ཝུའུ་ཞའོ་ཅུན་གྱིས་མགོ་ལོག་ཁུལ་རྨ་ཆེན་རྫོང་དུ་རྟོག་ཞིབ་བྱས།

 ཟླ11ཚེས14ཉིན། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝུའུ་ཞའོ་ཅུན་གྱིས་མགོ་ལོག་བོད་རིགས་རང་སྐྱོང་ཁུལ་གྱི་གཙོ་གནད་ནུས་ཁུངས་ལས་གཞི་དང་། རྣམ་པ་གསར་པའི་གྲོང་ཁྱེར་དང་གྲོང་རྡལ་ཅན་འཛུགས་སྐྲུན། དབུལ་ཐར་མཁྲེགས་གཏོར་གྱི་གྲུབ་འབྲས་བཅས་གྲོང་གསེབ་དར་སྤེལ་དང་སྦྲེལ་མཐུད་ནུས་ལྡན་བྱེད་པའི་ལས་དོན་ལ་རྟོག་ཞིབ་བྱེད་སྐབས།  ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་གྱི་ལས་དོན་ཐད་བཏོན་པའི་བླང་བྱ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ།  ལས་གཞི་གཙོ་བོའི་འཛུགས་སྐྲུན་གྱི་འཕེལ་རིམ་ཇེ་མགྱོགས་སུ་གཏོང་བ་དང་། ཡུལ་བབ་དང་བསྟུན་ནས་ཁྱད་ལྡན་ཐོན་ལས་གསོ་སྐྱོང་དང་སྟོབས་ཆེར་གཏོང་བ། མི་རྩ་བར་འཛིན་པའི་རྣམ་པ་གསར་པའི་གྲོང་ཁྱེར་དང་གྲོང་རྡལ་ཅན་དང་།  གྲོང་གསེབ་ཕྱོགས་ཡོངས་ནས་དར་སྤེལ་བྱེད་པར་་སྐུལ་འདེད་གཏོང་བར་སྤྱི་འདོམས་སྔར་ལས་ཡག་པོ་བཅས་བྱས་ནས།  རིགས་སོ་སོའི་མང་ཚོགས་ཀྱི་ཐོབ་ཚོར་དང་།  སྐྱིད་སྣང་། བདེ་སྣང་བཅས་ཆེ་རུ་གཏོང་དགོས་ཞེས་ནན་གྱིས་བསྟན།

མར་སྟེང་ཆུ་གློག་ས་ཚིགས་ནི་རྒྱལ་ཁབ་དང་རང་ཞིང་གི་དག་གཙང་ནུས་ཁུངས་ཀྱི་ལས་གཞི་གལ་ཆེན་ཞིག་ཡིན། ཆུ་གློག་ས་ཚིགས་སུ་སླེབས་སྐབས་ཝུའུ་ཞའོ་ཅུན་གྱིས་སྤྱི་ཡོངས་ཇུས་འགོད་དང་། ལས་གཞི་འཛུགས་སྐྲུན་གྱི་འཕེལ་རིམ། གློག་མཁོ་འདོན་སྒྲིག་ཆས་ཀྱི་ལག་རྩལ།  སྐྱེ་ཁམས་ཁོར་ཡུག་སྲུང་སྐྱོབ། བདེ་འཇགས་ཐོན་སྐྱེད་སོགས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས་པར་མ་ཟད། ཞིང་ཆེན་ཡོངས་ཀྱི་ནུས་ཁུངས་ལས་གཞིར་མ་དངུལ་བཏང་ནས་འཛུགས་སྐྲུན་བྱས་པའི་གནས་ཚུལ་ངོ་སྤྲོད་བྱས་པར་ཉན།  ཁོས་ནུས་ཤུགས་ཡོད་རྒུས་གཙོ་གནད་ནུས་ཁུངས་ལས་གཞི་འཛུགས་སྐྲུན་གྱི་སྤུས་ཚད་མཐོར་འདེགས་དང་ཕན་འབྲས་ཆེ་རུ་གཏོང་བར་སྐུལ་འདེད་བྱེད་པ་དང་།  མ་དངུལ་གཏོང་ཚད་མུ་མཐུད་དུ་ཆེ་རུ་བཏང་ནས།  རྒྱལ་ཁབ་ཀྱི་དག་གཙང་ནུས་ཁུངས་ཐོན་ལས་ཀྱི་མཐོ་ས་འཛུགས་སྐྲུན་ལ་འདེགས་སྐྱོར་ནུས་ལྡན་བྱེད་དགོས། རླུང་དང་། འོད། ཆུ། མེ། གསོག་འཇོག་བཅས་གཞི་གཅིག་ཅན་གྱི་འཕེལ་རྒྱས་ལ་སྐུལ་འདེད་ཆེན་པོ་གཏོང་བ་དང་། འདེགས་སྐྱོར་རང་བཞིན་གྱི་གཙོ་གནད་ནུས་ཁུངས་ལས་གཞི་ཁག་ཅིག་བརྒྱུད་རིམ་ལྡན་པའི་ངང་ཇུས་འགོད་དང་། གསོག་འཇོག ལག་བསྟར་བཅས་བྱས་ཏེ། ཞིང་ཆེན་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་ཡང་བསྐྱར་སྐས་རིམ་གསར་པ་ཞིག་ཏུ་སླེབས་པར་རམ་འདེགས་བྱེད་དགོས། སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་རྒྱུན་འཁྱོངས་བྱས་ཏེ་རྨ་ཆུའི་སྟོད་རྒྱུད་ཀྱི་སྐྱེ་ཁམས་སྲུང་སྐྱོབ་ལ་ཤུགས་སྣོན་པ་དང་།  མ་ལག་ཆ་ཚང་བའི་གློག་དྲ་འཛུགས་སྐྲུན་འཐུས་ཚང་དུ་གཏོང་བ། གཉེར་སྐྱོང་དོ་དམ་ཆུ་ཚད་མཐོ་རུ་གཏོང་བ་བཅས་བྱས་ཏེ། ས་གནས་ཀྱི་དཔལ་འབྱོར་འཕེལ་རྒྱས་ལ་ཧུར་ཐག་གིས་སྐུལ་ཁྲིད་བྱེད་དགོས་ཞེས་ནན་གྱིས་བསྟན།

རྨ་ཆེན་རྫོང་ར་རྒྱ་གྲོང་རྡལ་དང་རྫོང་མཁར་གྱི་འཚོ་བའི་བཙོག་ཆུ་གཙང་སྒྱུར་བཟོ་གྲྭ་རུ་ཝུའུ་ཞའོ་ཅུན་གྱིས་གྲོང་ཁྱེར་དང་གྲོང་རྡལ་གྱི་འཆར་འགོད་དང་། ཐོན་ལས་བཀོད་སྒྲིག འཐུང་ཆུའི་བདེ་འཇགས། བཙོག་ཆུ་དང་འཚོ་བའི་གད་སྙིགས་གཙང་སེལ་བཅས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས། ཁོས་མི་གཙོ་བོར་འཛིན་པ་དང་། ཆོས་ཉིད་ལ་བརྩི་འཇོག རིགས་དབྱེ་ཇུས་བསྟར། ལེགས་བསྡུས་ཞིབ་གཉེར་དང་ཕན་ནུས་མཐོ་བ་བཅས་རྒྱུན་འཁྱོངས་བྱས་ཏེ།  གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་ཇེ་མགྱོགས་སུ་གཏོང་བ་དང་། གྲོང་ཁྱེར་དང་གྲོང་རྡལ་གྱི་བར་སྟོང་བཀོད་སྒྲིག་ཇེ་ལེགས་སུ་གཏོང་བ། རྨང་གཞིའི་སྒྲིག་བཀོད་ཀྱི་ཞན་ཆ་གསབ་པ། ཡུལ་བབ་དང་བསྟུན་ནས་དེང་རབས་ཀྱི་ཞིང་ཕྱུགས་ལས་དང་། ཚོང་དོན་ཟོང་འགྲེམས།  སྐྱེ་ཁམས་ཡུལ་སྐོར་སོགས་ཀྱི་ཐོན་ལས་འཕེལ་རྒྱས་གཏོང་བ། གྲོང་ཁྱེར་དང་གྲོང་རྡལ་གྱི་སྤྱི་པའི་ཞབས་ཞུའི་ཆུ་ཚད་མཐོ་རུ་གཏོང་བ་བཅས་བྱས་ནས།  མཛེས་སྡུག་ལྡན་ལ་སྡོད་བདེ་ལས་འཚམ་གྱི་མཐོ་སྒང་གི་ཁྱད་ཆོས་ལྡན་པའི་གྲོང་ཁྱེར་དང་གྲོང་རྡལ་འཛུགས་སྐྲུན་བྱེད་དགོས་ཞེས་ནན་གྱིས་བསྟན།   ཁོས་གྲོང་ཁྱེར་དང་གྲོང་རྡལ་འཛུགས་སྐྲུན་བྱེད་པར་ཕྱི་ནང་གཉིས་ཀར་མཐོང་ཆེན་བྱེད་དགོས། གྲོང་ཁྱེར་གྱི་ས་འོག་སྦུག་དྲ་འཛུགས་སྐྲུན་བྱེད་ཤུགས་ཆེ་རུ་གཏོང་བ་དང་། བཙོག་ཆུ་གཙང་སེལ་དང་འཚོ་བའི་གད་སྙིགས་བསྡུ་རུབ་དང་།   བརྒྱུད་འདྲེན།  ཐག་གཅོད་བཅས་བྱེད་པའི་མ་ལག་འཐུས་ཚང་དུ་གཏོང་བ། དུས་རྒྱུན་གྱི་ལྟ་སྐུལ་དོ་དམ་དང་སྐོར་ཞིབ་བྱེད་ཤུགས་ཆེ་རུ་གཏོང་བ་བཅས་བྱས་ཏེ། གྲོང་ཁྱེར་གྱི་སྒྲིག་བཀོད་བདེ་འཇགས་ངང་འཁོར་སྐྱོད་ཐུབ་པར་འགན་ལེན་ཏན་ཏིག་བྱེད་དགོས་ཞེས་བསྟན།

མགོ་ལོག་ཁུལ་ཞིང་ཕྱུགས་དང་ཚན་རྩལ་ཅུའུ་དང་གངས་རི་ཟས་རིགས་ཚད་ཡོད་ཀུང་སི་རུ། ཝུའུ་ཞའོ་ཅུན་གྱིས་ལས་བྱེད་པ་དང་ལས་བཟོ་པ། ཁེ་ལས་ཀྱི་འགན་འཁུར་བ་བཅས་དང་གླེང་མོལ་བྱས་ཏེ། དབུལ་ཐར་མཁྲེགས་གཏོར་གྱི་གྲུབ་འབྲས་སྲ་བརྟན་དང་རྒྱ་སྐྱེད་དུ་གཏོང་བ་དེ་གྲོང་གསེབ་དར་སྤེལ་དང་སྦྲེལ་མཐུད་ལེགས་པོ་བྱེད་པ་དང་།   ཁྱད་ལྡན་ཐོན་ལས་འཕེལ་རྒྱས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས། ཁོས་ཐོན་ལས་དར་སྤེལ་ནི་གྲོང་གསེབ་དར་སྤེལ་གཏོང་བའི་གལ་ཆེའི་ནང་གི་འགངས་ཆེན་ཡིན་པས། མཐོ་སྒང་གི་ཁྱད་ལྡན་ཞིང་ཕྱུགས་ཐོན་ཁུངས་ལ་གཞི་ཚུགས་པ་དང་། ཐོན་ལས་ཀྱི་ལས་གཞི་གནད་སྨིན་འདེམས་གསོ་བྱེད་པ། ཁ་གཏད་ཀྱིས་མཚོ་སྔོན་ལ་རོགས་སྐྱོར་བྱེད་པའི་ལམ་སྲོལ་བེད་སྤྱོད་ཡག་པོ་བཅས་བྱས་ཏེ།  ལས་གཞི་ཐོན་ལས་ཅན་དང་། ལེགས་བསྡུས་ཞིབ་གཉེར་ཅན། ཚན་རྩལ་ཅན། ཁྲོམ་ར་ཅན་བཅས་ཀྱི་ཆུ་ཚད་ཧུར་ཐག་གིས་ཇེ་མཐོར་གཏོང་དགོས། ཁེ་ལས་ཀྱི་ལོ་རྒྱུས་རིག་གནས་རྒྱུན་འཛིན་དང་། དེང་རབས་ཀྱི་ཁྲོམ་རའི་དགོས་མཁོ་དང་འཚམ་པ། ཐོན་རྫས་ཀྱི་སྣ་ཁ་གསར་གཏོད།    སྤུས་ལེགས་ཐོན་རྫས་གཏོད་པ་བཅས་བྱས་ཏེ། ཁྱད་ལྡན་སྤུས་རྟགས་གསོ་སྐྱོང་བྱེད་དགོས། རྒྱ་ཆེའི་ལས་བྱེད་པ་དང་མང་ཚོགས་དང་ཁེ་ལས་ཀྱི་ཧུར་བརྩོན་རང་བཞིན་དང་རང་འགུལ་རང་བཞིན་སྐུལ་སློང་གང་ལེགས་བྱེད་པ་དང་། ཞིང་འབྲེལ་ཞིང་འཁྲིད་ཞིང་སྐྱོར་གྱི་བྱེད་ཐབས་དོན་འཁྱོལ་ཞིབ་མོ་བྱས་ཏེ། རོང་འབྲོག་མང་ཚོགས་སྔར་ལས་མང་པོ་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་བྱེད་དགོས།  གནད་དོན་གྱི་ཁྲིད་ཕྱོགས་རྒྱུན་འཁྱོངས་བྱས་ཏེ།  ལས་འགན་གཙོ་བོ་དང་འགག་རྩའི་བརྒྱུད་རིམ་ལ་དམ་པོར་དམིགས་པ་དང་། མཐིལ་རྟོགས་གྲལ་བཤེར་ནན་མོ་བྱེད་པ། གནད་དོན་དག་ཐེར་ལ་སྐུལ་འདེད་གཏོང་བ།  སློབ་གསོ་དང་། སྨན་བཅོས། སྡོད་ཁང་། འཐུང་ཆུ་བཅས་ཀྱི་བདེ་འཇགས་འགན་སྲུང་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་བཅས་བྱས་ནས།  མང་ཚོགས་ཀྱིས་ཚོར་ཐུབ་པའི་བྱ་བ་དངོས་ཧུར་ཐག་གིས་བསྒྲུབ་དགོས་ཞེས་ནན་གྱིས་བསྟན།