ཆུ་བེད་སྡེ་ཚན་གྱིས་བྱེད་ཐབས་ཁག་དྲུག་ལ་ཤུགས་བསྣན་ནས་འབྲུབ་འགོག་གི་འགག་རྩའི་དུས་ཀྱི་ཆུ་ལོག་ལ་ཁ་གཏད་པ།
ཚེས5ཉིན་གསར་འགོད་པས་ཆུ་བེད་པུའུ་ནས་ཤེས་རྟོགས་བྱུང་བར་གཞིགས་ན། ཆུ་བེད་པུའུ་ཡིས་ཉིན་དེར་འབྲུབ་འགོག་གཟའ་འཁོར་གྱི་གྲོས་མོལ་ཚོགས་འདུ་འཚོགས་ནས། ཉེ་དུས་འབབ་རྒྱུད་ཆེ་གྲས་ཁག་གི་ཆུ་ལོག་འགོག་སྲུང་ལས་དོན་བཀོད་སྒྲིག་བྱས་ཏེ། བྱ་ཐབས་ཁག་དྲུག་ལ་ཤུགས་སྣོན་བརྒྱབ་ནས་འབྲུབ་འགོག་གི་འགག་རྩའི་དུས་སྐབས་ཀྱི་ཆུ་ལོག་ལ་ཁ་གཏད་པ་རེད།
རྒྱལ་ཁབ་འགོག་སྲུང་སྤྱི་ཁྱབ་བཀོད་འདོམས་པ་གཞོན་པའམ་ཆུ་བེད་པུའི་པུའུ་ཀྲང་ལི་གོ་དབྱིང་གིས་བསྟན་དོན། མིག་སྔར་འབྲུབ་འགོག་གི་འགག་རྩའི་དུས་སུ་གནས་ཡོད་པ་དང་། སྔོན་བརྡ་བཏང་བར་གཞིགས་ན། མ་འོངས་པའི་གཟའ་འཁོར་གཅིག་ནང་ལྷོ་ནུབ་ས་ཁུལ་ཁ་ཤས་དང་། ས་སེར་ས་མཐོའི་ས་ཁུལ། བྱང་ཤར་ས་ཁུལ་གྱི་སུང་ཧྭ་གཙང་པོ་དང་། ལེའོ་ཧོ་གཙང་བོ། ཝུའུ་སུའུ་ལི་གཙང་པོ་བཅས་ཀྱི་འབབ་རྒྱུད་དུ་ཆར་པ་དྲག་པོ་འབབ་རྒྱུ་རེད། དེའི་ཤུགས་རྐྱེན་ཐེབས་པའི་དབང་གིས་ལྷོ་ནུབ་ས་ཁུལ་དུ་ཆུ་ལོག་དང་འདམ་རྡོའི་ཆུ་རུད། ཆུ་རགས་འགག་པའི་མཚེའུ་ཐོན་པའི་ཉེན་ཁ་ཅུང་ཆེ་བ་དང་། ས་སེར་ས་མཐོའི་ས་ཁུལ་གྱི་ས་ཁུལ་ཁ་ཤས་སུ་ཆུ་ལོག་གི་གནོད་འཚེའི་ཉེན་ཁ་ཆེ་ལ། ཆུ་རགས་ཀྱི་འབྲུབ་དུས་གནོན་ཤུགས་ཆེ་ཞིང་། བྱང་ཤར་ས་ཁུལ་དུ་དུས་ཡུན་རིང་པོར་ཆུ་གནས་ཇེ་མཐོར་འགྲོ་ཚད་ཀྱི་ཉེན་ཁ་ཆེ་རུ་འགྲོ་སྲིད་པས། འབྲུབ་འགོག་གི་དུས་བབ་སྔར་བཞིན་ཛ་དྲག་དང་རྙོག་འཛིང་ཆེ་བ་ཡིན།
དེའི་ཐད་ཆུ་བེད་སྡེ་ཚན་གྱིས་གཙོ་གནད་འབུར་ཐོན་དུ་བཏང་ནས་དམིགས་སའི་རང་བཞིན་ལྡན་པའི་སྒོ་ནས། བྱ་ཐབས་ཁག་དྲུག་དམ་འཛིན་ཡག་པོ་བྱས་ཏེ་འབྲུབ་འགོག་གི་འགག་རྩའི་དུས་སྐབས་ཀྱི་ཆུ་ལོག་ལ་ཁ་གཏད་ཧུར་ཐག་འཇལ་དགོས་པར་བསྟན།
གཅིག་ནི་ཆུ་ལོག་གི་གནོད་འཚེ་འགོག་སྲུང་དམ་འཛིན་ནན་པོ་བྱེད་པ་དང་། ཆུ་ལོག་གི་གནོད་འཚེ་འགོག་སྲུང་མ་ལག་གི་ནུས་པ་འདོན་སྤེལ་གང་ལེགས་བྱེད་པ། སྔོན་བརྡ་གཏོང་བ་དང་སྔོན་ཚུད་ཉེན་བརྡ་ཡག་པོར་གཏོང་བ། གནོད་འཚེ་འབྱུང་སྐབས་སྔོན་ཚུད་ཉེན་བརྡ་གཏོང་བའི་“ཁ་གཏད་”ལམ་སྲོལ་དང“སུས་སྒྲིག་འཛུགས་དང་། སུ་སྤོ་སྒྱུར། ག་དུས་སྤོ་སྒྱུར། གང་དུ་སྤོ་སྒྱུར། རང་འདོད་ཀྱིས་ཕྱིར་ལོག་མི་བྱེད་པ”བཅས་འགག་རྩའི་ལྷུ་ཚིགས་ལྔའི་འགན་འཁྲི་དང་བྱེད་ཐབས་དོན་འཁྱོལ་ནན་པོ་བྱས་ནས་མི་སྣ་ཤི་རྨས་མི་ཡོང་བའི་འགན་ལེན་བྱེད་དགོས།
གཉིས་ནི་ས་སེར་ས་མཐོའི་ཆུ་རགས་འགོག་སྲུང་ལས་དོན་ཡག་པོ་བསྒྲུབས་ནས། སྨད་རྒྱུད་ཀྱི་གྲོང་ཚོ་དང་མི་སྣ་ཡོད་པའི་ཆུ་རགས་ལ་གཙོ་གནད་དུ་དོ་ཁུར་བྱས་ཏེ། མི་སྣ་སྤོ་སྒྱུར་དང་ཉེན་ཁའི་གནས་ཚུལ་ཐག་གཅོད་བྱེད་ཐབས་དོན་འཁྱོལ་ནན་པོ་བྱེད་དགོས།
གསུམ་ནི་རྒྱུད་རིམ་ལྡན་པ་དང་ཚན་རིག་དང་མཐུན་པ། བདེ་འཇགས། གནད་སྨིན་བཅས་ཀྱི་སྒོ་ནས་འབབ་རྒྱུད་ཀྱི་ཆུ་ལོག་འགོག་པའི་ལས་གྲྭའི་མ་ལག་བཀོད་གཏོང་བྱས་ཏེ། ལིའོ་ཧོ་གཙང་པོའི་འབབ་རྒྱུད་དུ་རི་བོ་ཨེར་ལུང་དང་། ཆིང་ཧོ། ཏ་ཧོ་ཧྥང་སོགས་རྐང་འཛིན་ཆུ་མཛོད་ཀྱི་ཆུ་ལོག་འགོག་པའི་ནུས་པ་འདོན་སྤེལ་གང་ལེགས་བྱེད་པ་དང་། སུང་ཧྭ་གཙང་པོའི་འབབ་རྒྱུད་དུ་རི་བོ་པའེ་ཧྲན་དང་། ཧྥེང་མན། ཉི་ཨེར་ཅི། ཁྲ་སིན་སོགས་ཆུ་གཞུང་དང་ཆུ་ལག་ཚོད་འཛིན་རང་བཞིན་གྱི་ཆུ་མཛོད་ཀྱི་ཆུ་ལོག་འགོག་པའི་ནུས་པ་འདོན་སྤེལ་ཞིབ་ཚགས་བྱས་ནས། ནུས་ཤུགས་ཡོད་རྒུས་ཆུ་ལོག་འགོག་པའི་བརྒྱུད་རིམ་ལ་བཀོད་གཏོང་བྱེད་དགོས།
བཞི་ནི་ཆུ་མཛོད་ཀྱིས་བདེ་འཇགས་ངང་འབྲུབ་དུས་ཀྱི་ཉེན་ཁ་གཡོལ་བར་ཁྱོན་ཡོངས་ནས་ཞིབ་བཤེར་བྱས་ཏེ། དུས་སྐབས་སྔོན་མར་ཆུ་ལོག་བཀག་འགོག་བེད་སྤྱོད་བྱས་རྗེས་སྔར་བཞིན་ཆུ་གནས་མཐོ་བའི་ཆུ་མཛོད་དང་། ཉེ་དུས་ཉེན་ཁ་ཐོན་པའི་ཆུ་མཛོད། ཆར་ཆུ་འབབ་ཁུལ་གྱི་ཉེན་ཁ་ཆེ་བའི་ཆུ་མཛོད་བཅས་ལ་གཙོ་གནད་ཐོག་དོ་ཁུར་བྱས་ཏེ། ཆུ་མཛོད་རེ་རེས་བདེ་འཇགས་ངང་འབྲུབ་དུས་ཀྱི་བྱེད་ཐབས་དོན་འཁྱོལ་བྱེད་དགོས།
ལྔ་ནི་ཆུ་རགས་སྐོར་ཞིབ་འགོག་སྲུང་བྱེད་ཤུགས་ཆེ་རུ་བཏང་སྟེ། ལིའོ་ཧོ་གཙང་པོ་དང་ཧུའེ་ཧོ། ཐའེ་ཙི་ཧོ་བཅས་ཀྱི་རགས་བརྒལ་བཟོ་སྐྲུན་དངོས་པོ་དང་བྱེ་མ། རགས་ཀྱི་མཐོ་ཚད། ཉེན་ཆེའི་བཟོ་མཚམས་དང་འབྲུབ་འགོག་གི་ཚད་མཐོ་ཤོས་བཅས་དང་། སུང་ཧྭ་གཙང་པོའི་ཅི་ལིན་མཚམས་ཀྱི་ཆུ་རགས་ཆེ་གྲས་ལྔ་དང་དེ་བཞིན་དེའི་ཆུ་ལག་དབྱིན་མ་གཙང་པོ། སུང་ཧྭ་གཙང་པོའི་ཆུ་ལག་མཱ་དབྱི་གཙང་པོ། ཝུའུ་སུའུ་ལི་གཙང་པོ་སོགས་དུས་ཡུན་རིང་པོར་ཉེན་རྟོག་དང་འགན་སྲུང་ལས་བརྒལ་བའི་ཆུ་རགས་ལ་གཙོ་གནད་དུ་དོ་ཁུར་བྱེད་དགོས། མི་སྣ་དང་དངོས་ཟོག སྒྲིག་ཆས་ཇེ་མང་དུ་བཏང་ནས་སྐོར་ཞིབ་འགོག་སྲུང་ལེགས་པོར་སྒྲུབ་དགོས། འབྲི་ཆུའི་ཆུ་ལོག་གི་བརྒྱུད་རིམ་གྱིས་ཆུ་རགས་ལ་ཐེབས་པའི་ཤུགས་རྐྱེན་གྱི་རྗེས་ལུས་རང་བཞིན་ལ་བསམ་གཞིགས་གང་ལེགས་བྱས་ཏེ། འབྲི་ཆུའི་ཆུ་རགས་དང་། ཏུང་ཐིང་མཚེའུ། པོ་དབྱང་མཚེའུ་བཅས་ཀྱི་ཆུ་རགས་ལ་མུ་མཐུད་ནས་དོ་སྣང་བྱས་ཏེ། ཉེན་ཁའི་གནས་ཚུལ་སྔ་མོ་ནས་སྔོན་དཔག་དང་། སྔ་མོ་ནས་ཤེས་རྟོགས། སྔ་མོ་ནས་ཐག་གཅོད། སྔ་མོ་ནས་མེད་པར་བཟོ་བ་བཅས་བྱེད་དགོས།
དྲུག་ནི་ཆུ་བེད་པུའུ་ཡི་ཆུ་ཐན་གནོད་འཚེ་ཚབས་ཆེན་བཀོད་གཏོང་བཀོད་འདོམས་ལམ་སྲོལ་ཁྱོན་ཡོངས་ནས་དོན་འཁྱོལ་བྱས་ཏེ། ཆུ་ཐན་གནོད་འཚེ་འགོག་སྲུང་ལས་དོན་མ་ལག་མགྱོགས་མྱུར་ངང་འཛུགས་པ་དང་འགོག་སྲུང་ནུས་པ་ཆེ་རུ་གཏོང་དགོས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注