ཀྱི་ཐང་ཤིང་ལོ་མའི་གསེང་གི་ཐང་འབྲས་དང་རྩྭ་འབྲུ། འབུ་སྲིན་སོགས་ནི་བྱ་ཝང་དཀར་པོའི་ཁ་ཟས་ཡིན། ཁོ་ཚོ་སྡེར་མོ་སྤྱད་ནས་ས་ངོས་འབྲད་པའི་སྟངས་སྟབས་ལ་བྱང་ཆ་ཆེན་པོ་ལྡན། 

བར་སྣང་ནས་མཐོང་བའི་བཀྲ་ཤིས་འཁྱིལ་བ།

གནས་འདི་རུ། རི་ཆུ་སྔར་བཞིན་གནས་ཤིང་། འདབ་ཆགས་དང་གཅན་གཟན་མཉམ་འཚོ་བྱེད་པ་ཡིས་ངོ་མཚར་བའི་སྐྱེ་ཁམས་མ་ལག་ཅིག་བསྐྲུན་ཡོད། 

གནས་འདི་ཡི་ཁོར་ཡུག་དང་སྐྱེ་དངོས་རེ་རེ་ནི་རྫ་ཆུའི་མགོ་ཁུངས་ཀྱི་མེད་དུ་མི་རུང་བའི་ཆ་ཤས་ཡིན་པས། ཁོ་ཚོས་མཉམ་དུ་གནས་འདིའི་ངོ་མཚར་གཏམ་རྒྱུད་རྩོམ་བཞིན་རང་བྱུང་ཁམས་ཆེན་མོའི་ཁྱད་མཚར་བའི་མཛེས་སྡུག་དང་སྲ་ཞིང་བརྟན་པའི་ཚེ་སྲོག་གི་སྟོབས་ཤུགས་ངོམ་ཡོད། 

ང་ཚོ་གནས་འདིའི་མཛེས་སྡུག་གིས་རབ་ཏུ་མྱོས་བཞིན་ཚེ་སྲོག་གི་དཔལ་དང་རླབས་ཆེ་བའི་རང་བྱུང་གི་སྟོབས་ཤུགས་ལ་གུས་འདུད་ཞུ།

རྫ་ཆུའི་འགྲམ་གྱི་གནའ་བ།

ཆུ་འགྲམ་གྱི་ཤྭ་སྐྱ།

བྱ་ཝང་དཀར་པོས་ཁ་ཟས་འཚོལ་བཞིན་པ།