“ལྷ་ཆབ་རྟགས་མའི”ཀན་སུའུ་དང་མཚོ་སྔོན། སི་ཁྲོན། ཤིན་ཅང་། ཉིང་ཞའི་གཟེབ་གྲུག་གདན་ཞུའི་འགྲན་སྡུར་སྐབས་དང་པོ་རྐང་ཚ་རུ་སྤེལ།

“ལྷ་ཆབ་རྟགས་མའི”ཀན་སུའུ་དང་མཚོ་སྔོན། སི་ཁྲོན། ཤིན་ཅང་། ཉིང་ཞའི་གཟེབ་གྲུག་གདན་ཞུའི་འགྲན་སྡུར་སྐབས་དང་པོ་རྐང་ཚ་རུ་སྤེལ།

ཉེ་ཆར། “ལྷ་ཆབ་རྟགས་མའི”ཀན་སུའུ་དང་མཚོ་སྔོན། སི་ཁྲོན། ཤིན་ཅང་། ཉིང་ཞའི་གཟེབ་གྲུག་གདན་ཞུའི་འགྲན་སྡུར་སྐབས་དང་པོ་རྐང་ཚ་རུ་སྤེལ། རྒྱུས་ལོན་བྱུང་བ་ལྟར་ན། ཐེངས་འདིའི་འགྲན་སྡུར་ཆེན་མོའི་ནང་ཀན་སུའུ་དང་སི་ཁྲོན། ཤིན་ཅང་། ཉིང་ཞ་སོགས་ཞིང་ཆེན་དང་རང་སྐྱོང་ལྗོངས5ཡི་གཟེབ་གྲུག་རུ་ཁག17གདན་ཞུ་བྱས་འདུག ཐེངས་འདིའི་གདན་ཞུའི་འགྲན་སྡུར་སྤེལ་བ་ནི་མཚོ་བྱང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་ཐུན་མོང་འདུ་ཤེས་སྲ་བརྟན་དུ་གཏོང་བའི་སློབ་གསོའི་ལག་ལེན་གྱི་འཚོལ་ཞིབ་གལ་ཆེན་ཞིག་དང་རིགས་སོ་སོ་ཞིང་ཆེན་དང་རང་སྐྱོང་ལྗོངས་ལས་བརྒལ་ནས་འགྲོ་འོང་དང་བརྗེ་རེས། མཉམ་འདྲེས་བཅས་ཀྱི་གསོན་ཉམས་ལྡན་པའི་ལག་ལེན་ཞིག་ཡིན་ལ་རིགས་སོ་སོའི་ལུས་རྩལ་འགྲན་སྡུར་བྱས་པ་བརྒྱུད་ཀྲུང་ཧྭ་མི་རིགས་ཀྱི་ཐུན་མོང་གི་བསམ་པའི་ཁྱིམ་གཞིས་བསྐྲུན་པའི་གཞི་རྟེན་གལ་ཆེན་ཞིག་ཀྱང་ཡིན་པ་རེད།

ཟླ10པའི་ཚེས19ཉིན་འགྲན་སྡུར་ཆེན་མོ་མགོ་བརྩམས་པ་ནས་བཟུང་ཀན་ལྷོM2རུ་ཁག་དང་ཤིན་ཅང་སྒྲ་ལས་མྱུར་རུ་ཁག ཁྱུང་མཆུའི་ན་གཞོན་རུ་ཁག པཎ་ཆེན་འཁྲུངས་ཡུལ་རུ་ཁག སོག་རྫོང་མི་ལྔའི་རྩ་འཛུགས་རུ་ཁག རྩེ་ཁོག་རྐང་ཐང་རུ་ཁག མཚོ་བྱང་སྒར3པའི་རུ་ཁག་སོགས་གཟེབ་གྲུག་རུ་ཁག17གྱི་ལུས་རྩལ་པ168རྐང་ཚ་རྫོང་དུ་འཛོམས་ནས་ངོ་མཚར་ཆེ་བའི་འགྲན་སྡུར་མང་པོ་བྱས། ཐེངས་འདིའི་འགྲན་སྡུར་ནང“མཐུན་སྒྲིལ་དང་འབད་འཐབ། མཛའ་བརྩེ། འདྲ་མཉམ་འགྲན་རྩོད”བཅས་ཀྱི་ལུས་རྩལ་སྙིང་སྟོབས་བརྒྱུད་སྤེལ་བྱས་པར་མ་ཟད་རིགས་སོ་སོའི་དབར་རྒྱ་ཁྱབ་ངང་འགྲོ་འོང་བྱེད་པའི་ལས་སྟེགས་ཤིག་ཀྱང་བཏོད།

འགྲན་སྡུར་ཆེན་མོའི་དུས་མགོའི་གྲ་སྒྲིག་བྱ་བའི་ཁྲོད། གཙོ་སྒྲུབ་སྡེ་ཁག་དང་རོགས་སྒྲུབ་སྡེ་ཁག་གིས་གཞོགས་འདེགས་དམ་ཟབ་བྱས་ཏེ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཀྱི་གཙོ་ཐིག་དང"ལུས་རྩལ་གྱི་སྟེགས་བུ་བསྐྲུན་པ་དང་རིག་གནས་ཀྱི་ཟློས་གར་འཁྲབ་པའི"ནང་དོན་གཙོ་བོ་རྒྱུན་འཁྱོངས་ཀྱིས་ཞབས་ཞུའི་འགན་ལེན་ལ་ཤུགས་སྣོན་དང་རིགས་སོ་སོའི་བར་ཕྱོགས་ཡོངས་ནས་བརྗེ་རེས་བྱེད་པའི་ཐབས་ལམ་ཤར་གཏོང་ཐུབ་པ་བྱ་རྒྱུ་དེ་མགོ་རྩོམ་ས་དང་དོན་ལ་འབབ་སར་བརྩིས་ནས་མཁོ་བསྟུན་དང་ལས་འགན་ཁག་བགོས་ཞིབ་ཚགས་སུ་བཏང་ནས་འགྲན་སྡུར་ཆེན་མོ་སྤུས་ཚད་མཐོན་པོས་གཉེར་རྒྱུར་འགན་ལེན་བྱས། འགྲན་སྡུར་བྱེད་སྐབས་ཞབས་ཞུའི་འགན་ལེན་བྱ་ཐབས་དོན་འཁྱོལ་བྱ་རྒྱུར་དོ་སྣང་བྱས་ཏེ་ལུས་རྩལ་པའི་ཟ་འཐུང་དང་འགྲོ་འདུག སྨན་བཅོས་འགན་ལེན་སོགས་ཀྱི་ཞིབ་ཕྲའི་གནས་ཚུལ་སོ་སོ་ནས་དམ་འཛིན་བྱས་ཏེ"ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། བློ་སེམས་གཅིག་གིས་ཀྲུང་གོའི་ཕུགས་འདུན་བསྐྲུན"པའི་རྣམ་པ་ཟབ་མོ་ཞིག་ཧུར་ཐག་སྒོས་བཏོད་ནས་རིགས་སོ་སོའི་ལུས་རྩལ་པའི་བར་ཡང་འགྲོ་འོང་རྒྱ་ཁྱབ་དང་བརྗེ་རེས་གཏིང་ཟབ་བྱས་ནས་ཚང་མར་རང་ཁྱིམ་གྱི་སྒོ་འགྲམ་དུ་འགྲན་སྡུར་བྱེད་པའི་ཚོར་སྣང་ཡོང་བར་བྱས།

འགྲན་སྡུར་ཁྲོད་མཚོ་བྱང་ཁུལ་གྱིས་སྨྱན་སྦྱོར་གསར་པའི་ནུས་པ་འདོན་སྤེལ་གང་ལེགས་བྱས་ནས་ཐད་གཏོང་དང་བརྙན་ཐུང་སོགས་རྣམ་པ་སྣ་ཚོགས་བརྒྱུད་ནས་འགྲན་སྡུར་གྱི་གནས་ཚུལ་དྲིལ་སྒྲོག་དང་ཁྱབ་སྤེལ་བྱས་པས་འགྲན་རར་ལྟད་མོ་ཧ་ཅང་ངོ་མཚར་ལྡན། འགྲན་སྡུར་བྱེད་ཐེངས་རེར་ཆ་སྙོམས་མི700ནས1000བར་འགྲན་རར་ཐོན་པ་དང་དྲ་ཐོག་ཐད་གཏོང་ནང་ཆ་སྙོམས་མི་ཁྲི1ལྷག་ཙམ་ཟིན་ཡོད་པ་རེད།