2023ལོའི་མཚོ་བྱང་ཁུལ་གྱི་གཟུགས་འདས་ཤུལ་བཞག་རིག་གནས་འགྲེམས་སྟོན་བྱེད་སྒོ་ནུབ་མཚོ་གྲོང་རྡལ་དུ་སྤེལ།

ཟླ11པའི་ཚེས22ཉིན། མཚོ་བྱང་ཁུལ་ཨུ་དང་ཁུལ་སྲིད་གཞུང་གིས་གཙོ་སྒྲུབ་དང་། ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་ཀྱིས་འགན་སྒྲུབ་གནང་བའི་ཁུལ་ཡོངས་ཀྱི་གཟུགས་འདས་ཤུལ་བཞག་རིག་གནས་འགྲེམས་སྟོན་བྱེད་སྒོ་ནུབ་མཚོ་གྲོང་རྡལ་དུ་སྤེལ། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཞིང་ཆེན་ཏང་ཨུའི་སྐོར་སྐྱོད་ལྟ་སྐུལ་མཛུབ་ཁྲིད་ཚན་ཆུང་ལྔ་པའི་ཚན་གཙོ་ཞུའེ་ཅན་ཧྭ། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན། ཁུལ་དམངས་ཆེན་རྒྱུན་ལས་ཨུ་ལྷན་གྱི་ཀྲུའུ་རིན་དབྱང་ཧའེ་ལུང་། ཁུལ་སྲིད་གྲོས་ཀྱི་ཀྲུའུ་ཞི་པད་རྒྱལ་བཀྲ་ཤིས། དེ་བཞིན་ཁུལ་དུ་བསྡད་ཡོད་པའི་ཁུལ་རིམ་པའི་མགོ་ཁྲིད་བཅས་བྱེད་སྒོར་ཞུགས།

བྱེད་སྒོའི་ཡུལ་དངོས་སུ། མཚོ་བྱང་ཁུལ་རིག་གནས་ཁང་གི་འགན་འཁུར་བས་ཕྱོགས་ལྔའི་ཐད་ནས་མཚོ་བྱང་གི་གཟུགས་འདས་ཤུལ་བཞག་རིག་གནས་སྲུང་སྐྱོབ་དང་རྒྱུན་འཛིན་བྱ་བའི་གནས་ཚུལ་ངོ་སྤྲོད་བྱས་པ་དང་། གཟུགས་འདས་ཤུལ་བཞག་རིག་གནས་རྒྱུན་འཛིན་པ110ཡིས་གྲིབ་གཟུགས་ཟློས་གར་དང་། ཨ་རིག་གླུ་ཤགས། ཧོས་རིགས་ཀྱི་གསོལ་སྟོན་རོལ་དབྱངས། གེ་སར་རྒྱལ་པོའི་སྒྲུང་། པི་ཝང་རྟ་མགོ་མའི་དབྱངས་རྟ། སྤེན་མ་ཐང་གི་མེ་ཧུའུ་ཟློས་གར་སོགས་གཟུགས་འདས་ཤུལ་བཞག་རིག་གནས་རྣམ་གྲངས་ཀྱི་གསོན་ཉམས་དོད་པའི་འཁྲབ་སྟོན་ལ་ལྟད་མོ་བའི་དགའ་བསུ་ཐོབ། རྨ་ཙོང་གཙགས་དྲུབ་སྟེ་འཇུ་ལག་གཙགས་དྲུབ་དང་། ནས་ཀྱི་སོག་མའི་འདྲ་བཟོ་ལག་རྩལ། མདོ་ལའི་གཡང་ཊི་བཟོ་རྩལ། སི་སྐུད་ཐང་ག རྐང་ཚའི་སྣམ་བུ་འཐག་པའི་ལག་རྩལ། རུས་བརྐོ་ལག་རྩལ། མདའ་བཞིའི་རྨ་ཙོང་ཤོག་དྲས། མདའ་བཞིའི་དཀྲུགས་ཇ་ལག་རྩལ། གསེར་དངུལ་ཐང་གི་མེས་པོའི་རུས་ཆག་སྦྱོར་རྩལ་སོགས་བཟོ་རྩལ42ཀྱིས་ཡུལ་དངོས་ལག་རྩལ་འཁྲབ་སྟོན་བྱས་པས་བྱེད་སྒོ་སྤེལ་ཡུལ་དུ་ཚ་རླབས་ཤིག་འཕྱུར་ཡོད། འཇུ་ལག་དཔའ་རིས་རྒྱན་གོས་དང་མདོ་ལའི་ཨ་རིག་གི་སྲོལ་རྒྱུན་ཐག་པ་བརྒྱུས་པའི་ལག་རྩལ། རྐང་ཚའི་ཨ་ཡར་ཁུལ་ཁུ་ལུའི་ལས་སྣོན་བཟོ་རྩལ། མདའ་བཞིའི་རྒྱབ་ཚང་ལག་ཤེས་ཀོ་ཆས་སྒྱུ་རྩལ་སོགས་རིགས36གི་ཐོན་རྫས་སྣ་ཁ1800ལྷག་ཙམ་དང་། དེ་བཞིན་དེ་སྔའི221རྟེན་གཞིའི་ཡན་ལག་བཟོ་གྲྭ་གསུམ་པའི་གནའ་ཤུལ་དུ་འགྲེམས་སྟོན་བྱས་པའི“མདེལ་གཉིས”ཀྱི་དཔེ་དབྱིབས་དང་། ཤོག་དྲས་འདྲ་པར། ཤིང་བརྐོས། དམག་དཔེ་སོགས་རིག་གནས་གསར་གཏོད་ཐོན་རྫས་དང་མི་རིགས་རྒྱན་གོས་འགྲེམས་སྟོན་གྱིས་ལྟད་མོ་བ3000ལྷག་གི་མིག་དབང་འཕྲོག་ཅིང་འགྲེམས་རར་མི་ཚོགས་ཀྱིས་ཁེངས། གཟུགས་འདས་ཤུལ་བཞག་རིག་གནས་འཁྲབ་སྟོན་དང་བརྩམས་ཆོས་འགྲེམས་སྟོན། ཡུལ་དངོས་ནས་བཟོ་བ་སོགས་ཀྱི་བྱེད་ཐབས་བརྒྱུད། མཚོ་བྱང་ཁུལ་གྱི“རིམ་བཞིའི”གཟུགས་འདས་ཤུལ་བཞག་རིག་གནས་ཀྱི་དོན་སྙིང་ཟབ་མོ་དང་སྤྱིར་བཏང་མིན་པའི་གོ་དོན་ཁྱོན་ཡོངས་ནས་མངོན་པར་བྱས་ཏེ་མང་ཚོགས་ལ་གཟུགས་འདས་ཤུལ་བཞག་རིག་གནས་ཀྱི་སྟོན་མོ་ལོངས་སུ་སྤྱོད་དུ་བཅུག་ནས་དུས་རབས་གསར་པའི་རྒྱབ་ལྗོངས་འོག་སྲོལ་རྒྱུན་སྒྱུ་རྩལ་ལ་སྐྱེ་སྟོབས་དང་གསོན་ཤུགས་གསར་པ་འཕེལ་དུ་བཅུག་ཡོད། 

དེའི་རིང་། མཚོ་བྱང་ཁུལ་རིག་གནས་ཁང་དང་འཇུ་ལག་རྫོང་རིག་གནས་ཁང་། མདོ་ལ་རྫོང་རིག་གནས་ཁང་། རྐང་ཚ་རྫོང་རིག་གནས་ཁང་། མདའ་བཞི་རྫོང་རིག་གནས་ཁང་སོགས་གཟུགས་འདས་ཤུལ་བཞག་རིག་གནས་རྒྱུན་འཛིན་དང་སྲུང་སྐྱོབ་བྱ་བའི་ཕུལ་བྱུང་རྣམ་གྲངས་ཀྱི་སྲུང་སྐྱོབ་ལས་ཁུངས5དང་། འཇུ་ལག་འོ་བཟོ་ལག་རྩལ་གྱི་ཚབ་མཚོན་རྒྱུན་འཛིན་པ་མཱ་ཅིན་མེ་དང་། མདོ་ལ་ཨ་རིག་གླུ་ཤགས་ཀྱི་ཚབ་མཚོན་རྒྱུན་འཛིན་པ་གུ་རུ། རྨ་ཙོང་གཙགས་དྲུབ-མདོ་ལའི་གཙགས་དྲུབ་ཀྱི་ཚབ་མཚོན་རྒྱུན་འཛིན་པ་ཅིན་ཡེ་ལན། མདའ་བཞི་རྒྱབ་ཚང་ཀོ་བཟོ་ལག་རྩལ་གྱི་ཚབ་མཚོན་རྒྱུན་འཛིན་པ་བན་ཏེ། སོག་པོའི་རྒྱན་གོས（མདའ་བཞིའི་སོག་པོའི་རྒྱན་གོས）ཀྱི་ཚབ་མཚོན་རྒྱུན་འཛིན་པ་རིན་མོ། བོད་རིགས་ཆང་གཞས་ཀྱི་ཚབ་མཚོན་རྒྱུན་འཛིན་པ་མགོན་སྐྱབས་ཚེ་རིང་། ནས་ཀྱི་སོག་མའི་འདྲ་བཟོ་ལག་རྩལ་གྱི་ཚབ་མཚོན་རྒྱུན་འཛིན་པ་དབྱང་ཡན་ཧྥུའུ་སོགས་ཕུལ་བྱུང་གཟུགས་འདས་ཤུལ་བཞག་རིག་གནས་རྒྱུན་འཛིན་པ8ལ་གཟེངས་བསྟོད་བྱས།

ཉེ་བའི་ལོ་ཤས་རིང་། མཚོ་བྱང་ཁུལ་གྱིས་ལོ་རྒྱུས་རིག་གནས་ཤུལ་བཞག་སྲུང་སྐྱོབ་བྱེད་པའི་འདུ་ཤེས་གལ་ཆེན་བརྟན་པོར་བཙུགས་ཏེ་གཟུགས་འདས་ཤུལ་བཞག་ལ་མ་ལག་རང་བཞིན་ལྡན་པའི་སྒོ་ནས་གཅིག་གྱུར་སྲུང་སྐྱོབ་དོ་དམ་བྱ་བར་སྤྱི་འདོམས་ཤུགས་སྣོན་བྱས་ཏེ་མི་རིགས་སོ་སོའི་ཕུལ་བྱུང་སྲོལ་རྒྱུན་ལག་ཤེས་བཟོ་རྩལ་སྲུང་སྐྱོབ་དང་རྒྱུན་འཛིན་བྱ་རྒྱུར་སྐུལ་འདེད་གཏིང་ཟབ་བཏང་བ་དང་། ཧོས་རིགས་ཀྱི་གསོལ་སྟོན་རོལ་དབྱངས་དང་དཔའ་རིས་བོད་རིགས་ཀྱི་རྒྱན་གོས། ཨ་རིག་གླུ་ཤགས། མཚོ་སྔོན་པོའི་མཚོ་མཆོད་སོགས་རྒྱལ་ཁབ་རིམ་པའི་གཟུགས་འདས་ཤུལ་བཞག་རྣམ་གྲངས་དང་རིམ་པ་སོ་སོའི་ཕུལ་བྱུང་རིག་གནས་ཤུལ་བཞག་གི་རྒྱུན་འཛིན་པས་དེ་བས་མང་བའི་རིག་གནས་ཤུལ་བཞག་ལ་གསོན་ཤུགས་བསྩལ་བ་དང་། རིག་གནས་ཤུལ་བཞག་གི་དོན་དངོས་རང་བཞིན་དང་ཆ་ཚང་རང་བཞིན། རྒྱུན་མཐུད་རང་བཞིན་བཅས་སྲུང་སྐྱོང་བྱས་ཤིང་། ཁྱོན་ཡོངས་ནས་ཀྲུང་ཧྭའི་ཤེས་རིག་རྒྱུན་འཛིན་བྱེད་པའི་སྤྱི་ཚོགས་ཀྱི་རྣམ་པ་བཟང་བོ་བསྐྲུན་ཡོད། ཐེངས་འདིའི་གཟུགས་འདས་ཤུལ་བཞག་རིག་གནས་འགྲེམས་སྟོན་བྱེད་སྒོ་སྤེལ་བ་དེ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད་རིག་གནས་ཤུལ་བཞག་སྐོར་གྱི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གྱི་དགོངས་དོན་ལག་བསྟར་བྱེད་པའི་ཞིབ་ཕྲའི་བྱ་སྤྱོད་ཅིག་དང་། མཚོ་བྱང་གི་རིག་གནས་རྒྱུན་མཐུད་དང་ཕུལ་བྱུང་གི་སྲོལ་རྒྱུན་རིག་གནས་གསར་གཏོད་རང་བཞིན་གཞན་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་གཏོང་བའི་གསོན་ཉམས་དོད་པའི་ལག་ལེན་ཞིག་ཡིན་ལ།    “གཟུགས་འདས་ཤུལ་བཞག་རིག་གནས+ཡུལ་སྐོར”མཉམ་འདྲེས་འཕེལ་རྒྱས་འཚོལ་ཞིབ་བྱས་ནས་རིག་གནས་ཀྱི་འཇམ་ཤུགས་ལ་བརྟེན་ནས་མཚོ་བྱང་གི་རྒྱལ་སྤྱིའི་སྐྱེ་ཁམས་ཡུལ་སྐོར་བྱ་ཡུལ་ལ་སྐུལ་འདེད་གཏོང་བའི་ཐབས་ལམ་གསར་པ་ཞིག་ཀྱང་ཡིན།