རྐང་ཚའི་རིན་ཐང་སྒོར་དུང་ཕྱུར1.6གི་རྩ་བའི་བོད་ལུག་ཤ་ཁོག་ཁྲི18དངོས་སུ"པེ་ཅིང་དུ་སྐྱེལ་མགོ་བརྩམས།

ནོར་ལུག་བཤས་གཏོང་ཚད་སྔར་ལས་ཇེ་མགྱོགས་སུ་གཏོང་བ་དང་ས་གནས་ཀྱི་ནོར་ལུག་ཚོང་ཟོག་ཏུ་འགྱུར་ཚད་མཐོ་རུ་གཏོང་ཆེད། ད་ལོ་ནས་བཟུང་། རྐང་ཚ་རྫོང་གིས་མི་སྣ་སྒྲིག་འཛུགས་བྱས་ཏེ་པེ་ཅིང་དང་ཀོང་ཀྲོའུ། ཁྲིན་ཏུའུ་སོགས་སུ་ཞིང་ཕྱུགས་ཐོན་རྫས་ཕྱིར་ཚོང་བྱ་བ་འབྲེལ་མཐུད་བྱེད་པར་ཐེངས་མང་བསྐྱོད་དེ། ཚོང་དོན་སྤྱི་གཉེར་ཁང་སོགས་ཁེ་ལས་དང་གྲོས་མོལ་བྱས་ནས་མཉམ་ལས་ཁྱབ་ཁོངས་རྒྱ་ཆེར་གཏོང་རྒྱུའི་བརྩོན་ལེན་བྱས། ཉེ་ཆར་རྐང་ཚ་རྫོང་ཆིན་ཧུའུ་ཞིང་ཕྱུགས་མ་འཇོག་གསར་སྤེལ་ཚད་ཡོད་སྤྱི་གཉེར་ཁང་དང་པེ་ཅིང་ཐེན་ཡུག་ཁྲེང་ཤིན་ཚོང་དོན་ཚད་ཡོད་སྤྱི་གཉེར་ཁང་གི་དབར་ལུག་ཤ་ཤ་ཁོག་ཁྲི18ཀྱི་མངགས་ཐོ་བཞག་པ་དང་མངགས་ཐོའི་རིན་ཐང་དམངས་སྒོར་དུང་ཕྱུར1.6ཟིན་ལ། ཟླ10པའི་ཚེས23ཉིན་པེ་ཅིང་དུ་སྐུར་བ་དེས་རྐང་ཚའི་བོད་ལུག་དངོས་སུ"པེ་ཅིང་དུ་བསྐྱོད་པ"མཚོན་ཡོད།

ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་འཛུགས་སྐྲུན་ལ་སྐུལ་འདེད་ཏན་ཏིག་བཏང་ནས་ས་གནས་ཀྱི་ནོར་ལུག་གི་ཆས་རྟགས་སྙན་གྲགས་མཐོ་རུ་གཏོང་བ་དང་མང་ཚོགས་ལ་ཡོང་སྒོ་བརྟན་པོ་ཡོང་རྒྱུར་སྐུལ་འདེད་གཏོང་ཆེད། ད་ལོ་ནས་བཟུང་རྐང་ཚ་རྫོང་གིས<<རྐང་ཚ་རྫོང་གི་ནོར་ལུག་བཤས་གཏོང་གི་བྱ་དགའི་ཁ་གསབ་བྱ་ཐབས>>དང<<རྫོང་ཁོངས་ཕྱི་རོལ་དུ་ནོར་ལུག་ཐད་ཚོང་ཁང(ཐད་ཚོང་ཁང)འཛུགས་པའི་ཁ་གསབ་དང་བྱ་དགའི་བྱ་ཐབས>>སོགས་ཞིང་དར་ཞིང་ཕན་གྱི་སྲིད་ཇུས་རབ་དང་རིམ་པ་བཟོས་ནས་བཏོན་པ་དང་། རྫོང་རིམ་པའི་ནོར་སྲིད་ཀྱིས་བྱ་དགའི་ཁ་གསབ་མ་དངུལ་སྒོར་ཁྲི300བཏོན་ནས་མང་ཚོགས་ཀྱིས་ལུགས་མཐུན་ངང་བཤས་གཏོང་བྱ་རྒྱུར་རོགས་རམ་བྱས་པ་དང་འབྲེལ་རྫོང་རིམ་པའི་མགོ་ཁྲིད་ཀྱིས་ཚན་གཙོ་བྱས་པའི་ནོར་ལུག་བྲིན་ཚོང་འོས་སྦྱོར་ཚན་ཆུང5ཆེད་མངགས་བཙུགས་ཏེ། ཁྲོམ་ར་གསར་འབྱེད་ཧུར་ཐག་བྱས་པ་དང་གཉེར་སྐྱོང་བྱེད་པོ་སོ་སོས་རྫོང་ཁོངས་ཕྱི་རོལ་དུ་ནོར་ལུག་ཐད་ཚོང་ཁང་འཛུགས་རྒྱུར་སྐུལ་མ་བཏང་བས། མིག་སྔའི་བར་ནོར་ལུག་ཁྲི42.57བཤས་གཏོང་བྱས་པ་དང་རིམ་རྩིས་བྱས་ན་ནོར་ལུག་ཤ་ཏུན5086བྲིན་ཚོང་བྱས་ཡོད། བྱ་དགའི་ཁ་གསབ་མ་དངུལ་སྒོར་ཁྲི322.065སྤྲད་དེ་རྫོང་ཁོངས་ཕྱིའི་ནོར་ལུག་ཐད་ཚོང་ཁང18བཙུགས།

གོམ་སྟབས་རྗེས་མར། རྐང་ཚ་རྫོང་གིས་ཞིང་ཕྱུགས་ཐོན་རྫས་ཕྱིར་ཚོང་བྱ་བ་སྤེལ་ཤུགས་མུ་མཐུད་ཆེ་རུ་བཏང་ནས་ཕྱིར་ཚོང་བྱེད་སྟངས་དང་བྱ་ཐབས་ཟམ་མི་ཆད་པར་གསར་གཏོད་བྱས་ཏེ"ཐོན་སྐྱེད་དང་ལས་སྣོན། ཕྱིར་ཚོང་གཞི་གཅིག་ཅན"བཅས་ཀྱི་ནུས་མཐོའི་ཞིང་ཕྱུགས་ཐོན་ལས་མ་ལག་སྒོ་ཀུན་ནས་འཛུགས་སྐྲུན་བྱ་རྒྱུ་དམིགས་ཚད་དུ་བྱས་ནས། གོ་སྐབས་དམ་འཛིན་དང་སྲིད་ཇུས་དམ་འཛིན། ཁྲོམ་ར་དམ་འཛིན་བཅས་བྱས་ཏེ། མི་སེར་གྱི་ཡོང་སྒོ་ཇེ་མང་དུ་འགྲོ་བ་དང་ཐོན་ལས་ཀྱི་གྲུབ་ཆ་སྔར་བས་ཇེ་ལེགས་སུ་འགྲོ་བ། རྐང་ཚའི་ཆས་རྟགས་ཀྱི་མཚན་སྙན་ཇེ་རྒྱས་ཇེ་ལེགས་སུ་གཏོང་རྒྱུ་རེད།