ལིས་ཆང་ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི2025ལོའི་ལོ་ཚོགས་ཀྱི་མགོ་རྩོམ་མཛད་སྒོར་ཞུགས་པར་མ་ཟད་གཙོ་དོན་གསུངས་བཤད་གནང་།

 རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཆང་ཚེས23ཉིན་པེ་ཅིང་དུ་ཀྲུང་གོའི་འཕེལ་རྒྱས་མཐོ་རིམ་གླེང་སྟེགས་ཀྱི2025ལོའི་ལོ་ཚོགས་ཀྱི་མགོ་རྩོམ་མཛད་སྒོར་ཞུགས་པར་མ་ཟད་གཙོ་དོན་གསུངས་བཤད་གནང་།

ལིས་ཆང་གིས་བསྟན་དོན། ཀྲུའུ་ཞི་ཞི་ཅིན་ཕིང་གིས་གསུངས་པ་བཞིན་འཕེལ་རྒྱས་ནི་མིའི་རིགས་སྤྱི་ཚོགས་ཀྱི་རྟག་བརྟན་གྱི་བརྗོད་གཞི་ཡིན། ཚང་མས་ཀྲུང་གོའི་དཔལ་འབྱོར་འཕེལ་རྒྱས་གནས་ཚུལ་ལ་ཧ་ཅང་སེམས་ཁུར་བྱེད་བཞིན་ཡོད་ལ། གོ་ལ་ཧྲིལ་བོའི་འཕེལ་རྒྱས་ཀྱི་ཁ་ཕྱོགས་ལའང་སེམས་ཁུར་བྱེད་བཞིན་ཡོད་པས། ངས་འདི་ནས་ཕྱོགས་གསུམ་གྱི་ཐད་ནས་ཚང་མར་ལྟ་ཞིབ་དང་བསམ་གཞིགས་འགའ་མཉམ་སྤྱོད་བྱ་རྒྱུ་ཡིན། 

ཕྱོགས་གཅིག་ནས་ལོ་སར་སྐབས་ཀྱི་དཔལ་འབྱོར་ལས་ཀྲུང་གོའི་འཕེལ་རྒྱས་ཀྱི་གསོན་ཤུགས་ལ་བལྟ། ད་ལོའི་ལོ་སར་གྱི་སྔ་རྗེས་སུ་ཀྲུང་གོའི་དཔལ་འབྱོར་ཐད་སྣང་ཚུལ་རིམ་པའི་ཁྱད་ཆོས་སྐོར་ཞིག་མངོན་ཡོད་ལ། འཛད་སྤྱོད་ཁྲོམ་རར་ཡང་གཙོ་གནད་མང་པོ་མངོན་ཡོད་པར་མ་ཟད། ཚན་རྩལ་གྱི་ཚད་བརྒལ་ཡང་རྒྱུན་ཆད་མེད་པར་མངོན་ཡོད་ཅིང་། ལྗང་མདོག་དཔལ་འབྱོར་ཡང་དར་སྲོལ་ཞིག་ཏུ་གྱུར་ཡོད། ཁྱབ་ཁོངས་མི་འདྲ་བའི་སྒུལ་ནུས་གསར་པའི་གསོག་འཇོག་རྒྱུན་མཐུད་ངང་ཆེ་རུ་ཕྱིན་ཡོད་པས། ཀྲུང་གོའི་དཔལ་འབྱོར་ཐད་ཡུན་རིང་དར་རྒྱས་ཀྱི་འཕེལ་རྒྱས་སྒུལ་ཤུགས་བརྩོལ་ཐུབ་ངེས།

ཕྱོགས་གཉིས་ནས་རྒྱལ་ཡོངས་ཚོགས་ཆེན་གཉིས་ལས་ཀྲུང་གོའི་དཔལ་འབྱོར་སྲིད་ཇུས་ལ་བལྟ། ང་ཚོས་སྲིད་ཇུས་ཀྱི་ཤུགས་ཚད་ཆེ་རུ་གཏོང་བ་དང་ཁྲོམ་རའི་ནུས་ཤུགས་ལ་སྐུལ་སྤེལ་བྱེད་པ་གཉིས་ཟུང་འབྲེལ་བྱེད་རྒྱུ་གཙོ་གནད་དུ་བཟུང་སྟེ། སྔར་ལས་དགེ་མཚན་ལྡན་པའི་སྤྱི་ཁོག་སྲིད་ཇུས་ལག་བསྟར་བྱེད་པ་དང་། སྔར་ལས་ལྷག་པའི་སྒོ་ནས་དུས་འཁོར་ལས་ལྡོག་པའི་ཤུགས་ཚད་སྙོམས་སྒྲིག་ལ་ཤུགས་སྣོན་བྱེད་པ། དགོས་མཁོ་ཡོད་དུས་འཕར་ཚད་སྲིད་ཇུས་གསར་པ་བཏོན་ནས་དཔལ་འབྱོར་རྒྱུན་མཐུད་ངང་ལེགས་ཕྱོགས་སུ་འཕེལ་བར་ཤུགས་ཡོད་འདེགས་སྐྱོར་འདོན་སྤྲོད་བྱེད་དགོས། དཔལ་འབྱོར་ལམ་ལུགས་བཅོས་སྒྱུར་ཟབ་སྤེལ་བྱེད་པ་དང་། ནུས་ཤུགས་ཡོད་རྒུས་དཔལ་འབྱོར་འཁོར་སྐྱོད་ཀྱི་ཞན་ཆ་ཁ་གསབ་བྱེད་པ། ཁེ་ལས་ཀྱི་གསར་སྐྲུན་གསར་གཏོད་ལ་སྲིད་ཇུས་ཀྱི་རྒྱབ་སྐྱོར་བྱེད་ཤུགས་ཆེ་རུ་བཏང་ནས་འཕེལ་རྒྱས་ཀྱི་ནང་གནས་སྒུལ་ཤུགས་ཆེ་རུ་བསྐྱེད་དགོས།

ཕྱོགས་གསུམ་ནས་རྒྱལ་སྤྱིའི་འགྱུར་ལྡོག་ལས་འཛམ་གླིང་འཕེལ་རྒྱས་ཀྱི་བདེན་ལུགས་ལ་བསམ་གཞིགས་གཏོང་དགོས། དེང་སྐབས་འཛམ་གླིང་དཔལ་འབྱོར་ཆ་ཤས་ཅན་གྱི་ཚད་ཇེ་ཆེར་འགྲོ་བཞིན་ཡོད་ལ། བརྟན་འཇགས་མིན་པ་དང་གཏན་འཁེལ་མིན་པའི་རང་བཞིན་ཆེ་རུ་འགྲོ་བཞིན་ཡོད་པས། རྒྱལ་ཁབ་ཀྱིས་ཁྲོམ་ར་སྔར་ལས་སྒོ་འབྱེད་དང་ཁེ་ལས་ཀྱི་ཐོན་ཁུངས་མཉམ་སྤྱོད་བྱེད་རྒྱུ་སྔར་ལས་གལ་ཆེ། ཀྲུང་གོས་དཔལ་འབྱོར་འཛམ་གླིང་ཅན་གྱི་ཡང་དག་པའི་ཁ་ཕྱོགས་རྒྱུན་འཁྱོངས་བྱེད་པ་དང་། བློ་བརྟན་འགྱུར་མེད་ངང་སྒོ་འབྱེད་མཉམ་ལས་ལ་སྐུལ་འདེད་གཏོང་བ། མུ་མཐུད་དུ་རྒྱལ་ཁབ་སོ་སོའི་ཁེ་ལས་ཀྲུང་གོར་ཡོང་བར་དགའ་བསུ་བྱེད་པ། གོ་ལ་ཧྲིལ་བོའི་བདེ་འཇགས་འཕེལ་རྒྱས་ཀྱི་བརྟན་འཇགས་རང་བཞིན་དང་གཏན་འཁེལ་རང་བཞིན་ཐད་རོགས་འདེགས་བྱ་རྒྱུར་འབད་བརྩོན་བྱ་རྒྱུ་ཡིན། 

ཝུའུ་ཀྲིན་ལུང་མགོ་རྩོམ་མཛད་སྒོར་ཞུགས། 

ཐེངས་འདིའི་ལོ་ཚོགས་ནི་རྒྱལ་སྲིད་སྤྱི་ཁྱབ་ཁང་འཕེལ་རྒྱས་ཞིབ་འཇུག་ལྟེ་གནས་ཀྱིས་གཙོ་སྒྲུབ་བྱས། གསར་སྤེལ་དངུལ་ཁང་གི་མགོ་གཙོ་ལའོ་སའེ་ཧྥུའུ་དང་། ཡ་གླིང་གསར་སྤེལ་དངུལ་ཁང་གི་མགོ་གཙོ་ཧྲིན་ཐེན་ཀྲིན་རིན། ད་རུང་རྒྱལ་ཁབ་ཕྱི་ནང་གི་ཁེ་ལས་པ་དང་སྲིད་གཞུང་གི་དཔོན་རིགས། ཆེད་མཁས་པ་དང་རྒྱལ་སྤྱིའི་རྩ་འཛུགས་ཀྱི་འཐུས་མི་བཅས་མི720ཙམ་མགོ་རྩོམ་མཛད་སྒོར་ཞུགས།