རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གཉིས་པ་གྲོལ།

རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གཉིས་པ་ཚེས30ཉིན་ཧའེ་ནན་ཞིང་ཆེན་སན་ཡ་གྲོང་ཁྱེར་དུ་གྲོལ། རྒྱལ་སྲིད་ཨུ་ཡོན་ཧྲིན་དབྱི་ཆིན་འགྲན་ཚོགས་གྲོལ་བའི་མཛད་སྒོར་ཞུགས་ཏེ་ལུས་རྩལ་འགྲན་ཚོགས་དངོས་སུ་གྲོལ་བ་ཁྱབ་བསྒྲགས་བྱས།

དགོང་མོའི་དུས་ཚོད་བརྒྱད་ཀྱི་སྟེང་དུ། རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གཉིས་པའི་གྲོལ་བའི་མཛད་སྒོ་སན་ཡ་གྲོང་ཁྱེར་གྱི་ལུས་རྩལ་ལྟེ་གནས་སུ་འཚོགས། རྒྱལ་ཡོངས་ཀྱི་ས་གནས་སོ་སོ་ནས་ཡོང་བའི་མི་རིགས་ཁག་གི་ལུས་རྩལ་པ་དང་རྩལ་ཁྲིད་པ། སྐུ་མགྲོན་བཅས་ཀྱིས་སྤྲོ་སྣང་ཆེ་བ་དང་འཆམ་མཐུན་གྱི་རྣམ་པའི་ངོས་ནས་སྐབས་འདིའི་ལུས་རྩལ་འགྲན་ཚོགས་རྒྱལ་ཁའི་ངང་གྲོལ་བར་རྟེན་འབྲེལ་ཞུས། འགྲན་ཚོགས་གྲོལ་བའི་མཛད་སྒོར་ཀྲུང་དབྱང་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ། རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་གི་ཀྲུའུ་རིན་ཕན་ཡུའེ་ཡིས་འགོ་འཛིན་བྱས་པ་དང་། རྒྱལ་ཁབ་ལུས་རྩལ་སྤྱི་ཁྱབ་ཅུའུ་ཡི་ཅུའུ་ཀྲང་ཀའོ་ཀྲི་ཏན་གྱིས་འགྲན་ཚོགས་གྲོལ་བའི་མཛད་སྒོར་ཤིས་ཚིག་ཕུལ།

འཐུས་ཚབ་ཚོགས་པ་སོ་སོ་ལུས་རྩལ་ཐང་དུ་འཛུལ་རྗེས། ཚོགས་ཆེན་གྱིས་རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གཉིས་པའི“ལུས་རྩལ་ཀུན་སྤྱོད་དར་སྲོལ་བྱ་དགའ”ཐོབ་པའི་འཐུས་ཚབ་ཚོགས་པའི་མིང་ཐོ་སྒྲོག་འདོན་བྱས། མི་རིགས56གི་འཐུས་མིས་ལུས་རྩལ་འགྲན་ཚོགས་ལ་ཞབས་འདེགས་ཞུ་མཁན་དང་བླངས་པའི་འཐུས་མིར་མེ་ཏོག་ཕུལ།

འགྲན་ཚོགས་གྲོལ་བའི་མཛད་སྒོའི་སྟེང་ད་དུང་རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་ཀྱི་ཚོགས་དར་སྤྲོད་ལེན་གྱི་མཛད་སྒོ་སྤེལ། རྒྱལ་ཡོངས་གྲངས་ཉུང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་བཅུ་གསུམ་པ2027ལོར་ཧུའུ་ནན་ཞིང་ཆེན་དུ་འཚོགས་རྒྱུ་གཏན་འཁེལ་བྱས།  དེའི་རྗེས“བསམ་པའི་ཁྱིམ་གཞིས་མཉམ་དུ་སྐྲུན”ཞེས་པ་བརྗོད་གཞི་ཡིན་པའི་རིག་རྩལ་འཁྲབ་སྟོན་བྱས།

སྐབས་འདིའི་ལུས་རྩལ་འགྲན་ཚོགས་ལ་རྒྱལ་ཡོངས་ཀྱི་ཞིང་ཆེན་དང་རང་སྐྱོང་ལྗོངས། ཐད་གཏོགས་གྲོང་ཁྱེར་སོ་སོ་དང་ཞིན་ཅང་ཐོན་སྐྱེད་འཛུགས་སྐྲུན་དམག་སྡེ་བཅས་ཀྱི་འཐུས་ཚབ་ཚོགས་པ། ཞང་ཀང་དམིགས་བསལ་སྲིད་འཛིན་ཁུལ་དང་ཨའོ་མིན་དམིགས་བསལ་སྲིད་འཛིན་ཁུལ་གྱི་འཐུས་ཚབ་ཚོགས་པ། ཐའེ་ཝན་གྲངས་ཉུང་མི་རིགས་ཀྱི་འཐུས་ཚབ་ཚོགས་པ་བཅས་ཀྱི་ལུས་རྩལ་པ6960འགྲན་བསྡུར་རྣམ་གྲངས་18དང་འཁྲབ་སྟོན་རྣམ་གྲངས3ཁྲོད་ཞུགས་པ་དང་། རྒྱལ་ནང་གི་ཕྱོགས་བསྡུས་རང་བཞིན་གྱི་ལུས་རྩལ་འགྲན་སྡུར་ཁྲོད་ས་ཁུལ་སོ་སོའི་འཐུས་ཚབ་ཚོགས་པ་ཐོག་དང་པོར་མཉམ་འཛོམས་ཆེན་པོ་བྱུང་།