ཝུའུ་ཞའོ་ཅུན་གྱིས་ཧ་ཡང་ཐོན་ལས་དང་ལྗང་མདོག་རྩིས་ནུས་ལ་རྟོག་ཞིབ་བྱས།

ཟླ11པའི་ཚེས9ཉིན།    ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝུའུ་ཞའོ་ཅུན་གྱིས་རྟ་ཐང་ཧུའེ་རིགས་ཧོར་རིགས་རང་སྐྱོང་རྫོང་གི་པེ་ཁྲོན་བཟོ་ལས་གླིང་དང་། ཧོང་ཀྲུང་ཆུས་ཀྲུང་གོ་ལེན་ཐུང་གཙང་གསུམ་འབྱུང་ཡུལ་རྒྱལ་ཁབ་ཀྱི་གཞི་གྲངས་ཆེན་མོའི་རྟེན་གཞིར་རྟོག་ཞིབ་བྱེད་སྐབས།    ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས། སྲོལ་རྒྱུན་ཐོན་ལས་ཚུལ་སྒྱུར་རིམ་སྤོར་ལ་མུ་མཐུད་དུ་སྐུལ་འདེད་གཏོང་བ་དང་།    མགྱོགས་མྱུར་སྒོས་ལྗང་མདོག་རྩིས་ནུས་མཉམ་དུ་འཕེལ་རྒྱས་གཏོང་བ།    ཡུལ་བབ་དང་བསྟུན་ནས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་སུ་གཏོང་བ།   བཅོས་སྒྱུར་གསར་གཏོད་ཀྱི་སྙིང་སྟོབས་ལ་བརྟེན་ནས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས་པ་ནན་གྱིས་བསྟན།

རྟ་ཐང་རྫོང་པེ་ཁྲོན་བཟོ་ལས་གླིང་གི་ཧ་ཡང་ཐོན་ལས་འགྲེམས་སྟོན་རྟེན་གཞི་ནས། ཝུའུ་ཞའོ་ཅུན་གྱིས་ཡུལ་དངོས་སུ་ཨོའུ་ནའེ་ཐེ་སྐུད་ཐག་སྡེ་ཚོགས་ཚད་ཡོད་ཀུང་སིའི་ཐོན་སྐྱེད་འཁོར་ཁང་དང་ཀྲུང་གོ་ཧ་ཡང་ལས་རིགས་སྡེ་ཚོགས་ཀུང་སི་མཚོ་སྔོན་ཡན་ལག་ཀུང་སིའི་སྟོང་ཧྥུའུ་ཨན600ཡི་ལས་གཞི་དང་།    ཧྲིན་ཧན་ཧ་ཡང་ལྕགས་བསྲེས་མའི་ལས་གཞི།    ཧུའེ་ཡོན་ལྗང་མདོག་ཧ་ཡང་སྲབ་མོའི་ལས་གཞི་བཅས་ཀྱི་འཛུགས་སྐྲུན་གནས་ཚུལ་ལ་རྟོག་ཞིབ་བྱས་པ་དང་།    ཐོན་སྐྱེད་གཉེར་སྐྱོང་དང་ཚན་རྩལ་གསར་གཏོད།    བདེ་འཇགས་ཐོན་སྐྱེད།    ལས་ཀའི་མྱུར་ཚད་སོགས་ཀྱི་གནས་ཚུལ་ལ་རྒྱུས་ལོན་ཞིབ་མོ་བྱས་ཏེ། ཡུལ་དངོས་སུ་ཁེ་ལས་འཕེལ་རྒྱས་ལ་འཕྲད་པའི་དཀའ་ངལ་དང་གནད་དོན་མཐུན་སྦྱོར་བྱས་ཏེ་ཐག་གཅོད་བྱས།   ཁོས་བཤད་རྒྱུར། བཟོ་ལས་ནི་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་བྱེད་པའི་སྟོབས་ཤུགས་གལ་ཆེན་ཞིག་ཡིན་པས། ལྗང་མདོག་ཅན་དང་རིག་ནུས་ཅན།    རྩེར་སོན་ཅན།    གཅིག་བསྡུས་ཅན་བཅས་ཀྱི་འཕེལ་རྒྱས་ཁ་ཕྱོགས་རྒྱུན་འཁྱོངས་བྱེད་པ་དང་།    ཐོན་ལས་ཀྱི་གོང་འོག་ཆ་སྡེབ་སྦྲེལ་མཐུད་ལ་ཤུགས་སྣོན་པ། ཞན་ཆ་ཡོད་པའི་ཐོན་ལས་ཀྱི་ཕྲེང་འབྲེལ་ལ་ཁ་གསབ་བྱེད་པ་དང་ཁྱད་སྟོབས་ལྡན་པའི་ཐོན་ལས་ཀྱི་ཕྲེང་འབྲེལ་བསྲིང་བ། སྲོལ་རྒྱུན་ཐོན་ལས་ཕྲེང་འབྲེལ་གྱི་རིམ་པ་ཇེ་མཐོར་གཏོང་བ་བཅས་བྱས་ནས།    ཐོན་ལས་ཕྲེང་འབྲེལ་གྱི་བརྟན་བརླིང་རང་བཞིན་དང་འགྲན་རྩོད་ནུས་པ་ཆེ་རུ་གཏོང་དགོས།     ཐོན་ལས་ཕྲེང་འབྲེལ་གྱི་ཚོང་འགུག་ལག་བསྟར་གཏིང་ཟབ་བྱས་ཏེ། ཧ་ཡང་ཐོན་ལས་དེ་འབྲིང་རིམ་དང་དམའ་རིམ་ནས་འབྲིང་རིམ་དང་རྩེར་སོན་དང་།    མ་བཅོས་རྒྱུ་ཆ་ནས་རྒྱུ་ཆ་གསར་པ།    ཟུར་སྣོན་རིན་ཐང་དམའ་བ་ནས་ཟུར་སྣོན་རིན་ཐང་མཐོ་བའི་ཕྱོགས་སུ་བསྐྱོད་རྒྱུར་སྐུལ་འདེད་བཏང་ནས། རྒྱལ་ཡོངས་སུ་ལྟེ་བའི་འགྲན་རྩོད་ནུས་པ་ལྡན་པའི་ལྗང་མདོག་ཐཱན་ཉུང་གི་ཧ་ཡང་ཐོན་ལས་རྟེན་གཞི་བསྐྲུན་དགོས།

ཀྲུང་གོ་ལེན་ཐུང་གཙང་གསུམ་འབྱུང་ཡུལ་རྒྱལ་ཁབ་གཞི་གྲངས་ཆེན་མོའི་རྟེན་གཞི་རུ། ཝུའུ་ཞའོ་ཅུན་གྱིས་ཡུལ་དངོས་སུ་ལྗང་མདོག་རྩིས་གློག་མཐུན་སྦྱོར་དཔེ་སྟོན་གླིང་གི་འཆར་འགོད་འཛུགས་སྐྲུན་གནས་ཚུལ་ལ་རྟོག་ཞིབ་བྱས་པ་མ་ཟད་བཞུགས་མོལ་ཚོགས་འདུར་འགོ་འཛིན་བྱས་ནས་འབྲེལ་ཡོད་ཕྱོགས་ཀྱི་གནས་ཚུལ་སྙན་ཞུར་ཉན།    ཁོས་བསྟན་དོན། ལྗང་མདོག་རྩིས་གློག་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་རྒྱུ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱེད་པའི་ཞིབ་ཕྲའི་བྱ་སྤྱོད་ཅིག་ཡིན་པས།   དངོས་གནས་ཆབ་སྲིད་ཀྱི་ལངས་གནས་མཐོ་རུ་གཏོང་བ་དང་།    བདེན་སྲུང་གསར་སྐྲུན་དང་སྔོན་ལ་ལག་བསྟར་དང་སྔོན་ལ་ཚོད་ལྟ་བྱེད་པ་རྒྱུན་འཁྱོངས་བྱས་ཏེ།   བཅོས་སྒྱུར་གྱི་འདུ་ཤེས་དང་བསམ་ཕྱོགས།    བྱེད་ཐབས་བཅས་ལ་བརྟེན་ནས་ལམ་ལུགས་རྐྱེན་སྲོལ་གསར་གཏོད་ལ་སྐུལ་འདེད་གཏོང་བ་དང་། ཐོན་ཁུངས་ནུས་གསོག་སོགས་ཀྱི་གཙོ་གནད་བཅོས་སྒྱུར་འཚོལ་ཞིབ་ཧུར་ཐག་བྱས་ནས། འགག་རྩའི་ལག་རྩལ་ཁག་ཅིག་གསར་དུ་བཏོད་དེ་ཕུན་སུམ་ཚོགས་ལ་འཐུས་སྒོ་ཚང་བའི་ཐོན་ལས་སྐྱེ་ཁམས་མ་ལག་ཆགས་རྒྱུར་སྐུལ་འདེད་བཏང་སྟེ། དཔེ་སྟོན་གླིང་དེ་ཞིང་ཆེན་ཡོངས་ཀྱི་ལྗང་མདོག་རྩིས་གློག་མཐུན་སྦྱོར་འཕེལ་རྒྱས་ཀྱི་འགྲེམས་སྟོན་བྱ་ཡུལ་ཞིག་ཏུ་སྔོན་ལ་བསྐྲུན་དགོས། འགན་སྲུང་མ་ལག་འཐུས་ཚང་དུ་གཏོང་བ་དང་།    ཚན་རིག་དང་མཐུན་པའི་སྒོ་ནས་གླིང་ཁུལ་འཕེལ་རྒྱས་སུ་གཏོང་བའི་འཆར་འགོད་བཟོ་བ།    སྲིད་ཁེ་མཉམ་ལས་ཀྱི་བྱ་བའི་ལམ་སྲོལ་འཛུགས་པ།    སྲིད་ཇུས་ཀྱི་ཁྲིད་སྟོན་ལ་ཤུགས་སྣོན་པ་དང་།གསར་གཏོད་འདེགས་སྐྱོར་དང་རྒྱུ་རྐྱེན་གཙོ་བོར་འགན་སྲུང་བཅས་བྱས་ཏེ། གླིང་ཁུལ་གྱི་ཆུ་ཚད་མཐོ་བའི་འཛུགས་སྐྲུན་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།     གཙོ་གནད་འབུར་ཐོན་དང་དཔེ་སྟོན་སྣེ་ཁྲིད་བྱ་རྒྱུ་རྒྱུན་འཁྱོངས་བྱས་ཏེ། གླིང་ཁུལ་བཅོས་སྒྱུར་འཕེལ་རྒྱས་ཀྱི་ཉམས་མྱོང་དང་བྱེད་ཐབས་དུས་ཐོག་ཏུ་སྤྱི་བསྡོམས་དང་གདམ་གསེས་བྱས་ཏེ། འདྲ་བཟོ་དང་ཁྱབ་གདལ་གཏོང་ཆོག་པའི་ཉམས་མྱོང་བཟང་པོ་ཁག་ཅིག་མགྱོགས་མྱུར་སྒོས་ཆགས་པར་བྱས་ནས། མཚོ་སྔོན་གྱི་ཁྱད་ཆོས་ལྡན་པའི་ལྗང་མདོག་རྩིས་གློག་མཐུན་སྦྱོར་འཕེལ་རྒྱས་ཀྱི་བགྲོད་ལམ་སྟེང་བསྐྱོད་དགོས།

ཝང་ཝེ་ཏུང་དང་ལིའུ་ཁྲའོ་འབྲེལ་ཡོད་བྱེད་སྒོར་ཞུགས།