ཀྲུང་དབྱང་གིས་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཀྱིས་ཞིང་ཆེན་གསུམ་གྱི་དཔེ་མཚོན་གྱོད་དཔེ་བརྡ་ཁྱབ་བཏང་བ།

ཀྲུང་དབྱང་གིས་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ཀྱིས་ཞིང་ཆེན་གསུམ་གྱི་དཔེ་མཚོན་གྱོད་དཔེ་བརྡ་ཁྱབ་བཏང་བ།

རེས་སྐོར་གསུམ་པའི་ཁག་གསུམ་པའི་ཀྲུང་དབྱང་གི་སྐྱེ་ཁམས་ཁོར་ཡུག་སྲུང་སྐྱོང་ལྟ་ཞིབ་ལས་དོན་དངོས་སུ་སྤེལ་བཞིན་ཡོད་པ་དང་།　ཚེས14ཉིན་ཨན་ཧུའེ་དང་སི་ཁྲོན།　ཀུའེ་ཀྲོའུ་བཅས་ཞིང་ཆེན་གསུམ་གྱི་སྐྱེ་ཁམས་གཏོར་བཤིག་ཕོག་པ་སོགས་ཀྱི་གནད་དོན་བརྡ་ཁྱབ་བཏང་།

ལྟ་ཞིབ་ཚོགས་ཆུང་གིས་བསྟན་དོན། ཨན་ཧུའེ་ཞིང་ཆེན་འབྲི་ཆུའི་ཆུ་གཞུང་གི་འགྲམ་ངོགས་སྤྱི་ལེ་གཅིག་གི་ཁྱབ་ཁོངས་སུ་ཁྲིམས་འགལ་སྒྲིག་འགལ་གྱི་འཛུགས་སྐྲུན་བྱ་སྤྱོད་གནས་ཡོད།　འབྲི་ཆུ་སྲུང་སྐྱོང་བཅའ་ཁྲིམས་ལག་བསྟར་བྱས་ཚུན་ཨན་ཆིང་གྲོང་ཁྱེར་གྱིས་ད་དུང་འབྲི་ཆུའི་ཆུ་གཞུང་འགྲམ་རྒྱུད་ཀྱི་སྤྱི་ལེ་གཅིག་གི་ཁྱབ་ཁོངས་ནང་རྫས་འགྱུར་བཟོ་ལས་རྣམ་གྲངས་གསར་སྐྲུན་བྱས་པར་ཉེན་ཁ་དང་མི་མངོན་པའི་རྐྱེན་ངན་མངོན་གསལ་དོད་པོ་ཡོད་པ་རེད།　2021ལོ་ནས་བཟུང་ཁྲེ་ཀྲོའུ་གྲོང་ཁྱེར་ཤར་ངོས་ཀྱི་དཔལ་འབྱོར་གསར་སྤེལ་ཁུལ་གྱིས་འབྲི་ཆུའི་ཆུ་གཞུང་འགྲམ་རྒྱུད་ཀྱི་སྤྱི་ལེ་གཅིག་གི་ཁྱབ་ཁོངས་སུ་རྫས་འགྱུར་བཟོ་ལས་རྣམ་གྲངས་གསར་སྐྲུན་བྱས་པ་རེད།　དེ་དང་ཆབས་ཅིག ཨན་ཧུའེ་ཀྲུང་ཤིན་གྲུ་གཟིངས་ལས་གྲྭ་ཚད་ཡོད་ཀུང་སིའི་གྲུ་གཟིངས་བཟོ་སྐྲུན་རྟེན་གཞིས་འབྲི་ཆུའི་འགྲམ་རྒྱུད་སོར་འཇོག་ཁུལ་གྱི་མུའུ18སྒྲིག་འགལ་ངང་སྤྱད་དེ་གྲུ་གཟིངས་ཉམས་བཟོ་བྱས་པ་རེད།　2021ལོའི་ཟླ1པོར་ཨན་ཧུའེ་ཞིང་ཆེན་གྱིས་ཨན་ཆིང་ཆུ་ཕག་ཞིང་ཆེན་རིམ་པའི་རང་བྱུང་སྲུང་སྐྱོང་ཁུལ་འཛུགས་རྒྱུའི་ཆོག་མཆན་སྤྲད་རྗེས།　ཁེ་ལས་དེས་སྒྲིག་འགལ་ངང་བཟུང་བའི་འགྲམ་རྒྱུད་དང་གཙང་འགྲམ་དེ་སྲུང་སྐྱོང་ཁུལ་གྱི་ལྟེ་བའི་ཁུལ་དུ་གཏོགས་མོད།　འོན་ཀྱང་ཁེ་ལས་ཀྱིས་ཁྲིམས་འགལ་སྒྲིག་འགལ་ངང་སྲུང་སྐྱོང་ཁུལ་གྱི་ལྟེ་བའི་ཁུལ་བཟུང་བའི་གནད་དོན་ས་གནས་དེ་གས་ཐག་གཅོད་བྱས་མེད་པ་རེད།　གྲུ་གཟིངས་ཉམས་གསོ་ཁེ་ལས་ཁག་གཅིག་གིས་ཁྲིམས་འགལ་ངང་འབྲི་ཆུའི་གཞུང་རྒྱུན་ལ་བཙོག་འབུད་བྱེད་ཀྱིན་ཡོད།

ལྟ་ཞིབ་ཚོགས་ཆུང་གིས་སི་ཁྲོན་ཞིང་ཆེན་དུ་འབྲི་ཆུའི་ཆུ་ལག་ཆུ་ལམ་དང་དེ་བཞིན་ངོགས་རྒྱུད་ལ་བཙན་བཟུང་དང་གཏོར་བཤིག་ཕོག་པ་ཤེས་རྟོགས་བྱུང་བ་རེད།　ཀོང་ཡོན་གྲོང་ཁྱེར་ཚང་ཤིས་རྫོང་གིས་པའེ་ལི་ཁུལ་གསར་གྱི་ཆུ་ལམ་ཕྱོགས་བསྡུས་བཅོས་སྐྱོང་ལས་གྲྭ་ལག་བསྟར་བྱེད་རིང་སྒྲིག་འགལ་ངང་ཅ་ལིང་གཙང་པོའི་ཆུ་ལམ་དོ་དམ་ཁྱབ་ཁོངས་ནང་གི་ཆུ་ལམ་གྲམ་ཐང་མུའུ971.6གྲོང་ཁྱེར་དང་གྲོང་རྡལ་གྱི་གསར་སྤེལ་འཛུགས་སྐྲུན་ཁྱབ་ཁོངས་ནང་བཅུག་པ་དེའི་ནང་ནས་མུའུ340.6བཟོ་ལས་ས་ཆར་འཆར་འགོད་བྱས་པ་དང་། མིག་སྔར་མུའུ49.7རྣམ་གྲངས་འཛུགས་སྐྲུན་ཐད་སྤྱད་ཡོད་པ་རེད།　དེ་དང་ཆབས་ཅིག རྩ་ཆེའི་ཉ་རིགས་རང་བྱུང་སྲུང་སྐྱོང་ཁུལ་གྱི་གནད་དོན་མངོན་གསལ་དོད་པོ་ཡོད་པ་རེད།　གཡག་རྔ་གྲོང་ཁྱེར་ཅིའུ་ལུང་ཆུ་མཛོད་ནི་ཀྲོའུ་ཀུང་གཙང་པོའི་རྩ་ཆེའི་ཉ་རིགས་ཀྱི་ཞིང་ཆེན་རིམ་པའི་རང་བྱུང་སྲུང་སྐྱོང་ཁུལ་གྱི་ཚོད་ལྟ་ཁུལ་དུ་གནས་པ་དང་།　2024ལོའི་ཟླ3པ་ནས་ཟླ4པའི་ནང་ཆུ་མཛོད་ཀྱི་སྐྱེ་ཁམས་བཞུར་ཚད་ཀྱིས་སྨད་རྒྱུད་ཀྱི་ཆུ་སྐྱེས་སྐྱེ་དངོས་དང་ལྷག་པར་དུ་རྩ་ཆེའི་ཉ་རིགས་ཀྱི་འཚོ་གནས་དགོས་མཁོ་སྐོང་ཐུབ་ཀྱིན་མེད་པ་རེད།

ལྟ་ཞིབ་ཚོགས་ཆུང་གིས་བསྟན་དོན། ཀུའེ་ཀྲོའུ་ཞིང་ཆེན་ཨན་ཧྲུན་གྲོང་ཁྱེར་དང་།　ཀུའེ་ཀྲོའུ་ལྷོ་ནུབ་ཁུལ།　ཀུའེ་ཀྲོའུ་ཤར་ལྷོ་ཁུལ་སོགས་ཀྱི་གཏེར་རི་གོ་རིམ་མེད་པར་གསར་སྤེལ་བྱས་ནས། ཁྲིམས་འགལ་ངང་ནགས་ས་བཙན་བཟུང་བྱས་ཏེ། སྐྱེ་ཁམས་ལ་གཏོར་བཤིག་གཏོང་བའི་གནད་དོན་ཚབས་ཆེན་ཐོན་ཡོད།　ཨན་ཧྲུན་གྲོང་ཁྱེར་ཙེ་ཡུན་རྫོང་ཀྲུང་ཧྲུན་རྡོ་རྒྱུ་གསར་སྤེལ་ཚད་ཡོད་ཀུང་སིས2021ལོའི་ཟླ4པར་ས་ཆུ་སྲུང་འཛིན་ཇུས་གཞིའི་མཆན་འགོད་བཀའ་ལན་དང་ནགས་ས་བེད་སྤྱོད་ཀྱི་འགྲོ་ལུགས་མ་ཐོབ་པའི་གནས་ཚུལ་འོག་འཛུགས་སྐྲུན་བྱེད་མགོ་ཚུགས་པ་དང་། དུས་ཡུན་རིང་པོའི་ནང་ཁྲིམས་འགལ་གྱིས་སྔོག་འདོན་བྱས་ཡོད་པ་རེད།　ཀུང་སི་དེའི་གཏེར་ཁུལ་གྱིས་ད་དུང་ཁྲིམས་འགལ་ངང་ནགས་ས་མུའུ349བཟུང་སྤྱོད་བྱས་པའི་ནང་མུའུ92འགོག་སྲུང་ནགས་ཚལ་རེད།　ཙེ་ཡུན་རྫོང་ཧོ་ཚའེ་འཛུགས་སྐྲུན་རྒྱུ་ཆ་ཚད་ཡོད་ཀུང་སིས་ནགས་ས་མུའུ114ཁྲིམས་འགལ་ངང་བཙན་བཟུང་བྱས་ཡོད།　ཀུའེ་ཀྲོའུ་ལྷོ་ནུབ་ཁུལ་ཨན་ལུང་རྫོང་གསེར་ཀུང་སི་ཧའེ་ཙེ་གསེར་གཏེར་ལ་ནགས་ས་མུའུ752བཟུང་སྤྱོད་བྱ་རྒྱུའི་ཆོག་མཆན་ཐོབ་པ་དང་། དོན་དངོས་ཐོག་མུའུ818བཟུང་སྤྱོད་བྱས་ཡོད།　དུས་མཚུངས་སུ་གཏེར་འདོན་ཁེ་ལས་མང་པོ་ཞིག་གིས་སྦགས་བཙོག་འགོག་བཅོས་བྱ་ཐབས་གནད་ལ་མ་འཁེལ་བར་ཁོར་ཡུག་སྦགས་བཙོག་ཚབས་ཆེན་བཟོས་ཡོད།

ལྟ་ཞིབ་ཚོགས་ཆུང་གིས་འབྲེལ་ཡོད་གནས་ཚུལ་སྔར་བས་བརྟག་དཔྱད་ཞིབ་བསྡུར་བྱ་རྒྱུ་དང་འབྲེལ་བླང་བྱ་གཞིར་བཟུང་རྗེས་མཐུད་ཀྱི་ལྟ་ཞིབ་ལས་དོན་ཡག་པོ་བསྒྲུབ་རྒྱུ་ཡིན་པར་བསྟན།