ཀྲུང་དབྱང་དྲིལ་སྒྲོག་པུའུ་ཡིས་ས་གནས་ཁག་གི་གསར་འགྱུར་སྡེ་ཚན་སོ་སོས2025ལོའི“ལོ་གསར་ལ་གཞི་རིམ་དུ་བསྐྱོད་པའི”བྱེད་སྒོ་སྒྲིག་འཛུགས་ཞིབ་ཚགས་བྱས་ནས་སྤེལ་དགོས་པའི་བླང་བྱ་བཏོན་པ།

ཉེ་ཆར་ཀྲུང་དབྱང་དྲིལ་སྒྲོག་པུའུ་ཡིས་བརྡ་སྦྱོར་བཏང་ནས་ས་གནས་ཁག་གི་གསར་འགྱུར་སྡེ་ཚན་སོ་སོས2025ལོའི“ལོ་གསར་ལ་གཞི་རིམ་དུ་བསྐྱོད་པའི”བྱེད་སྒོ་སྒྲིག་འཛུགས་ཞིབ་ཚགས་བྱས་ཏེ་རྒྱ་ཆེའི་གསར་འགྱུར་ལས་ཀ་བྱེད་མཁན་གཞི་རིམ་གྱི་འཐབ་ཕྱོགས་དང་པོའི་ནང་དུ་བཅར་འདྲི་བྱེད་པར་སྐུལ་སློང་བྱས་ཏེ། “རྐང་ཤུགས་དང་མིག་ཤུགས།　ཀླད་ཤུགས།　སྨྱུག་ཤུགས”བཅས་རྒྱུན་ཆད་མེད་པར་ཆེ་རུ་བཏང་སྟེ། མེས་རྒྱལ་ས་གནས་ཁག་གི་དར་རྒྱས་གོང་འཕེལ་དང་མི་དམངས་མང་ཚོགས་ཀྱིས་དཔྱིད་གསར་དུས་ཆེན་ལ་དགའ་སྤྲོ་ཆེན་པོས་རོལ་བའི་མཛེས་སྡུག་གི་རྣམ་པ་གང་ལེགས་སྒོས་མངོན་པ་དང་། གསོན་ཤུགས་འཕེལ་བ་དང་སྤྲོ་སྣང་ཞི་བདེའི་དུས་ཆེན་གྱི་རྣམ་པ་ཧུར་ཐག་གིས་གཏོད་དགོས་པའི་བླང་བྱ་བཏོན།

བརྡ་སྦྱོར་གྱི་ནང་ས་གནས་ཁག་གིས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་འཕེལ་རིམ་དང་ཕན་འབྲས་དྲིལ་བསྒྲགས་ཤུགས་ཆེན་བྱ་དགོས། ས་གནས་ཁག་གིས་ཚང་འཛོམས་གྲོས་ཚོགས་ཀྱི་དགོངས་དོན་ལག་བསྟར་དོན་འཁྱོལ་བྱེད་པའི་བྱེད་ཐབས་ཞིབ་ཕྲ་དང་།　འཕེལ་རྒྱས།　ཉམས་མྱོང་བྱེད་སྟངས་བཅས་ཀྱི་གནས་ཚུལ་སྤེལ་བ་དང་།　ཚང་འཛོམས་གྲོས་ཚོགས་ཀྱི་དགོངས་དོན་གཞི་རིམ་དུ་རྩ་བ་ཚུགས་པའི་དཔེ་མཚོན་མངོན་པར་བྱས་ཏེ།　རྒྱ་ཆེའི་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་། བདེ་སྣང་བཅས་སྔར་བས་ཆེ་བ་དང་། སྔར་བས་འགན་སྲུང་ཡོད་པ། སྔར་ལས་རྒྱུན་མཐུད་ཡིན་པ་གསལ་པོར་མཚོན་པ་དང་།　གཞི་རིམ་ལས་བྱེད་པ་མང་ཚོགས་ཀྱིས་བསྒྱུར་བཅོས་ལ་ཡིད་ཆེས་བརྟན་པོ་དང་བསྒྱུར་བཅོས་བྱ་གཞག་ནང་ཧུར་ཐག་གིས་ཞུགས་པའི་བསམ་པའི་ཉམས་འགྱུར་གང་ལེགས་སྒོས་མངོན་པར་བྱེད་དགོས་པའི་བླང་བྱ་བཏོན།

བརྡ་སྦྱོར་གྱི་ནང་བསྟན་དོན། ས་གནས་ཁག་གི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གྲུབ་འབྲས་དྲིལ་བསྒྲགས་ཤུགས་ཆེན་བྱེད་དགོས།　ས་གནས་ཁག་གིས་ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱེད་པའི་བྱེད་ཐབས་གསར་པ་དང་འཕེལ་རྒྱས་གསར་པ། གྲུབ་འབྲས་གསར་པ་བཅས་ཀྱི་གནས་ཚུལ་རྗེས་འདེད་ཁྱབ་སྒྲོག་བྱེད་པ་དང་།　བཀྲག་མདངས་ཆེ་བའི་གྲུབ་འབྲས་རྒྱུན་མཐུད་ངང་དྲིལ་བསྒྲགས་ལེགས་པོ་བྱེད་དགོས།　ས་གནས་ཁག་གིས་ལོ་གཅིག་རིང་ཉེན་ཁ་དང་འགྲན་སློང་སྣ་ཚོགས་ལ་ཁ་གཏད་ནུས་ལྡན་བཏང་བ་དང་།　དཔལ་འབྱོར་འཁོར་སྐྱོད་སྤྱི་ཡོངས་ནས་བརྟན་ལྷིང་དང་བརྟན་ལྷིང་ཁྲོད་ཡར་རྒྱས་ཡོང་བ་དང་།　སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཏན་ཏིག་བྱས་པ།　དམངས་འཚོ་བྱ་གཞག་ཁག་འཕེལ་རྒྱས་ཇེ་མགྱོགས་སུ་བཏང་བ།　མི་དམངས་ཀྱི་འཚོ་བ་རྒྱུན་མཐུད་ངང་ཇེ་ལེགས་སུ་ཕྱིན་པ་བཅས་གསོན་ཉམས་ལྡན་པའི་སྒོ་ནས་མཚོན་པར་བྱེད་དགོས།　“གསར་བ་གཉིས”དང“གཙོ་བོ་གཉིས”སོགས་སྲིད་ཇུས་གལ་ཆེན་ལག་ལེན་བསྟར་བའི་ཕན་འབྲས་གནས་ཚུལ་གང་ལེགས་སྒོས་སྤེལ་ནས་ཀྲུང་གོའི་དཔལ་འབྱོར་འཕེལ་རྒྱས་ཀྱི་གསོན་ཤུགས་དང་མི་མངོན་པའི་སྟོབས་ཤུགས་མངོན་པར་བྱེད་དགོས།

བརྡ་སྦྱོར་ནང་། ས་གནས་ཁག་དང་སྡེ་ཁག་ཁག་གི་དམངས་འཚོ་འགན་སྲུང་ལས་དོན་གྱི་བྱེད་ཐབས་དྲིལ་བསྒྲགས་ཤུགས་ཆེན་བྱ་དགོས།　འགྲིམ་འགྲུལ་སྐྱེལ་འདྲེན་དང་།　ཁྲོམ་རའི་ལྟ་སྐུལ།　འཕྲལ་བསྟུན་དོ་དམ་སོགས་འབྲེལ་ཡོད་སྡེ་ཚན་གྱིས་ནུས་ཤུགས་ཡོད་རྒུས་དཔྱིད་གསར་སྐྱེལ་འདྲེན་འགན་ལེན་དང་། མཁོ་སྤྲོད་འགན་ལེན་དང་རིན་གོང་བརྟན་པོ་བྱས་ཏེ། དུས་ཆེན་ཁྲོམ་ར་བརྟན་རླིང་ངང་འཁོར་སྐྱོད་བྱེད་པ་དང་། མང་ཚོགས་ཀྱིས་དྲོད་སྐྱིད་དང་བདེ་འཇགས་ངང་དུས་ཆེན་རོལ་བའི་ལས་དོན་བྱེད་ཐབས་ལ་ཁག་ཐེག་བྱེད་དགོས།　རྒྱ་ཆེའི་ཏང་ཡོན་ལས་བྱེད་པས་གནོད་འཚེའི་དབང་གིས་དཀའ་ངལ་ཐེབས་པའི་མང་ཚོགས་དང་།　རྒན་ཉམས་ནད་པ་དང་དབང་པོ་སྐྱོན་ཅན་སོགས་དམིགས་བསལ་ཚོགས་སྤྱིར་དུས་ཐོག་ཏུ་རོགས་སྐྱོབ་དང་འཚམས་འདྲི་སོགས་ཀྱི་བྱེད་སྒོ་རྒྱ་ཁྱབ་ཏུ་སྤེལ་བའི་གནས་ཚུལ་བསྒྲགས་ནས།　ཏང་ཨུ་དང་སྲིད་གཞུང་རིམ་པ་ཁག་གིས་མང་ཚོགས་ལ་སེམས་ཁུར་དང་གཅེས་སྐྱོང་བྱེད་པ་དང་། དམངས་འཚོའི་མཐའ་ཚད་བརྟན་པོ་ཡོང་བར་བྱེད་པའི་བྱ་ཐབས་ནུས་ལྡན་སོགས་གཅིག་སྡུད་ཐོག་མངོན་པར་བྱེད་དགོས་པ་གསལ་བོར་བཏོན་ཡོད།

བརྡ་སྦྱོར་ནང་། ས་གནས་ཁག་གིས་དཔྱིད་གསར་དུས་ཆེན་ལ་དགའ་སྤྲོའི་ངང་ནས་རྟེན་འབྲེལ་ཞུ་བའི་རྣམ་པ་དྲིལ་བསྒྲགས་ཤུགས་ཆེན་བྱེད་དགོས།　ས་གནས་ཁག་གིས་དཔྱིད་གསར་དུས་ཆེན་གྱི་རིག་གནས་ཤུལ་བཞག་ཁྲོམ་རའི་མཁོ་སྤྲོད་ཕུན་སུམ་ཇེ་ཚོགས་སུ་གཏོང་བ་དང་།　ཁྱད་ཆོས་ལྡན་པའི་རིག་གནས་ཡུལ་སྐོར་ཐོན་ལས་འཕེལ་རྒྱས་གཏོང་བ།　གཟུགས་འདས་ཤུལ་བཞག་རིག་གནས་རྣམ་གྲངས་དང་སྲོལ་རྒྱུན་དུས་ཆེན་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བ།　སྣ་མང་ཕུན་སུམ་ཚོགས་པའི་མང་ཚོགས་རང་བཞིན་གྱི་བྱེད་སྒོ་དང་སྲོལ་རྒྱུན་དམངས་སྲོལ་གྱི་བྱེད་སྒོ་སྤེལ་བ།　ས་གནས་ཁག་གི་རྙིང་སྐྱེལ་གསར་བསུ་དང་མང་ཚོགས་ཀྱིས་གློག་ཞུ་དང་དར་གོས་འགེལ་བའི་འཁྲུག་ཆ་དོད་པའི་རྣམ་པ་འགྲེམས་སྟོན་བྱེད་པ་སོགས་ཀྱི་དྲོད་སྐྱིད་ཀྱི་རྣམ་པ་རྒྱུད་སྒྲོག་བྱེད་དགོས།　ཀྲུང་ཧྭ་མི་རིགས་ཀྱི་རྒན་པ་ལ་སྲི་ཞུ་དང་གཉེན་ཉེ་ལ་དགའ་ཞེན་གྱི་སྲོལ་རྒྱུན་སྤྱོད་བཟང་དང་། འཆམ་མཐུན་མཉམ་འཛོམས་ཀྱི་དཔྱིད་གསར་དུས་ཆེན་རིག་གནས་དྲིལ་བསྒྲགས་བྱས་ཏེ། ས་ཁོངས་ཀྱི་ཁྱད་ཆོས་དང་དུས་རབས་ཀྱི་ཉམས་འགྱུར་འབུར་དུ་ཐོན་པ་དང་།　ཀྲུང་ཧྭ་རིག་གནས་ཀྱི་སྣ་མང་རང་བཞིན་མངོན་པ།　དཔྱིད་གསར་དུས་ཆེན་གྱི་རིག་གནས་ཀྱི་ཡིད་དབང་འཕྲོག་ཤུགས་མངོན་པར་བྱེད་དགོས།　དཔྱིད་གསར་དུས་ཆེན་རིག་གནས་ཕྱི་ཕྱོགས་སུ་ཁྱབ་སྤེལ་བྱ་རྒྱུར་ཤུགས་སྣོན་བརྒྱབ་ནས། འཛམ་གླིང་ལ་དཔྱིད་གསར་དུས་ཆེན་རིག་གནས་ཀྱི་ཕུན་སུམ་ཚོགས་པའི་ནང་དོན་དང་རིན་ཐང་འདུ་ཤེས་གང་ལེགས་ཀྱིས་མངོན་པར་བྱེད་དགོས་པ་གསལ་བོར་བསྟན་ཡོད།

ཞིབ་ཕྲའི་བཀོད་སྒྲིག་ཐད། བརྡ་སྦྱོར་ནང2025ལོའི་ཟླ1པོའི་ཚེས14ཉིན་ནས་ཟླ2པའི་ཚེས12ཉིན་བར། ཀྲུང་དབྱང་དང་ཞིང་ཆེན་དང་རང་སྐྱོང་ལྗོངས། གྲོང་ཁྱེར་སོ་སོའི་གསར་འགྱུར་སྡེ་ཚན་གཙོ་བོས“ལོ་གསར་ལ་གཞི་རིམ་དུ་བསྐྱོད་པའི”ཆེད་བསྒྲིགས་ལེ་ཚན་གཅིག་གྱུར་གྱིས་སྒྲིག་འཛུགས་བྱས་ཏེ།　གཙོ་གནད་ཐོག“སྒུལ་ཤུགས་གསར་པར་བདེན་དཔང་བྱེད་པ”དང“རྟེན་འབྲེལ་ལས་གཞི་གསར་པ”།“གཞི་རིམ་གྱི་རྣམ་པ་གསར་པ”།“འབད་བརྩོན་བྱེད་མཁན་ལ་གུས་འདུད་ཞུ་བ”།“ཁྱིམ་ཚང་ཁྲི་སྟོང་ལ་དྲོད་སྐྱིད་སྐྱེལ་བ”།“དཔྱིད་གསར་སྐྱེལ་འདྲེན་ལམ་དུ་བརྩེ་དུང་གིས་ཁེངས་པ”།“རིག་གནས་ཀྲུང་གོའི་ལོ”སོགས་ཀྱི་རིམ་སྤེལ་གསར་འགྱུར་སྤེལ་ཏེ།　ཚེ་སྲོག་ལྡན་པ་དང་བརྩེ་དུང་གིས་ཕྱུག་པའི་ཕུལ་བྱུང་བརྩམས་ཆོས་འདོན་པ་དང།　གསར་འགྱུར་གསོན་ཉམས་ལྡན་པ་དང་ཕུན་སུམ་ཚོགས་པར་བྱས་ནས།　མང་ཚོགས་དང་བར་ཐག་ཇེ་ཐུང་དུ་བཏང་སྟེ།　ཁྱབ་སྤེལ་ནུས་ལྡན་མངོན་འགྱུར་བྱེད་དགོས། །