མཚོ་བྱང་ཁུལ་མི་དམངས་སྲིད་གཞུང་དང་ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་དབར་འཐབ་ཇུས་མཉམ་ལས་གྲོས་མཐུན་གྱི་གན་རྒྱ་བཞག་ཅིང“གློག་དྲ་ནུས་གསོག”གཞི་གཅིག་ཅན་གྱི་ལས་གཞིའི་མ་དངུལ་བསྡུ་སྒྲིལ་གྱི་གན་རྒྱ་འཇོག་པའི་མཛད་སྒོ་འཚོགས་པ།

ཡོང་ཁུངས། གངས་ལྗོངས་འཕྲིན་གསར། རྩོམ་སྒྲིག་པ། དབང་ཆེན་དོན་འགྲུབ། 2023-08-30 16:10:02 ཀློག་གྲངས།352

ཟླ8པའི་ཚེས29ཉིན། མཚོ་བྱང་ཁུལ་མི་དམངས་སྲིད་གཞུང་དང་ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་དབར་འཐབ་ཇུས་མཉམ་ལས་གྲོས་མཐུན་གྱི་གན་རྒྱ་བཞག་ཅིང“གློག་དྲ་ནུས་གསོག”གཞི་གཅིག་ཅན་གྱི་ལས་གཞིའི་མ་དངུལ་བསྡུ་སྒྲིལ་གྱི་གན་རྒྱ་འཇོག་པའི་མཛད་སྒོ་ཚོགས། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་། ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་ཏང་ཨུའི་ཧྲུའུ་ཅིའམ་ཧང་ཀྲང་ཕན་ཧྥིན་གན་རྒྱ་འཇོག་པའི་མཛད་སྒོར་ཕེབས་པ་དང་འབྲེལ་ཤིས་ཚིག་ཕུལ་ལ། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་ཚོགས་འདུར་ཞུགས་པ་དང་། ཁུལ་དཔོན་གཞོན་པ་ཚོ་ཅི་ཆང་གིས་གཙོ་སྐྱོང་གནང་།

ཤ་བོ་སྐྱབས་ཀྱིས་ཁུལ་ཨུ་དང་ཁུལ་སྲིད་གཞུང་གི་ཚབ་བྱས་ནས་ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་དུས་ཡུན་རིང་པོའི་ནང་མཚོ་བྱང་ལ་ཐུགས་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས། ཉེ་བའི་ལོ་ཤས་རིང་མཚོ་བྱང་གིས་བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཞིང་། སྐྱེ་ཁམས་སྤུས་ཚད་མངོན་གསལ་དོད་པོས་ལེགས་སུ་བཏང་བ་དང“གནས་བཞིའི”ཐོན་ལས་ཁྱོན་ཡོངས་ནས་མགྱོགས་སུ་བཏང་སྟེ་དཔལ་འབྱོར་ཕྱོགས་སྒྱུར་གྱི་གོམ་སྟབས་མགྱོགས་སུ་བཏང་ལ། མིག་སྔར་མཚོ་བྱང་གིས་རྒྱལ་ཁབ་ཀྱིས་ནུབ་རྒྱུད་ས་ཁུལ་འཕེལ་རྒྱས་ལ་རྒྱབ་སྐྱོར་བྱེད་པའི་ཤར་རླུང་དང་ཐོན་ཁུངས་ཀྱི་ལེགས་ཆ། ས་བབ་ཀྱི་ལེགས་ཆ་བཅས་འཕེལ་རྒྱས་ཀྱི་ལེགས་ཆར་བརྟེན་ནས་སྨོན་ལམ་མཐོན་པོའི་མཁའ་དམག་གི་རྗེས་ཤུལ་གྱི་གསར་བརྗེའི་ཉམས་ཞིབ་རྟེན་གཞིའི་རྨང་གཞིའི་སྒྲིག་བཀོད་ཆ་ཚང་གི་ལས་གཞི་དང་མདོ་ལ་རི་བོའི་ནགས་ཚལ་ཡུལ་སྐོར་ལས་གཞི་སོགས་ཀྱི་གཟིགས་སྐྱོང་སྲིད་ཇུས། སྤུས་ལེགས་ལས་གཞི་བཅས་མཚོ་བྱང་དུ་བསྡུ་བཞིན་ཡོད་པས་མ་འོངས་པའི་མཉམ་ལས་བར་མཐོངས་ཆེན་པོ་ལྡན་ཡོད། མཉམ་ལས་གྲོས་མཐུན་གན་རྒྱ་བཞག་ནས་ཕྱོགས་གཉིས་ཀྱིས་ཡུན་རིང་མཉམ་ལས་དམ་ཟབ་བྱས་ཏེ་དངུལ་རྩའི་འཕེལ་རྒྱས་ཞབས་ཞུའི་ཁོར་ཡུག་མུ་མཐུད་ལེགས་སུ་གཏོང་དགོས་པར་བསྟན། ཞིང་ལས་དངུལ་ཁང་མཚོ་སྔོན་ཡན་ལག་དངུལ་ཁང་གིས་ལེགས་ཆ་འདོན་སྤེལ་གང་ལེགས་བྱས་ནས་མཚོ་བྱང་གི་ཐོན་ལས་ཀྱི“གནས་བཞི”དང་གྲོང་གསེབ་དར་སྤེལ། དམངས་འཚོ་འགན་ལེན། རྨང་གཞིའི་སྒྲིག་བཀོད་སོགས་ཁྱབ་ཁོངས་ལ་མ་འཇོག་དང་མ་དངུལ་བསྡུ་སྒྲིལ་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། དངུལ་རྩའི་ཞབས་ཞུའི་རྣམ་པ་གསར་གཏོད་བྱེད་ཤུགས་ཆེ་རུ་གཏོང་བ། ཀུན་ཕན་དངུལ་རྩའི་འབྲེལ་ཁྱོན་ཆེ་རུ་གཏོང་བ། མཚོ་བྱང་ཁུལ་གྱི་དངོས་ཚན་དཔལ་འབྱོར་གྱི་སྒུལ་ནུས་གསར་པ་འཕེལ་བ་བཅས་བྱས་ནས་ཐུན་མོང་ཐོག་སྲིད་དོན་དང་དངུལ་ཁང་གི་ཁེ་ལས་མཉམ་ལས་ཀྱི་དཔེ་མཚོན་གསར་པ་གཏོད་རྒྱུའི་རེ་བ་ཡོད་ཟེར།

ཕན་ཧྥིན་གྱིས་ཉེ་བའི་ལོ་ཤས་རིང་ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་སྤུས་ཚད་མཐོ་བའི་འཕེལ་རྒྱས་བརྗོད་དོན་དུ་འཛིན་རྒྱུ་རྒྱུན་འཁྱོངས་བྱས་ནས“གྲོང་གསེབ་དར་སྤེལ་ལ་ཞབས་འདེགས་ཞུ་བར་སྣེ་ཁྲིད་པའི་དངུལ་ཁང་དང་དངོས་ཚན་དཔལ་འབྱོར་ལ་ཞབས་འདེགས་ཞུ་བའི་གཙོ་ཤུགས་དངུལ་ཁང”གི་ངེས་གནས་ཆེན་པོ་གཉིས་མངོན་གསལ་དོད་པོ་ཡོང་བར་བྱས་ནས“ཞིང་གསུམ”རྫོང་ཁོངས་དང་། ལྗང་མདོག་དངུལ་རྩ། གྲངས་འཛིན་གཉེར་སྐྱོང་བཅས་ཀྱི་འཐབ་ཇུས་ཆེན་པོ་གསུམ་ཕྱོགས་ཡོངས་ནས་ལག་བསྟར་བྱས་ཏེ་གཞི་ཁྱོན་དང་སྤུས་ཚད་ཕན་འབྲས་དུས་གཅིག་ཏུ་མཐོ་རུ་བཏང་ཡོད་ལ། ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གིས་ཐེངས་འདིའི་གྲོས་མཐུན་གན་རྒྱ་བཞག་པ་དེ་གོ་སྐབས་སུ་བཟུང་ནས་མཚོ་བྱང་ཐོན་ལས་དེང་རབས་ཅན་དང་གྲོང་གསེབ་དར་སྤེལ། དམངས་འཚོའི་དངུལ་རྩ། དངོས་ཚན་དཔལ་འབྱོར། རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་མང་པོ་འཕེལ་རྒྱས་གཏོང་རྒྱུར་ནུས་ཤུགས་ཡོད་རྒུས་རྒྱབ་སྐྱོར་བྱས་ནས། མཚོ་བྱང་ནི་གཙོ་གནད་རྒྱབ་སྐྱོར་ས་ཁོངས་སུ་བརྩིས་ཏེ་ཕྱོགས་བསྡུས་ཐོན་ཁུངས་ཀྱི་མཉམ་འདྲེས་བྱེད་ཤུགས་སྔར་བས་ཆེ་རུ་བཏང་སྟེ་སྤུས་ཚད་མཐོ་བའི་དངུལ་རྩའི་ཞབས་ཞུར་བརྟེན་ནས་མཚོ་བྱང་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱ་རྒྱུ་ཡིན་པར་བསྟན།

ཀྲང་ཧྲིང་ཡོན་དང་ཕན་ཧྥིན་གྱིས་ཕྱོགས་གཉིས་ཀྱི་ཚབ་བྱས་ནས《འཐབ་ཇུས་མཉམ་ལས་གྲོས་མཐུན》ལ་གན་རྒྱ་བཞག་པ་དང་། ཞིང་ལས་དངུལ་ཁང་མཚོ་བྱང་ཡན་ལག་དངུལ་ཁང་དང་རྒྱལ་ཁབ་ནུས་རྒྱུ（མཚོ་བྱང་རྐང་ཚ）ནུས་རྒྱུ་གསར་པ་གསར་སྤེལ་ཚད་ཡོད་ཀུང་སིས“རྐང་ཚ་རྫོང་གི་ཆན་ཝ་ཁྲི320ཡི‘གློག་དྲ་ནུས་གསོག’གཞི་གཅིག་ཅན་གྱི་ལས་གཞིའི”དངུལ་བུན་སྒོར་དུང་ཕྱུར9ཡི་མ་དངུལ་བསྡུ་སྒྲིལ་གྱི་གྲོས་མཐུན་ལ་གན་རྒྱ་བཞག་པ་དང་། དེས་ཕྱོགས་གཉིས་ཀྱི་འཐབ་ཇུས་མཉམ་ལས་གྲོས་མཐུན་གྱི་གལ་ཆེའི་ལས་གཞི་དང་པོ་དངོས་སུ་ལག་བསྟར་བྱས་ནས་ཕྱོགས་གཉིས་ཀྱི་མ་འོངས་པའི་མཉམ་ལས་ལ་མགོ་ཡག་པོ་ཞིག་བཙུགས་ཤིང་། མཚོ་བྱང་གི་སྤུས་ལེགས་ལས་གཞི་དེ་བས་མང་བ་ཞིག་ལ་དངུལ་རྩའི་གསོན་ཤུགས་རྒྱུན་ཆད་མེད་པར་བསྩལ་རྒྱུ་ཡིན་པ་མཚོན་ཡོད།

ཁུལ་གྱི་མགོ་ཁྲིད་ཝང་ཡུང་ཁྲང་དང་། ལི་ཞུ་ཀྲེན། ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་ཨུ་ཡོན་ནམ་ཧང་ཀྲང་གཞོན་པ་ལིག་ཡུང་། ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་ཏང་ཨུའི་ཨུ་ཡོན་ནམ་ཧང་ཀྲང་གཞོན་པ་སུང་ཞའོ་ཞང་། ཁུལ་ཨུའི་སྡེ་ཁག་སོ་སོ་དང་ཁུལ་ཐད་གཏོགས་ལས་ཁུངས་སོ་སོ། ཀྲུང་གོའི་ཞིང་ལས་དངུལ་ཁང་མཚོ་སྔོན་ཞིང་ཆེན་ཡན་ལག་དངུལ་ཁང་གི་སྡེ་ཁག་སོ་སོ་དང་མཚོ་བྱང་ཡན་ལག་དངུལ་ཁང་གི་འགན་འཁུར་བློ་མཐུན་གཙོ་བོ་བཅས་ཞུགས།