ཐཱ་ཅི་ཁི་སི་ཐན་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་ཀྱི་ཙུང་ཐུང་གིས་རྒྱལ་ཁབ་གསུམ་གྱི་རྒྱལ་མཚམས་ཆིངས་ཡིག་བཀོད།

ཐཱ་ཅི་ཁི་སི་ཐན་དང་ཅིར་ཅི་སི་སི་ཐན། ཝུའུ་ཙི་པེ་ཁི་སི་ཐན་བཅས་རྒྱལ་ཁབ་གསུམ་གྱི་ཙུང་ཐུང་གིས་ཟླ3པའི་ཚེས31ཉིན་ཐཱ་ཅི་ཁི་སི་ཐན་གྱི་གྲོང་ཁྱེར་ཆེན་པོ་གཉིས་པ་ཁུའུ་ཀྲན་ནས་རྒྱལ་ཁབ་གསུམ་གྱི་རྒྱལ་མཚམས་ཆིངས་ཡིག་བཀོད།

ཐཱ་ཅི་སི་ཁི་ཐན་གྱི་ཙུང་ཐུང་དྲ་ཚིགས་ཀྱིས་སྤེལ་བའི་གསལ་སྒྲོག་ལྟར་ན། ཐཱ་ཅི་ཁི་སི་ཐན་གྱི་ཙུང་ཐུང་ལཱ་ཧི་མིན་དང་ཅིར་ཅི་སི་སི་ཐན་གྱི་ཙུང་ཐུང་ཀྲ་ཕཱ་ལོ་ཧྥུའུ། ཝུའུ་ཙི་པེ་ཁི་སི་ཐན་གྱི་ཙུང་ཐུང་མུས་ཨར་ཅི་ཡའོ་ཡེ་ཧྥུའུ་བཅས་ཀྱིས་ཉིན་དེར་ཕྱོགས་གསུམ་གྲོས་མོལ་སྤེལ། གསལ་སྒྲོག་ལས་བསྟན་དོན། རྒྱལ་ཁབ་གསུམ་དང་དེའི་མི་དམངས་བར་གྱི་དུས་ཡུན་རིང་བོའི་མཛའ་བཤེས་དང་ཁྱིམ་མཚེས་མཛའ་མཐུན། ཐུན་མོང་འཕེལ་རྒྱས་བཅས་ཀྱི་སྦྲེལ་ཐག་དམ་པོར་སྦྲེལ་ཡོད་ལ། ཐཱ་ཅི་ཁི་སི་ཐན་གྱིས་ཅིར་ཅི་སི་སི་ཐན་དང་ཝུའུ་ཙི་པེ་ཁི་སི་ཐན་བར་གྱི་འབྲེལ་བར་མཐོང་ཆེན་བྱེད་པ་དང་། འབྲེལ་བ་དེ་ཁྱིམ་མཚེས་མཛའ་མཐུན་དང་འདྲ་མཉམ་གཉིས་ཕན། ཕན་ཚུན་བརྩི་འཇོག ཕན་ཚུན་གྱི་ཁེ་ཕན་ལ་སེམས་ཁུར་བྱེད་པའི་རྩ་དོན་གྱི་རྨང་གཞིའི་སྟེང་བཙུགས་ཡོད། རྒྱལ་ཁབ་གསུམ་གྱི་འབྲེལ་བའི་ཕྱོགས་ཡོངས་འཕེལ་རྒྱས་ནི་ཐཱ་ཅི་ཁི་སི་ཐན་དང་ཅིར་ཅི་སི་སི་ཐན་གྱི་ཕྱི་འབྲེལ་སྲིད་ཇུས་ཀྱི་ཐོག་མའི་ཁ་ཕྱོགས་ཡིན་ཟེར།

ལཱ་ཧི་མིན་གྱིས་བཤད་རྒྱུར། ཕྱོགས་གསུམ་གྱིས་རྒྱལ་ཁབ་གསུམ་བར་གྱི་རྒྱལ་མཚམས་ཆིངས་ཡིག་བཀོད་པ་ནི་མཚོན་རྟགས་རང་བཞིན་ལྡན་པའི་དོན་ཞིག་ཡིན་ཟེར། ཁོས་བསྟན་དོན། ཐེངས་འདིའི་རྒྱལ་ཁབ་གསུམ་གྱི་མགོ་ཁྲིད་པའི་གྲོས་མོལ་གྲུབ་འབྲས་དེས་སྔར་ལས་ལྷག་པའི་སྒོ་ནས་ཁྱིམ་མཚེས་འབྲེལ་བར་ཤུགས་སྣོན་པ་དང་། ཕན་ཚུན་གྱི་རྒྱུས་ལོན་དང་བརྩི་འཇོག ཡིད་ཆེས་བཅས་ལ་སྐུལ་འདེད་བཏང་སྟེ། རྒྱལ་ཁབ་གསུམ་གྱི་མཉམ་ལས་ལ་རྒྱུན་ཆད་མེད་པར་ཤུགས་སྣོན་བྱེད་པར་ཕན་ཐོགས་འབྱུང་བར་ཡིད་ཆེས་ཡོད་ཟེར།

ཀྲ་ཕཱ་ལོ་ཧྥུའུ་ཡིས་བསྟན་དོན། ས་ཁུལ་གྱི་གཞི་གཅིག་ཅན་ལ་བསྟུད་མར་སྐུལ་འདེད་བཏང་སྟེ། ཁྱབ་ཁོངས་སོ་སོའི་མཉམ་ལས་ལ་ཤུགས་སྣོན་པ་དེ་ཨེ་ཤ་ཡཱ་དབུས་མའི་རྒྱུན་མཐུད་འཕེལ་རྒྱས་དང་དར་རྒྱས་མངོན་འགྱུར་བྱེད་པའི་གནད་འགག་གི་འགན་སྲུང་ཡིན་ཟེར།

ཝུའུ་ཙི་པེ་ཁི་སི་ཐན་གྱི་ཙུང་ཐུང་དྲ་ཚིགས་ཀྱིས་སྤེལ་བའི་གསལ་སྒྲོག་ལྟར་ན། རྒྱལ་ཁབ་གསུམ་གྱི་རྒྱལ་མཚམས་ཆིངས་ཡིག་བཀོད་པ་དེས་ས་ཁུལ་གྱི་གཏན་འཇགས་དང་རྒྱུན་མཐུད་འཕེལ་རྒྱས་ཀྱི་དམིགས་འབེན་མངོན་འགྱུར་བྱེད་པར་ཕན་ཐོགས་འབྱུང་སྲིད་ཟེར།