ལོ་སར་ཟློས་གར་དགོང་ཚོགས་པེ་ཅིང་དུ་འཚོགས།

2025ལོའི་ལོ་སར་ཟློས་གར་དགོང་ཚོགས་ཚེས30ཉིན་གྱི་དགོང་མོ་རྒྱལ་ཁབ་ཟློས་གར་ཁང་ཆེན་མོ་རུ་འཚོགས། ཏང་དང་རྒྱལ་ཁབ་ཀྱི་འགོ་ཁྲིད་པ་ཞི་ཅིན་ཕིང་དང་ལིས་ཆང་། ཀྲའོ་ལི་ཅི། ཝང་ཧུའུ་ཉིང་། ཚའེ་ཆི། ཏེན་ཞུའེ་ཞང་། ལིས་ཞི། ཧན་ཀྲིན་སོགས་ཀྱིས་རྒྱལ་སའི་ལས་རིགས་སོ་སོའི་མང་ཚོགས་དང་མཉམ་དུ་འཁྲབ་སྟོན་ལ་བལྟས་ཏེ་ལོ་གསར་ཚེས་པར་དགའ་བསུ་ཞུས།

མཚན་མོའི་རྒྱལ་ཁབ་ཟློས་གར་ཁང་ཆེན་མོའི་གློག་སྒྲོན་འོད་དུ་འཚེར་བ་དང་ཟློས་གར་ཁང་གི་ནང་དུ་སྤྲོ་སེམས་འཁོལ་བའི་རྣམ་པས་ཁེངས།  དགོང་མོའི་དུས་ཚོད་བདུན་དང་སྐར་མ་ཞེ་ལྔའི་སྟེང་དུ། ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པ་དགོང་ཚོགས་ཀྱི་ཡུལ་དངོས་སུ་ཕེབས་ནས། འཁྲབ་སྟོན་ལ་ལྟ་བར་ཕེབས་པའི་ཟློས་གར་ལས་རིགས་ཀྱི་སྒྱུ་རྩལ་པའི་འཐུས་མིར་བྱམས་བརྩེའི་ངང་ཕྱག་འཇུ་གནང་ནས་འཚམས་འདྲི་གནང་བར་བརྟེན། ཚོགས་ར་ཡོངས་སུ་སྤྲོ་སེམས་འཁོལ་བའི་ཐལ་མོའི་རྡེབ་སྒྲ་མཆེད།

དགའ་སྤྲོའི་ཡོ་ལང་རབ་ཏུ་རྒོད་པའི《མེ་ཏོག་སྣ་བརྒྱ་བཞད་པའི་ལྡུམ་རའི་ནང་ནས་ལོ་སར་བསུ།》ཞེས་པའི་དབྱངས་འགྲོས་ཀྱི་ཁྲོད་ནས་དགོང་ཚོགས་ཧྲིལ་པོ་དངོས་སུ་འགོ་བརྩམས། 《པེ་ཅིང་གི་ཟློས་གར་གྲུབ་མཐའ་འགྲེམས་སྟོན།》ཞེས་པ་ནི་ཡིད་དབང་འཕྲོག་པའི་མཉམ་ལེན་གྱི་རྣམ་པར་བརྟེན་ནས་པེ་ཅིང་ཟློས་གར་གྱི་སྒྱུ་རྩལ་གྱི་རང་མདངས་མངོན་པར་བསྟན། པེ་ཅིང་གི་ཟློས་གར《ཆིན་ཞང་ལེན།》དང་ཁོང་མེན་གྱི་ཟློས་གར《ནུབ་ཕྱོགས་ཀྱི་ཟིན་ཐོ།》དཔྱད་འཇོག་ཟློས་གར《ལིའུ་ཆའོ་ཨར།》ཧོང་མེ་ཟློས་གར《ལྷའི་མཐུན་སྡེབ།》སོགས་ལས་ཚན་པ་རེ་བདམས་ནས་ལྟད་མོ་བའི་སྣེ་ཁྲིད་དེ། གསུང་རབ་གཏམ་རྒྱུད་ཀྱི་ཁྲོད་ནས་ཕུལ་བྱུང་སྲོལ་རྒྱུན་སྒྱུ་རྩལ་གྱི་ཡིད་དབང་འཕྲོག་ཤུགས་ཚོར་བར་བྱས། པེ་ཅིང་གི་ཟློས་གར《ཧྲ་ཅཱ་པེན·ཀྲི་ཏུའུ།》དང《དབྱང་ཚང་གི་བུད་མེད་དམག་དཔོན།》ཞེས་པ་ལས་ཚན་པ་འགའ་བདམས་ནས་དཔའ་བོ་མི་སྣས་ཁྱིམ་ཚང་དང་རྒྱལ་ཁབ་ལ་བཅངས་པའི་བརྩེ་དུང་གསོན་ཉམས་ལྡན་པའི་ངང་མཚོན་པར་བྱས། པེ་ཅིང་གི་ཟློས་གར《མེན་ཧྥང་ལའེ·ཁ་བྲལ་མི་འདུག》དང《རི་སྐྱེས་མེ་ཏོག་རྣམ་པར་བཞད། མི་རིགས་ས་ཁུལ་གྱི་ཟློས་གར་ཚན་འདེམས།》ཞེས་པའི་ནང་གནའ་བོའི་ཟློས་གར་གྱི་རིགས་ལ་བརྟེན་ནས་དེང་རབས་ཀྱི་བརྗོད་བྱ་འཁྲབ་སྟོན་བྱས་ནས། དུས་རབས་ཀྱི་ཉམས་འགྱུར་གསོན་ཉམས་ལྡན་པའི་ངང་བསྟན་པ་དང་མི་རིགས་ཀྱི་ཡུལ་སྲོལ་གོམས་གཤིས་སྣ་མང་མིག་གི་དགའ་སྟོན་དུ་བཤམས། པེ་ཅིང་དང་ཁོང་མེན་གྱི་བྱིས་པའི་འཁྲབ་སྟོན་གྱིས་བྱང་ཆ་དོད་པའི་འཁྲབ་སྟོན་ལ་བརྟེན་ནས་ཟློས་གར་སྒྱུ་རྩལ་རྒྱུན་འཛིན་བྱེད་པའི་ དགའ་འོས་པའི་སྣང་ཚུལ་མངོན་པར་བྱས། ངར་ཤུགས་རྫོགས་པའི་ཟློས་གར་གླུ་གཞས《དཔྱིད་སྟོན་གྱི་བྲག་ཅ།》ཞེས་པས་དགོང་ཚོགས་ཀྱི་རྣམ་པ་མཐོ་རླབས་སུ་འཕེལ་བར་བྱས་ཏེ། རྒྱ་ཆེའི་རིག་རྩལ་ལས་བྱེད་པས་ཞི་ཅིན་ཕིང་གི་རིག་གནས་དགོངས་པ་སྣེ་ཁྲིད་དུ་འཛིན་རྒྱུ་རྒྱུན་འཁྱོངས་བྱས་ཏེ། དུས་རབས་གསར་པའི་རིག་རྩལ་བྱ་གཞག་དར་རྒྱས་གོང་འཕེལ་ཡོང་བར་སྐུལ་འདེད་གང་ལེགས་བཏང་ནས། སྤྱི་ཚོགས་རིང་ལུགས་ཀྱི་རིག་གནས་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པའི་ལས་འགན་དོན་གཉེར་ཁྲོད་འབད་པས་ཞུགས་པ་གང་ལེགས་སྒོས་མཚོན་ཡོད། སྒྱུ་རྩལ་པ་དག་གི་ཕུལ་དུ་བྱུང་བའི་འཁྲབ་སྟོན་ལ་དགའ་བསུ་ཆེན་པོ་ཐོབ།

དགོང་ཚོགས་ཧྲིལ་པོར་ཟློས་གར་རིགས་མི་འདྲ་བའི་བཀྲག་མདངས་ལམ་ལམ་འཚེར་ཏེ། ཕུལ་བྱུང་ཟློས་གར་དང་གསར་རྩོམ་ཟློས་གར་གྱི་ཁྱད་ཡོན་རྫོགས་པར་བསྟན་ནས། ཀྲུང་ཧྭའི་ཟློས་གར་གྱི་གསོན་སྟོབས་ཀྱིས་ཁེངས་པའི་དར་རྒྱས་ཀྱི་རྣམ་པ་མངོན་པར་མཚོན་ཐུབ་ཡོད་ལ། སེམས་ནུས་གཅིག་སྒྲིལ་གྱིས་ཕུགས་འདུན་དོན་གཉེར་བྱེད་པའི་འབད་བརྩོན་གྱི་རྒྱལ་ཁ་ཐོབ་པའི་གླུ་དབྱངས་གསང་མཐོར་ལེན་བཞིན་པ་གང་ལེགས་སྒོས་མཚོན་ཡོད།

ཏང་དང་རྒྱལ་ཁབ་ཀྱི་འབྲེལ་ཡོད་འགོ་ཁྲིད་བློ་མཐུན་དང་འབྲེལ་ཡོད་སྡེ་ཁག་གི་འགན་འཁུར་བློ་མཐུན་རྣམས་ཀྱིས་འཁྲབ་སྟོན་ལ་གཟིགས།