ཞི་ཅིན་ཕིང་གིས་ཅི་པོའུ་ཐིའི་ཙུང་ཐུང་ཀའེ་ལའེ་དང་ཐུག་འཕྲད་གནང་བ།
ཟླ9པའི་ཚེས2ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིན་མི་དམངས་ཚོགས་ཁང་ཆེན་མོ་རུ་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིན་རྩེ་གྲ་ཚོགས་འདུར་ཞུགས་པའི་ཅི་པོའུ་ཐིའི་ཙུང་ཐུང་ཀའེ་ལའེ་དང་ཐུག་འཕྲད་གནང་། རྒྱལ་ཁབ་གཉིས་པོའི་གཙོ་བདག་གིས་ཀྲུང་གོ་དང་ཅི་པོའུ་ཐིའི་འབྲེལ་བ་དེ་ཁྱོན་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་མཐོ་རུ་གཏོང་རྒྱུ་ཞེས་ཁྱབ་བསྒྲགས་མཛད།
འདི་ནི་ཟླ9པའི་ཚེས2ཉིན་གྱི་སྔ་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་པེ་ཅིན་མི་དམངས་ཚོགས་ཁང་ཆེན་མོ་རུ་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིན་རྩེ་གྲ་ཚོགས་འདུར་ཞུགས་པའི་ཅི་པོའུ་ཐིའི་ཙུང་ཐུང་ཀའེ་ལའེ་དང་ཐུག་འཕྲད་གནང་བའི་ཚུལ་རེད།
ཞི་ཅིན་ཕིང་གིས་བསྟན་དོན། ཙུང་ཐུང་ཀའེ་ལའེ་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་བཙུགས་ཚུན་གྱི་རྩེ་གྲ་ཚོགས་འདུ་ཚང་མར་ཞུགས་པས། གླེང་སྟེགས་ཇེ་རྒྱས་ཇེ་ལེགས་སུ་ཕྱིན་པའི་བདེན་དཔང་མཁན་དང་སྐུལ་འདེད་མཁན་ཡིན་ལ། ང་རང་གིས་དེར་ཚད་མཐོའི་བསྔགས་བརྗོད་བྱ་རྒྱུ་དང་། ཁྱེད་དང་མཉམ་ལས་དམ་ཟབ་བྱས་ནས་ཐེངས་འདིའི་རྩེ་གྲ་ཚོགས་འདུ་བདེ་བླག་ངང་འཚོགས་པར་སྐུལ་འདེད་གཏོང་འདོད་ཡོད།
ཞི་ཅིན་ཕིང་གིས་ནན་གྱིས་བསྟན་དོན། ད་ལོ་ནི་ཀྲུང་གོ་དང་ཅི་པོའུ་ཐི་བར་འབྲེལ་བ་བཙུགས་ནས་ལོ་ངོ45འཁོར་བའི་ལོ་ཡིན། ལོ་ངོ45ཡི་རིང་ལ། ཀྲུང་གོ་དང་ཅི་པོའུ་ཐི་རྒྱལ་ཁབ་གཉིས་པོས་ལྷག་བསམ་གཅིག་མཐུན་དང་སྐྱིད་སྡུག་མཉམ་མྱོང་།དཔལ་འབྱོར་མཉམ་ལས་དང་ཕན་ཚུན་ཕན་རེས།མི་དམངས་འགྲོ་འོང་དང་ཕན་ཚུན་རྒྱུས་ལོན། ཕན་ཚུན་བརྩེ་བ་བཅངས་པ་བཅས་བྱས་པས། ལྷོ་ལྷོ་མཉམ་ལས་ཀྱི་དཔེ་མཚོན་ཞིག་ཡིན་ཞེས་བརྗོད་ཆོག ཀྲུང་གོ་ཕྱོགས་ཀྱིས་ཅི་པོའུ་ཐི་ཕྱོགས་དང་མཉམ་དུ་ཕན་ཚུན་རྒྱབ་སྐྱོར་བྱེད་པའི་སྲོལ་རྒྱུན་བཟང་པོ་རྒྱུན་འཛིན་དང་།ཕན་ཚུན་སློབ་སྦྱོང་དང་ཕན་ཚུན་དཔྱད་གཞིར་འཛིན་པའི་ཉམས་མྱོང་རྩ་ཆེན་འདོན་སྤེལ།མཉམ་ལས་གཉིས་ཕན་གྱི་ཁེ་ཕན་འབྲེལ་ཐག་དམ་དུ་གཏོང་བ།ཞི་བདེ་མཉམ་གནས་ཀྱི་ཐུན་མོང་གི་ངོས་འཛིན་གལ་ཆེན་གཅིག་ཏུ་སྒྲིལ་བ།རྒྱལ་ཁབ་གཉིས་པོའི་འབྲེལ་བར་གྲུབ་འབྲས་གསར་པ་སྔར་བས་མང་པོ་ལེན་པར་སྐུལ་འདེད་གཏོང་བ་བཅས་བྱེད་འདོད་ཡོད། ཀྲུང་གོ་ཕྱོགས་ཀྱིས་ཅི་པོའུ་ཐི་ཕྱོགས་ཀྱིས་ཨེ་ཤ་ཡ་དང་ཅི་པོའུ་ཐིའི་ལྕགས་ལམ་དང་རྒྱལ་སྤྱིའི་རང་མོས་ཉོ་ཚོང་ཁུལ་སོགས་ཀྱི་རྣམ་གྲངས་གཉེར་སྐྱོང་ཡག་པོ་བྱ་རྒྱུར་རྒྱབ་སྐྱོར་བྱས་ནས། ས་ཁུལ་གྱི་ཚོང་དོན་ཟོག་འགྲེམས་ལྟེ་གནས་གཏོད་པ་དང་། ཨ་ཧྥེ་རི་ཁའི་ལུའུ་པན་བཟོ་ཁང་དང་པོ་མཉམ་དུ་གཉེར་སྐྱོང་ཡག་པོ་བྱས་ཏེ། ཅི་པོའུ་ཐིར་དཔལ་འབྱོར་འཛུགས་སྐྲུན་ཐད་མཁོ་བའི་བྱང་ཚད་མཐོ་བའི་ཤེས་ལྡན་མི་སྣ་སྔར་བས་མང་པོ་གསོ་སྐྱོང་བྱེད་རོགས་བྱ་རྒྱུ་ཡིན།ཀྲུང་གོ་ཕྱོགས་ཀྱིས་ཅི་པོའུ་ཐི་ཕྱོགས་ཀྱིས་སྲིད་གཞུང་དབར་གྱི་འཕེལ་རྒྱས་རྩ་འཛུགས་ཀྱི་རེས་འཁོར་ཀྲུའུ་ཞིའི་རྒྱལ་ཁབ་ཀྱི་འགན་འཁྲི་ལག་ཏུ་བསྟར་ནས། གླིང་ཆེན་ཨ་ཧྥེ་རི་ཁའི་ཟུར་དང་ཐ་ན་གླིང་ཆེན་ཨ་ཧྥེ་རི་ཁའི་ས་ཁུལ་གྱི་ཞི་བདེ་དང་འཕེལ་རྒྱས་ཀྱི་ཆེད་དུ་བྱས་རྗེས་གསར་པ་འཇོག་པར་རྒྱབ་སྐྱོར་བྱ་རྒྱུ་ཡིན།
ཀའེ་ལའེ་ཡིས་བསྟན་དོན། རང་ཉིད་ཀྲུང་གོར་འཚམས་འདྲིར་ཕེབས་ཐེངས་རེར་རང་ཡུལ་དུ་ལོག་པ་ལྟ་བུའི་ཚོར་སྣང་ཟབ་མོ་སྐྱེས་ཡོང་ཞིང་། ཀྲུང་གོ་ཕྱོགས་ཀྱིས་སྤྲོ་སེམས་འཁོལ་བའི་ངང་བཀོད་སྒྲིག་བྱས་པར་ཐུགས་རྗེ་ཆེ་ཞུ། ཅི་པོའུ་ཐི་དང་ཀྲུང་གོའི་བར་འབྲེལ་བ་བཙུགས་ནས་ལོ་ངོ45ཕྱིན་པ་དང་། དེ་ནི་ཀྲུང་གོ་འཕེལ་རྒྱས་མགྱོགས་པོ་ཕྱིན་པ་དང་ཅི་པོའུ་ཐི་དང་ཀྲུང་གོའི་འབྲེལ་བ་འཕེལ་རྒྱས་མགྱོགས་པོ་ཕྱིན་པའི་ལོ་ངོ45ཡིན། ཀྲུང་གོ་ཕྱོགས་ཀྱིས་ཅི་པོའུ་ཐིའི་དཔལ་འབྱོར་འཕེལ་རྒྱས་དང་དམངས་འཚོ་ཇེ་ལེགས་སུ་གཏོང་བར་རོགས་རམ་མི་དམན་པ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཅི་པོའུ་ཐི་ཕྱོགས་ཀྱིས་ཅི་པོའུ་ཐི་དང་ཀྲུང་གོའི་འབྲེལ་བར་གསོན་ཤུགས་ཀྱིས་བརྟས་པར་བློ་ཡིད་ཚིམ་པོ་བྱེད་ཀྱི་ཡོད་ཅིང་། ཀྲུང་གོ་ཕྱོགས་དང་མཉམ་དུ་ཨེ་ཤ་ཡ་དང་ཅི་པོའུ་ཐིའི་ལྕགས་ལམ་སོགས་རྣམ་གྲངས་གལ་ཆེན་ལ་མུ་མཐུད་དུ་སྐུལ་འདེད་བཏང་ནས། ཁྱབ་ཁོངས་སོ་སོ་ནས་དངོས་སྒྲུབ་མཉམ་ལས་སྔར་བས་གཏིང་ཟབ་ཏུ་གཏོང་རྒྱུ་ཡིན། མིག་སྔའི་རྒྱལ་སྤྱིའི་ས་ཁུལ་གྱི་གནས་བབ་འོག ཅི་པོའུ་ཐི་ཕྱོགས་ཀྱིས་ཀྲུང་གོ་ཕྱོགས་དང་འབྲེལ་གཏུག་མཉམ་ལས་ལ་ཤུགས་བསྣན་ནས། ས་ཁུལ་གྱི་བདེ་འཇགས་དང་འཕེལ་རྒྱས་ལ་སྐུལ་འདེད་གཏོང་ཆེད་ཐུན་མོང་ཐོག་འབད་བརྩོན་བྱ་རྒྱུའི་རེ་སྒུག་བྱེད་ཀྱི་ཡོད། ཐེངས་འདིའི་ཀྲུང་གོ་དང་ཨ་ཧྥེ་རི་ཁའི་མཉམ་ལས་གླེང་སྟེགས་ཀྱི་པེ་ཅིན་རྩེ་གྲ་ཚོགས་འདུ་བདེ་བླག་ངང་འཚོགས་ཏེ། ཨ་ཧྥེ་རི་ཁའི་རྒྱལ་ཁབ་ཀྱི་འཕེལ་རྒྱས་ལ་སྔར་བས་རོགས་འདེགས་ཐུབ་པར་ཡིད་ཆེས་ཡོད།
རྩེ་གྲ་ཚོགས་འདུའི་སྐབས་སུ། ཀྲུང་གོ་དང་ཅི་པོའུ་ཐི་ཕྱོགས་གཉིས་པོས་དཔལ་འབྱོར་ཉོ་ཚོང་དང་འཕེལ་རྒྱས།མཁའ་འགྲུལ་འཇིག་རྟེན་འཕུར་སྐྱོད་སོགས་ཁྱབ་ཁོངས་ཀྱི་མཉམ་ལས་ཡིག་ཆར་མིང་རྟགས་བཀོད།
ཝང་དབྱི་ཐུག་འཕྲད་ནང་ཞུགས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注