ལཱ་ཧྥུའུ་ལོ་ཧྥུའུ་ཡིས་ཨུ་རུ་སི་དང་ཨ་མེ་རི་ཁས་སྐོར་ཐེངས་གསར་བའི་གྲོས་མོལ་ལ་གྲ་སྒྲིག་བྱེད་པའི་ཚུལ་བསྟན།

ཨུ་རུ་སིའི་ཕྱི་འབྲེལ་བློན་ཆེན་ལཱ་ཧྥུའུ་ལོ་ཧྥུའུ་ཡིས་ཟླ4བའི་ཚེས1ཉིན་བཤད་རྒྱུར། ཨུ་རུ་སི་དང་ཨ་མེ་རི་ཁས་སྐོར་ཐེངས་གསར་བའི་གྲོས་མོལ་ལ་གྲ་སྒྲིག་བྱེད་བཞིན་ཡོད་ལ། ཕྱོགས་གཉིས་ཀྱི་འབྲེལ་བའི་ཁྲོད་ཀྱི་འགལ་རྩོད་མེད་པར་བཏང་ནས་རྒྱུན་ལྡན་ཅན་གྱི་འབྲེལ་འདྲིས་མངོན་འགྱུར་བྱེད་རྒྱུ་ཡིན་ཟེར།

ཨུ་རུ་སིའི་སྨྱན་བྱད་ཀྱིས་བསྒྲགས་པ་ལྟར་ན། ལཱ་ཧྥུའུ་ལོ་ཧྥུའུ་ཡིས་ཉིན་དེར་སྨྱན་བྱད་ལ་བསྟན་དོན། རྒྱལ་ཁབ་གཉིས་ཀྱི་མགོ་ཁྲིད་པ་འཐད་པ་བྱུང་བ་བརྒྱུད། ཨུ་རུ་སི་དང་ཨ་མེ་རི་ཁ་ཕྱོགས་གཉིས་ཀྱིས་རྒྱལ་ཁབ་གཉིས་ཀྱི་གཞུང་ཚབ་བྱ་བར་གནོད་སྐྱེལ་བའི་འགལ་རྩོད་མེད་པར་གཏོང་བའི་ཐད་བྱ་བ་བསྒྲུབ་བཞིན་ཡོད་ཟེར།

ལཱ་ཧྥུའུ་ལོ་ཧྥུའུ་ཡིས་བསྟན་དོན། ཨུ་རུ་སི་དང་ཨ་མེ་རི་ཁས་ཟླ2པར་ཐུར་ཁེའི་དབྱི་སི་ཐན་པོར་ནས་སྐོར་ཐེངས་དང་པོའི་གྲོས་མོལ་སྤེལ་རྗེས། མིག་སྔར་ཕྱོགས་གཉིས་ཀྱིས་སྐོར་ཐེངས་གཉིས་པའི་གྲོས་མོལ་ལ་གྲ་སྒྲིག་བྱེད་བཞིན་ཡོད་པ་དང་། ཁ་པར་དང་བརྙན་རིས་བརྒྱུད་དེ་འབྲེལ་འདྲིས་བྱེད་བཞིན་ཡོད་ལ། མིག་སྔར་གྲུབ་འབྲས་ངེས་ཅན་བྱུང་ཡོད་ཟེར།

ཨུ་རུ་སི་དང་ཨ་མེ་རི་ཁའི་འཐུས་ཚབ་ཚོགས་པས་ཟླ2པའི་ཚེས27ཉིན་དབྱི་སི་ཐན་པོར་ནས་ཕྱོགས་གཉིས་ཀྱི་འབྲེལ་བའི་ཐད་ནས་སྐོར་ཐེངས་དང་པོའི་གྲོས་མོལ་སྤེལ། རྒྱུས་ལོན་བྱུང་བ་ལྟར་ན། ཕྱོགས་གཉིས་ཀྱིས་གྲོས་མོལ་བྱེད་སྐབས་གཞུང་ཚབ་ཁང་གི་འཁོར་སྐྱོད་གནད་དོན་ལ་གྲོས་བསྡུར་བྱས་པ་དང་། མི་སྣའི་བཀོད་སྒྲིག་དང་ལམ་ཡིག་སོགས་ལ་འབྲེལ་ཡོད།