མཚོ་བྱང་ཁུལ་གྱི2025ལོའི་དྲིལ་སྒྲོག་པུའུ་ཀྲང་དང་དྲ་འཕྲིན་གཞུང་ལས་ཁང་གི་ཀྲུའུ་རིན་ཚོགས་འདུ་འཚོགས།

ཡོང་ཁུངས། མཚོ་བྱང་མདོ་ལ་བོད་ཡིག་ཚགས་པར། རྩོམ་སྒྲིག་པ། ཕག་མོ་ཚེ་བརྟན། 2025-03-29 15:56:42 ཀློག་གྲངས།2446

ཟླ3པའི་ཚེས28ཉིན། མཚོ་བྱང་ཁུལ་གྱི2025ལོའི་དྲིལ་སྒྲོག་པུའུ་ཀྲང་དང་དྲ་འཕྲིན་གཞུང་ལས་ཁང་གི་ཀྲུའུ་རིན་ཚོགས་འདུ་འཚོགས་ལ། ཚོགས་འདུའི་ཐོག རྒྱལ་ཡོངས་དང་ཞིང་ཆེན་ཡོངས་ཀྱི་དྲིལ་སྒྲོག་པུའུ་ཀྲང་གི་ཚོགས་འདུ་དང་དྲ་འཕྲིན་གཞུང་ལས་ཁང་གི་ཀྲུའུ་རིན་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཤིང་། གྲུབ་འབྲས་ཕྱོགས་བསྡོམས་དང་ཉམས་མྱོང་བརྗེ་རེས། དུས་བབ་ལ་དབྱེ་ཞིབ། ལོ་འཁོར་མོའི་བྱ་བའི་ལས་འགན་བཀོད་སྒྲིག་བཅས་བྱས། ཁུལ་ཨུའི་རྒྱུན་ཨུའམ་དྲིལ་སྒྲོག་པུའུ་ཡི་པུའུ་ཀྲང་། དྲ་རྒྱའི་ཆ་འཕྲིན་ཨུ་ལྷན་གྱི་ཀྲུའུ་རིན་གཞོན་པ་ཀྲང་ཐའོ་ཚོགས་འདུར་སླེབས་ནས་གཏམ་བཤད་གནང་།

ཚོགས་འདུའི་ཐོག་བསྟན་དོན། 2024ལོར་ཁུལ་ཡོངས་ཀྱི་བསམ་བློ་རིག་གནས་དྲིལ་སྒྲོག་དང་དྲ་འཕྲིན་འཐབ་ཕྱོགས་ཀྱིས་ཞི་ཅིན་ཕིང་གི་རིག་གནས་དགོངས་པ་སློབ་སྦྱོང་དང་དྲིལ་སྒྲོག་ལག་བསྟར་གཏིང་ཟབ་བྱས་ཤིང་། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་ཞིང་ཆེན་ཏང་ཨུ་དང་ཁུལ་ཨུའི་བྱ་བའི་བླང་བྱ་ལག་བསྟར་གཏིང་ཟབ་དང་དོན་འཁྱོལ་བྱས་ཏེ། ལྟེ་བར་དམིགས་པ་དང་ཁྱོན་ཡོངས་ལ་ཞབས་འདེགས་ཞུ་བ། བདེན་སྲུང་གསར་གཏོད། འགག་སྒྲོལ་དཀའ་སེལ། རིགས་པའི་གཞུང་ལུགས་ཀྱི་དྲག་ཆས་ལ་ཤུགས་སྣོན་པ་དང་བསམ་བློའི་རྨང་གཞི་བརྟན་དུ་གཏོང་བ། གླེང་ཕྱོགས་ཀྱི་ཁྲིད་སྟོན་ལ་ཤུགས་སྣོན་པ། ཁོར་ཡུག་བཟང་པོ་བསྐྲུན་པ། གཡུལ་ས་འཛུགས་སྐྱོང་ལ་ཤུགས་སྣོན་པ་དང་དཔལ་ཡོན་གྱི་སྤྱོད་ཚུལ་གསར་པ་འཛུགས་པ། གསར་བརྗེའི་ཐོན་ཁུངས་སྔོག་འདོན་གཏིང་ཟབ་བྱེད་པ། སྙིང་སྟོབས་ཀྱི་བཙན་ས་བསྐྲུན་པ། མང་ཚོགས་ལ་ཞབས་འདེགས་ཞུ་བ་རྒྱུན་འཁྱོངས་དང་། རིག་གནས་ཀྱིས་དམངས་ཕན་ལ་སྐུལ་འདེད་གཏོང་བ། བྱ་བའི་འགན་འཁྲི་སྲ་བརྟན་དུ་གཏོང་བ། གཡུལ་ས་བརྟན་སྲུང་། དྲ་རྒྱ་དོ་དམ་དང་བཅོས་སྐྱོང་བྱེད་ཤུགས་ཆེ་རུ་གཏོང་བ། རྒྱུན་མཐུད་སྒོས་དྲ་རྒྱ་ཇེ་ལེགས་སུ་གཏོང་བ་བཅས་བྱས་ཏེ་བྱ་བ་སོ་སོར་འཕེལ་རྒྱས་གསར་བ་བྱུང་ཞིང་། ཡར་རྒྱས་གསར་བ་མངོན་འགྱུར་བྱུང་ནས་ཁུལ་ཡོངས་ཀྱི་བྱ་བའི་ཁྱོན་ཡོངས་ལ་ཞབས་འདེགས་ནུས་ལྡན་བྱས་ཡོད་ཟེར།

ཚོགས་འདུའི་ཐོག་ནན་གྱིས་བསྟན་དོན། 2025ལོར་ཁུལ་ཡོངས་ཀྱི་བསམ་བློ་རིག་གནས་དྲིལ་སྒྲོག་དང་དྲ་འཕྲིན་བྱ་བས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱེད་པ་རྒྱུན་འཁྱོངས་དང་། ཞི་ཅིན་ཕིང་གི་རིག་གནས་དགོངས་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད་དྲ་རྒྱའི་སྟོབས་ལྡན་རྒྱལ་ཁབ་སྐོར་གྱི་དགོངས་པ་གལ་ཆེན་སློབ་སྦྱོང་དང་དྲིལ་སྒྲོག་ལག་བསྟར་གཏིང་ཟབ་བྱས་ཏེ། བསམ་བློ་རིག་གནས་དྲིལ་སྒྲོག་དང་དྲ་རྒྱའི་ཆ་འཕྲིན་བྱ་བའི་ཁྱད་ཆོས་དང་ཆོས་ཉིད་ཁོང་དུ་གཏིང་ཟབ་ཆུད་པར་བྱེད་པ་དང་། ཡང་དག་པའི་ཆབ་སྲིད་ཀྱི་ཁ་ཕྱོགས་དང་གླེང་ཕྱོགས་ཀྱི་ཁྲིད་ཕྱོགས། རིན་ཐང་གི་ལྟ་བ་འཛིན་ཕྱོགས་བཅས་དམ་འཛིན་ཏན་ཏིག་བྱེད་དགོས། ཕྱོགས་ཡོངས་ནས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་བྱེད་པ་དང་། རྒྱལ་ཡོངས་དང་ཞིང་ཆེན་ཡོངས་ཀྱི་དྲིལ་སྒྲོག་པུའུ་ཀྲང་དང་དྲ་འཕྲིན་གཞུང་ལས་ཁང་གི་ཀྲུའུ་རིན་ཚོགས་འདུའི་དགོངས་དོན་དང་། ཞིང་ཆེན་ཏང་ཨུའི་སྐབས་བཅུ་བཞི་པའི་ཚང་འཛོམས་གྲོས་ཚོགས་ཐེངས་བརྒྱད་པ་དང་ཁུལ་ཨུའི་སྐབས་བཅུ་གསུམ་པའི་ཚང་འཛོམས་གྲོས་ཚོགས་ཐེངས་བཅུ་པའི་དགོངས་དོན་ལག་བསྟར་དོན་འཁྱོལ་བྱེད་པ་དང་། ཞིང་ཆེན་ཏང་ཨུའི་བསམ་བློ་རིག་གནས་དྲིལ་སྒྲོག་ཁྱབ་ཁོངས་བཅོས་སྒྱུར་གཏིང་ཟབ་ཏུ་གཏོང་བའི“དམིགས་འབེན་གསར་བ་དྲུག”དང“བཟོ་སྐྲུན་ཆེན་པོ་བཅུ”ལག་བསྟར་དོན་འཁྱོལ་བྱས་ཏེ། ཁུལ་ཡོངས་ཀྱི་ལྟེ་བའི་བྱ་བར་ཞབས་འདེགས་ཞུ་བ་གཙོ་བོར་འཛིན་པ་དང་གཙོ་གནད་དམ་འཛིན། དཀའ་གནད་སྒྲོལ་བ། བཀྲག་མདངས་འཚེར་ས་གཏོད་པ། མ་མཐའི་མཚམས་ཐིག་སྲུང་བ། བསམ་བློ་རིག་གནས་དྲིལ་སྒྲོག་དང་དྲ་རྒྱའི་ཆ་འཕྲིན་བྱ་བའི་སྤུས་ཚད་ཇེ་མགྱོགས་སུ་གཏོང་བ་བཅས་བྱས་ཏེ། ནུས་ཤུགས་ཡོད་རྒུས་ཀྲུང་གོའི་རྣམ་པའི་དེང་རབས་ཅན་གྱི་མཚོ་སྔོན་འཛུགས་སྐྲུན་གྱི་མཚོ་བྱང་གི་ལེའུ་རྩོམ་ཆེད་བསམ་བློའི་འགན་ལེན་བརྟན་པོ་དང་བསམ་པའི་སྟོབས་ཤུགས་ཆེན་པོ། གླེང་ཕྱོགས་ཀྱི་ཁོར་ཡུག་བཟང་པོ་བཅས་མཁོ་འདོན་བྱེད་དགོས་ཟེར།

ཚོགས་འདུའི་ཐོག གཙོ་གནད་ལས་འགན་ལ་དམ་པོར་དམིགས་ནས་རྒྱུན་མཐུད་སྒོས་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་བློ་སྒྲིལ་སེམས་སྐྱེད་དང་། དྲིལ་སྒྲོག་ཁྲིད་སྟོན་ལ་ཤུགས་སྣོན་པ། ཧུར་ཐག་སྒོས་དུས་རབས་གསར་བར་འབད་པས་བསྐྱོད་པའི་སྙིང་སྟོབས་ཀྱི་སྟོབས་ཤུགས་གཅིག་སྡུད་བྱས་ཏེ་དཔལ་ཡོན་གསར་སྐྲུན་གཏིང་ཟབ་ཏུ་གཏོང་བ་དང་། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བར་ཤུགས་སྣོན་པ། མ་མཐའི་བསམ་གཞིགས་རྒྱུན་འཁྱོངས་བྱེད་པ། འདུ་ཤེས་འཛིན་སྟངས་ཀྱི་བདེ་འཇགས་བཀག་རྒྱ་བརྟན་པོར་འཛུགས་པ་དང་གསར་བརྗེའི་སྙིང་སྟོབས་རྒྱུན་འཛིན་བྱེད་པ། སེམས་ཤུགས་གཅིག་སྒྲིལ་གྱིས་མཚོ་བྱང་གི་སྙིང་སྟོབས་ཀྱི་བཙན་ས་བསྐྲུན་པ། རྩ་བ་སྲ་ཞིང་རྨང་གཞི་བརྟན་པར་མཐོང་ཆེན་བྱེད་པ་དང་། དྲ་འཕྲིན་བྱ་བ་སྐས་རིམ་གསར་བ་ཞིག་ཏུ་བསྐྱོད་པར་སྐུལ་འདེད་གཏོང་བ་དང་། ཏང་གིས་ཁྱོན་ཡོངས་ལ་མགོ་ཁྲིད་བྱེད་པར་ཤུགས་བསྣན་ཏེ་རིག་གནས་ཀྱི་འགན་འཁྲི་གསར་པ་འཁུར་རྒྱུར་འགན་སྲུང་བརྟན་པོ་འདོན་སྤྲོད་བྱེད་དགོས། ཏན་ཏན་ཏིག་ཏིག་དང་དངོས་འཛིན་དངོས་སྒྲུབ། དངོས་ཕན་དོན་གཉེར་བཅས་ཀྱི“མཚོ་བྱང་དངོས་སྒྲུབ”བྱེད་སྟངས་དར་སྤེལ་གང་ལེགས་བྱས་ཏེ། ལྟེ་བར་དམིགས་པ་དང་དོན་སྟོང་དངོས་སྒྲུབ། ཡིད་ཆེས་བརྟན་པོ། དངོས་སྒྲུབ་སྔོན་བརྩོན་བཅས་བྱས་ཏེ། བསམ་བློའི་ངོས་འཛིན་སྔར་ལས་མཐོ་རུ་གཏོང་བ་དང་བྱ་བའི་གཅིག་གྱུར་འཆར་འགོད་ལ་ཤུགས་སྣོན་པ། མཉམ་ལས་མཉམ་འགུལ་ལ་ཤུགས་སྣོན་པ་བཅས་བྱས་ཏེ་ནུས་ཤུགས་ཡོད་རྒུས་སྤྱི་ཚོགས་ཡོངས་ཐུན་མོང་ཐོག་ཞུགས་པའི་དྲིལ་སྒྲོག་ཆེན་པོ་དང་དྲ་འཕྲིན་ཆེན་པོའི་བྱ་བའི་སྒྲིག་གཞི་འཛུགས་དགོས་པའི་བླང་བྱ་བཏོན།

ཁུལ་ཨུའི་བསམ་བློ་རིག་གནས་དྲིལ་སྒྲོག་མགོ་ཁྲིད་ཚན་ཆུང་གི་ཁོངས་མི་སོ་སོ་དང་། ཁུལ་ཨུའི་སྡེ་ཁག་སོ་སོ། ཁུལ་ཐད་གཏོགས་ལས་ཁུངས་ཀྱི་ལས་ཁུངས་སོ་སོ། མང་ཚོགས་ཚོགས་པ་སོ་སོ། ཁུལ་དུ་བཅའ་སྡོད་བྱས་པའི་ཞིང་ཆེན་ལས་ཁུངས་སོ་སོའི་ཁག་བགོས་འགན་ཁུར་བློ་མཐུན། རྫོང་སོ་སོའི་རྫོང་ཨུའི་དྲིལ་སྒྲོག་པུའུ་ཀྲང་། དྲ་འཕྲིན་གཞུང་ལས་ཁང་གི་ཀྲུའུ་རིན། དེ་བཞིན་ཁུལ་ཐད་གཏོགས་དྲིལ་སྒྲོག་དང་དྲ་འཕྲིན་མ་ལག་གི་འབྲེལ་ཡོད་མགོ་ཁྲིད་ལས་བྱེད་པ་ཚོགས་འདུར་ཞུགས།