2024ལོའི་དུས་ཚིགས་བཞི་པའི“ཀྲུང་གོའི་མི་བཟང་མིང་ཐོ”ཁྱབ་བསྒྲགས་བྱས་པ།

2024ལོའི་དུས་ཚིགས་བཞི་པའི“ཀྲུང་གོའི་མི་བཟང་མིང་ཐོ”ཁྱབ་བསྒྲགས་མཛད་སྒོ་དང་རྒྱལ་ཡོངས་ཀྱི་ཀུན་སྤྱོད་དཔེ་བཟང་དང་ཉེ་འགྲམ་གྱི་མི་བཟང་བར་གྱི་ཡུལ་དངོས་སྤེལ་རེས་བྱེད་སྒོ་ཚེས15ཉིན་ཡུན་ནན་ཞིང་ཆེན་ཏ་ལི་པའེ་རིགས་རང་སྐྱོང་ཁུལ་དུ་འཚོགས་པ་རེད།　ས་གནས་ཁག་གི་འོས་སྦྱོར་དང་དྲ་གྲོགས་དཔྱད་བསྡུར།　ཆེད་མཁས་པས་ཞིབ་དཔྱད་སོགས་ཀྱི་གོ་རིམ་བརྒྱུད་ཁྱོན་མི（ཚོགས་ཆུང）153མི་གཞན་ལ་རོགས་རམ་བྱ་རྒྱུར་དགའ་བ་དང་།　བདེན་མཐོང་དཔའ་བསྐྱེད།　གཞུང་དྲང་ཡིད་རྟོན།　ལས་བཀུར་སྐྱེས་འབུལ།　རྒན་བཀུར་བྱམས་སྐྱོང་བཅས་ཀྱི་ཉེ་འགྲམ་གྱི་མི་བཟང་དག་གཟི་བརྗིད་ལྡན་པའི་ངང་མིང་ཐོའི་ནང་ཚུད་ཡོད།

མིང་ཐོའི་ནང་གི་མི་བཟང་ཁྲོད།　བེམ་པོ་ཞལ་འདེབས་བརྒྱབ་ནས་གཞན་པར་སླར་ཡང་འོད་སྣང་བསྩོོལ་པར་རོགས་རམ་བྱེད་མཁན་གྱི་ལོ26ལ་སླེབས་པའི་བུ་མོ་དབྱིན་ཧྥེ་རན་དང་།　ཡིད་རྟོན་རྨང་གཞིར་བྱས་ནས་གྲོང་མི་ཐུན་མོང་ཐོག་ཕྱུག་པོར་འགྱུར་བར་སྐུལ་ཁྲིད་བྱེད་པའི“ཞིང་པ་གསར་པ”ལིའུ་མིང་ཁུན།　ཉེན་ཁ་ཡོད་པའི་སྐབས་སུ་ནུས་ཤུགས་ཡོད་རྒུས་ཆུའི་ནང་དུ་ལྷུང་བའི་བྱིས་པ་ཆུ་འགྲམ་དུ་བསྐྱབས་ཀྱང་སྟབས་མ་ལེགས་པར་རང་སྲོག་བློས་གཏོང་བྱས་པའི་སྐྱེས་པ་བཟང་པོ་ཀྲེང་ཁའེ་ལུང་།　ངལ་རྩོལ་ཚད་ལས་བརྒལ་ནས་ནད་ཕོག་ནས་ལས་ཀའི་ཡུལ་དངོས་སུ་འགྱེལ་བའི་གྲོང་ཚོའི་ཏང་ཀྲི་པུའུ་ཧྲུའུ་ཅི་ཀྲང་ཧྥ་གོ།　ལོ་ངོ40ལྷག་གི་རིང་དབང་བོ་སྐྱོན་ཅན་གྱི་ཁྱོ་ག་ལ་བདག་སྐྱོང་བྱས་པའི“མནའ་མ་བཟང་པོ”དབྱང་ཞིའུ་ཧྥིན་སོགས་ཡོད་པ་དང་།　ཁོང་ཚོས་བྱ་སྤྱོད་ལ་བརྟེན་ནས་བརྩེ་བ་ཆེན་པོ་མངོན་པ་དང་།　རྒྱུན་འཁྱོངས་ལ་བརྟེན་ནས་འགན་འཁྲིར་འགྲེལ་བཤད་བྱས་ཤིང་།　དགེ་སྒྲུབ་ལ་བརྟེན་ནས་མི་སེམས་ལ་དྲོད་འཁོལ་བསྩལ།

བྱེད་སྒོ་སྤེལ་ཡུལ་དུ།　“ཀྲུང་གོའི་མི་བཟང”གི་འཐུས་མིས་ཁོང་ཚོའི་མི་སེམས་འགུལ་བའི་གཏམ་རྒྱུད་མཉམ་སྤྱོད་བྱས་པ་མ་ཟད།　རྒྱལ་ཡོངས་ཀྱི་ཀུན་སྤྱོད་དཔེ་བཟང་དང་དུས་རབས་གསར་པའི་གཞོན་ནུ་བཟང་པོ་དང་མཉམ་འགུལ་སྤེལ་རེས་བྱས་ནས།　ཁོང་ཚོའི་བྱམས་སེམས་དང་སེམས་བཟང་།　དཔའ་ངར་ཆེ་བ།　ལེགས་སྐྱེས་འབུལ་བ་བཅས་ཀྱི་བླ་ན་མེད་པའི་གཤིས་རྒྱུད་མངོན་པ་དང་།　ཀྲུང་ཧྭ་བུ་ཕྲུག་གྲངས་མེད་རྣམས་བླ་ན་མེད་པའི་ཀུན་སྤྱོད་ལག་ལེན་བྱེད་མཁན་དང་།　ཤེས་རིག་གི་དར་སྲོལ་སྲུང་མཁན།　མཛེས་སྡུག་ལྡན་པའི་འཚོ་བ་གསར་གཏོད་བྱེད་མཁན་བཅས་སུ་བརྩོན་ལེན་བྱེད་པར་སྐུལ་མ་གཏོང་བཞིན་ཡོད།　དྲ་གྲོགས་ཚོས་གཅིག་རྗེས་གཉིས་མཐུད་དུ་བཤད་རྒྱུར“ང་ཚོས‘ཀྲུང་གོའི་མི་བཟང’གི་བྱས་རྗེས་ཁོ་ནར་སེམས་འགུལ་ཐེབས་མི་རུང་བར།　བསམ་པའི་སྟོབས་ཤུགས་དེ་རིགས་སྔར་ལས་ལྷག་པར་བྱ་སྤྱོད་དངོས་སུ་བསྒྱུར་དགོས”ཟེར།

ད་ཐེངས་ཀྱི་ཁྱབ་བསྒྲགས་བྱེད་སྒོ་དེ་ཀྲུང་དབྱང་བསམ་པའི་དཔལ་ཡོན་འཛུགས་སྐྱོང་གཞུང་དོན་ཁང་གིས་གཙོ་གཉེར་བྱས་པ་དང་།　ཀྲུང་གོའི་བསམ་པའི་དཔལ་ཡོན་དྲ་བ་དང་།　གློག་བརྙན་འཕྲིན་ལམ་ལེ་ཚན་ལྟེ་གནས།　ཀྲུང་གུང་ཡུན་ནན་ཞིང་ཆེན་ཏང་ཨུ་དྲིལ་བསྒྲགས་པུའུ（ཀྲུང་གུང་ཡུན་ནན་ཞིང་ཆེན་ཏང་ཨུའི་བསམ་པའི་དཔལ་ཡོན་འཛུགས་སྐྱོང་གཞུང་དོན་ཁང）ཡིས་གཉེར་བ་དང་།　ཀྲུང་གུང་ཏ་ལི་ཁུལ་ཏང་ཨུའི་དྲིལ་བསྒྲགས་པུའུ（ཀྲུང་གུང་ཏ་ལི་ཁུལ་ཏང་ཨུའི་བསམ་པའི་དཔལ་ཡོན་འཛུགས་སྐྱོང་གཞུང་དོན་ཁང）ཡིས་རོགས་སྒྲུབ་བྱས།　།