ཧན་ཀྲིན་གྱིས་དབྱིན་ཇིའི་ནོར་སྲིད་བློན་ཆེན་ལིས་ཧྥུའུ་སིར་མཇལ་འཕྲད་གནང་།

ཟླ1ཚེས11ཉིན། རྒྱལ་ཁབ་ཀྱི་ཀྲུའུ་ཞི་གཞོན་པ་ཧན་ཀྲིན་གྱིས་པེ་ཅིང་དུ་དབྱིན་ཇིའི་ནོར་སྲིད་བློན་ཆེན་ལིས་ཧྥུའུ་སིར་མཇལ་འཕྲད་གནང་།

ཧན་ཀྲིན་གྱིས་ཀྲུང་གོ་ཕྱོགས་ཀྱིས་ཀྲུང་གོ་དང་དབྱིན་ཇིའི་འབྲེལ་བ་འཕེལ་རྒྱས་གཏོང་རྒྱུར་མཐོང་ཆེན་ཚད་མཐོན་པོ་བྱེད་ཀྱིན་ཡོད། ད་ཐེངས་ཕྱོགས་གཉིས་ཀས་ཀྲུང་གོ་དང་དབྱིན་ཇིའི་དཔལ་འབྱོར་དང་ནོར་སྲིད་ཐད་ཀྱི་གྲོས་མོལ་ཡང་བསྐྱར་མགོ་བརྩམས་པ་དེ་ནི། ཀྲུའུ་ཞི་ཞི་ཅིན་ཕིང་དང་དབུ་བཞུགས་བློན་ཆེན་སི་ཐཱ་མོ་གཉིས་མཇལ་འཕྲད་བྱས་པ་ལས་བྱུང་བའི་ངོས་འཛིན་གལ་ཆེན་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ཅིག་ཡིན། ཀྲུང་གོ་དང་དབྱིན་ཇི་གཉིས་ནི་འཛམ་གླིང་གི་དཔལ་འབྱོར་དངོས་ཕུང་གཙོ་བོ་དང་དངུལ་རྩའི་རྒྱལ་ཁབ་ཆེན་པོ་ཡིན་པའི་དབང་གིས། ཕྱོགས་གཉིས་ཀས་འཐབ་ཇུས་རོགས་རེས་ཀྱི་ངེས་གནས་རྒྱུན་འཁྱོངས་བྱས་ནས་དཔལ་འབྱོར་དང་དངུལ་རྩའི་མཉམ་ལས་ལ་ཤུགས་བསྣན་ན། རྒྱལ་ཁབ་གཉིས་ཀྱི་དཔལ་འབྱོར་འཕར་སྣོན་དང་དམངས་ཚིས་ལེགས་བཅོས། ལྗང་མདོག་འཕེལ་རྒྱས་བཅས་ལ་སྐུལ་འདེད་གཏོང་བར་དོན་སྙིང་གལ་ཆེན་ལྡན་ལ། འཛམ་གླིང་གི་དཔལ་འབྱོར་འཕེལ་རྒྱས་ལ་ཡིད་ཆེས་དང་སྒུལ་ཤུགས་ཀྱང་སྣོན་ཐུབ། ཀྲུང་གོ་དང་དབྱིན་ཇིའི་དཔལ་འབྱོར་ཚོང་དོན་མཉམ་ལས་ཟབ་ཅིང་རྒྱ་ཆེ་ལ་མདུན་ལམ་རྒྱ་ཆེན་པོ་ཡོད། ཀྲུང་གོ་ཕྱོགས་ཀྱིས་དབྱིན་ཇི་ཕྱོགས་དང་མཉམ་དུ་མུ་མཐུད་སྒོ་འབྱེད་བརྗེ་རེས་རྒྱ་སྐྱེད་གཏོང་བ་དང་། ཕན་ཚུན་བར་བསམ་ཤེས་དང་ཕན་ཚུན་བར་གྱི་ཡིད་ཆེས་ཇེ་བརྟན་དུ་གཏོང་བ། གཉིས་ཕན་མཉམ་ལས་ཟབ་སྤེལ་གཏོང་བ་བཅས་བྱས་ནས། རྒྱལ་ཁབ་གཉིས་ཀར་བདེ་སྐྱིད་དང་འཛམ་གླིང་ལ་ཕན་པ་དངོས་སྟེར་རྒྱུ་ཡིན་ཞེས་གསུངས།

ལིས་ཧྥུའུ་སི་ཡིས་དབྱིན་ཇི་དང་ཀྲུང་གོས་ལོ་ངོ་དྲུག་གི་རྗེས་སུ་ཡང་བསྐྱར་དཔལ་འབྱོར་དང་ནོར་སྲིད་སྐོར་ནས་གྲོས་མོལ་སླར་གསོ་བྱས་པར་དོན་སྙིང་གལ་ཆེན་ལྡན། དབྱིན་ཇི་ཕྱོགས་ཀྱིས་ཀྲུང་གོའི་བར་གྱི་འབྲེལ་བ་འཕེལ་རྒྱས་གཏོང་རྒྱུར་མཐོང་ཆེན་བྱེད་ཀྱིན་ཡོད་ཅིང་། ཁྱད་པར་དུ་ཀྲུང་གོའི་བར་ལྷག་བསམ་ཟོལ་མེད་ཀྱི་སྒོ་ནས་གྲོས་མོལ་དང་གཉིས་ཕན་མཉམ་ལས་ལ་ཤུགས་བསྣན་ནས། རང་སོ་སོའི་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་འདོད་ཡོད་ཅེས་བསྟན།