མདའ་བཞི་རྫོང་གི་ཁྱབས་ཁོངས་ཡོངས་ཀྱི་སྐྱེ་ཁམས་དོ་དམ་པས་བདེ་བརྟན་མདའ་བཞིའི་ལྗང་མདོག་འཕེལ་རྒྱས་ལ་གསོན་ཤུགས་བསྐྲུན་པ།

མདའ་བཞི་རྫོང་གི་ས་ཁོངས་ཡོངས་ཀྱི་སྐྱེ་ཁམས་བདག་སྐྱོང་པས་རང་ངོས་ཀྱི་འགན་ནུས་འདོན་སྤེལ་གང་ལེགས་བྱས་ཏེ་མི་སྡོད་ཁོར་ཡུག་ཁྱབ་ཁོངས་ཀྱི་ཁོར་སྲུང་ལས་དོན་ཏན་ཏིག་གིས་སྤེལ་བ་དང་། ཁོངས་གཏོགས་ཀྱི་ཁོར་ཡུག་གཙང་སྦྲའི་འགན་འཁྲིའི་ས་ཁོངས་ནང་འཚོ་བའི་གད་སྙིགས་དང་འཛུགས་སྐྲུན་གད་སྙིགས་སོགས་བཙོག་ཟིང་ཞན་གསུམ་གྱི་ས་ཁོངས་ལ་གཅིག་སྡུད་གཙང་ཕྱགས་བྱས་ཏེ་ནགས་སར་གད་སྙིགས་མེད་པ་དང་ལམ་རྒྱུད་དུ་ས་རྡུལ་མེད་པ། ཁང་པའི་རྒྱབ་མདུན་དུ་གད་སྙིགས་མེད་པ་བཅས་ལ་འགན་ལེན་བྱས་ཡོད། མིག་སྔའི་བར་སྐྱེས་ཁམས་བདག་སྐྱོང་པ་ཁྱོན་མི་ཐེངས4000ལྷག་ཙམ་སྐུལ་སློང་རྩ་འཛུགས་བྱས་ཏེ། གཟའ་པ་སངས་ཀྱི་ཁོར་ཡུག་གཙང་སྦྲ་ཉིན་མོར་བྱེད་སྒོ་ཐེངས300ལྷག་སྤེལ་བ་དང་། གད་སྙིགས་སྣ་ཚོགས་ཏུན2000ལྷག་ཙམ་མེད་པར་བཏང་བ་དང་གྱང་ངོས་ཀྱི་བརྡ་ཁྱབ་ཆུང་ངུ3000ལྷག་ཙམ་གཙང་སེལ་བྱས་ཡོད།    

མདའ་བཞི་རྫོང་གིས་ནགས་ཚལ་དང་རྩྭ་ཐང་གི་མེ་གསོད་ལས་དོན་ལ་ཤུགས་སྣོན་ཏན་ཏིག་བརྒྱབ་ནས་ནགས་ཚལ་དང་རྩྭ་ཐང་གི་ཐོན་ཁུངས་བདེ་འཇགས་ལ་སྲུང་སྐྱོང་ནུས་ལྡན་བྱས་ཡོད། ས་ཁོངས་ཡོངས་ཀྱི་སྐྱེ་ཁམས་བདག་སྐྱོང་པས་རང་འགན་གཙང་སྒྲུབ་ཀྱིས་བདེ་འཇགས་ཐོན་སྐྱེད་དང་ནགས་ཚལ། རྩྭ་ཐང་གི་མེ་ཟོན་འགན་འཁྲི་དོན་འཁྱོལ་བྱེད་ཤུགས་སྔར་བས་ཆེ་རུ་བཏང་སྟེ། རྫོང་ཡོངས་ཀྱི་རྩྭ་ས་དང་འགོག་གསོ་ཁུལ། ཞིང་ནགས་སྣོལ་འདྲེས་ཁུལ། མཆོད་འབུལ་བྱ་ཡུལ་སོགས་མེ་སྐྱོན་འབྱུང་སླ་བའི་ས་ཁུལ་དང་གཙོ་གནད་ཁུལ་དུ་གཙོ་གནད་སྲུང་སྐྱོང་དང་གཙོ་གནད་དོ་དམ་ཚོད་འཛིན་བྱེད་པ། ཕྱི་རོལ་གྱི་མེ་ཁུངས་དོ་དམ་ལ་ཁྱོན་ཡོངས་ནས་ཤུགས་སྣོན་བརྒྱབ་སྟེ་བདེ་འཇགས་ཀྱི་ཉེན་ཁ་མེད་པར་བཟོས་ཡོད།    

རྫོང་ཡོངས་ཀྱི་རྒྱ་ཆེའི་རོང་འབྲོག་མང་ཚོགས་ཀྱི་ཁོར་ཡུག་སྲུང་སྐྱོབ་འདུ་ཤེས་གཏིང་ཟབ་ཏུ་གཏོང་ཆེད། མདའ་བཞི་རྫོང་གི་ས་ཁོངས་ཧྲིལ་པོའི་སྐྱེ་ཁམས་དོ་དམ་སྲུང་སྐྱོང་པས་བཅོས་སྒྲིག་ལས་དོན་སྤེལ་བ་དང་ཆབས་ཅིག ཐབས་ལམ་མང་པོ་དང་ཁྱོན་ཡོངས་ཀྱི་རྣམ་པའི་ཐོག་ནས་དྲིལ་བསྒྲགས་དང་ངག་ཐོག་འགྲེལ་བཤད། ཁྱབ་བསྒྲགས་ཡིག་གེ་འགྲེམ་པ། སྐད་འཕྲིན་ཐོག་ནས་ཁ་བརྡ་བྱེད་པ་སོགས་ཀྱི་ཐབས་ལམ་སྤྱད་དེ་རོང་འབྲོག་མང་ཚོགས་ཀྱི“གཙོ་རྒྱུགས་གླེང་ཕྱོགས”ཀྱི་ཤུགས་རྐྱེན་རྒྱ་ཆེར་བཏང་བ་དང་། སྡོད་དམངས་རང་ཉིད་ལ་དོ་དམ་བྱ་རྒྱུར་ཤུགས་སྣོན་དང་ཁོར་ཡུག་འཕྲོད་བསྟེན་བཅོས་སྒྲིག་བྱ་རྒྱུར་སྐུལ་སློང་བྱེད་པ། རང་སྐྱོང་རང་བཞིན་གྱི་བཅོས་སྒྲིག་ལས་དོན་སྤེལ་རྒྱུ་བཅས་ལ་ཁྲིད་སྟོན་ཧུར་ཐག་བྱས་ཡོད།    

རྒྱུས་ལོན་པ་ལྟར་ན། མདའ་བཞི་རྫོང་གིས་སྐྱེ་ཁམས་དོ་དམ་སྲུང་སྐྱོང་པའི་དཔུང་ཁག་འཛུགས་སྐྱོང་དང་དོ་དམ་ལ་ཚད་མཐོའི་མཐོང་ཆེན་བྱས་ཏེ། གཞི་རིམ་གྱི་སྐྱེ་ཁམས་ཁོར་ཡུག་དོ་དམ་སྲུང་སྐྱོང་གི་དཀའ་གནད་དང་འགག་གནད་ཀྱི་གནད་དོན་ལ་དམིགས་ནས“འདེམས་གསོ་གོ་ཆོད་པའི”བྱ་ཐབས་ཧུར་ཐག་སྤྱད་དེ། སྐྱེ་ཁམས་དོ་དམ་སྲུང་སྐྱོང་པའི་དཔུང་ཁག་རྒྱུན་ཆད་མེད་པར་ལེགས་སྒྲིག་དང་འཐུས་ཚང་དུ་གཏོང་བ་དང་། སྐྱེ་ཁམས་སྲུང་སྐྱོང་གི“གདོང་ལེན་རུ་ཁག”ནུས་ཤུགས་ཡོད་རྒུས་རྒྱ་བསྐྱེད་དེ། གཞི་རིམ་གྱི་སྐྱེ་ཁམས་དོ་དམ་སྲུང་སྐྱོང་ཁྱབ་ཁོངས་ཀྱི་མདའ་བཞིའི་ཁྱད་ཆོས་ལྡན་པའི་གསར་གཏོད་ལག་ལེན་གྱི་ལམ་བུ་ཞིག་གཏོད་པ་དང་། རི་ཆུ་སྔོན་མོར་སྲུང་སྐྱོང་ཡག་པོ་དང་དབུལ་ཐར་འགག་སྒྲོལ་གྱི་གྲུབ་འབྲས་སྲ་བརྟན་གཏོང་བར་རྨང་གཞི་བརྟན་པོ་གཏོང་རྒྱུ་རེད།