བོད་མཁར་རྐང་ཚ་ནས་སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་སྤེལ།

བོད་མཁར་རྐང་ཚ་ནས་སྣ་མང་ཕུན་སུམ་ཚོགས་པའི་རིག་གནས་བྱེད་སྒོ་སྤེལ།

    ལྷན་འཛོམས་ལྷ་ཉིན་ལྒང་ཞུའི་དུས་ཆེན་རོལ།། ཡིད་འོང་བཀྲ་ཤིས་ལོ་སར་མཉམ་དུ་བསྐྱལ།། སྤྱི་ཟླ2པའི་ཚེས5སྟེ་ལོ་སར་ཚེས་བཅོ་ལྔའི་ཉིན། ཏང་གི་ཚོགས་ཆེན་ཉི་ཤུ་པའི་དགོངས་དོན་ལག་བསྟར་དོན་འཁྱོལ་དང་སྲོལ་རྒྱུན་རིག་གནས་སྔར་ལས་དར་སྤེལ། མང་ཚོགས་ཀྱི་རིག་རྩལ་འཚོ་བ་ཕུན་སུམ་ཇེ་ཚོགས་སུ་གཏོང་བ། རྐང་ཚ་རྫོང་ཡོངས་ཀྱི་མི་དམངས་ལ་བཀྲ་ཤིས་འཆམ་མཐུན་གྱི་སྲོལ་རྒྱུན་ལོ་སར་ཞིག་རོལ་དུ་འཇུག་ཆེད། རྐང་ཚ་རྫོང་གིས“དཔྱིད་གསར་དུས་ཆེན་བསུས་ཏེ་ལྒང་ཞུའི་དུས་ཆེན་རོལ”ཞེས་པ་བརྗོད་དོན་ཡིན་པའི་ཕྲེང་བསྟར་བྱེད་སྒོ་སྤེལ་ལ། རྐང་ཚ་རྫོང་དུ་སྡོད་པའི་མགོ་ཁྲིད་དག་ཡུལ་དངོས་སུ་ཕེབས་ནས་རྟ་པ་བརྒྱས་བོད་མཁར་ཁྲོམ་གཞུང་དུ་ལོ་སར་བསུ་བའི་བྱེད་སྒོར་ཤིས་ཚིག་ཕུལ་ཞིང་། མི་དམངས་མང་ཚོགས་དང་ལྷན་དུ་དུས་ཆེན་རོལ་བ་རེད། 

    གནམ་ལོ་གསར་བ། སྨོན་འདུན་གསར་བ། རེ་སྒུག་གསར་བ། འདས་པའི་ལོ་གཅིག་གི་རིང་རྐང་ཚ་རྫོང་གིས་རྔུལ་ཆུས་ཉམས་མྱོང་བསགས་ཤིང་སྤོབས་པས་མདུན་ལམ་སྙེག་པ་ཡིན་པས། ལོ་གསར་བའི་ནང་དུའང་གོམ་མཚམས་མི་འཇོག་པར་མཚར་སྡུག་བསྐྲུན་ཡོད།  2022ལོ་ནི་རང་ག་བའི་ལོ་ཞིག་མིན་ཏེ། དཀའ་ངལ་ཁྲོད་འབད་བརྩོན་དང་འབད་འབུངས་ཁྲོད་འཕེལ་རྒྱས་ཀྱིས་རྐང་ཚ་རྫོང་ཡོངས་ཀྱི་སྤྱི་ཚོགས་དཔལ་འབྱོར་སྐྱོན་བྲལ་མགྱོགས་མྱུར་ངང་འཕེལ་བའི་རྣམ་པ་བཟང་བོ་མངོན་པར་བྱས་ཤིང་། ཕྱོགས་ཡོངས་ནས་འབྱོར་འབྲིང་སྤྱི་ཚོགས་མངོན་འགྱུར་བྱེད་པའི་ལམ་བུའི་སྟེང་འོད་སྟོང་འབར་བའི་ལེའུ་བྲིས་ཡོད།  གནས་འདིར་རྟ་པ་བརྒྱའི་གཟི་ཉམས་དང་བྲོ་བ་བརྒྱའི་སྟངས་སྟབས་བསྒྱུར་བས། འབྱོར་ཕྱུག་དང་འཆམ་མཐུན། མཛེས་སྡུག་བཅས་ཀྱི་རྐང་ཚའི་སྣང་བརྙན་ལེགས་པར་བཞེངས་འདུག 

    སྔ་དྲོའི་དུས་ཚོད10སྟེང་། གཟབ་མཆོར་སྤྲས་པའི་རྟ་མཆོག180ལྷག་གྲལ་ཡག་པོར་བསྒྲིགས་ཤིང་། རྟ་པ་ཚོས་མི་རིགས་ཀྱི་བརྒྱན་གོས་གོན་ཞིང་ལག་ཏུ་རྒྱལ་དར་དང་རི་དར། ཚོན་དར་སོགས་བཟུང་སྟེ། རྫོང་མཁར་གྱི་རྟ་རྒྱུག་ར་བ་ནས་ཏང་སྲིད་ཐོག་ཁང་མདུན་གྱི་ཐང་ཆེན་བར་སྐོར་སྐྱོད་འཁྲབ་སྟོན་བྱས་པས། ཀུན་གྱིས་ཡིད་དབང་འཕྲོག་པའི་རྐྱེན་དང་ཕྱི་མིག་སྟོང་གི་རྟེན་དུ་གྱུར་ཏེ། མང་ཚོགས་རྣམས་ལ་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་རིག་གནས་ཞེས་པ་ཚོར་དུ་བཅུག ཐལ་མོའི་རྡེབ་སྒྲ་དང་ཀི་བསྭོ་ལྷ་རྒྱལ་ཁྲོད་ལྟ་མཁན་སྟོང་ལྔའི་དགའ་འབོད་ཀྱིས་བྱེད་སྒོར་སྔར་མེད་ཀྱི་རྣམ་པ་བཟང་བོ་བསྩལ། དེ་དང་ཆབས་ཅིག དབྱངས་དང་གར་གྱི་མཆོད་པ 《མཚོ་སྔོན་པོའི་སྨོན་འདུན 》ཞེས་པའི་སྐོར་བྲོའི་འཁྲབ་སྟོན་གྱི་ཚ་རླབས་འཕྱུར། བཀྲ་ཤིས་པའི་ཉིན་མོ་འདིར་རྐང་ཚའི་བུ་བུ་མོ་ཚོས་གཟབ་མཆོར་སྣ་ཚོགས་སྤྲས་ཤིང་ཕ་ཡུལ་གྱི་གཅེས་སེམས་བསྣམས་ནས། ཏང་གི་དྲིན་ཚོར་མཐའ་དག་གླུ་དང་གར་གྱི་འགྱུར་བ་ལ་དྲངས་ཏེ། མེས་རྒྱལ་སྔར་ལས་སྟོབས་ལྡན་ཡོང་བའི་སྨོན་འདུན་ཞུས།

    འོམ་ཆུ་གྲོང་རྡལ་གསེར་བཟང་སྡེ་བའི་སྡེ་མི་དཀོན་མཆོག་ཚེ་རིང་གིས་བཤད་རྒྱུར། ལོ་འདི་གར་འདི་འདྲའི་ལྟད་མོ་ཡག་པོ་ཞིག་མཐོང་མ་ཐུབ། ད་ལོ་ལོ་སར་གྱི་བྲོ་བ་ཤིན་ཏུ་འཛོམས་པས་ཧ་ཅང་དགའ་ལ། ཕ་ཡུལ་ཇེ་བཟང་ནས་ཇེ་བཟང་དང་འཚོ་བ་ཇེ་སྐྱིད་ནས་ཇེ་སྐྱིད་དུ་འགྱུར་བར་ཤོག་ཟེར།