དོན་འདི་གྲོང་ཁྱེར་དུ་གཞིས་ཆགས་པ་དང་འབྲེལ་བ་ཡོད། 

ཟླ8པའི་ཚེས2ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གི་སྲིད་ཇུས་རྒྱུན་ལྡན་བརྡ་གཏོང་ཚོགས་འདུ་འཚོགས་པའི་ཐོག སྤྱི་བདེ་པུའུ་ཡི་འབྲེལ་ཡོད་འགན་འཁུར་བས་ཐེམ་ཐོའི་ལམ་ལུགས་སྒྱུར་བཅོས་སྔར་བས་གཏིང་ཟབ་ཏུ་བྱས་ནས། ཞིང་པ་གནས་སྤོས་མི་འབོར་གྲོང་ཁྱེར་དུ་གཞིས་ཆགས་སྔར་བས་བདེ་བླག་དང་སྔར་བས་སྟབས་བདེ་ཡོང་བ་བྱ་རྒྱུ་ཡིན་ཞེས་ངོ་སྤྲོད་བྱས་པ་རེད།

《མི་གཞི་རྩར་འཛིན་པའི་གྲོང་ཁྱེར་དང་གྲོང་རྡལ་ཅན་གྱི་འཐབ་ཇུས་གསར་པ་ལག་བསྟར་གཏིང་ཟབ་བྱེད་པའི་ལོ་ལྔའི་བྱ་སྤྱོད་འཆར་གཞིའི་》ནང་། སླད་ཕྱིན་ལོ་ལྔའི་རིང་ཐེམ་ཐོའི་ལམ་ལུགས་སྒྱུར་བཅོས་ཟབ་ཏུ་གཏོང་རྒྱུའི་བཀོད་སྒྲིག་ཁ་གསལ་བྱས་ནས། གྲོང་ཁུལ་དུ་རྒྱུན་སྡོད་མི་འབོར་ཁྲི300མན་གྱི་གྲོང་ཁྱེར་དུ་གཞིས་ཆགས་ཚོད་འཛིན་མེད་པར་བཟོ་རྒྱུའི་བླང་བྱ་ཕྱོགས་ཡོངས་ནས་དོན་འཁྱོལ་བྱ་རྒྱུ་དང་། གྲོང་ཁུལ་དུ་རྒྱུན་སྡོད་མི་འབོར་ཁྲི300ནས་ཁྲི500བར་གྱི་གྲོང་ཁྱེར་དུ་གཞིས་ཆགས་པའི་ཆ་རྐྱེན་ཕྱོགས་ཡོངས་ནས་ལྷུག་ཏུ་གཏོང་རྒྱུ། གྲོང་ཁུལ་དུ་རྒྱུན་སྡོད་མི་འབོར་ཁྲི500ཡན་གྱི་གྲོང་ཁྱེར་ཆེ་ཤོས་སུ་སྐར་བསགས་གཞིས་ཆགས་ཀྱི་སྲིད་ཇུས་འཐུས་ཚང་དུ་གཏོང་རྒྱུ་བཅས་བཏོན་ཡོད།

སྤྱི་བདེ་པུའུ་ཡི་བདེ་འཇགས་དོ་དམ་ཅུས་ཀྱི་ཅུས་ཀྲང་ཁྲའོ་པའོ་ལི་ཡིས། བྱེ་བྲག་ཏུ་བཤད་ན།

གྲོང་ཁུལ་དུ་རྒྱུན་སྡོད་མི་འབོར་ཁྲི300མན་གྱི་གྲོང་ཁྱེར་ལ་ལས་ཞུགས་སམ་ཡང་ན་སྡོད་གནས་ཀྱི་ལོ་ཚད་རྩ་དོན་ཐོག་ལོ་ཕྱེད་ཡིན་པ་དང་། དུས་མཚུངས་སུ་ཁང་པ་ཉོ་བ་དང་དངུལ་འཇོག་ཁྲལ་འཇལ་སོགས་ཚད་བརྒལ་ཚོད་འཛིན་ཆ་རྐྱེན་ཟུར་སྣོན་བྱས་མི་ཆོག

གྲོང་ཁུལ་དུ་རྒྱུན་སྡོད་མི་འབོར་ཁྲི300ནས་ཁྲི500བར་ཡོད་པའི་གྲོང་ཁྱེར་ལ་ཆ་མཚོན་ན། ཉེ་ལམ་ལས་ཞུགས་སམ་ཡང་ན་སྡོད་གནས་ཀྱི་ལོ་ཚད་བླང་བྱ་ཅུང་མཐོ་བས། ལོ་ཚད་ཀྱི་ཚད་གཞི་སྔར་བས་དམའ་རུ་གཏོང་དགོས།

གྲོང་ཁུལ་དུ་རྒྱུན་སྡོད་མི་འབོར་ཁྲི500ཡན་གྱི་གྲོང་ཁྱེར་ཆེ་ཤོས་ལ་སྐར་བསགས་གཞིས་ཆགས་སྲིད་ཇུས་སྔར་བས་ལེགས་སྒྲིག་དང་འཐུས་ཚང་དུ་གཏོང་དགོས་པ་དང་། ཆ་རྐྱེན་འཛོམས་པའི་གྲོང་ཁྱེར་གྱིས་སྐར་བསགས་གཞིས་ཆགས་ལོ་འཁོར་གྱི་མི་གྲངས་ཚད་བཀག་མེད་པར་བཟོ་རྒྱུའི་འཚོལ་ཞིབ་བྱེད་དགོས།

ཡོངས་བསྒྲགས་ཚོགས་འདུའི་ཐོག་གི་གཞི་གྲངས་ལས་མངོན་པར། 2021ལོ་ནས2023ལོའི་བར། ཞིང་ལས་སྤོ་སྒྱུར་མི་འབོར་ཁྲི4000ལྷག་ཙམ་གྲོང་ཁྱེར་དང་གྲོང་རྡལ་དུ་གཞིས་ཆགས་ཡོད་པ་རེད། དེའི་རྗེས་སུ་སྤྱི་བདེ་པུས་འབྲེལ་ཡོད་སྡེ་ཁག་དང་མཉམ་དུ་མུ་མཐུད་ཤུགས་སྣོན་རྒྱག་པ་དང་། སྐུལ་འདེད་ཟབ་མོར་བཏང་ནས་ས་གནས་ཁག་གིས་ཐེམ་ཐོ་གནས་སྤོ་སྲིད་ཇུས་རྒྱུན་ཆད་མེད་པར་ལེགས་སྒྲིག་དང་འཐུས་ཚང་དུ་ཡོང་བར་བྱ་རྒྱུའི་སྐུལ་འདེད་གཏོང་རྒྱུ་ཡིན་པ་རེད།