ཏིན་ཞུའེ་ཞང་གིས་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལེ་སི་ལ་ཐུག་འཕྲད་བྱས།

ཟླ11པའི་ཚེས13ཉིན།　ཀྲུའུ་ཞི་ཞི་ཅིན་ཕིང་གི་དམིགས་བསལ་སྐུ་ཚབ་བམ་ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན།　རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏིན་ཞུའེ་ཞང་གིས་ཨ་སེ་པའེ་ཅང་གི་རྒྱལ་ས་པ་ཁུའུ་རུ་འཛམ་གླིང་གི་འགོ་ཁྲིད་པའི་གནམ་གཤིས་འགུལ་སྐྱོད་རྩེ་ཚོགས་ལ་ཞུགས་སྐབས་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལེ་སི་ལ་ཐུག་འཕྲད་བྱས།

ཏིན་ཞུའེ་ཞང་གིས་བསྟན་དོན།　ཀྲུང་གོས་ནམ་ཟླའི་འགྱུར་ལྡོག་ལ་ཁ་གཏད་གཅོག་པའི་རྒྱལ་ཁབ་ཀྱི་འཐབ་ཇུས་བློ་བརྟན་འགྱུར་མེད་ངང་ལག་བསྟར་བྱེད་པ་དང་།　ལྗང་མདོག་ཅན་དང་ཐཱན་ཉུང་ཅན་དེ་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པའི་གནད་འགག་ལྷུ་ཚིགས་སུ་བརྩི་བ།　སྲིད་ཇུས་བྱེད་ཐབས་རབ་དང་རིམ་པ་གཏན་འབེབས་ལག་བསྟར་བྱས་ཏེ་སྐྱེ་ཁམས་ཕན་འབྲས་དང་དཔལ་འབྱོར་ཕན་འབྲས་མཉམ་རྒྱལ་ཡོང་བ་མངོན་འགྱུར་བྱས་ཡོད།　ཀྲུང་གོས་འཛམ་གླིང་ལ2030ལོའི་སྔོན་དུ་ཐཱན་རྩེར་སོན་མངོན་འགྱུར་བྱེད་པ་དང་།　2060ལོའི་སྔོན་དུ་ཐཱན་སྙོམས་སྦྱོར་མངོན་འགྱུར་བྱ་རྒྱུ་ཁྱབ་བསྒྲགས་བྱས་པ་དེ་ནི་བསམ་བློ་གཟབ་ནན་བཏང་རྗེས་ཁས་ལེན་བྱས་པ་ཞིག་ཡིན་ལ།　གནམ་གཤིས་འགྱུར་ལྡོག་ལ་ཁ་གཏད་གཅོག་པའི་འགག་རྩ་ནི་དམ་པ་དོན་གཉེར་གྱི་བྱ་སྤྱོད་སྤེལ་རྒྱུ་དེ་ཡིན།　ཀྲུང་གོས་སྔ་མོ་ནས་ད་བར་ཁ་དན་ཚིག་གནས་དང་གང་བྱས་མཐའ་འཁྱོལ་བྱེད་ཀྱིན་ཡོད་པས།　རྒྱལ་སྤྱིའི་གནས་བབ་ལ་འགྱུར་ལྡོག་ཇི་འདྲ་བྱུང་བ་དང་རྒྱལ་ཁབ་གཞན་དག་གི་སྲིད་ཇུས་ལ་འགྱུར་ལྡོག་ཇི་འདྲ་བྱུང་རུང་གནམ་གཤིས་འགྱུར་ལྡོག་ལ་ཁ་གཏད་ཧུར་ཐག་གཅོག་པའི་ཀྲུང་གོའི་ཆོད་སེམས་དང་བྱ་སྤྱོད་ལ་འགྱུར་ལྡོག་གཏོང་མི་སྲིད།

ཏིན་ཞུའེ་ཞང་གིས་བསྟན་དོན།　ཀྲུང་གོས་ཕྱོགས་མང་རིང་ལུགས་བློ་བརྟན་འགྱུར་མེད་ངང་སྲུང་སྐྱོབ་དང་།　མཉམ་འབྲེལ་རྒྱལ་ཚོགས་ལྟེ་བར་བྱེད་པའི་རྒྱལ་སྤྱིའི་མ་ལག་ལ་ཐོག་མཐའ་བར་གསུམ་དུ་སྲུང་སྐྱོང་བྱེད་པ།　《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱིའཛམ་གླིང་གི་གནམ་གཤིས་བཅོས་སྐྱོང་ཁྲོད་ཀྱི་ཐབས་ལམ་གཙོ་བོའི་གནས་བབ་ལ་རྒྱབ་སྐྱོར་བྱེད་པ།　རྒྱལ་ཁབ་ཆེན་པོའི་འགན་འཁྲི་འཁུར་བ་དང་རྒྱལ་ཁབ་ཆེན་པོའི་འགན་འཁྲི་མངོན་པ་བཅས་བྱས་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པའི་རྒྱལ་སྤྱིའི་མཉམ་ལས་ཐད་ལེགས་སྐྱེས་གལ་ཆེན་འབུལ་རྒྱུ་ཡིན།　ཀྲུང་གོ་ཕྱོགས་ཀྱིས་ཕྱོགས་སོ་སོ་དང་མཉམ་དུ་དངོས་སྒྲུབ་ཟོལ་མེད་ཀྱི་བརྗེ་རེས་དང་མཉམ་ལས་བྱེད་པ་དང་།　ཕྱོགས་རྐྱང་པའི་རིང་ལུགས་དོར་བ།མཉམ་འབྲེལ་རྒྱལ་ཚོགས་ནམ་ཟླའི་འགྱུར་ལྡོག་ཚོགས་ཆེན་སྐབས་ཉེར་དགུ་པར་དགེ་མཚན་ལྡན་པའི་གྲུབ་འབྲས་ཐོབ་རྒྱུར་སྐུལ་འདེད་གཏོང་བ་བཅས་བྱས་ནས་གནམ་གཤིས་ཀྱི་ཕྱོགས་མང་འཕེལ་རིམ་ལ་དྲང་ནུས་སྣོན་འདོད་ཡོད་ཅེས་གསུངས།

ཀུའུ་ཐི་ལེ་སི་ཡིས་བསྟན་དོན།　མཉམ་འབྲེལ་རྒྱལ་ཚོགས་ཀྱིས་ཀྲུང་གོས“ཐཱན་གཉིས”ཀྱི་དམིགས་འབེན་ལ་སྐུལ་འདེད་གཏོང་བའི་ཐད་ཀྱི་འབད་བརྩོན་དང་ལེགས་སྐྱེས་ལ་ཚད་མཐོའི་གདེང་འཇོག་བྱེད་ཀྱི་ཡོད་ལ།　ཀྲུང་གོས་དུས་ཡུན་རིང་པོའི་ནང་མཉམ་འབྲེལ་རྒྱལ་ཚོགས་ཀྱི་བྱ་གཞག་ལ་རྒྱབ་སྐྱོར་ནུས་ལྡན་གནང་བར་ཐུགས་རྗེ་ཆེ་ཞུ་རྒྱུ་ཡིན།　ཀྲུང་གོ་དང་མཉམ་ལས་ལ་ཤུགས་སྣོན་བརྒྱབ་ནས་ཕྱོགས་མང་རིང་ལུགས་ལ་མཉམ་དུ་སྲུང་སྐྱོང་བྱེད་པ་དང་།མཉམ་འབྲེལ་རྒྱལ་ཚོགས་ནམ་ཟླའི་འགྱུར་ལྡོག་ཚོགས་ཆེན་སྐབས་ཉེར་དགུ་པར་གྲུབ་འབྲས་ཐོབ་རྒྱུར་སྐུལ་འདེད་བཏང་ནས་གོ་ལ་ཧྲིལ་པོའི་གནམ་གཤིས་འགྱུར་ལྡོག་གི་འགྲན་སློང་ལ་སྔར་ལས་ཁ་གཏད་གཅོག་འདོད་ཡོད།