ཞིང་ཆེན་གསར་འགྱུར་ལས་སྒྲུབ་པའི་མཐུན་ཚོགས་མཚོ་བྱང་ཁུལ་དུ་ཡོང་ནས་བརྟག་ཞིབ་གནང་པ།
ཟླ5པའི་ཚེས23ཉིན། མཚོ་སྔོན་ཞིང་ཆེན་གསར་འགོད་པའི་མཐུན་ཚོགས་ཀྱི་ཆེད་བསྐོས་ཀྲུའུ་ཞི་གཞོན་པ་ཀུའོ་ཡུན་ཧྥུའུ་ཡིས་ཞིང་ཆེན་གསར་འགོད་པའི་མཐུན་ཚོགས་ཀྱི་ལས་འཛིན་ལྷན་ཚོགས་ཀྱི་ཚབ་ཞུས་ཏེ་སྔ་རྗེས་སུ་མདའ་བཞི་རྫོང་མཉམ་འདྲེས་སྨྱན་སྦྱོར་ལྟེ་གནས་དང་མདོ་ལ་ཚགས་པར་ཁང་། མཚོ་བྱང་ཁུལ་རྒྱང་སྒྲོག་བརྙན་འཕྲིན་ཁང་བཅས་སུ་ཕེབས་ཏེ་སྨྱན་སྦྱོར་མཉམ་འདྲེས་དང་ཕུལ་བྱུང་བརྩམས་ཆོས་གསར་རྩོམ་ཐོན་སྐྱེད་སོགས་ཀྱི་བྱ་བར་བརྟག་ཞིབ་གནང་ཞིང་། འཐབ་ཕྱོགས་དང་པོའི་གསར་འགྱུར་ལས་སྒྲུབ་པར་འཚམས་འདྲི་དང་བཞུགས་མོལ་བརྗེ་རེས་གནང་། མདོ་ལ་ཚགས་པར་ཁང་དང་མཚོ་བྱང་ཁུལ་རྒྱང་སྒྲོག་བརྙན་འཕྲིན་ཁང་། མདའ་བཞི་རྫོང་དང་རྐང་ཚ་རྫོང་། མདོ་ལ་རྫོང་བཅས་ཀྱི་རྫོང་རིམ་པའི་མཉམ་འདྲེས་སྨྱན་སྦྱོར་ལྟེ་གནས་ཀྱི་འབྲེལ་ཡོད་འགན་འཁུར་བས་མཉམ་དུ་བརྟག་ཞིབ་ལ་ཕེབས་རོགས་བྱས།
མདོ་ལ་ཚགས་པར་ཁང་དུ་བརྟག་ཞིབ་བྱེད་རིང་ཀུའོ་ཡུན་ཧྥུའུ་ཡིས་གསར་འགྱུར་ལས་སྒྲུབ་པ་རྣམས་ལ་རེ་རེ་བཞིན་བྱམས་བརྩེའི་གླེང་མོལ་གནང་བ་དང་། ཚགས་པར་ཁང་གི་གསར་འགྱུར་བཅར་འདྲིའི་རྩོམ་སྒྲིག་ལས་སྒོ་དང་སྨྱན་གསར་ལས་སྟེགས་འཛུགས་སྐྲུན། སྨྱན་སྦྱོར་མཉམ་འདྲེས་འཕེལ་རྒྱས་སོགས་ཀྱི་གནས་ཚུལ་ལ་རྒྱུས་ལོན་ཞིབ་ཕྲ་གནང་། ཀུའོ་ཡུན་ཧྥུའུ་ཡིས་མདོ་ལ་ཚགས་པར་ཁང་གི་གསར་འགྱུར་དྲིལ་སྒྲོག་བྱ་བར་ཁས་ལེན་གནང་པ་དང་། ཉེ་བའི་ལོ་ཤས་རིང་མདོ་ལ་ཚགས་པར་ཁང་གིས་ཕུལ་བྱུང་གི་གསར་འགྱུར་བརྩམས་ཆོས་མི་ཉུང་བ་ཞིག་བཏོན་ནས་མཚོ་བྱང་གི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གླེང་ཕྱོགས་ཀྱི་རྣམ་པ་བཟང་པོ་ཞིག་བཏོད་ཡོད། ཚང་མས་མུ་མཐུད་དུ“ནུས་བཞི”ལག་བསྟར་བྱས་ནས“སྐྱོད་སྒྱུར་བཅོས་གསུམ”རྒྱུན་འཁྱོངས་ཀྱིས་བཅོས་སྒྱུར་གསར་གཏོད་ཀྱི་སྙིང་སྟོབས་ལ་བརྟེན་ནས་ཏང་དང་སྲིད་གཞུང་གི་སྐད་སྒྲ་དང་སྤྱི་ཚོགས་ཀྱི་གནས་ཚུལ། མི་དམངས་ཀྱི་བསམ་འདུན་ཤེས་རྟོགས། མི་དམངས་མང་ཚོགས་ལ་ཞབས་ཞུ། སྤྱི་ཚོགས་ཡར་ཐོན་ཡོང་བར་སྣེ་ཁྲིད་བཅས་བྱེད་པའི་ལས་འགན་ལྗིད་པོ་ཁུར་ནས། སྨྱན་སྦྱོར་མཉམ་འདྲེས་འཕེལ་རྒྱས་ཡོང་བར་སྐུལ་འདེད་ཧུར་ཐག་གཏོང་བ་དང་། བྱེད་ཐབས་རྒྱུན་ཆད་མེད་པར་གསར་གཏོད་བྱ་དགོས་ལ། མི་སེམས་ལ་སྔར་བས་སྐུལ་མ་གཏོང་བའི་ཕུལ་བྱུང་གསར་འགྱུར་བརྩམས་ཆོས་གསར་རྩོམ་བྱ་རྒྱུའི་རེ་བ་ཡོད་པར་བསྟན།
དེའི་རྗེས་ཀུའོ་ཡུན་ཧྥུའུ་མཚོ་བྱང་ཁུལ་རྒྱང་སྒྲོག་བརྙན་འཕྲིན་ཁང་དུ་ཡོང་ནས་སྨྱན་སྦྱོར་སྡེ་ཁག་འཛུགས་སྐྲུན་གནས་ཚུལ་ལ་རྒྱུས་ལོན་ཞིབ་ཕྲ་གནང་། ཁོས་གསར་འགྱུར་སྨྱན་སྦྱོར་གྱིས་ཆབ་སྲིད་ཀྱི་ཚུགས་གནས་མཐོ་རུ་བཏང་ནས“འདུ་ཤེས་བཞི”ཟབ་ཏུ་གཏོང་བ་དང་།“གདེང་ཚོད་བཞི”བརྟན་དུ་གཏོང་བ། གསར་འགྱུར་གྱི་ཆོས་ཉིད་ལ་བརྩི་སྲུང་བྱེད་པ།“གཞི་རིམ་དུ་སྐྱོད་པ་དང་སྤྱོད་ཚུལ་ལེགས་སྒྱུར། རྩོམ་སྲོལ་ལེགས་སྒྱུར”བཅས་བྱེད་དགོས། བརྗོད་དོན་ཇུས་འགོད་ཡག་པོ་བྱེད་པ་དང་བརྗོད་བྱ་གནད་འཁེལ་འདེམས་པ། ཇུས་འགོད་ཀྱི་གཙོ་གནད་སྟངས་འཛིན་བྱེད་པ། མཉམ་འདྲེས་གསར་གཏོད་ལ་མཐོང་ཆེན་བྱེད་པ། སྨྱན་སྦྱོར་གྱི་རྣམ་པ་སྣ་ཚོགས་སྤྱད་དེ་བརྩམས་ཆོས་སྤུས་དག་འདོན་པ། བརྩམས་ཆོས་ཀྱི་བརྒྱུད་སྒྲོག་ནུས་པ་དང་ཤུགས་རྐྱེན་ཐེབས་ཤུགས་ཆེ་རུ་གཏོང་བ་བཅས་བྱེད་དགོས། དཔུང་ཁག་འཛུགས་སྐྲུན་ལ་ཤུགས་སྣོན་པ་དང་། གསར་འགྱུར་དྲིལ་སྒྲོག་དཔུང་ཁག་གི་ཆེད་ལས་བྱང་ཚད་མཐོ་རུ་གཏོང་བ། རྐང་ནུས་དང་མིག་ནུས། ཀླད་ནུས། སྨྱུག་ནུས་བཅས་ཟམ་མི་ཆད་པར་ཆེ་རུ་གཏོང་བ་བཅས་བྱས་ནས་བསམ་བློ་དང་དྲོད་ཚད། སྤུས་ཚད་བཅས་ལྡན་པའི་བརྩམས་ཆོས་དེ་བས་མང་བ་གསར་རྩོམ་བྱས་ཏེ་ཏང་གི་གསར་འགྱུར་གླེང་ཕྱོགས་བྱ་བར་ལེགས་སྐྱེས་གསར་པ་དེ་བས་ཆེ་བ་དབུལ་དགོས་པ་ནན་གྱིས་བསྟན།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注