ཏེན་ཞུའེ་ཞང་དུས་སྐབས་སྔོན་མའི་ཉེན་བརྡ་གཏོང་ཤུགས་ཇེ་ཆེར་གཏོང་བ་དང་གནམ་གཤིས་འོས་འཚམ་ཡིན་པའི་མ་འོངས་པ་མཉམ་སྐྲུན་བྱེད་ཅེས་པའི་མཐོ་རིམ་གྲོས་ཚོགས་ལ་ཞུགས་པར་མ་ཟད་ཤིས་ཚིག་ཕུལ།

ཟླ11པའི་ཚེས12ཉིན། ཀྲུའུ་ཞི་ཞི་ཅིན་ཕིང་གི་དམིགས་བསལ་སྐུ་ཚབ། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ཨུ། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཏེན་ཞུའེ་ཞང་ཨ་སེད་པེད་ཅང་གི་རྒྱལ་ས་པ་ཁོ་རུ་ཀྲུང་གོའི་ཕྱོགས་ཀྱིས་གཙོ་སྒྲུབ་བྱས་པའི་དུས་སྐབས་སྔོན་མའི་ཉེན་བརྡ་གཏོང་ཤུགས་ཇེ་ཆེར་གཏོང་བ་དང་གནམ་གཤིས་འོས་འཚམ་ཡིན་པའི་མ་འོངས་པ་མཉམ་སྐྲུན་བྱེད་ཅེས་པའི་མཐོ་རིམ་གྲོས་ཚོགས་ལ་ཞུགས་པར་མ་ཟད་ཤིས་ཚིག་ཕུལ།

ཏེན་ཞུའེ་ཞང་གིས་བསྟན་དོན། ཀྲུང་གོས་གནམ་གཤིས་ཀྱི་དུས་སྐབས་སྔོན་མའི་ཉེན་བརྡའི་རྒྱལ་སྤྱིའི་མཉམ་ལས་ལ་ཚད་མཐོན་པོས་མཐོང་ཆེན་བྱེད་ཀྱིན་ཡོད་ལ། ཀྲུའུ་ཞི་ཞི་ཅིན་ཕིང་གིས་དེའི་ཐད་ལ་བླང་བྱ་གསལ་བོ་བཏོན་ཡོད། ཉེ་བའི་ལོ་འགའི་རིང་། གནམ་གཤིས་འགྱུར་ལྡོག་གིས་གོ་ལ་ཧྲིལ་བོར་ཤུགས་རྐྱེན་ཐེབས་ཚད་ཉིན་བཞིན་ཇེ་དྲག་ཏུ་འགྲོ་བཞིན་ཡོད་ལ། ནམ་ཟླ་མི་ལེགས་པའི་གནམ་གཤིས་ཀྱི་དོན་རྐྱེན་འབྱུང་ཚད་མང་བས། རྒྱལ་ཁབ་སོ་སོའི་མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་དང་དཔལ་འབྱོར་སྤྱི་ཚོགས་འཕེལ་རྒྱས་ཐད་སྔར་བྱུང་མྱོང་མེད་པའི་འགྲན་རྩོད་ལ་འཕྲད་དུ་བཅུག དམངས་ཡོངས་ཀྱི་དུས་སྐབས་སྔོན་མའི་ཉེན་བརྡ་གཏོང་ཤུགས་ཇེ་ཆེར་གཏོང་བ་དང་། གནམ་གཤིས་འགྱུར་ལྡོག་ལ་འཚམ་པའི་ནུས་པ་མཐོར་འདེགས་གཏོང་རྒྱུ་དེ་སྔར་ལས་གལ་ཆེན་དང་ཁ་ཚ་དགོས་གཏུག་ཏུ་གྱུར་ཡོད་ཅེས་གསུངས།

ཏེན་ཞུའེ་ཞང་གིས་བསྟན་དོན། ཀྲུང་གོས་རྒྱལ་ཁབ་སོ་སོ་དང་མཉམ་དུ། མཉམ་འབྲེལ་རྒྱལ་ཚོགས་ཀྱི་དམངས་ཡོངས་ཀྱི་དུས་སྐབས་སྔོན་མའི་ཉེན་བརྡའི་གྲོས་འགོ་ལག་བསྟར་བྱེད་པར་སྐུལ་འདེད་བཏང་ནས། གནམ་གཤིས་འགྱུར་ལྡོག་ལ་ཁ་གཏད་འཇལ་བར་སྔར་ལས་བྱས་རྗེས་གསར་བ་མང་པོ་འཇོག་འདོད་ཡོད། གཅིག་ནས་གོ་ལ་ཧྲིལ་བོའི་ཉེན་ཁའི་དཔྱད་འཇོག་ནུས་པ་མཉམ་དུ་མཐོར་འདེགས་གཏོང་བ་དང་།  གནམ་གཤིས་འགྱུར་ལྡོག་གི་ཉེན་ཁ་དཔྱད་འཇོག་ཚད་གཞི་ཅན་གྱི་འཛུགས་སྐྲུན་ལ་སྐུལ་འདེད་བཏང་ནས། གནམ་གཤིས་བཅོས་སྐྱོང་བྱེད་པར་ཚན་རིག་གི་གཞི་འཛིན་ས་འདོན་སྤྲོད་བྱེད་དགོས། གཉིས་ནས་གོ་ལ་ཧྲིལ་བོའི་སྔོན་བརྡའི་དྲ་རྒྱ་མཉམ་དུ་བསྐྲུན་པ་དང་། ལག་རྩལ་མཉམ་སྤྱོད་བྱེད་ཅིང་། མ་ལག་མཉམ་འབྲེལ་ལ་ཤུགས་བསྣན་ནས། གོ་ལ་ཧྲིལ་བོའི་དུས་སྐབས་སྔོན་མའི་ཉེན་བརྡའི་མ་ལག་འཐུས་ཚང་གཏོང་བར་སྐུལ་འདེད་གཏོང་དགོས། གསུམ་ནས་གནམ་གཤིས་འོས་འཚམ་ཡིན་པའི་གྲོགས་པོའི་འབྲེལ་བ་མཉམ་དུ་འཛུགས་པ་དང་། ཀྲུང་གོས་གནམ་གཤིས་འགྱུར་ལྡོག་ལ་ཁ་གཏད་འཇལ་བའི་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་བར་གྱི་མཉམ་ལས་ཀྱི་དུས་སྐབས་སྔོན་མའི་ཉེན་བརྡའི་ལས་གཞི་གསར་སྤེལ་ལག་བསྟར་བྱེད་ཅིང་། གནམ་གཤིས་ལྟ་ཞིབ་སྒྲིག་ཆས་དང་། དུས་སྐབས་སྔོན་མའི་ཉེན་བརྡའི་མ་ལག ནུས་པ་འཛུགས་སྐྲུན་གསོ་སྦྱོང་སོགས་ཀྱི་བྱེད་ཐབས་འདོན་སྤྲོད་བྱས་པ་བརྒྱུད་དེ། འཕེལ་རྒྱས་སུ་འགྲོ་བཞིན་པའི་རྒྱལ་ཁབ་གཞན་དག་ལ་རྒྱབ་སྐྱོར་འདོན་སྤྲོད་བྱེད་དགོས།

མཉམ་འབྲེལ་རྒྱལ་ཚོགས་ནམ་ཟླའི་འགྱུར་ལྡོག་ཚོགས་ཆེན་སྐབས་ཉེར་དགུ་པའི་ཀྲུའུ་ཞི་པཱ་པཱ་ཡའེ་ཧྥུའུ་དང་། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ། གནམ་གཤིས་འགུལ་སྐྱོད་དང་དྲང་བཞག་ཚུར་སྒྱུར་གྱི་དམིགས་བསལ་བློ་འདོན་པ་ཧཱ་ཐི། འཛམ་གླིང་གནམ་གཤིས་རྩ་འཛུགས་ཀྱི་དྲུང་ཡིག་ཆེན་མོ་ཧྲའོ་ལའོ། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ། གནོད་སེལ་ལས་དོན་གྱི་དམིགས་བསལ་འཐུས་མི་དང་མཉམ་འབྲེལ་རྒྱལ་ཚོགས་ཀྱི་གནོད་སྐྱོན་ཉེན་ཁ་སེལ་བའི་གཞུང་སྒྲུབ་ཁང་གི་ཀྲུའུ་རིན་གྱི་འགན་གཅིག་ལྕོགས་སུ་འཁུར་བའི་ཅིས་ཞའོ་འར་སོགས་གྲོས་ཚོགས་ལ་ཞུགས་པར་མ་ཟད་ཤིས་ཚིག་ཕུལ།

གྲོས་ཚོགས་སྟེང་དུས་སྐབས་སྔོན་མའི་ཉེན་བརྡས་གནམ་གཤིས་འགྱུར་ལྡོག་ཀྲུང་གོར་འཚམ་པར་སྐུལ་འདེད་གཏོང་བའི་འགུལ་སྐྱོད་ཇུས་གཞི་ཁྱབ་བསྒྲགས་བྱས།