ཀྲུའུ་ཞི་ཞི་ཅིན་ཕིང་གི2025ལོའི་ལོ་གསར་ཤིས་ཚིག་ལ་དམག་དཔུང་ཡོངས་ཀྱི་དཔུང་སྡེའི་ཁྲོད་ཚུར་སྣང་དྲག་པོ་བྱུང་།

ལོ་གསར་སླེབས་ལ་ཉེ་བའི་སྐབས་སུ། ཀྲུའུ་ཞི་ཞི་ཅིན་ཕིང་གིས2025ལོའི་ལོ་གསར་ཤིས་ཚིག་སྤེལ་བ་དང་། བཅིངས་འགྲོལ་དམག་དང་དྲག་ཆས་ཉེན་རྟོག་དཔུང་སྡེའི་ཁྲོད་ཚུར་སྣང་དྲག་པོ་བྱུང་། རྒྱ་ཆེའི་དཔོན་དམག་གིས་བསྟན་དོན། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་སྔར་ལས་དམ་ཟབ་བྱས་ཏེ། ཆབ་སྲིད་ཀྱི་སྣེ་ཁྲིད་རྒྱུན་འཁྱོངས་དང་འགན་འཁྲི་ཁུར་ཤུགས་ཆེ་རུ་གཏོང་བ། ཉིན་མཚན་དབྱེར་མེད་དུ་འབད་བརྩོན་བྱེད་པ། བློ་བརྟན་འགྱུར་མེད་ངང་འབད་འཐབ་བྱེད་པ། དམག་དཔུང་བཙུགས་ནས་ལོ་ངོ་བརྒྱའི་རིང་གི་འབད་འཐབ་དམིགས་འབེན་མངོན་འགྱུར་བྱེད་པར་འབད་བརྩོན་བྱེད་པ། མི་དམངས་དམག་དཔུང་དེ་འཛམ་གླིང་གི་དམག་དཔུང་རྩེ་གྲ་ཞིག་ཏུ་འཛུགས་སྐྲུན་བྱེད་ཚད་ཇེ་མགྱོགས་སུ་བཏང་སྟེ། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་རླབས་ཆེན་བྱ་གཞག་ལ་ཕྱོགས་ཡོངས་ནས་སྐུལ་འདེད་གཏོང་བར་འཐབ་ཇུས་ཀྱི་འདེགས་སྐྱོར་བརྟན་པོ་འདོན་སྤྲོད་བྱ་དགོས།

ཉིན་འདི་དག་གི་རིང་ལ། དམག་ཡོངས་ཀྱི་དཔུང་སྡེ་ཡིས་དཔོན་དམག་རྩ་འཛུགས་བྱས་ནས་རླུང་འཕྲིན་དང་།བརྙན་འཕྲིན། དྲ་རྒྱ་སོགས་བརྒྱུད་དེ་ཀྲུའུ་ཞི་ཞི་ཅིན་ཕིང་གི་ལོ་གསར་ཤིས་ཚིག་ལ་ནན་ཏན་གྱིས་ཉན་པ་དང་ལྟ་བཞིན་ཡོད། མཚོ་དམག་དང་མཁའ་དམག་གིས་ལོ75ལ་སླེབས་པའི་སྐྱེས་སྐར་ལ་རྟེན་འབྲེལ་ཞུས་པ་དང་། མི་དམངས་ཀྱི་བུ་སྤུན་དམག་གི་རྣམ་པ་གསར་པ་མངོན་ལ། ཀྲུའུ་ཞི་ཞི་ཅིན་ཕིང་གི་ལོ་གསར་ཤིས་ཚིག་གིས་མི་སེམས་ལ་དྲོད་སྐྱིད་ལྡན་པར་བྱས་པ་དང་། མི་རྣམས་ལ་འབད་བརྩོན་བྱེད་པར་སྐུལ་མ་གཏོང་ཐུབ། དཔོན་དམག་ཚོས་བསྟན་དོན། མངགས་བཅོལ་སྟོང་ཟད་དུ་མི་གཏོང་བར་མུ་མཐུད་དུ་འབད་འཐབ་བྱེད་ངེས་ཡིན་ཟེར།

འབད་འཐབ་བྱས་ནས་འབྱུང་འགྱུར་གསར་གཏོད་བྱེད། དམག་དཔུང་སྟོབས་ལྡན་གཏོང་བའི་འགན་འཁྲི་ཕྲག་ཏུ་འཁུར། དུས་བཀག་ལྟར་དམག་དཔུང་བཙུགས་ནས་ལོ་བརྒྱའི་རིང་གི་འབད་འཐབ་དམིགས་འབེན་མངོན་འགྱུར་བྱ་རྒྱུ་ནི་མི་དམངས་དམག་དཔུང་གིས་ངེས་པར་དུ་འཁུར་དགོས་པའི་དུས་རབས་ཀྱི་ལས་འགན་ལྕི་མོ་དང་འབུལ་དགོས་པའི་ལོ་རྒྱུས་ཀྱི་རྒྱུགས་ལན་ཞིག་ཡིན་པས། ངེས་པར་དུ་ནུས་ཤུགས་གང་ཡོད་བཏོན་ནས་དུས་ལྟར་ངེས་པར་དུ་འགྲུབ་པར་བྱ་དགོས། ཤར་ལྷོའི་མཚོ་རྒྱུད་ཀྱི་སྦྱོང་བརྡར་འཐབ་ས་དང་པོ་ནས་ནུབ་བྱང་བྱེ་ཐང་ཆེན་མོའི་ཕྱི་རོལ་གྱི་སྦྱོང་བརྡར་ར་བའི་བར་དང་། མཐའ་སྲུང་སོ་ལྟ་ཁང་ནས་རྒྱང་རིང་རྒྱ་མཚོའི་སྲུང་སྐྱེལ་དཔུང་སྡེའི་བར་ཀྲུའུ་ཞི་ཞི་ཅིན་ཕིང་གི་གསུང་བཤད་སློབ་སྦྱོང་བྱས་པས། དཔོན་དམག་རྣམས་ལ་རང་གི་ལས་འགན་གཟི་བརྗིད་ལྡན་པ་དང་འགན་འཁྲི་ལྗིད་མོ་ཕྲག་ཏུ་འཁུར་ཡོད་པའི་ཚོར་སྣང་དྲག་པོ་སྐྱེས།